“AN Dios Espiritu,” diri hiya nakikita han tawo. (Juan 4:24) Pero an Biblia nasiring nga may mga tawo nga sugad hin nakakita ha Dios. (Hebreo 11:27) Paonan-o ito nahitabo? Puydi mo gud ba makita an “diri-nakikita nga Dios”?​—Colosas 1:15.

Itanding an aton sitwasyon ha usa nga buta tikang ha katawo. Tungod la ba kay buta hiya diri na niya masasabtan an kalibotan ha iya palibot? Diri man. Nakakakuha hiya hin impormasyon tikang ha iba-iba nga paagi salit nasasabtan niya an mga tawo, butang, ngan mga paggios ha iya palibot. “Diri mata an nakakakita,” siring han usa nga buta. “Kondi an hunahuna.”

Ha pariho nga paagi, bisan kon diri nakikita han imo pisikal nga mga mata an Dios, makikita mo hiya pinaagi han “mga mata han [imo] kasingkasing.” (Efeso 1:18) Tagda an tulo nga paagi ha pagbuhat hito.

An buta agsob nga may mas maopay nga pagpamati ngan pag-abat, nga iya ginagamit basi hisabtan an iya palibot. Ha pariho nga paagi, mahimo mo gamiton an imo mga sentido ha pag-usisa han kalibotan ha imo palibot ngan pagsabot han diri-nakikita nga Dios nga naglarang hito. ‘An iya diri-nakikita nga mga kalidad klaro nga nakikita tikang pa ha paghimoa han kalibotan, kay nasasabtan ito pinaagi han mga butang nga ginhimo.’—Roma 1:20.

Pananglitan, tagda an aton planeta nga Tuna. Waray ito himoa basi la kita mabuhi, kondi basi liwat kita malipay. Kon naaabat naton an huyuhoy han hangin ngan an kapaso han adlaw, natitilawan an marasa nga prutas, o nababatian an huni han mga tamsi, nalilipay kita. Diri ba ito nagpapakita nga an aton Maglalarang mahunahunaon, mahigugmaon, ngan mahinatagon?

Ano an imo mahibabaroan mahitungod ha Dios tikang ha imo nakikita ha uniberso? Iginpapakita han kalangitan an gahum han Dios. An bag-o la nga mga nadiskobrehan nagpapakita nga an uniberso diri la basta nagtitikahaluag kondi nagtitikalaksi pa an paghaluag! Samtang ginkikita an kalangitan ha gab-i, hunahunaa: Diin tikang an enerhiya nga nagpapalaksi ngan nagpapahaluag han uniberso? An Biblia nasiring nga an Maglalarang “makusog ha gahum.” (Isaias 40:26) Iginpapakita han mga linarang han Dios nga hiya an “Makagarahum”​—an Usa nga “daku ha kagahum.”​—Job 37:23.

Usa nga nanay nga may duha nga anak nga may depekto ha pagkita an nagsiring: “Importante an pag-istorya basi mahibaro hira. Isumat ha ira an ngatanan nga imo nakikita ngan nababatian, [ngan] isaysay ito. Ikaw an ira mata.” Ha pariho nga paagi, bisan kon “waray tawo nga nakakita ha Dios ha bisan san-o,” an Anak han Dios, hi Jesus, “nga duok gud ha Amay amo an nag-esplikar mahitungod ha Iya.” (Juan 1:18) Sugad nga an siyahan nga linarang ngan an bugtong nga Anak, hi Jesus an nagin aton “mata” ha langit. Hiya an pinakamasasarigan nga makukuhaan hin impormasyon mahitungod han diri-nakikita nga Dios.

Tagda an pipira han ginsiring ni Jesus mahitungod han iya Amay nga iya kaupod ha sulod hin diri maihap nga katuigan:

• An Dios maduruto. “An akon Amay padayon nga nagbubuhat tubtob yana.”—Juan 5:17.

• An Dios maaram han aton panginahanglan. “[An] iyo Amay maaram han iyo panginahanglan antes pa kamo mangaro ha iya.”—Mateo 6:8.

