ʼI te Tohi-Tapu, ko te kupu ʼae ne’e fakaliliu ki te “fakatu’uake” ʼe ha’u mai te kupu Fakakeleka anastasis, ʼae ʼe fakaʼuhiga “tu’u ki oluga” pe’e “malaga ke tu’u.” Ko he tahi ne’e fakatu’uake ne’e ko he tahi ne’e tu’uake mai te mate ki te ma’uli, kua toe liliu pe ia ki tona ʼuhiga totonu ʼi mu’a ʼo tana mate.​—1 Kolonito 15:12, 13.

 ʼE mole ha te kupu “fakatu’uake” ʼi te ʼu tohi Fakahepeleo, ʼae ʼe tou fakahigoa’i tu’uma’u ko te Tauhi ʼAfeā. Kaeʼ e tou ma’u ai te akonaki ʼae ki te fakatu’uake. Ohage la, ne’e fai e te ʼAtua te fakapapau ʼaeni ʼaki te polofeta ko Oseo: “ʼE au totogi anai natou mai te malohi ʼo te Faitoka, ʼe au toe fakamaʼuli ake anai natou mai te mate.”​—Oseo 13:14; Sopo 14:13-​15; Esaia 26:19; Taniela 12:​2, 13.

 ʼE hoko anai ʼifea te fakatu’uake? Ko ʼihi ne’e fakatuʼuake ki te lagi ko he ʼu hau mo pelepitelo ʼi te ʼu tafa ʼo Kilisito. (2 Kolonito 5:1; Apokalipesi 5:​9, 10) ʼE fakahigoa’i ʼi te Tohi-Tapu ko te “ʼuluaki fakatuʼuake” pe’e “ʼuluaki fakatuʼuake ʼo te kau mate.” ʼE ha mai ʼi te ʼu kupu ʼaeni ʼe lua, ʼe ’i ai te tahi age fakatu’uake kei muli mai. (Apokalipesi 20:6; Filipe 3:​11) Ko te fakatu’uake ʼaia ʼe hoko anai ʼi te kele, ʼae ʼe ma’uʼuli ai anai te tokolahi ʼo natou ʼae ʼe fakatu’uake.​—Pesalemo 37:29.

 ʼE hoko feafea’i anai te fakatu’uake? Ne’e foaki e te ʼAtua te fealagia ʼae kia Sesu ke ina fakatu’uake te kau mate. (Soane 11:25) ʼE toe fakama’uli anai e Sesu “ia natou fuli ʼi te ʼu fale maka fakamanatu.” ʼE fakatu’uake anai natou mo tonatou ’uhiga takitokotahi. (Soane 5:​28, 29) Ko natou ʼae ʼe fakatu’uake ki te lagi ʼe foaki anai kia natou he sino fakalaumalie. Ko natou ʼae ʼe fakatu’uake anai ʼi te kele ʼe foaki anai kia natou he sino kakano ʼe haohaoa.​—Esaia 33:24; 35:​5, 6; 1 Kolonito 15:42-​44, 50.

 Ko ai ʼae ka fakatu’uake? ʼE ui ʼi te Tohi Tapu “ʼe ʼi ai anai he fakatuʼuake ʼo te kau faitotonu pea mo te kau heʼe faitotonu.” (Gaue 24:15) Ko te kau faitotonu ʼe ko te ʼu tagata pea mo te ʼu fafine agatonu ki te ʼAtua, ohage ko Noe, mo Sala pea mo Apalahamo. (Senesi 6:9 ; Hepeleo 11:11; Sakopo 2:​21) Ko te kau he’e faitotonu ʼe ko natou ʼae ne’e mole natou fakaʼapaʼapa ki te ʼu pelesepeto ʼo te ʼAtua ʼuhi ne’e mole natou ma’u te fealagia ʼae ke natou ako mo mahino ki ai pea mo mauli’i.

 Koia ʼae, ko ʼihi ʼe mole kei ai he tuʼakoi ʼo tanatou agakovi, pea ʼe mole toe fetogi anai natou. Ko te fakaʼuhiga ʼo tanatou mate ʼe tautea’i anai natou ʼo talu ai; e mole kei ia natou he ʼamanaki ki te fakatu’uake.​—Mateo 23:33; Hepeleo 10:26, 27.

 ʼE hoko ʼafea te fakatu’uake? Ne’e fakakikite ʼi te Tohi-Tapu, ko te fakatu’uake ʼae ki selo ʼe hoko anai ʼi te lolotoga ʼo te ʼi heni ʼa Kilisito, pea ne’e kamata te aluʼaga ʼaia ʼi te ta’u 1914. (1 Kolonito 15:21-​23) Ko te fakatu’uake ʼae ki te kele ʼe hoko anai ʼi te lolotoga Taki e Sesu Kilisito te kele ia Ta’u ʼe Afe, pea ʼe fakaliliu anai te kele ʼi te ʼu ta’u ʼaia ko he palatiso.​—Luka 23:43; Apokalipesi 20:​6, 12, 13.

