AN PAGKABANHAW ni Jesus diri la kadaan nga panhitabo nga waray daku nga bili ha aton yana. Iginpapakita ni apostol Pablo an bili hito han hiya nagsurat: “Ginbanhaw an Kristo, an una nga bunga han mga nangaturog ha kamatayon. Tungod kay nagkaada kamatayon pinaagi han usa ka tawo, nagkakaada liwat pagkabanhaw han mga patay pinaagi han usa ka tawo. Kay sugad la nga tungod kan Adan an ngatanan namamatay, sugad man an ngatanan mabubuhi pinaagi han Kristo.”—1 Corinto 15:20-22, NW.

Hi Jesus ginbanhaw han Nisan 16, 33 C.E., an adlaw diin an mga Judio naghalad kan Jehova nga Dios ha santuaryo han templo ha Jerusalem han siyahan nga mga lugas nga ira gin-ani. Ha pag-unabi kan Jesus sugad nga an una nga bunga, iginpapasabot ni Pablo nga may iba pa nga babanhawon.

Iginsasaysay han sunod nga mga pulong ni Pablo an nahimo han pagkabanhaw ni Jesus. “Tungod kay nagkaada kamatayon pinaagi han usa ka tawo,” siring ni Pablo, “nagkakaada liwat pagkabanhaw han mga patay pinaagi han usa ka tawo.” An sala ngan pagkadiri-hingpit nga napanunod naton kan Adan an hinungdan nga kita namamatay. Pero, pinaagi ha paghatag ni Jesus han iya hingpit nga tawhanon nga kinabuhi sugad nga lukat, gin-abrihan niya an dalan basi makagawas an mga tawo ha sala ngan kamatayon pinaagi ha pagkabanhaw. Ha Roma 6:23, hi Pablo nagsurat: “An suhol han sala amo an kamatayon; kondi an hatag nga waray bayad han Dios amo an kinabuhi nga waray kataposan, nga aada kan Kristo Jesus nga aton Ginoo.”

Iginsaysay ni Jesus mismo an kapulsanan han iya kamatayon ngan pagkabanhaw para ha aton ha pagsiring: “Kinahanglan bitayon liwat an Anak han tawo, basi an bisan hin-o nga natoo ha iya magkaada kinabuhi nga waray kataposan. ‘Hinigugma gud han Dios an kalibotan salit iginhatag niya an iya bugtong nga Anak basi an tagsa nga nagpapakita hin pagtoo ha iya diri mamatay kondi magkaada kinabuhi nga waray kataposan.’”—Juan 3:14-16, NW.

Hunahunaa la—kinabuhi nga dayon nga waray kasakit, pag-antos, o kakurian! (Pahayag 21:3, 4) Makalilipay gud ito! Usa nga eskolar an nagsiring: “Samtang an mga sementeryo nagpapahinumdom han pagin halipot han kinabuhi, an pagkabanhaw nagpaparig-on han pagin halipot han kamatayon.” Oo, an pagkabanhaw ni Jesus nangangahulogan hin kinabuhi!