ʼE HA ʼi te ʼu alatike ʼae kua ʼosi atu moka hoko he ʼu aluʼaga ʼe fakatupu mamahi ʼe faigataʼa ai leva te maʼuli. ʼE lagi ke ʼamo nei he kavega ʼe mamafa, pea ʼe ke feuiʼaki pe ʼe tokagaʼi koa koe e he tahi peʼe kei ʼaoga koa ke ke maʼuli. Manatuʼi ʼe tokagaʼi pe e te ʼAtua tou lotomamahi. ʼE maʼuhiga tou maʼuli kia te ia.

Neʼe fakaha e te tagata faipesalemo tana falala ʼae ki te ʼAtua: “E au fetapa kia koe i te aho o toku mamahi, koteuhi e ke tali aku kole.” (Pesalemo 86:7) ʼE feala ke ke fai te fehuʼi ʼaeni: ‘ ʼE tali feafeaʼi e te ʼAtua ʼaku kole “i te aho o toku mamahi”?’

ʼE mole pulihi atu aipe e te ʼAtua ʼou fihifihia, kae ʼe ina foaki ia te tokalelei ʼaki tana Folafola, ia te Tohi-Tapu: “ ʼAua naʼa kotou tuʼania ki he meʼa, kaʼe ʼi te temi fuli ʼaki te faikole mo te kole mamahi pea mo te fakafetaʼi, kotou fakaha ki te ʼAtua ʼakotou kole, pea ko te tokalelei ʼo te ʼAtua ʼae ʼe maʼoluga age ʼi te ʼu ʼatamai fuli, ʼe ina taupau anai ʼokotou loto pea mo ʼokotou fealagia fakakaukau.” (Filipe 4:6, 7, nota) Koʼeni ni vaega ʼo te Tohi-Tapu ʼe ha ai ʼe tokaga moʼoni ia te ʼAtua ki te tagata.

“ ʼE mole he [misi] ʼe galoʼi e te ʼAtua. . . . ʼE kotou maʼuhiga age ʼi he faga misi.” —Luka 12:6, 7, nota.

FAKAKAUKAUʼI AGE MUʼA: Ko te kiʼi manulele ʼaeni ko te misi ʼe tahitahiga tona tokagaʼi e te tagata kae ʼe sio ia te ʼAtua ki te ʼu misi takitokotahi. ʼE maʼuhiga ia te maʼuli ʼo te ʼu kiʼi manu ʼaia kia te ia. Kae ʼe maʼuhiga age pe te maʼuli ʼo te tagata kia mata ʼo te ʼAtua. Pea ʼe ko tona fakatupu ʼaia ʼe fakaofoofo tokotahi. Neʼe fakatupu ia e te ʼAtua ʼo fakatatau ki tona pāki ʼo feala ai ke faʼifaʼitakiʼi e te tagata ʼona kalitate maʼoluga.—Senesi 1:26, 27.

“Sehova! Neʼe ke sivisivi au pea ʼe ke iloʼi au. . . . ʼE ke tokagaʼi ʼaku manatu . . . Sivisivi au, pea mo ke iloʼi ʼoku tuʼania.”—Pesalemo 139:1, 2, 23, MN.

FAKAKAUKAUʼI AGE MUʼA: ʼE iloʼi lelei koe e te ʼAtua. ʼE mole lagi malama he tahi ki te ʼu manatu ʼae ʼi tou loto mo ʼau tuʼania gata pe ko te ʼAtua pea ʼe fia tokoni atu. ʼE mole ke maʼu ai koa la he ʼuhiga ki tou maʼuli?

“ [Sehova] fakalogo mai ki taku kole, pea ke kaku atu taku tagi kia koe! . . . Fakalogo mai tou taliga kia au moka au tagi atu kia koe! Vave o tali mai kia au! . . . E tokaga ia ia ki te kole a te tagata e mamahi.”—Pesalemo 102:2, 3, 18.

FAKAKAUKAUʼI AGE MUʼA: ʼE tanaki e te ʼAtua te ʼu loʼimata fuli ʼo te tagata talu tana fakatupu. (Pesalemo 56:9) ʼE toe iloʼi lelei pe e te ʼAtua ko ʼou loʼimata ʼe fia neʼe maligi ʼuhi ko te ʼu faigataʼaʼia ʼo tou maʼuli. ʼE mole ha ai koa la ʼe ke maʼuhiga kia te ia?

“Aua naa ke feaveaki ni mata tuania, koteuhi ko au ko tou Atua. E au fakamalohii ia koe, e au hau o tokoni kia koe . . . Ko au ko [Sehova] tou Atua, . . . ae e ui atu kia koe: Aua naa ke mataku ki he mea, e au hau o tokoni kia koe.” —Esaia 41:10, 13.

FAKAKAUKAUʼI AGE MUʼA: ʼE fia tokoni atu ia te ʼAtua. Kapau ʼe kovi ʼaupito tau lotomamahi ʼe ina haofaki anai koe.

“Neʼe ʼofa mamahi te ʼAtua ki te malamanei ʼo ina foaki ai tona ʼAlo ʼulu tokotahi, pea ko ʼae ʼe tui kia te ia ʼe mole mate anai kaʼe ʼe ina maʼu anai te maʼuli heʼe gata.”—Soane 3:16.

FAKAKAUKAUʼI AGE MUʼA: ʼE ʼofa lahi ia te ʼAtua kia koe. Koia ʼae neʼe lotolelei ai ke ina sakilifisioʼi te maʼuli ʼo tona ʼAlo ko Sesu ke ke maʼu he ʼamanaki ʼo he maʼuli fiafia ʼe heʼe gata. *