 He koʼe ʼe fakapotopoto te tui ʼae ki te fakatu’uake? ʼE tou ma’u i te Tohi-Tapu te ʼu fakamatala ʼe hiva ki te fakatu’uake ʼe matala lelei, pea ne’e fakamo’oni ki ai ʼihi. (1 Hau 17:17-​24; 2 Hau 4:​32-​37; 13:20, 21; Luka 7:​11-​17; 8:​40-​56; Soane 11:38-​44; Gaue 9:​36-​42; 20:​7-​12; 1 Kolonito 15:​3-6) Ko te fakatu’uake ʼo Lasalo ne’e logo sino, ʼuhi ne’e kua ʼosi ki ai ʼaho ʼe fa ki tana mate ʼi te temi ʼae ne’e fakatu’uake ai e Sesu ia muʼa ʼo te tokolahi. (Soane 11:39, 42) Maʼia mo natou ʼae ne’e fakafeagai kia Sesu, ne’e mole feala ke natou fakafihi’i te ʼu mo’oni ʼaia. Koia ʼae ne’e natou fonofono ke natou matehi ia Sesu pea mo Lasalo.​—Soane 11:47, 53; 12:​9-​11.

 ʼE fakaha ʼi te Tohi-Tapu ʼe feala ki te ʼAtua ke ina toe fakatu’uake te kau mate ki te ma’uli pea ʼe loto ki ai. ʼE mole anai galo he tahi ia ia, ʼe ina ilo’i te ʼuhiga ʼo tatou takitokotahi ke ina toe fakatu’uake ʼaki tona malohi. (Sopo 37:23; Mateo 10:30; Luka 20:37, 38) ʼE feala ke fakatu’uake e te ʼAtua te kau mate, pea ʼe loto moʼoni ki ai. ʼO ʼuhiga mo te fakatu’uake, ʼe ui ʼi te Tohi-Tapu ʼe fakaʼamu malohi te ʼAtua ke toe sio ki te gaue ʼo tona ʼu nima.​—Sopo 14:15.

Te manatu ʼa ʼihi ʼo ʼuhiga mo te fakatu’uake

 Te manatu ʼa te tagata: Ko te fakatu’uake ʼe ko te fakatahi ʼa te laumalie pea mo te sino.

 Te manatu ʼae ʼe mo’oni: ʼE ako’i mai ʼi te Tohi-Tapu ʼe ko te laumalie ʼe ko te tagata katoa, kae ʼe mole ko he koga ʼe to kehe mai tona sino pea ʼe mole feala ke mate. (Senesi 2:7, nota; Esekiele 18:4) Ko he tahi ne’e fakatu’uake ʼe fakaʼuhiga ki he tagata katoa, kae ʼe mole tou palalau ki he tahi ne’e fakapipiki mai ki ai tona laumalie. ʼI tona fakatu’uake, ʼe toe liliu ko he laumalie ma’uli.

 Te manatu ʼa te tagata: Ko ʼihi ne’e fakatu’uake ke matehi atu aipe.

 Te manatu ʼae ʼe mo’oni: “Ko natou ʼae ne’e natou fai te ʼu me’a ʼae ʼe kovi” ʼe ‘fakatu’uake anai natou ki te fakamau.’ (Soane 5:​29) Kae ko te fakamau ʼaia ʼe fakatafito anai ki te ʼu me’a ʼae ka natou fai ʼi te hili ʼo tonatou fakatu’uake, kae mole ki te ʼu me’a ʼae ne’e kua natou fai ʼi mu’a atu. Ne’e ui fenei e Sesu: “Ka logo anai te kau mate ki te leʼo ʼo te ʼAlo ʼo te ʼAtua, pea ko natou ʼae neʼe fakalogo ki ai, ʼe natou maʼuʼuli anai.” (Soane 5:25) Ko natou ʼae, ʼi te hili ʼo tonatou fakatu’uake, ʼe “fakalogo” anai ʼo maʼuli’i te ʼu fakatotonu ʼa te ʼAtua, ʼe tohi anai tonatou ʼu higoa ʼi “te takaiga tohi ’o te ma’uli.”​—Apokalipesi 20:12, 13.

 Te manatu ʼa te tagata: ʼI tona fakatu’uake, ʼe toe ma’u pe ʼe ia ʼaeni tona sino ʼafea ʼae ne’e ina ma’u ia mu’a ʼo tana mate.

 Te manatu ʼae ʼe mo’oni: Ka mate he tahi, ko tona sino ʼe toe liliu ʼo efu.—Ekelesiasi 3:​19, 20.