Pagmando han Pipira, Kapulsanan han Damu

TIKANG pa ha panahon han mga apostol, nagpipili na an Dios ha mga tawo hin limitado nga kadamu hin magtinumanon nga Kristiano, gin-aampon hira sugad nga mga anak. Tungod hito nga pag-ampon nakaeksperyensya hira hin bug-os nga pagbag-o salit ginhulagway ito han Biblia sugad nga bag-o nga katawo. An katuyoan hiton bag-o nga katawo amo an pag-andam han natawo utro nga mga surugoon han Dios ha pagin magmarando ha langit. (2 Timoteo 2:12) Basi magin magmarando, ginbanhaw hira tikang ha mga patay ngadto ha kinabuhi ha langit. (Roma 6:3-5) Ha langit, ‘maghahadi hira ha tuna’ kaupod ni Kristo.—Pahayag 5:10; 11:15.

Kondi, an Pulong han Dios nasiring liwat nga an iba, gawas han mga igin-anak utro, makarawat hin waray kataposan nga kaluwasan. An Biblia (ha Hebreo ngan Kristiano Griego nga Kasuratan) naghihisgot nga katuyoan han Dios nga talwason an duha nga grupo hin katawohan —gutiay nga grupo han magmarando nga nag-uukoy ha langit ngan daku nga grupo han mga sakop nga nag-uukoy dinhi ha tuna. Tigamni pananglitan an iginsurat ni Juan ha iya mga igkasi-tumuroo nga nakaeksperyensya han bag-o nga katawo. Hiya nagsiring mahitungod kan Jesus: “Hiya an halad ha pagpahiuli tungod han aton mga sala, diri la para han aton [an gutiay nga grupo], kondi para liwat han bug-os nga kalibotan [an daku nga grupo].”—1 Juan 2:2, NW.

Ha pariho nga paagi, hi apostol Pablo nagsurat: “An buhi nga paglaom han mga binuhat [an daku nga grupo] naghuhulat ngada ha pagpahayag han mga anak han Dios [an gutiay nga grupo].” (Roma 8:19-21) Paonan-o sasabuton an mga pulong nira Juan ngan Pablo? Sasabuton ito hini nga paagi: An mga igin-anak utro magigin bahin han gobyerno ha langit. Ha ano nga katuyoan? Basi maghatag hin waray kataposan nga kapulsanan ha minilyon nga katawohan—mga sakop han gobyerno han Dios nga mag-uukoy ha tuna. Salit, gintutdoan ni Jesus an iya mga disipulo nga mag-ampo: “Kumanhi an imo ginhadian. Matuman an imo pagburut-an, sugad ha langit, amo man ha tuna.”—Mateo 6:10.

Ini nga kamatuoran mahitungod ha kaluwasan nga iginhahatag ha duha nga grupo mababasa liwat ha Hebreo nga Kasuratan. Pananglitan ha kaapoy-apoyan ni Jesus nga hi Abraham, hi Jehova nagsiring: “Pinaagi han imo binhi [an gutiay nga grupo] sigurado nga an ngatanan nga nasud ha tuna [an daku nga grupo] magbibendisyon ha ira kalugaringon.” (Genesis 22:18, NW) Oo, makakapahimulos hin mga bendisyon an ngatanan nga nasud pinaagi han “binhi” ni Abraham.

Hin-o ito nga “binhi”? Hi Jesu-Kristo, upod an mga nakaeksperyensya han bag-o nga katawo, an gin-ampon nga mga anak han Dios. Hi apostol Pablo nagsiring: “Kon kamo kan Kristo, ha pagkamatuod mga katulinan [“binhi,” NW] kamo ni Abraham.” (Galasia 3:16, 29) Pinaagi han “binhi,” ano nga mga bendisyon an makakarawat han mga tawo tikang ha ngatanan nga nasud? An pribilehiyo nga makarawat utro an pag-uyon han Dios ngan an kinabuhi nga dayon ha paraiso nga tuna. An salmista nga hi David nagtagna: “An mga magtadong makakapanunod han tuna, ngan maukoy hira dida hin waray kataposan.”—Salmo 37:29; Isaias 45:18; Pahayag 21:1-5.

Oo, pipira la an magmamando tikang ha langit, kondi an mga kapulsanan han langitnon nga pagmando makakarawat han damu, upod na an kinabuhi nga dayon ha tuna ngan an ngatanan nga bendisyon tungod hito. Hinaot ikaw ngan an imo pamilya upod han makakakarawat han waray kataposan nga kapulsanan nga pahihinaboon han Ginhadian han Dios.

[Retrato ha pahina 12]

Minilyon an makakakarawat hin kinabuhi nga dayon ha tuna. Usa ka ba ha ira?