• Filifili anai e te ʼAtua. “Ko au kua au fakanofo toku hau . . . ʼE au foaki atu kia koe te ’u pule’aga ko hou tofi’a pea mo te ’u potu taupotu ’o te kele maʼa koe.”—Pesalemo 2:6, 8, MN.

• Hifo mai anai ʼi te hologa ʼo te Hau ko Tavite. “Kua tupu kia matou he toe, kua foaki mai kia matou he foha . . . E ina fakamafola anai tana pule ki te atu puleaga, e ina tuku anai te tokalelei heegata ki te hekaaga fakahau o Tavite, mo tona puleaga, pea e ina fakamalohii anai ia ia.”—Esaia 9:5, 6.

• Tupu anai ʼi Petelehemi. “Petelehemi . . . ia koe e hau anai kia au, ae e pule anai.  . . E fakakololia anai ia ia o kaku ki te u potupotu o te kele.”—Mikea 5:1, 3.

• Fehiʼaʼinaʼi anai e te hahaʼi pea mo matehi. “Neʼe fehiʼaʼinaʼi pea neʼe mole maʼuhiga kia tatou.  . . Neʼe hukiʼi ʼuhi ko ʼatatou agahala, neʼe laliki ʼuhi ko ʼatatou hala.”—Esaia 53:3, 5, MN.

• Fakatuʼuake pea mo fakakololiaʼi anai. “ ʼE mole ke liʼaki anai au ʼi te Faitoka. Pea ʼe mole ke tuku anai ke sio tau tagata agatonu ki te luo. . . . ʼI tou faʼahi mataʼu, ʼe maʼu ai te ʼu meʼa lelei ʼo talu ai.”—Pesalemo 16:10, 11, MN.

ʼE mole he tahi ʼi te tagata ʼe tuha ke ui ko he takitaki lelei, gata tokotahi pe kia Sesu Kilisito. Koia, neʼe ui fenei e he ʼaselo kia Malia, te faʼe ʼa Sesu: ‘ ʼE foaki age anai e te ʼAtua te hekaʼaga fakahau ʼo Tavite tana tamai, pea ʼe mole he gataʼaga anai ʼo tona Puleʼaga.’—Luka 1:31-33.

Neʼe mole pule ia Sesu ʼi tana ʼi te kele. Kae ʼe ina puleʼi anai te kele mai te lagi ʼi tona ʼuhiga Hau ʼo te Puleʼaga ʼo te ʼAtua. He koʼe ʼe ui ko he takitaki lelei? Tou vakaʼi te ʼu gaue ʼae neʼe ina fai ʼi tana ʼi te kele.

•   Neʼe agalelei ki te hahaʼi. Neʼe tokoni ia Sesu ki te hahaʼi tagata mo fafine, mo te ʼu fanau pea mo te hahaʼi matuʼa, tatau aipe tonatou haʼuʼaga peʼe natou koloaʼia mo masisiva. (Mateo 9:36; Maleko 10:16) Ohage la, neʼe kole mamahi e he tagata kilia kia Sesu: “Kapau ʼe ke loto ki ai, ʼe feala ke ke fakamaʼa au.” Pea neʼe ʼofa mamahi leva ki ai pea neʼe ina fakamalolo te tagata ʼaia.—Maleko 1:40-42.

• Neʼe ina akoʼi pe feafeaʼi hatatou fakafiafiaʼi te loto ʼo te ʼAtua. Neʼe ui fenei e Sesu: “ ʼE mole feala ke kotou kaugana ki te ʼAtua pea mo te Paʼaga.” Neʼe ina toe ui ke tou fai ki ʼihi te meʼa ʼae ʼe tou loto ke fai mai kia tatou. Pea ʼe ko he Lekula Maʼuhiga ʼaia. Neʼe ina fakaha ʼe mole tokagaʼi pe e te ʼAtua te ʼu meʼa ʼe tou fai kae ʼe ina toe tokagaʼi ʼatatou manatu mo te ʼu meʼa ʼae ʼe tou logoʼi. Kae ʼe tonu ke tou lolomi te ʼu meʼa ʼae ʼi ʼotatou loto moʼo fakafiafiaʼi te loto ʼo te ʼAtua. (Mateo 5:28; 6:24; 7:12) Pea tahi, neʼe ina fakaha lelei ʼe tonu ke tou ako te ʼu faʼahi ʼae ʼe loto ki ai te ʼAtua pea mo maʼuliʼi ke tou fiafia moʼoni ai.—Luka 11:28.

• Neʼe ina akoʼi pe kotea te ʼofa. Neʼe malave te ʼu palalau ʼa Sesu mo ʼana gaue ki te ʼu loto ʼo te hahaʼi. “Neʼe punamaʼuli ai te hahaʼi kaugā malie ʼi tana faʼahiga faiakonaki, koteʼuhi neʼe ina akoʼi natou ohage ko he tahi ʼe ina maʼu te pule.” (Mateo 7:28, 29) Neʼe ina akoʼi age kia natou: “Kotou haga ʼoʼofa ki ʼokotou fili.” Pea neʼe ina toe hufakiʼi ia natou ʼae neʼe kau ki tona matehi: “Tamai, fakamolemole age kia natou koteʼuhi ʼe mole natou iloʼi te meʼa ʼae ʼe natou fai.”—Mateo 5:44; Luka 23:34.

ʼE maʼu e Sesu te ʼu kalitate fuli ʼae ke liliu ai ko he tagata takitaki lelei ʼo te malamanei, ʼe agalelei pea mo manavaʼofa. Kae ko ʼafea ʼae ka pule ai anai?