Ano an Ginsisiring han Biblia Mahitungod ha Kakulang hin Pagkaon nga Nahitatabo Yana?

I-PLAY

“Waray na magugutom.” Ito an karuyag mahitabo han mga lider ha kalibotan mahitungod ha usa han pinakadaku nga problema han katawohan—an pagtagana hin pagkaon ha ngatanan nga tawo ha bug-os nga tuna. a Pero maabot pa ba an panahon nga waray na magugutom? Ano an ginsisiring han Biblia?

Igintagna han Biblia an kakulang hin pagkaon yana

Igintagna han Biblia nga mahitatabo an kakulang hin pagkaon ha aton panahon, nga gintatawag han Biblia nga “kataposan nga mga adlaw.” (2 Timoteo 3:1) Diri an Dios an hinungdan hini nga kakulang hin pagkaon, pero ginpahamangnoan kita niya mahitungod hini. (Santiago 1:13) Pansina an duha nga tagna ha Biblia.

“Magkakaada kakulang hin mga pagkaon . . . ha iba-iba nga mga lugar.” (Mateo 24:7) Ini nga tagna han Biblia nagsusumat nga magkakaada gutom ha damu nga lugar. Ngani, hinin bag-o la, an mga nanginginano han suplay han pagkaon nagreport: “Nagtitikagrabe an gutom, kakulang hin pagkaon ngan malnutrisyon ha kalibotan bisan pa han mga paningkamot nga sulbaron ito.” b Ginatos ka milyon nga tawo ha damu nga nasud an waray ginkakaon. Makasurubo, sugad nga resulta, damu ha ira an nagkamatay.

“Kitaa! usa nga kabayo nga itom, ngan an nasakay hito may ginkakaptan nga timbangan.” (Pahayag 6:5) Hini nga tagna, an simboliko nga kabayo ngan an nasakay hito nagrirepresentar hin gutom ha kataposan nga mga adlaw. c An timbangan nga ginkakaptan han sakay han kabayo para ha pagtimbang han rasyon nga pagkaon. Samtang sakay pa an parapangabayo, usa nga tingog an nag-aanunsyo nga magmamahal gud an presyo han pagkaon ngan nagpahamangno ha mga tawo nga diri magkarag hin pagkaon. (Pahayag 6:6) Husto nga iginpapakita hini an krisis ha pagkaon ha kalibotan yana, diin binilyon nga tawo an diri nakakabiling o nakakaakos pagpalit hin masustansya nga pagkaon.

Kon paonan-o matatapos an kakulang hin pagkaon

An mga eksperto nasiring nga an aton planeta naghahatag hin labaw pa han ginkikinahanglan nga pagkaon han ngatanan nga naukoy hito. Kon sugad, kay ano nga nagkukulang man hin pagkaon? Ngan ano an ginsisiring han Biblia nga bubuhaton han aton Maglalarang, hi Jehova, d basi sulbaron ini nga mga problema?

Problema: Diri kaya wad-on han mga gobyerno an kapobrehan ngan an kawaray-hustisya nga hinungdan han kagutom han mga tawo.

Solusyon: An diri perpekto nga mga gobyerno han tawo sasaliwnan han usa nga perpekto nga gobyerno—an Ginhadian han Dios. (Daniel 2:44; Mateo 6:10) Yana, damu nga pobre nga tawo an diri nakakaakos pagpalit hin pagkaon, pero susulbaron ito han Ginhadian han Dios. An Biblia nasiring mahitungod kan Jesu-Kristo, an Hadi han Ginhadian han Dios: “Iya tatalwason an pobre nga nangangaraba para hin bulig, sugad man an ubos nga tawo ngan an bisan hin-o nga waray parabulig. . . . Magkakaada hin hura nga lugas ha tuna; ha pungkay han kabukiran magsasap-ay ito.”—Salmo 72:12, 16.

