Pagin “Born Again”—Ano an Katuyoan Hito?

DAMU an natoo nga kinahanglan magin born again an usa basi makakarawat hin waray kataposan nga kaluwasan. Kondi, mahitungod han katuyoan han pagin born again, ini an ginsiring ni Jesus: “Waray bisan hin-o nga diri ig-anak tikang ha igbaw [‘ig-anak utro,’ NW] nga sadang makakita han ginhadian han Dios.” (Juan 3:3) Salit, kinahanglan magin born again an usa basi makasulod ha Ginhadian han Dios, diri basi makakarawat hin kaluwasan. ‘Kondi,’ bangin magpakiana an iba, ‘an pakasulod ba ha Ginhadian ngan an pakakarawat hin kaluwasan nagtutudlok ha usa la nga balos?’ Diri. Basi hisabtan an kaibahan hito, tagdon anay naton an kahulogan han mga pulong nga “ginhadian han Dios.”

An ginhadian usa nga klase hin gobyerno. Kon sugad, an “ginhadian han Dios” nangangahulogan hin “gobyerno han Dios.” Igintututdo han Biblia nga hi Jesu-Kristo an “anak han tawo,” amo an Hadi han Ginhadian han Dios ngan may-ada hiya mga igkasi-magmarando. (Daniel 7:1, 13, 14; Mateo 26:63, 64) Dugang pa, an bisyon ni apostol Juan nagpapakita nga an mga igkasi-magmarando ni Kristo ginpili “tikang ha tagsa-tagsa nga panon, ngan yinaknan, ngan katawohan” ngan ‘maghahadi ha tuna.’ (Pahayag 5:9, 10; 20:6) Labot pa hito, iginpapakita han Biblia nga an magmamando sugad nga mga hadi ginkukompwesto han ‘gutiay nga panon’ han 144,000 nga indibiduwal nga “gintubos tikang ha tuna.”—Lukas 12:32; Pahayag 14:1, 3.

Tikang diin nagmamando an Ginhadian han Dios? An “ginhadian han Dios” gintatawag liwat nga “ginhadian han langit.” Nagpapakita ito nga hi Jesus ngan an iya mga igkasi-hadi  nagmamando tikang ha langit. (Lukas 8:10; Mateo 13:11) Salit, an Ginhadian han Dios usa nga langitnon nga gobyerno nga ginkukompwesto ni Jesu-Kristo ngan han grupo han iya igkasi-magmarando nga ginpili tikang ha katawohan.

Kon sugad, ano an karuyag sidngon ni Jesus han hiya sumiring nga kinahanglan magin born again basi “makasulod ha ginhadian han Dios”? Karuyag sidngon niya nga kinahanglan magin born again an usa basi magin magmarando kaupod niya ha langit. Nangangahulogan la ito nga an katuyoan han pagin born again amo an pag-andam ha limitado nga grupo hin katawohan basi magmando tikang ha langit.

Tikang ha mga nahisgotan na, nasabtan naton nga an bag-o nga katawo importante hinduro, ginpapahinabo han Dios, ngan nag-aandam ha usa nga grupo hin katawohan ha pagmando tikang ha langit. Kondi paonan-o aktuwal nga nahitatabo an bag-o nga katawo?

[Blurb ha pahina 7]

An katuyoan han pagin born again amo an pag-andam ha limitado nga grupo hin katawohan ha pagmando tikang ha langit

[Retrato ha pahina 7]

Hi Jesu-Kristo ngan an usa nga grupo han magmarando nga ginpili tikang ha katawohan an nagkukompwesto han Ginhadian han Dios