Neʼe au tupu ʼi te kolo ko Ciudad Mante, ʼi te potu fenua ko Tamaulipas, ʼi Mexique. ʼI te agamahani, ko te ʼu kiʼi kolo feia, ʼe agalelei ai te hahaʼi. Kaʼe mai tona aluʼaga ʼae neʼe ʼi ai te kautahi faifakapo, neʼe liliu ai te kolo ʼo kovi.

Ko ʼoku tehina ʼe toko tolu, pea neʼe au tuʼulaga lua. Neʼe papitemaʼi au e ʼaku matuʼā ʼi te Lotu Katolika. Ki muli age neʼe au kau ki te kau hiva ʼo te ʼekelesia. Neʼe au mataku naʼa fakamauʼi au e te ʼAtua pea ke tutu au ʼi te ʼifeli ʼo talu ai. Koia neʼe au fia fakafiafiaʼi ai te loto ʼo te ʼAtua.

Neʼe mavae taku tamai ʼi te loto fale ʼi toku taʼu nima. Neʼe au lotomamahi ʼaupito. Neʼe mole au mahino ki te tupuʼaga ʼo tana liaki matou, kaʼe neʼe matou ʼoʼofa mamahi ai. Neʼe gaue kinakina taku faʼe ke ina tauhi matou toko fa.

Neʼe au fai leva te meʼa ʼae neʼe au loto ki ai. Neʼe au to ako pea mo fakatahi mo te ʼu tama kua lalahi. Neʼe natou akoʼi au ke au faitauvele, mo suluka, mo kaihaʼa, pea mo fuhu. Mai tona aluʼaga ʼae neʼe au fia toʼa, neʼe au ako ai te fuhu pea mo te fakaʼaogaʼi ʼo te ʼu mahafu. Neʼe au liliu ai ʼo agamalohi. Neʼe au kau tuʼa lahi ki te ʼu faifana. Pea tuʼa lahi neʼe au lavea kovi ʼo meihiʼi pe ke au mate. Neʼe lotomamahi tuʼumaʼu taku faʼe moka ina maʼu au, ʼe au takoto ʼi te ala, neʼe kua au lavea pea ina ʼave fakavilivili au ki te lopitali.

ʼI toku taʼu 16, neʼe haʼu toku kaumeʼa lelei neʼe higoa ko Jorge, ʼo ʼaʼahi matou. Neʼe ina ui mai ko ia ko he Fakamoʼoni ʼa Sehova pea neʼe ina fia vaevae mo matou ia he logo maʼuhiga. Neʼe ina kamata fakamahino mai te ʼu akonaki ʼae neʼe tui ki ai, mo ina fakaʼaogaʼi ia te Tohi-Tapu. Neʼe heʼeki au lau ia te Tohi-Tapu. Pea neʼe au fia iloʼi pe ko ai te huafa ʼo te ʼAtua pea mo ʼana fakatuʼutuʼu. Neʼe kole mai e Jorge pe ʼe matou fia ako ia te Tohi-Tapu, pea neʼe matou tali.

Neʼe au fiafia ʼi taku iloʼi te moʼoni ʼo ʼuhiga mo te ʼifeli. Neʼe mole ko he akonaki Fakatohi-tapu. (Pesalemo 146:4; Ekelesiasi 9:5) Neʼe mole kei au mataku ʼi te fakaovi ki te ʼAtua. Neʼe au mahino ai ʼe ko he Tamai ʼe ʼofa ki ʼana fanau.

 Neʼe haʼele lelei taku ako Tohi-Tapu, pea neʼe au mahino leva ʼe tonu ke au fetogi toku ʼuluagaaga. Neʼe tonu ke au ako te agavaivai pea ke au fakagata taku agamalohi. Ko te tokoni ʼae ʼe tuʼu ia 1 Kolinito 15:33, neʼe tokoni mai kia au. ʼE ui fenei ai: “E maumaui e te u kaumea kovi te u agalelei.” Neʼe au mahino ai, kapau ʼe au fia fetogi toku ʼuluagaaga, ʼe tonu ke au fakagata taku fakatahi mo natou ʼae ʼe natou uga au ke au fai te ʼu aga ʼae ʼe kovi. Koia neʼe au fakatahi leva mo te ʼu tehina mo tuagaʼane ʼo te kokelekasio Fakakilisitiano. Ko natou ʼaia ʼe natou fakatokatoka ʼonatou fihifihia, mole ʼaki te agamalohi, kaʼe ʼaki te ʼu pelesepeto Fakatohi-tapu.

Neʼe ʼi ai te tahi vaega Tohi-Tapu neʼe malave ki toku loto, ko te vaega ʼo Loma 12:17-19. ʼE ui fenei: “Aua naa kotou totogi ki he tahi te kovi aki te kovi. . . . Kapau e feala, pea e fakalogo kia koutou, ke kotou mauli i te tokalelei mo te u tagata fuli. Aua naa kotou taui koutou totonu, . . . koteuhi e tuu i te Tohi: E ui e [Sehova]: A aku te lagavaka, a aku te totogi.” Neʼe au mahino leva, ʼe fakatokatoka anai e Sehova te ʼu aluʼaga heʼe faitotonu ʼi tona temi totonu. ʼAki te temi, neʼe mole kei au agamalohi leva.

