Hi Virginia, nga usa han mga Saksi ni Jehova, nag-aantos hin sakit nga gintatawag nga locked-in syndrome. Paralisado an iya lawas. Nakakakita hiya ngan nakakabati, napupukrat niya ngan napipiyong an iya mga mata, ngan medyo naikikiwa niya an iya ulo. Pero diri hiya nakakayakan o nakakakaon. Hadto, mahimsog hiya ngan matibaksi. Pero usa ka aga han 1997, inabat hiya hin duro nga kaul-ol ha luyo han iya ulo. Gindara hiya han iya bana ha hospital, ngan hito nga gab-i na-coma hiya. Nagmata hiya katapos hin duha ka semana ha intensive-care unit, nga paralisado ngan nakakonekta ha ventilator. Ha sulod hin pipira ka adlaw, waray hiya nahinunumdoman, bisan ngani kon hin-o hiya.

 Ginsumat ni Virginia an sunod nga nahitabo. “Hinay-hinay nga binalik an akon memorya. Nag-ampo gud ako. Diri ko karuyag mamatay ngan magdaku an akon anak nga waray nanay. Basi magkaada kaisog, nangalimbasog ako nga maghinumdom hin damu nga bersikulo ha Biblia nga mahuhunahuna ko.

 “Ha urhi, ginpagawas na ako han mga doktor ha ICU. Katapos hin unom ka bulan ha iba-iba nga hospital ngan ha rehabilitation center, ginpauli ako. Paralisado la gihapon ako ngan nagkikinahanglan hin bulig ha ngatanan nga butang. Nanluya gud ako! Inabat ko nga waray ako pulos ha iba ngan kan Jehova. Nabaraka liwat ako kay diri ko naaataman an akon anak.

 “Nagtikang ako magbasa hin mga eksperyensya han iba nga Saksi nga nag-antos liwat hin grabe nga sakit pariho han akon, ngan nahipausa gud ako han ira mga kaya himoon para kan Jehova. Sugad nga resulta, nangalimbasog ako nga magin positibo pinaagi ha pagpokus ha kaya ko himoon. Antes ako magkasakit, gutiay la nga panahon an akon naihahatag para ha espirituwal nga mga buruhaton. Yana, may-ada na ako bug-os nga adlaw kada adlaw. Salit imbes nga mahulop, nagpokus ako ha akon debosyon kan Jehova.

 “Nag-aram ako paggamit hin kompyuter. Nagta-type ako pinaagi hin software nga nagrireak ha pagkiwa han akon ulo. Makapoy ito, pero nakabulig ito ha akon nga maadman an Biblia ngan maisumat ha iba an akon paglaom pinaagi hin surat ngan e-mail. Basi makagkomunikar ha iba, may-ada ako board nga may alpabeto. Gintutudlok han akon kaupod an kada letra. Kon sayop nga letra an napili, nanmumudlat ako; pero kon tama nga letra an napili, napiyong ako. Gin-uutro namon an proseso basi makaporma hin mga pulong ngan sentence. An iba han mga sister nga pirme ko nakakaupod nagin eksperto na ha pagtigo han karuyag ko iyakan. Usahay kon sayop nga pulong an ira napuporma, nahingangatawa na la kami.

 “Nag-i-enjoy ako pag-api ha mga buruhaton han kongregasyon. Pirme ako naka-tie in ha mga katirok, yana pinaagi han videoconferencing. Naita-type ko an akon mga komento ngan may-ada nagbabasa hito ha panahon han pakiana ngan baton nga mga bahin. Nagta-tie in liwat ako ha grupo han pagsangyaw han mga Saksi basi magkita han binulan nga mga programa ha JW Broadcasting. a

 “Yana, 23 ka tuig na ako nga may locked-in syndrome. May mga panahon nga nasusubo ako. Pero nalalamposan ko ito nga pag-abat pinaagi ha pag-ampo, pakig-upod ha kabugtoan, ngan pagin busy ha pag-alagad kan Jehova. Ngani, tungod han bulig han kongregasyon, sobra unom ka tuig na ako nga nakakag-auxiliary payunir. Nangangalimbasog ako nga magin maopay nga ehemplo ha akon anak nga hi Alessandro, nga may asawa na yana ngan usa nga tigurang. Hiya ngan an iya asawa mga regular payunir liwat.

 “Agsob ko pamalandungon an mga butang nga mahihimo ko na ha paraiso. An siyahan ko nga karuyag buhaton amo an pag-istorya mahitungod kan Jehova gamit an akon tingog. Karuyag ko maglakat-lakat ha ligid han sapa basi ma-enjoy an maopay nga kiritaon ha palibot. Ngan tungod kay duha na ako ka dekada nga ginpapakaon gamit hin tubo, eksayted na ako nga magkuha hin mansanas tikang ha puno ngan kaunon ito. Ngan syempre, tungod kay Italyana ako, karuyag ko na gud maghimo ngan kumaon han akon paborito nga mga Italian nga pagkaon, pariho han pizza!

 “An ‘paglaom han katalwasan’ nakabulig nga maprotektaran an akon hunahuna. (1 Tesalonica 5:8) An pag-imadyin han akon kalugaringon ha bag-o nga kalibotan naghahatag ha akon hin kalipay bisan kon may mga limitasyon ako ha pisikal, kay nasarig ako nga hirani na ito mawara. Oo, karuyag ko na gud maeksperyensyahan ‘an tinuod nga kinabuhi’ nga iginsaad ni Jehova ha aton pinaagi han iya Ginhadian.”—1 Timoteo 6:19; Mateo 6:9, 10.