ʼI te Tohi-Tapu, ʼe tau fakahigoaʼi Sesu ko “te ʼAlo ʼo te ʼAtua.” (Soane 1:49) Ko tona ʼuhiga ko te “ʼAlo ʼo te ʼAtua” ʼe ina fakamoʼoni ko te ʼAtua ʼe ko te Tupuʼaga, peʼe Matapuna ʼo te mauli, ʼo feia ki te maʼuli ʼo Sesu. (Pesalemo 36:9; Apokalipesi 4:11) ʼE mole ako’i mai ’i te Tohi-Tapu ko te ʼAtua ko he Tamai ohage ko te hahaʼi fuli ʼae ’e maʼu fanau.

 ʼE toe ui ʼi te Tohi-Tapu, ʼe fakahigoa te kau ʼaselo ko “te ʼu foha ʼo te ʼAtua moʼoni.” (Sopo 1:6) Pea ʼe toe fakahigoa te ʼuluaki tagata, ia Atama ko te “foha ’o te ʼAtua.” (Luka 3:38) Kae, ʼe talanoa ʼi te Tohi-Tapu kia Sesu ʼe ko te foha maʼuhiga pe ʼaia ʼo te ʼAtua koteʼuhi ko ia ne’e ko te ʼuluaki fakatupu totonu ʼa te ʼAtua ’i muʼa ’o te fakatupu ’o meʼa maʼuli fuli pe.

•  Neʼe maʼuli koa Sesu ʼi selo ʼi muʼa ʼi tana tupu ʼi te kele?

•  Kotea neʼe fai e Sesu ʼi muʼa ʼo tana haʼu ki te kele?

 ʼEi. ʼI muʼa ʼo tana tupu tagata ʼi te kele, ko Sesu neʼe ko he laumalie maʼuli ʼi selo. Ne’e ina ui totonu: “Neʼe . . . au hifo mai selo.”—Soane 6:38; 8:23.

 Neʼe fakatupu e te ʼAtua ia Sesu ʼi muʼa ʼo tana fakatupu ia meʼa fuli. ʼE ui fenei e te Tohi-Tapu ʼo ʼuhiga mo Sesu:

•   “ʼE ko ia . . . te ʼuluaki tupu ʼo meʼa fuli ʼae neʼe fakatupu.”—Kolose 1:15.

•   ʼE ko ia “te kamataʼaga ʼo te fakatupu ʼa te ʼAtua.”—Apokalipesi 3:14.

 Ne’e fakahoko e Sesu te lea fakapolofeta ʼo uhiga mo ia ‘ʼae ʼe maʼuli talu mai te ʼu temi ʼafeā, talu mai te ʼu ʼaho ʼo te ʼu temi heʼe gata.’—Mikea 5:2; Mateo 2:4-6.

 Neʼe ina maʼu he tuʼulaga maʼoluga ʼi selo. Ne’e ina ui ʼi tana faikole: “Tamai, fakakololiaʼi au . . . ʼaki ia te kololia ʼae neʼe au maʼu ʼi ʼou tafa ʼi muʼa ʼo te fakatupu ʼo te malama ʼaeni.”—Soane 17:5.

 Neʼe tokoni ki tana Tamai ki te fakatupu ʼo meʼa fuli pe. Neʼe kaugā gaue Sesu mo te ʼAtua ‘ohage he tagata gaue faiva.’ (Ta’aga Lea 8:30) ʼO ʼuhiga mo Sesu ʼe ui ʼi te Tohi-Tapu: “ʼAki ia ia neʼe fakatupu ia meʼa fuli ʼae, te ʼu meʼa ʼae ʼi te lagi pea mo te ʼu meʼa ʼae ʼi te kele.”—Kolose 1:16.

 Neʼe fakaʼaogaʼi e te ʼAtua ia Sesu mo’o fakatupu ia meʼa fuli. Neʼe ina toe fakatupu te kau ʼaselo pea mo te ʼatulaulau. (Apokalipesi 5:11) Koia, ʼe kaugā gaue te ʼAtua mo Sesu ohage ko te gaue fakatahi ’a he tufuga faipāki pea mo he tagata faʼu fale. Ko te tufuga ʼe ina fai te ’u pāki ʼo te fale pea ʼe mulimuli ki ai te tagata faʼu fale ki te fakatuʼu ʼo te ʼapi.

 ʼE ko ia te Folafola. ʼI tana maʼuli ʼi selo ʼe ui ʼi te Tohi-Tapu neʼe ko te higoa ʼo Sesu ko te “Folafola.” (Soane 1:1) Koia, ko tona fakaʼuhiga ʼae, neʼe fakaʼaogaʼi e te ʼAtua tona ʼAlo moʼo ʼave tana folafola pea mo ni fakatotonu ki ʼihi atu kau ʼaselo.

 ʼE mahino neʼe toe fakaʼaogaʼi e te ʼAtua ia Sesu ko hana tagata ʼave folafola ki te hahaʼi. ʼI tana foaki teʼ u fakatotonu kia Atama mo Eva ’i te ʼoloto ’o Eteni ne’e palalau te ʼAtua ʼaki ia Sesu, te Folafola. (Senesi 2:16, 17) Lagi ko Sesu te ʼaselo ʼae ne’e ina taki te kau Iselaele ’i te toafa pea ne’e tonu ke natou talagafua ki ʼana fakatotonu.—Ekesote 23:20-23. a