ʼE kei au manatuʼi pe te afiafi ʼae neʼe au toe liliu ai ki toku ʼapi. Neʼe ʼomai te kiʼi kutuga ʼo natou fia ta au. Neʼe ko ʼoku fili ʼi muʼa atu. Pea neʼe haʼu tonatou pule ʼo ui mai ke ma fuhu. Neʼe au faikole atu aipe kia Sehova, ke tokoni mai ke au lava katakiʼi te aluʼaga ʼaia. Logo la toku ita, kaʼe neʼe au hola. ʼI te ʼaho ake, neʼe au toe felaveʼi mo te tama ʼaia. Logo la neʼe au ita mo au fia lagavaka, kaʼe neʼe au toe faikole kia Sehova, ke tokoni mai ke au lolomi toku ita. Neʼe au punamaʼuli koteʼuhi neʼe haʼu fakahagatonu te tama kia au pea mo ina ui mai: “Fakalelei mai ʼo ʼuhiga mo te aluʼaga ʼae neʼe hoko ʼanafi. Sio koe, ʼi tona fakahagatonu,ʼe au fia fetogi toku maʼuli ke au hage ko koe. ʼE au fia ako te Tohi-Tapu.” Neʼe au fiafia ʼi taku lava lolomi toku ita ʼanafi. Neʼe au kamata ai leva tana ako Fakatohi-tapu.

Meʼa fakaʼofaʼofa, he ʼi te temi ʼaia neʼe mole hoko atu e toku famili, tanatou akoʼi te Tohi-Tapu. Kaʼe neʼe au fakatotonu malohi ke au hoko atu taku ako. Neʼe au iloʼi, kapau ʼe au fakatahi tuʼumaʼu mo te hahaʼi ʼa te ʼAtua, ʼe natou fakafimalieʼi anai toku loto, pea ʼe natou liliu anai ko toku famili. Neʼe hoko atu pe taku tuputupu ʼi te faʼahi fakalaumalie. Pea ʼi te taʼu 1991, neʼe au papitema leva, ʼo au liliu ai ko he Fakamoʼoni ʼa Sehova.

ʼI muʼa atu, neʼe au agakovi, mo fia toʼa pea mo agamalohi. Pea neʼe fetogi toku maʼuli ʼuhi ko te Folafola ʼa Te ʼAtua. ʼI te temi nei, ʼe au fakamafola te logo lelei ʼo te Tohi-Tapu ki te hahaʼi. Kua taʼu 23 nei taku faifakamafola temi katoa.

ʼI te tahi temi, neʼe au gaue ʼi te filiale ʼa te kau Fakamoʼoni ʼa Sehova ʼi Mexique. Neʼe au felaveʼi ai mo te tuagaʼane neʼe higoa ko Claudia, pea neʼe ma ʼohoana ʼi te taʼu 1999. ʼE au fakafetaʼi kia Sehova ʼi tana foaki mai hoku kaugā gaue agatonu.

ʼE ma kau ki te kokelekasio ʼe palalau ʼi te Lea Fakatuli ʼo Mexique. ʼE ma tokoni ki te kau tuli ke natou ako ʼo ʼuhiga mo Sehova. Ki muli age, neʼe fakaafe maua ke ma olo ʼo faifakamafola ʼi te fenua ko Bélize. Logo la neʼe ma maʼuli fakafeʼauga, kaʼe neʼe ma maʼu pe ia meʼa fuli neʼe ʼaoga ki toma maʼuli. Neʼe ma fiafia ʼaupito.

ʼI te temi ʼaia, neʼe toe toʼo e taku faʼe tana ako Tohi-Tapu pea neʼe papitema leva. ʼO toe feia pe mo toku taʼokete mo tona ʼohoana pea mo ʼana fanau, kua natou kau nei ki te kau Fakamoʼoni ʼa Sehova. Ko ʼihi ʼi ʼoku kaumeʼa ʼae neʼe au fakaha kia natou te logo lelei ʼo te Puleʼaga, kua natou tauhi nei kia Sehova.

Meʼa fakaʼofaʼofa, ko ʼihi ʼi toku famili kua mamate koteʼuhi neʼe mole natou fia fetogi tanatou agamalohi. Ka na pau la neʼe mole au fetogi taku aga, kua au lagi mate nei ohage pe ko natou. ʼE au fakafetaʼi kia Sehova ki tana taki au kia te ia pea mo tana hahaʼi, mo tana ʼofa ʼae ʼo akoʼi au ʼaki he faʼa kataki, ke au maʼuliʼi te ʼu pelesepeto Fakatohi-tapu.