Problema: An mga girra nagriresulta hin kadaot ngan nagkukuri an ekonomiya, salit nalilimitahan o nauundang an suplay han pagkaon.

Solusyon: “Ginpapaundang [ni Jehova] an mga girra ha bug-os nga tuna. Iya ginbabari an pana ngan gin-uutod-utod an bangkaw; iya ginsusunog ha kalayo an mga karomata han kasundalohan.” (Salmo 46:9) Bubungkagon han Dios an mga armas nga pan-girra ngan an mga nagpapahinabo han girra. Sugad nga resulta, an ngatanan diri na makukurian ngan talwas nga magkakaada hin pagkaon. An Biblia nagsasaad: “An magtadong mag-uuswag, ngan an kamurayawan magigin hura.”—Salmo 72:7.

Problema: Tungod han grabe nga kadaot han klima ngan han mga kalamidad, nadadaot an mga tanom ngan nagkakamatay an mga hayop.

Solusyon: Kukontrolon han Dios an natural nga mga pwersa ha tuna basi magkaada maopay nga klima nga makakabulig ha pagdamu han suplay han pagkaon. An Biblia nasiring: “Ginpapakalma [ni Jehova] an subasko; an mga balud ha dagat nahilom. . . . An disyerto iya ginhihimo nga tubigon nga lugar nga puno hin tangbo, ngan an mamara nga tuna ginhihimo nga mga burabod han tubig. Ginpapaukoy niya didto an mga nagugutom . . . Nagsasabwag hira ha mga uma ngan nagtatanom ha mga urubasan nga namumunga hin damu.”—Salmo 107:29, 35-37.

Problema: An hakog ngan korap nga mga indibiduwal naghihimo hin pagkaon nga diri talwas kaunon o ginpupugngan nira nga makaabot an pagkaon ha mga nanginginahanglan.

Solusyon: Bubungkagon han Ginhadian han Dios an ngatanan nga diri tangkod ngan korap nga mga tawo. (Salmo 37:10, 11; Isaias 61:8) An Biblia nasiring nga hi Jehova nga Dios an “naghahatag hin hustisya para ha mga ginlimbongan, hiya nga naghahatag hin pagkaon ha ginugutom.”—Salmo 146:7.

Problema: Kada tuig, mga 33 porsyento han suplay han pagkaon ha kalibotan an nakakarag o nawawara.

Solusyon: Ha pagmando han Ginhadian han Dios, dudumarahon hin maopay an mga suplay han pagkaon. Han nakanhi hi Jesus ha tuna, ginlikyan gud niya nga magkarag hin pagkaon. Pananglitan, makausa, milagroso nga ginpakaon niya an sobra 5,000 nga tawo. Ha urhi, ginsugo niya an iya mga disipulo: “Tiroka niyo an nahisalin nga mga tipik, basi waray makarag.”—Juan 6:5-13.

Tungod kay wawad-on han Ginhadian han Dios an mga problema nga hinungdan han gutom, an ngatanan nga tawo magpapahimulos hin hura nga magrasa ngan masustansya nga pagkaon. (Isaias 25:6) Basi mahibaroan kon san-o ini bubuhaton han Ginhadian han Dios, kitaa an artikulo nga “San-o Mamandoan han Ginhadian han Dios an tuna?”

a An 2030 Agenda for Sustainable Development, nga ginsuportaran han ngatanan nga United Nations Member States han 2015.

b Gintarampo nga report han Food and Agriculture Organization of the United Nations, International Fund for Agricultural Development, United Nations Children’s Fund, United Nations World Food Programme, ngan World Health Organization.

c Basi mahibaro hin dugang mahitungod han ngatanan nga upat nga mangangabayo ha Pahayag, kitaa an artikulo nga “An Upat nga Mangangabayo—Hin-o hira?”

d Jehova an personal nga ngaran han Dios. (Salmo 83:18) Kitaa an artikulo nga “Hin-o hi Jehova?”