Ko te sakilifisio ’o Sesu ’e ko te puleʼaki pe ʼaia ne’e fai e te ʼAtua mo’o faka’ateaina’i pea mo haofaki te hahaʼi fuli mai te agahala pea mo te mate. ʼI te Tohi-Tapu, ’e fakaʼuhiga te ta’ata’a ʼae ne’e liligi e Sesu ko he totogi. (Efeso 1:7; 1 Petelo 1:​18, 19) Koia ne’e ui e Sesu ne’e haʼu moʼo “foaki tona maʼuli ko he totogi ma’a te tokolahi.”​—Mateo 20:28, Bible du roi Jacques.

He koʼe neʼe ʼaoga ‘he totogi ma’a te tokolahi’?

 Ko Atama, te ʼuluaki tagata, ne’e fakatupu haohaoa. Ne’e ina maʼu te fealagia ʼae ke maʼuli ’o he’e gata, kae ne’e mole ina taupau te fealagia ʼaia he ne’e ina filifili ke talagata’a ki te ʼAtua. (Senesi 3:​17-​19) Pea ki muli mai, ne’e ina tuku holo ki ʼana fanau te agahala mo te heʼe haohaoa. (Loma 5:1​2) Ko te tupu’aga ʼaia ’e ui ’i te Tohi-Tapu ko Atama ne’e ina “fakatau” ia ia mo tona hologa. (Loma 7:​14) ʼI tona uhiga he’e haohaoa, ne’e mole feala ai ki tona hologa ke natou totogi te meʼa ʼae ne’e pulihi e Atama.​—Pesalemo 49:​7, 8.

 Ne’e ʼofa mamahi te ʼAtua ki te hologa ’o Atama, ʼuhi ʼae ne’e mole kei ’i ai hanatou ʼamanaki. (Soane 3:​16) Kae, ko te ’u lekula faitotonu ’o te ʼAtua ’e natou fakatokaga ke ʼaua na’a mea noa’i te ’u agahala pe’e ko te fakamolemole ʼo he agahala kae mole hona fakatafito’aga lelei. (Pesalemo 89:14; Loma 3:​23-​26) ʼAki te ʼofa ’o te ʼAtua ki te hahaʼi, ne’e ina foaki he meʼa ʼofa ’e tau, mole gata’aki pe te fakamolemole ’o ʼanatou agahala kae ke natou toe maʼu te maʼuli haohaoa. (Loma 5:​6-8) Ko te meʼa ʼofa ʼaia ’e ko te totogi.

Kotea te ʼaoga ’o te totogi?

 ʼI te Tohi-Tapu, ko te kupu “totogi” ’e fakaʼuhiga kia aluʼaga ’e tolu:

1.   ʼE ʼaoga mo’o totogi ’o he meʼa pe’e ko he maʼuli.​—Numelo 3:​46, 47.

2.   ʼE ina fakafealagia ia he faka’ateaina’i ʼo he tahi, pe’e toe totogi he meʼa ne’e kua ʼosi fakatau.​—Ekesote 21:30.

3.   ʼE tauhoa ia mo te maʼuhiga ’o te meʼa ʼae ’e tonu ke totogi, ’e mata tau ia mo te pa’aga ʼae kole mai. a

 Tou vakaʼi te pikipikiga ’o te ’u aluʼaga ʼaeni ’e tolu pea mo te sakilifisio ’o Sesu.

1.   Totogi. ʼE ui ʼi te Tohi-Tapu ko te kau Kilisitiano ‘ne’e totogi natou ʼaki he totogi lahi.’ (1 Kolonito 6:​20; 7:​23) Ko te totogi ʼaia ko te ta’ata’a ’o Sesu, ʼae ne’e ina “totogi maʼa te ʼAtua he hahaʼi mai te ʼu telepi fuli, mo te ʼu lea fuli, mo te ʼu lanu fuli pea mo te ʼu fenua fuli.”—Apokalipesi 5:​8, 9.

2.   Faka’ateaina’i. Ko te sakilifisio ’o Sesu ’e ina foaki he “totogi ʼe feala ai ke fakaʼateainaʼi tatou mai te agahala.”—1 Kolonito 1:30; Kolose 1:​14; Hepeleo 9:​15.

3.   ’E matatau. Ko te sakilifisio ’o Sesu ’e tatau mo te maʼuli haohaoa ʼae ne’e pulihi e Atama. (1 Kolonito 15:21, 22, 45, 46) ’E ui ’i te Tohi-Tapu: “ʼAki te talagataʼa ʼa te tagata pe ʼe tahi kua agahala ai te hahaʼi tokolahi, ʼo toe feia aipe, ʼaki te fakalogo ʼa te tagata pe ʼe tahi ʼe faitotonu anai te hahaʼi tokolahi ia muʼa ʼo te ʼAtua.” (Loma 5:​19) ’E fakamahino ’i te vaega ʼaeni pe ne’e feafea’i te mate ’a te tagata ’e tahi moʼo foaki tona maʼuli ko he totogi ma’a te kau agahala. Koia, ko te sakilifisio ’o Sesu ’e ko “te totogi ʼae neʼe ʼaoga moʼo fakaʼateainaʼi te hahaʼi fuli,” ko tona ʼuhiga ma’a natou fuli ʼae ’e natou fia ma’u te ’u lelei ’o te totogi.”​—1 Timoteo 2:​5, 6.