“Hiya nga diri maaram magpasaylo ha iba nag-uutod han tulay nga iya mismo kinahanglan agian.” Ginpapabug-atan hito nga mga pulong han historyador han ika-17 ka siglo nga hi Edward Herbert han Britanya an usa nga rason kon kay ano nga sadang kita magin mapinasayloon: Maabot an panahon, bangin pagkinahanglanon liwat naton an pagpasaylo han iba. (Mateo 7:12) Kondi, may-ada pa mas importante nga rason kon kay ano nga sadang kita magin mapinasayloon. Tagda an ginsiring ni apostol Pablo ha Colosas 3:13.​—Basaha.

Tungod kay kita ngatanan diri hingpit, usahay bangin may mabuhat kita nga makaaringit o makapasina ha iba, ngan bangin may panahon liwat nga kita an maaringit o masina ha ira. (Roma 3:23) Paonan-o naton matitipigan an kamurayawan ha aton igkasi-tawo nga pariho ha aton diri hingpit? Pinaagi ha pagin pasensyoso ngan mapinasayloon sugad han sagdon ni Pablo nga mababasa ha Pulong han Dios. Mapulsanon la gihap yana ini nga sagdon bisan kon iginsurat ini haros duha ka yukot ka tuig na an naglabay. Aton usisahon an ginsiring ni Pablo.

“Padayon nga mag-inantosay . . . kamo [ha usa kag usa].” An mga pulong nga “padayon nga mag-inantosay” tikang ha Griego nga pulong nga naghuhulagway ha pagin pasensyoso o mapailubon. Usa nga reperensya an nasiring nga iginpapakita ini han mga Kristiano pinaagi ha “pagin andam ha pagpailob ha mga sayop o diri mag-opay nga pamatasan nga nakakaaringit ha ira.” An mga pulong nga “ha usa kag usa” nagpapakita nga kinahanglan ito pariho kultibaron han kada tagsa. Nagpapasabot ini nga kon nahinunumdoman naton nga may mga pamatasan kita nga mahimo makaaringit ha iba, diri naton tutugotan an aton mga nadidirian ha ira nga magwara han kamurayawan. Kondi, kumusta man kon makasala hira ha aton?

“Padayon nga . . . kinasingkasing nga magpinasayloay kamo.” Sumala ha usa nga eskolar, an Griego nga pulong nga iginhubad nga “kinasingkasing nga magpinasayloay” “diri an komon nga pulong para ha pagpasaylo . . . kondi usa nga pulong nga nagpapabug-at hin hura nga pagpasaylo.” Usa pa nga reperensya an nasiring nga ini nga mga pulong mahimo magpasabot hin “paghatag hin butang nga makapatagbaw, usa nga pabor, usa nga benepisyo.” Nagpapakita kita hin sugad nga kalidad kon andam kita ha pagpasaylo bisan kon may-ada kita “hinungdan . . . ha pagreklamo kontra ha iba.” Kondi, kay ano nga sadang kita magpasaylo? Tungod kay bangin pagkinahanglanon liwat naton an pagpasaylo han nakasala ha aton.

“Sugad la nga hi Jehova kinasingkasing nga nagpasaylo ha iyo, kinahanglan ito liwat an iyo buhaton.” Ini an siyahan nga rason kon kay ano nga kinahanglan naton magin mapinasayloon: Hi Jehova hura nga nagpapasaylo ha aton. (Mika 7:18) Hunahunaa an daku nga pabor nga iginhahatag ni Jehova ha mga makasasala nga nagbabasol. Diri pariho ha aton, hi Jehova diri nakakasala. Kondi, hiya andam ngan bug-os nga nagpapasaylo ha mga makasasala nga nagbabasol bisan kon maaram hiya nga diri gud niya pagkikinahanglanon an ira pagpasaylo. Oo, hi Jehova an pinakamaopay nga susbaranan ha pagin mapinasayloon!

An kalooy ni Jehova nag-aaghat ha aton nga magin duok ha iya ngan nagpapagios ha aton nga subaron hiya. (Efeso 4:32–5:1) Salit maopay nga pakianhan naton an aton kalugaringon, ‘Kon hi Jehova bug-os nga nagpapasaylo ha akon, kay ano nga diri ko liwat pasayloon an akon igkasi-tawo nga pariho ha akon diri hingpit kon tinuod nga nagbabasol hiya ha sala nga iya nabuhat ha akon?’—Lucas 17:3, 4.