HI Sem nga anak ni Noe naluwas han nagkaada baha, ngan padayon nga nabuhi katapos hito. Maaram ka ba kon kay ano nga an mga tawo antes han Baha ha panahon ni Sem ginpoo han Dios ngan kon paonan hiya ngan an iya bug-os nga pamilya naluwas hito nga Baha?— a Pag-istoryahan naton ito.

Han batan-on pa hi Sem, duro an “karaotan han tawo,” siring han Biblia. An ngatanan nga ira ginhuhunahuna pirme maraot. Salit maaram ka ba kon ano an ginbuhat han Dios?— Ginpahinabo niya nga magkaada baha ha pagpoo han magraot nga tawo. Hi apostol Pedro nagsurat: “An kalibotan hadto, nga [ginbaha] hin tubig, nawara.”—Genesis 6:5; 2 Pedro 3:6.

Maaram ka ba kon kay ano nga an mga tawo antes han Baha ginpoo han Dios?— Tungod kay hira magraot, ngan pirme la maraot an ira ginhuhunahuna. Nag-istorya hi Jesus mahitungod hini. Hiya nagsiring nga “han waray pa an [baha],” an mga tawo nagkakalipay ha ‘pagpinangaon, pagpinanginom, pagpinangasawa, ngan pagpinangasal.’ Hiya nagdugang: “Hira waray hibaro [pagtagad] tubtob han pag-abot han paglunop ngan gin-anod hira ngatanan.”—Mateo 24:37-39.

Ano an waray tagda hadto nga mga tawo?— Adto nga mga tawo waray mamati ha ginsiring han tatay ni Sem nga hi Noe nga “parawali ha katadongan.” Pero hi Noe namati ha Dios ngan naghimo hin arka, usa nga nalutaw nga sarakyan nga magluluwas ha iya ngan han iya pamilya ha Baha. Hiya, an iya asawa, ngan an ira mga anak—hira Sem, Ham, ngan Japet—ngan an mga asawa hito amo la an nagtagad ha mga ginsugo han Dios. An iba nagbuhat la han ira karuyag, salit gin-anod hira han Baha.—2 Pedro 2:5; 1 Pedro 3:20.

Paglabay hin haros usa ka tuig katapos magtikang an Baha, hi Sem ngan an iya pamilya ginawas ha arka. Waray na an magraot nga tawo, pero waray pag-iha nabag-o an sitwasyon. Hi Kanaan, an anak nga lalaki han bugto ni Sem nga hi Ham, nakabuhat hin maraot gud salit hi Noe nakagsiring: “Maghingaraot unta hi Kanaan.” Hi Nimrod nga apo ni Ham maraot liwat. Ginkontra niya an matuod nga Dios, hi Jehova, ngan ginsugo an mga tawo nga magtukod hin torre nga gintawag nga Babel basi hira magin kilala. Ha imo hunahuna, ano an gin-abat ni Sem ngan han iya tatay?—Genesis 9:25; 10:6-10; 11:4, 5.

 Nasubo hira, pati hi Jehova. Maaram ka ba kon ano an ginbuhat ni Jehova?— Iya gin-iba-iba an yinaknan han mga tawo basi diri hira magkaintindihay. Tungod hito, inundang hira ha pagtukod ngan namalhin ha iba-iba nga lugar upod hadton kapariho han ira yinaknan. (Genesis 11:6-9) Kondi waray bag-oha han Dios an yinaknan ni Sem ngan han iya pamilya, basi padayon nga magkaupod hira ngan magbinuligay ha pag-alagad ha Dios. Maaram ka ba kon pira ka tuig nga nag-alagad hi Sem kan Jehova?—

Nabuhi hi Sem hin 600 ka tuig. Antes han Baha, 98 ka tuig na hiya, ngan padayon nga nagkinabuhi ha sulod hin 502 ka tuig katapos hito. Sigurado nga ginbuligan niya hi Noe ha pagtukod han arka ngan ha pagsumat ha mga tawo han tiarabot nga Baha. Pero ha imo hunahuna, ano an ginbuhat ni Sem ha sulod hin sobra 500 ka tuig katapos han Baha?— Gintawag ni Noe hi Jehova nga “Dios ni Sem.” Posible gud nga nagpadayon hi Sem ha pag-alagad kan Jehova ngan ha pagbulig ha iya pamilya nga buhaton an pariho. Ha urhi, nagin bahin ha iya pamilya hira Abraham, Sara, ngan Isaak.—Genesis 9:26; 11:10-31; 21:1-3.

Hunahunaa an magraot nga tawo ha kalibotan yana nga nagtikaraot pa gud tikang han panahon ni Sem. Ano an mahitatabo ha ira?— An Biblia nasiring nga hira ‘mawawara.’ Kondi, tagda ini nga saad: “An nagbubuhat ha kaburut-on han Dios nagpapadayon ha gihapon.” Salit, kon buhaton naton an iya kaburut-on, mahimo nga usa kita han maluluwas ngadto ha iya bag-o nga kalibotan. Katapos, ha iya bulig mahimo kita mabuhi nga malipayon ha waray kataposan dinhi ha tuna!—1 Juan 2:17; Salmo 37:29; Isaias 65:17.