Ko te kau Sutea ʼo te temi muʼa, neʼe natou matataku ʼi te mahaki ʼae ko te kilia. Ko te mahaki fakamataku ʼaia ʼe ina kaina mamalie te ʼu faʼahi kehekehe ʼo te sino. Neʼe mole he faitoʼo neʼe maʼu ki te mahaki ʼaia ko te kilia. Kaʼe, ko natou ʼae neʼe kau ʼi te mahaki ʼaia neʼe mole nonofo fakatahi mo te hahaʼi pea neʼe tonu ke natou fakaha ki te hahaʼi ʼe natou kilia.—Levitiko 13:45, 46.

Neʼe fai e te kau takitaki lotu Sutea he ʼu lao ʼo ʼuhiga mo te mahaki ʼae ko te kilia. Ko te ʼu lao ʼaia neʼe mamafa age ʼi te ʼu lao ʼae ʼi te Tohi-Tapu ʼo feala ai ke faigataʼa te maʼuli ʼo te kau kilia. Ohage la, ʼi te ʼu lao ʼa te kau lapi neʼe tonu ke nofo mamaʼo he tahi ia meta ʼe 2 mai he tahi ʼe kilia. Kaʼe, kapau ʼe matagi, neʼe tonu ke nofo mamaʼo he tahi ia meta ʼe 45 mai he tahi ʼe kilia. ʼI te manatu ʼa ʼihi Talmudistes ko te ui ʼae ʼi te Tohi-Tapu ko te kau kilia ʼe natou nonofo “i tua o te nofoaga o te hahai,” ko tona fakaʼuhiga neʼe tonu ke natou maʼuʼuli ʼi te tuʼa kolo. Pea tahi, ka sio he lapi ki he kilia ʼi te kolo, ʼe ina tuki makaʼi ia ia pea mo ui fenei age: “Alu ki tou nofoʼaga naʼa pikisia te hahaʼi.”

ʼI kehekehe leva mo te aga ʼa Sesu. Koteʼuhi neʼe lotolelei ʼo fafa pea mo fakamalolo natou kaʼe neʼe mole ina kapu ia natou.—Mateo 8:3.

Ko te mavete, neʼe ko he aluʼaga neʼe tau fihi ai te kau takitaki lotu ʼi te temi ʼo te kau apositolo. ʼI te tahi ʼaho, neʼe ʼahiʼahiʼi e ʼihi Faliseo ia Sesu ʼaki tanatou fai age te fehuʼi ʼaeni: “ ʼE gafua koa ki he tagata ke mavete mo tona ʼohoana ʼi he faʼahiga meʼa pe?”—Mateo 19:3, MN.

ʼI te Lao ʼa Moisese, neʼe fakagafua ai ki he tagata ke mavete mo tona ʼohoana mo kapau “nee [ina] mau . . . i tona ohoana he mea fakaufiufi.” (Tetelonome 24:1) Neʼe ʼi ai he ʼu kutuga ʼe lua Fakalapi neʼe tatau ʼanatou manatu pea neʼe natou fakafeagai ki te lao ʼa Moisese. Ko te kau Shamaï neʼe fefeka fau ʼanatou lao. Koteʼuhi ʼi tanatou manatu, ko te fakaʼuhiga ʼo te lao ʼaia neʼe feala ke mavete he taumatuʼa mo kapau pe neʼe ʼi ai he tahi ia naua neʼe ina fai he “aga heʼe ʼaoga,” ko tona fakaʼuhiga neʼe tono. Ko te kau Hillel, neʼe lagolago ia ki te manatu ʼae ʼe feala ki te tagata hana mavete mo tona ʼohoana ʼuhi ko he ʼu fihi fakataumatuʼa, tatau aipe pe neʼe mole faʼa maʼuhiga. Pea ʼi te ʼu lao ʼo te ʼu kutuga ʼaia, neʼe feala ki te tagata hana mavete mo tona ʼohoana mo kapau neʼe mole poto lelei ʼi te gaohi meʼa kai, peʼe neʼe ina maʼu he tahi fafine ʼe finemui age ia.

Kaʼe, kotea te tali neʼe fai e Sesu ki te fehuʼi ʼa te kau Faliseo? Neʼe ui fakalelei fenei e Sesu: “Ko ae e ina fakamavae tona ohoana, gata pe ki te faiaga, pea e toe ohoana ia ia mo he tahi age fafine, e ina fai he tono.”—Mateo 19:6, 9.