Diri naapi an mga Saksi ni Jehova ha girra tungod han masunod nga mga rason:

1.   Pagsugot ha Dios. An Biblia nasiring nga “papandayon[han mga alagad han Dios] an ira mga espada basi magin mga punta han arado” ngan diri “na hira mag-aaram hin pakiggirra.”—Isaias 2:4.

2.   Pagsugot kan Jesus. Hi apostol Pedro ginsidngan ni Jesus: “Itakob an imo espada, kay an ngatanan nga nagamit han espada mamamatay pinaagi han espada.” (Mateo 26:52) Iginpakita dinhi ni Jesus nga an iya mga sumurunod diri magamit hin mga armas nga pan-girra.

    Ginsusugot han mga disipulo ni Jesus an iya sugo nga ‘diri magin bahin han kalibotan’ pinaagi ha pagpabilin gud nga neutral ha politikal nga mga isyu. (Juan 17:16) Diri hira nagpuprotesta kontra ha mga ginbubuhat han militar o ginpupugngan adton nagdesisyon nga magsundalo.

3.   Gugma ha iba. Ginsugo ni Jesus an iya mga disipulo nga “higugmaon . . . an usa kag usa.” (Juan 13:34, 35) Magigin bahin hira han bug-os-kalibotan nga pagminagburugto diin waray bisan usa an makikiggirra kontra ha iya bugto.—1 Juan 3:10-12.

4.   An ehemplo han siyahan nga mga Kristiano. An Encyclopedia of Religion and War nagsiring: “An siyahan nga mga sumurunod ni Jesus waray makiggirra ngan magsundalo,” tungod kay ginkikilala ito nga mga buhat nga “diri uyon ha iginpakita nga gugma ni Jesus ngan ha iya sugo nga higugmaon an mga kaaway.” Ini liwat an iginsiring han Aleman nga teologo nga hi Peter Meinhold parte ha siyahan nga mga disipulo ni Jesus: “Diri gud puydi magsundalo an usa nga Kristiano.”

 An mga Saksi ni Jehova may naibubulig ha sosiedad ngan diri hira tarhog ha seguridad han nasud diin hira naukoy. Ginrirespeto namon an awtoridad han mga gobyerno, uyon hini nga mga sugo ha Biblia:

•   “Magpasakop ha higtaas nga mga awtoridad.”—Roma 13:1.

•   “Kon sugad, ihatag ha Cesar an mga butang han Cesar, pero ihatag ha Dios an mga butang han Dios.”—Mateo 22:21.

 Salit, ginsusugot namon an balaud, nagbabayad hin mga buhis, ngan nakikigkooperar ha mga pangalimbasog han gobyerno para ha kaopayan han publiko.