Kon namatay an usa nga aton hinigugma, natural la nga magtangis kita kay mamimingaw kita ha iya. Bisan kon hinigugma ni Jesus hi Lasaro, waray hiya magtangis tungod kay namatay hi Lasaro. Nagtangis hiya kay nalooy hiya ha mga namatyan, sugad han iginpapakita han konteksto han asoy ni Juan.—Juan 11:36.

Han siyahan nga hinbaroan ni Jesus nga may sakit hi Lasaro, waray dayon hiya kumadto ha balay ni Lasaro basi tambalon hiya. An asoy nasiring: “Han pakabati ni Jesus nga may sakit hi Lasaro, gintuyo niya nga magpabilin pa hin duha ka adlaw didto ha lugar nga iya ginkadtoan.” (Juan 11:6) Kay ano nga waray dayon kumadto hi Jesus? May katuyoan hiya ha pagbuhat hito. Hiya nagsiring: “Ito nga sakit diri magriresulta hin kamatayon kondi hin himaya han Dios, basi himayaon an Anak han Dios pinaagi hito.” (Juan 11:4) An kamatayon diri amo an kataposan nga resulta han sakit ni Lasaro. Karuyag ni Jesus gamiton an kamatayon ni Lasaro para ha “himaya han Dios.” Paonan-o? May bubuhaton hi Jesus nga urusahon nga milagro pinaagi ha pagbanhaw ha iya hinigugma nga sangkay.

Ha pakiistorya ni Jesus ha iya mga disipulo hini nga higayon, iya igintanding an kamatayon ha pagkaturog. Salit nagsiring hiya ha ira nga “makadto [hiya] basi pukawon [hi Lasaro].” (Juan 11:11) Para kan Jesus, an pagbanhaw kan Lasaro pariho hin pagpukaw han kag-anak ha iya anak nga nakaturog. Salit waray hinungdan nga masubo hiya tungod la kay namatay hi Lasaro.

Kon sugad, kay ano nga nagtangis hi Jesus? Ginbabaton na liwat ini han konteksto. Han nakita ni Jesus nga hi Maria ngan an iba pa nagtatangis, “nabantad gud an iya kasingkasing ngan nasubo gud hiya.” An pakakita ha ira kasakit ‘nakabantad gud han iya kasingkasing.’ Ito an hinungdan nga “nagtangis hi Jesus.” Nasubo gud hiya han iya nakita nga an iya hinigugma nga kasangkayan nasusubo hinduro.—Juan 11:33, 35.

Iginpapakita hini nga asoy nga hi Jesus may gahum ngan abilidad nga ibalik an kinabuhi ngan maopay nga kahimsog han aton mga hinigugma ha tiarabot nga bag-o nga kalibotan. Iginpapakita liwat hini nga may empatiya hiya ha mga namatyan han ira mga hinigugma. Usa pa nga leksyon nga aton hibabaroan hini nga asoy, nga sadang kita magpakita hin kalooy ha mga nasusubo tungod han kamatay han ira mga hinigugma.

Maaram hi Jesus nga iya babanhawon hi Lasaro. Pero nagtangis gihapon hiya tungod han iya hilarom nga gugma ngan duro nga kalooy ha iya kasangkayan. Ha pariho nga paagi, an aton empatiya mahimo magpagios ha aton nga ‘magtangis upod han mga nananangis.’ (Roma 12:15) An pagpakita hin sugad hito nga kasubo diri nagpapasabot nga an usa kulang hin pagtoo ha paglaom ha pagkabanhaw. Salit angayan gud nga hi Jesus nagpakita hin susbaranan ha pagpakita hin simpatiya ha mga namatayan pinaagi han sinsero nga pagtangis bisan kon iya babanhawon hi Lasaro.