HAN Girra ha Kalibotan I han 1914, nakita han damu nga tawo an pagin neutral han mga Estudyante han Biblia. (Isa. 2:2-4; Juan 18:36; Efe. 6:12) Ano an nagin kahimtang han mga surugoon han Dios ha Britain?

Han 1916 iginpagawas han Britain an balaud nga Military Service Act nga nag-oobligar ha solo nga kalalakin-an nga 18 tubtob 40 anyos nga magsundalo. Pero naghatag ito hin konsiderasyon ha mga may makatadunganon nga hinungdan nga iginbasar ha “relihiyoso o moral nga mga gintotoohan.” An gobyerno nagporma hin komite nga magsisiguro kon hin-o an puydi tugotan nga diri magsundalo ngan kon ha ano nga mga kondisyon.

Ha sulod hin halipot nga panahon, mga 40 nga Estudyante han Biblia an ginpriso, ngan walo an iginpadara ha France basi makiggirra. Tungod hini nga pagin diri makatadunganon, an kabugtoan ha Britain nagsurat ha Primero Ministro nga hi Herbert Asquith ha pagprotesta han pagprisoha han kabugtoan, upod an petisyon nga may 5,500 nga pirma.

Katapos nagkaada sumat nga an walo nga ginpadara ha France ginsentensyahan nga mamatay pinaagi hin firing squad tungod han pagdumiri nga umapi ha girra. Pero han naglilinya na hira basi pusilon, an ira sentensya ginliwanan hin napulo ka tuig nga kapriso. Iginbalik hira ha England ngan didto ginpriso.

Samtang nagpapadayon an girra, igin-obligar na han balaud nga pati an inasaw-an nga kalalakin-an umapi ha girra. Ha usa nga kaso ha Manchester, England, an akusado amo hi Henry Hudson, usa nga doktor ngan Estudyante han Biblia. Han Agosto 3, 1916, nagdesisyon an korte nga waray niya buhata an igin-oobligar han balaud, ginpamulta hiya, ngan igintubyan ha militar. Ha pariho nga panahon, usa pa nga kaso an ginbista ha Edinburgh, Scotland. Hi James Frederick Scott, usa nga 25-anyos nga colporteur, napamatud-an nga waray sala. An gobyerno nag-apela han kaso kondi waray ito idayon tungod han lain nga kaso ha London. Hini nga panahon, hi brother Herbert Kipp ginsentensyahan nga salaan, ginpamulta, ngan igintubyan ha militar.

Han Septyembre 1916, inabot na hin 264 nga brother an nag-aplay nga diri magsundalo. Lima ha ira an gin-aprobahan, 154 an gintagan hin magkuri nga trabaho sugad han paghimo hin kalsada, pangukab, ngan iba pa, 23 an gintokahan hin buruhaton nga diri nag-uupod hin pakiggirra, 82 an igintubyan ha militar, ngan an iba ha ira ginbista ngan ginpriso tungod han diri pagsunod ha balaud. Damu an nagkondenar han mapintas nga pagtratar ha ira ha prisohan, salit iginbalhin hira han gobyerno tikang ha militar nga prisohan ngadto ha sibilyan nga mga kampo.

 Hira Edgar Clay ngan Pryce Hughes, nga ha urhi nag-alagad sugad nga paramangno han sanga nga opisina ha Britain, nagtrabaho ha usa nga dam ha Wales. Ha luyo nga bahin, hi Herbert Senior, usa han walo nga iginbalik tikang ha France, iginpadara ngadto ha Wakefield Prison ha Yorkshire. An iba nga ginsentensyahan hin magkuri nga trabaho iginkadto ha Dartmoor Prison diin makuri gud an mga kahimtang. Didto hira an pinakadaku nga grupo han mga nagdumiri ha pagserbisyo ha militar tungod han ira gintotoohan.

Hi Frank Platt, usa nga Estudyante han Biblia nga inuyon ha buruhaton nga diri nag-uupod hin pakiggirra, nakaeksperyensya hin maiha ngan mapintas nga pagtimaraot han waray hiya sumugot ha sugo nga makiggirra. Hi Atkinson Padgett nga nahibaro han kamatuoran waray pag-iha katapos niya magsundalo, nag-antos liwat han mapintas nga pagtratar han mga opisyal han militar tungod ha pagdumiri nga umapi ha girra.

Bisan kon hito nga panahon an aton kabugtoan diri pa bug-os nga nakakasabot kon ano an nahiuupod ha pagin neutral, nangalimbasog hira nga lipayon hi Jehova nga Dios. An kabugtoan nga gin-unabi dinhi an mga ngaran nagpakita hin maopay nga susbaranan ha pagin neutral durante hiton makuri gud nga “oras han pagsari.” (Pah. 3:10)—Tikang ha aton daan nga mga koleksyon ha Britain.