•  An Dios hura nga nagtatagana para ha aton. ‘[An] iyo Amay nga aadto ha langit, nagpapasirang han adlaw ha magraot ngan mag-opay nga tawo ngan nagpapauran ha magtadong ngan diri-magtadong.’—Mateo 5:45.

• Ginpapabilhan han Dios an kada usa ha aton. “An duha nga maya iginbabaligya ha gutiay gud nga kantidad hin sinselyo, diri ba? Pero waray usa hito an nahuhulog ha tuna nga diri hinbabaroan han iyo Amay. Maaram hiya bisan han kadamu han iyo buhok ha ulo. Salit ayaw kahadlok: Mas importante kamo kay ha damu nga maya.”—Mateo 10:29-31.

Agsob nga iba an paagi han mga buta ha pagsabot kay han mga tawo nga nakakakita. Para ha buta, an malandong nga lugar diri lugar nga masirom kondi lugar nga mahayahay. Sugad la nga an buta diri nakita hin landong o kalamrag, diri gihap naton masasantop an mahitungod kan Jehova kon ha aton la pangalimbasog. Salit, nagtagana hi Jehova hin usa nga hingpit nga makakagpakita han iya mga kalidad ngan personalidad.

Ito nga usa amo hi Jesus. (Filipos 2:7) Diri la iginsumat ni Jesus an mahitungod han iya Amay, kondi iginpakita liwat niya an kalidad han Dios. An iya disipulo nga hi Felipe naghangyo: “Ginoo, ipakita ha amon an Amay.” Hi Jesus binaton: “An nakakita ha akon nakakita liwat ha Amay.” (Juan 14:8, 9) Aw, ano an imo “nakikita” mahitungod han Amay pinaagi han mga ginbuhat ni Jesus?

Hi Jesus mahigugmaon, mapainubsanon, ngan masayon madaop. (Mateo 11:28-30) An iya maopay nga personalidad nakadani ha mga tawo. Naaabat niya an pag-antos han iba, ngan nalilipay hiya kon nalilipay hira. (Lucas 10:17, 21; Juan 11:32-35) Samtang ginbabasa o ginpapamatian mo an mga asoy han Biblia mahitungod kan Jesus, gamita an imo mga sentido ngan handurawa an mga panhitabo sugad nga tinuod nga nahitatabo. Kon papamalandungon mo an pakig-upod ni Jesus ha mga tawo, mas makikita mo an mag-opay nga personalidad han Dios ngan magigin duok ka ha Iya.

Ini an ginsiring han usa nga awtor kon paonan-o hinsasabtan han buta an iya palibot: “Nakakakuha hiya hin talagudti nga detalye tikang ha iba-iba nga paagi (pag-abat, pag-amyon, pagpamati, ngan iba pa), ngan ginbubug-os ito.” Ha pariho nga paagi, samtang gin-oobserbaran mo an mga linarang han Dios, ginbabasa an ginsiring ni Jesus mahitungod han iya Amay, ngan gin-uusisa kon paonan-o iginpakita ni Jesus an mga kalidad han Dios, nabubug-os an maopay nga hulagway ni Jehova. Hito nga paagi, magigin tinuod gud hiya ha imo.

Hi Job, nga nabuhi ha kadaan nga panahon, may pariho nga eksperyensya. Ha tinikangan, hiya nagyakan nga ‘waray sarabotan.’ (Job 42:3) Pero katapos tagdon hin maopay an urusahon nga mga linarang han Dios, hiya nagsiring: “Ako nakabati ha imo pinaagi han pamatian han talinga; kondi yana an akon mata nakita ha imo.”—Job 42:5.

Mahimo liwat ito magin tinuod ha imo. “Kon imo [hi Jehova] pamilngon, hiaagian mo hiya.” (1 Kronikas 28:9) Malilipay an mga Saksi ni Jehova ha pagbulig ha imo nga makita an diri-nakikita nga Dios.