Karuyag gud ni Jehova tutdoan an iya katawohan. Tungod hito, an iya organisasyon nag-establisar hin mga eskwelahan nga magbabansay ha mga estudyante basi matuman nira an ira mga toka. Usa hito nga mga eskwelahan amo an School for Kingdom Evangelizers (SKE). Hinin bag-o la nga mga tuig, an organisasyon han Dios nagpokus ha pagpauswag diri la ha mga curriculum kondi pati liwat ha mga pasilidad diin ginhihimo an mga klase. An usa nga nangunguna nga tumong hini basi magin mas masayon an pagtutdo han mga instruktor ngan an pag-aram han mga estudyante. Paonan-o nakakabulig an imo mga donasyon basi makab-ot ito nga tumong?

 Ha damu nga katuigan, gindudumara an teokratiko nga mga eskwelahan dida ha mga Kingdom Hall ngan mga Assembly Hall. Kon sugad, kay ano nga hinin bag-o la nagtukod o nag-renovate kita hin dugang nga mga pasilidad nga ginagamit yana para la ha teokratiko nga mga eskwelahan? Pansina an tulo nga rason.

 Mas daku an panginahanglan. “An mga sanga nga opisina nagsiring nga kinahanglan nira hin mas damu nga kabugtoan basi bumulig ha kanataran,” siring ni Christopher Mavor, usa nga kabulig han Service Committee han Nagmamando nga Lawas. “Pananglitan han 2019, ginbanabana han Brazil branch nga mga 7,600 pa nga naggradwar ha SKE an ginkinahanglan basi maataman an panginahanglan han teritoryo han ira branch.” An United States branch nagreport nga daku an ira panginahanglan para hin kwalipikado nga mga payunir nga makakag-train ha iba ha special metropolitan public witnessing, pagsangyaw ha pantalan, ngan pagsangyaw ha prisohan. Nagkikinahanglan liwat hin mga brother nga mag-aalagad ha Local Design/Construction Department ngan ha mga Hospital Liaison Committee. Daku an maibubulig han mga naggradwar ha SKE basi mapun-an ini nga mga panginahanglan.

 Nagtitikadamu an estudyante. Damu nga branch an nakakarawat hin damu nga aplikasyon tikang ha mga estudyante; mas damu ito kay ha kapasidad nga puydi nira karawaton. Pananglitan ha Brazil, an branch nakakarawat hin mga 2,500 nga aplikasyon para ha SKE ha usa la ka tuig. Pero tungod kay limitado an mga pasilidad nga ginagamit para hini nga eskwelahan, 950 la nga estudyante an kaya karawaton han branch.

 Angayan nga mga akomodasyon. Kon an klase gindudumara ha usa nga Kingdom Hall o Assembly Hall, kaurogan na nga an mga estudyante nakikiukoy ha balay han mga kabugtoan. Maopay ito nga kahikayan para ha mga lugar nga gutiay la an ginhihimo nga klase kada tuig. Pero ha mga lugar nga damu an ginhihimo nga klase, bangin diri posible para ha mga kabugtoan nga paukyon an mga estudyante hin damu ka bulan ha usa ka tuig. Salit naghimo hin mga pasilidad nga hirani ha klasrum ngan gindisenyo ito para gud la ha mga estudyante.

 An usa nga pasilidad nga may usa nga klasrum ngan urukyan para ha mga instruktor ngan mga 30 nga estudyante, upod na an mga support service, mahimo magkantidad hin minilyon ka dolyar (U.S.), depende ha lokasyon ngan iba pa nga butang.

 An mga eskwelahan kaurogan nga gintutukod ha mamingaw nga lugar ha gawas han syudad pero hirani ha mga lugar nga may panpubliko nga transportasyon. Mas ginpipili an mga lugar nga may damu nga magwarali nga makakabulig basi padayon nga mahimo an mga buruhaton han eskwelahan ngan mamintinar an mga bilding ngan mga gamit.

 An mga pasilidad may-ada mga librarya, lugar para ha pag-aram, mga kompyuter, mga printer, ngan iba pa nga mga gamit. Kaurogan na nga may-ada ito dining room diin didto nangangaon an mga estudyante ngan mga instruktor. May-ada liwat ito dapit diin puydi hira mag-ehersisyo ngan magrelaks.

 Ginplano liwat hin maopay an disenyo han klasrum. “Ginkonsulta namon an Theocratic Schools Department basi buligan kami ha pagdisenyo hin mga klasrum nga magpapasayon ha pag-aram han mga estudyante ,” siring ni Troy, nga nagtatrabaho ha Worldwide Design/Construction Department ha Warwick, New York. “An mga brother didto naghatag ha amon hin mga instruksyon may kalabotan ha kadaku ngan layout han mga klasrum, pati na an may kalabotan ha pag-instalar han mga suga ngan audio-video equipment.” Parte ha pag-instalar han audio equipment, hi Zoltán nga usa nga instruktor ha SKE ha Hungary, nagsiring: “Ha tinikangan, waray kami mga mikropono, salit kaurogan na nga ginpapahinumdoman namon an mga estudyante nga dakuon an ira tingog. Pero yana diri na ito problema kay may-ada na mikropono ha tagsa nga lamesa!”

 Ano an nagin epekto ha mga instruktor ngan mga estudyante hinin maopay nga mga pasilidad? “Murayaw gud ito nga lugar,” siring ni Angela, nga nakaeskwela ha SKE ha Palm Coast, Florida, U.S.A. “An ngatanan ginplano gud hin maopay, pati na an klasrum ngan an amon mga kwarto, basi makapokus kami ha pag-aram.” Gin-aapresyar ni Csaba, usa nga instruktor ha Hungary, an mga oportunidad nga makaupod an mga estudyante durante han pangaon. Hiya nagsiring nga hito nga mga higayon, “kaurogan na nga an mga estudyante diri nag-aalang pagsumat ha amon han ira mga eksperyensya. Hito nga paagi, mas nakikilala namon hin maopay an mga estudyante. Sugad nga resulta, mas epektibo nga naipapahiuyon namon an curriculum ha ira mga panginahanglan.”

 Para ha mga estudyante ngan mga instruktor, inin maopay nga mga pasilidad bendisyon tikang ha aton “Harangdon nga Instruktor,” hi Jehova. (Isaias 30:20, 21) Usa nga sister ha Pilipinas nga nakaeskwela ha SKE nga gindumara ha usa nga pasilidad nga gin-renovate basi magin eskwelahan an nagsiring: “An maopay nga kahimtang han eskwelahan nagpahinumdom ha amon nga diri la kami basta mga estudyante, lugod espesyal kami nga mga bisita ni Jehova. Karuyag niya mag-enjoy kami samtang gin-aadman namon hin maopay an iya Pulong.”

 Nakakagtukod ngan nakakag-renovate hini nga mga eskwelahan ngan namimintinar ito tungod han iyo mga donasyon, nga an damu hito igindonar gamit an donate.mr1310.com. Damu nga salamat ha iyo pagin mahinatagon.