“Ha kamatay, an mga kalag nga may mortal nga sala nahingangadto ha impyerno, diin hira nag-aantos han ‘waray kataposan nga kalayo.’” (Catechism of the Catholic Church) May mga lider han relihiyon nga nasiring nga an aadto ha impyerno bug-os nga bulag ha Dios.

“An kalag nga makakasala, ini mapatay.” (Esekiel 18:4) “An mga patay diri maaram han bisan ano.” (Eklesiastes 9:5) Kon namamatay ngan waray hinbabaroan an kalag, paonan-o ito mahimo mag-antos han “waray kataposan nga kalayo” o han pagin bulag ha Dios ha kadayonan?

Ha Biblia, an Hebreo ngan Griego nga mga pulong nga agsob ihubad nga “impyerno,” nagtutudlok ha lubnganan han mga tawo. Pananglitan, han nag-antos hi Job hin grabe nga sakit, hiya nag-ampo: “Hinaot itago mo ako ha akon lubnganan [“ha impyerno,” Douay-Rheims Version].” (Job 14:13, Holy Bible—Easy-to-Read Version) Karuyag ni Job magpahuway, diri ha lugar diin hiya mag-aantos o magigin bulag ha Dios, kondi ha lubnganan.

Kon madarahog an Dios diri naton hihigugmaon hiya, lugod mapahirayo kita ha iya. Hi Rocío, nga taga-Mexico, nasiring: “Bata pa ako han itutdo ha akon an doktrina han naglalaga nga impyerno. . . . Nahadlok gud ako salit diri ko mahunahuna nga may maopay nga kalidad an Dios. Para ha akon, putóng hiya ngan waray pasensya.”

An klaro nga ginsisiring han Biblia mahitungod han mga paghukom han Dios ngan han kahimtang han patay nakagbag-o han pagtagad ni Rocío ha Dios. “Naggaan an akon pag-abat, baga hin nagabotan ako hin tunok,” siring niya. “Nagtikang ako sumarig nga karuyag han Dios an pinakamaopay para ha aton, nga hinigugma kita niya, ngan mahimo ko hiya higugmaon. Pariho hiya hin tatay nga nakakapot han kamot han iya mga anak ngan naghihingyap han pinakamaopay para ha ira.”—Isaias 41:13.

Damu an nangangalimbasog magin relihiyoso tungod han kahadlok ha impyerno, kondi diri karuyag han Dios nga mag-alagad ka ha iya tungod la ha kahadlok. Hi Jesus nagsiring: “Higugmaa hi Jehova nga imo Dios.” (Marcos 12:29, 30) Kon nakikita naton nga may hustisya an paggios han Dios yana, makakasarig liwat kita han iya mga paghukom ha tidaraon. Pariho han sangkay ni Job nga hi Elihu, may pagsarig nga makakasiring kita: “Ipaharayo tikang ha Dios, nga hiya magbuhat hin kahugawan, ngan tikang ha Makagarahum, nga hiya magbuhat hin karat-an.”—Job 34:10.