Kada tuig, ginatos ka yukot an nababawtismohan, salit ginkikinahanglan naton an mas damu nga teokratiko nga mga pasilidad. Tungod hini, ginplano han mga Local Design/Construction Department ha bug-os nga kalibotan an pagtukod o pag-renovate hin sobra 2,700 nga lugar han pagsingba han 2020 nga tuig han pag-alagad. a

 Makasurubo nga naulang ini nga mga plano tungod han COVID-19 nga pandemya. Basi proteksyonan an kabugtoan ngan tumanon an mga restriksyon han gobyerno, iginpaundang la anay han Publishing Committee han Nagmamando nga Lawas an kadam-an han mga proyekto han pagpanukod ha bug-os nga kalibotan. Bisan pa hito, han 2020 nga tuig han pag-alagad, sobra 1,700 nga lugar han pagsingba an natukod ngan na-renovate antes han pandemya. Dugang pa, sobra 100 nga dagku nga proyekto han mga sanga nga opisina an natapos. Kitaa kon paonan-o an kabugtoan nagpahimulos ha duha han natapos nga proyekto han pagpanukod.

 Sanga nga opisina ha Cameroon. An daan nga sanga nga opisina nga nahimumutang ha Douala gutiay hinduro ngan nagkikinahanglan hin dagku nga renovation. Ginhunahuna han Publishing Committee nga i-renovate ito, pero an magagasto mas daku pa kay han kantidad han pasilidad. Naghunahuna liwat hira nga magtukod ha usa nga bag-o nga lote o pumalit ngan mag-renovate hin natukod na nga bilding, pero waray madayon an bisan hain hito.

 Hito nga panahon, nahibaroan liwat han kabugtoan nga ha norte han Douala, an lokal nga gobyerno nagplano paghimo hin kalsada hirani ha usa han aton mga Assembly Hall. Tungod hito, magigin mas masayon na an pagkadto ngan madali na an pagkaada koryente, tubig, ngan iba pa. Ito gud an ginkikinahanglan han sanga nga opisina. Salit gin-aprobaran han Nagmamando nga Lawas an pagtukod hin bag-o nga sanga nga opisina ha usa nga bahin han lote han Assembly Hall.

 An kabugtoan ngan an binaydan nga mga kontraktor urosa nga nagtrabaho hini nga proyekto, ngan nakabulig ito basi makatipid hin panahon ngan kwarta. Ngani, mas gutiay an ira nagasto hini nga proyekto kay han ginlalaoman. Nakatipid hira hin sobra duha ka milyon ka dolyar (U.S.)! An pamilya han Bethel nakabalhin ha bag-o nga pasilidad antes pa magtikang an COVID-19 nga pandemya.

 An mga Bethelite ha Cameroon nagpahimulos hin mas maopay nga urukyan ngan trabahoan, ngan para ha ira ini nga bag-o nga sanga nga opisina regalo tikang kan Jehova. Usa nga mag-asawa an nagsiring, “Karuyag namon nga magin mas maduruto pa ngan ipakita an amon apresasyon para hini nga regalo.”

 Tojolabal Remote Translation Office (RTO), Mexico. Ha sulod hin damu ka tuig, an Tojolabal translation team nagtatrabaho ha sanga nga opisina han Central America, nga nahimumutang hirani ha Mexico City. Pero, an kadam-an nga nagyayakan han Tojolabal aadto ha Altamirano ngan Las Margaritas nga haros 1,000 ka kilometro an kahirayo! Tungod hito, an mga translator han Tojolabal nakukurian ha pagpahiuyon ha mga pagbag-o han ira yinaknan. Ngan an sanga nga opisina nakukurian pamiling hin kwalipikado nga kabugtoan ha kahigrani nga mga lugar basi bumulig ha Tojolabal nga translation ngan audio recording.

 Tungod hini nga mga hinungdan, karuyag ibalhin han Writing Committee han Nagmamando nga Lawas an translation team ngadto ha lugar diin ginyayakan an Tojolabal. Basi mahimo ini, nagdesisyon an sanga nga opisina nga pumalit ngan mag-renovate hin bilding. Mas matipid ini nga paagi kompara ha pagtukod o pagplete hin mga opisina.

 Iginsumat han usa nga translator kon paonan-o hiya nagpahimulos: “Ha akon napulo ka tuig nga pagtrabaho sugad nga translator ha sanga nga opisina, waray ako nakaistorya bisan usa nga pamilya nga hirani ha branch nga pariho han akon yinaknan. Yana an amon opisina nahimumutang ha sentro han lugar diin ginyayakan an Tojolabal. An akon nakakaistorya kada adlaw nagyayakan hin Tojolabal. Tungod hini, nahibaro ako hin damu nga bag-o nga pulong ngan mas napaopay an akon trabaho.”

 Para ha 2021 nga tuig han pag-alagad, may ginpaplano nga mga proyekto nga 75 nga RTO ngan mga pasilidad para ha teokratiko nga mga eskwelahan, kon itutugot han kahimtang. Ipapadayon an pagtrabaho ha walo nga dagku nga proyekto han mga sanga nga opisina, upod na an bag-o nga proyekto han world headquarters ha Ramapo, New York, ngan an pagbalhin han sanga nga opisina han Argentina ngan han Italy. Dugang pa, sobra 1,000 nga bag-o nga Kingdom Hall an ginkikinahanglan, sobra 6,000 nga katirokan an diri na maopay gamiton ngan kinahanglan na liwanan, ngan 4,000 pa nga Kingdom Hall an kinahanglan i-renovate.

 Diin tikang an pundo para hini ngatanan nga pagpanukod ngan pag-renovate? Ginbaton ini ni Brother Lázaro González, nga membro han Branch Committee han Central America, samtang ginhihisgotan an Tojolabal Remote Translation Office nga proyekto. “Limitado la an pundo han mga lugar nga sakop han amon sanga nga opisina. Salit kon waray an bulig han kabugtoan ha bug-os nga kalibotan, imposible an pagtukod hin mga translation office para ha aton nitibo nga mga igkasi-tumuroo. Tungod han mga pundo tikang ha kabugtoan ha bug-os nga kalibotan, nagin posible nga ibutang nga mga translator ha mga lugar diin ginyayakan an ira yinaknan. Nagpapasalamat gud kami ha aton kabugtoan ha bug-os nga kalibotan tungod han ira kinasingkasing nga bulig.” Oo, nagin posible ini nga mga proyekto han pagpanukod tungod han iyo mga donasyon ha bug-os-kalibotan nga buruhaton. Damu hito an iginpapadara gamit an donate.mr1310.com.