ʼE mole faigafua te kumi ʼo he meʼa ʼofa ʼe lelei tukupau ki he tahi. Ko ia pe ʼae ka ina tali te meʼa ʼofa, ʼe feala ke ina ui pe neʼe lelei te meʼa ʼofa. ʼE takitahi pe te tagata mo tona fiafaiʼaga.

Ohage la ko he tupulaga, he meʼa ʼofa ʼe ina leleiʼia ko he kiʼi masini toʼotoʼo foʼou. Kae ki he tahi kua lahi, ʼe maʼuhiga age ki ai he ʼu koloa fakafamili. ʼI ʼihi fenua leva, ʼe leleiʼia e te hahaʼi moka ʼe foaki age he foʼi falā, ke feala ai hanatou totogi te meʼa ʼae ʼe natou loto ki ai.

Logo la ʼe mole faigafua, kae ʼe haga kumi pe e te tokolahi he meʼa ʼofa ʼe tuha mo he tahi ʼe natou ʼoʼofa ai. ʼE mole feala ke tou maʼu tuʼumaʼu te meʼa ʼofa ʼaia. Koia, ʼe lelei ai ke tou tokagaʼi ʼihi aluʼaga ʼe tokoni mai anai ke tou filifili ia he meʼa ʼofa ʼe lelei. Tou vakaʼi ia aluʼaga ʼe fa ʼe feala ke fiafia ai ia ia ʼae ka ina tali ia te meʼa ʼofa.

Tona fiafaiʼaga. ʼE manatuʼi e te tagata ʼi Belfast, ʼi te Potu Noleto ʼo Irlande, te temi ʼae neʼe foaki age ai tana lelue, ʼi tana kei taʼu 10 peʼe 11. Ko tana hoki maʼu ʼaia te meʼa ʼofa ʼe ina leleiʼia. Kotea tona tupuʼaga? ʼE ina fakamahino fenei: “Neʼe ko toku fiafaiʼaga ʼaia.” ʼE ha ʼi ʼana palalau neʼe ina leleiʼia moʼoni te meʼa ʼofa ʼaia. Koia kotou manatuʼi ia ia ʼae ʼe kotou fia foaki ki ai he meʼa ʼofa pe ʼe kotea ʼae ʼe maʼuhiga ki ai. ʼE kotou iloʼi ai tona fiafiaʼaga. Ohage la, ʼe fiafia te ʼu kui moka ʼe fakatahi te famili. ʼE lagi natou loto anai ke natou fakatahi tuʼumaʼu mo ʼanatou fanau pea mo ʼonatou mokopuna. Kapau ʼe kotou olo fakatahi mo ʼakotou kui ʼo malolo, ʼe natou fiafia age anai ʼi he tahi age meʼa ʼofa.

Kapau ʼe kotou fia iloʼi pe kotea ʼae ʼe fia fai ki ai he tahi, ʼe tonu ke kotou fagono lelei. ʼE ui fenei ʼi te Tohi-Tapu: “Ke lotolelei ʼo fagono, ke tuai ʼi te palalau.” (Sakopo 1:19) Ka kotou faipalalau mo ʼokotou kaumeʼa peʼe ko natou ʼo tokotou famili, kotou fakalogo lelei mo tokagaʼi te ʼu meʼa ʼae ʼe natou leleiʼia mo ʼae ʼe mole natou leleiʼia. Kapau ʼe kotou fai te faʼahi ʼaia, ʼe feala anai ke kotou filifili he meʼa ʼofa ʼe natou leleiʼia.

 Te ʼu meʼa ʼae ʼe ʼaoga ki ai. ʼE fiafia he tahi mo kapau ko he meʼa ʼofa ʼe ʼaoga ki tona maʼuli. Kae ʼe feafeaʼi hakita iloʼi te meʼa ʼae ʼe ʼaoga ki he tahi?

ʼE feala pe ke tou iloʼi vave te meʼa ʼae ʼe fia fai ki ai he tahi mo kapau ʼe tou fehuʼi fakahagatonu ki ai. Kae tokolahi ʼe natou leleiʼia mo kapau ko he meʼa ʼofa ʼe natou punamaʼuli ai. Ko ʼihi ʼe natou fia palalau faʼifaʼitaliha ki te ʼu meʼa ʼae ʼe natou leleiʼia mo ʼae ʼe mole natou leleiʼia. Kae ʼe ʼi ai ʼihi ʼe mole natou fia fakaha ʼanatou manatu.

Koia kotou fakakaukauʼi te aluʼaga ʼo ia ʼae ʼe kotou fia foaki ki ai he meʼa ʼofa. Peʼe ko he tahi ʼe kei tupulaga peʼe kua matuʼa, selipatea, ʼohoana peʼe kua mavete, vitua, mole hana gaue, peʼe kua letelete? Pea kotou fakakaukauʼi te meʼa ʼofa ʼae ʼe ʼaoga ki ai.

Kapau ʼe tou fia iloʼi pe kotea ʼae ʼe ʼaoga ki he tahi, ʼe lelei ke tou fakalavelave kia natou ʼae ʼe tatau ʼonatou aluʼaga ʼi tonatou maʼuli pea mo ia ʼae ʼe tou fia foaki ki ai he meʼa ʼofa. ʼE lagi feala ke natou fakaha atu he koga ʼe mole iloʼi e ʼihi. Kapau ʼe kotou fai feia, ʼe feala ai anai ke kotou foaki he meʼa ʼofa ʼe ʼaoga moʼoni ki ai kae neʼe mole manatu ki ai ʼihi.

Te temi totonu. ʼE ui fenei ʼi te Tohi-Tapu: “ ʼE ko he meʼa lelei te fai ʼo he palalau ʼi tona temi totonu!” (Taʼaga Lea 15:23, MN) ʼE fakaha mai ʼi te vaega ʼaeni te maʼuhiga ʼae ke tou filifili lelei te temi ʼae ʼe tonu ke tou fai ai he palalau. Kapau ʼe tou fai he ʼu palalau ʼi tona temi totonu, ʼe feala ke fiafia ʼaupito ai ia ia ʼae ʼe logo ki ai. ʼO toe feia pe, kapau ʼe tou foaki he meʼa ʼofa ʼi tona temi totonu, ʼe fiafia lahi anai ia ia ʼae ʼe ina tali ia te meʼa ʼofa ʼaia.

Ohage la, ʼe ʼohoana hou kaumeʼa. Kua vave maʼu e he tupulaga tona pepa ʼi te fale ako. ʼE ʼamanaki maʼu e he taumatuʼa hana fanau. Ko te ʼu temi ʼaia ʼe foaki meʼa ʼofa ai te hahaʼi. Ko ʼihi ʼe natou tohi he lisi ʼo te ʼu aluʼaga maʼuhiga ʼae ka hoko anai ki te taʼu ka haʼu. ʼE feala ai ke natou teuteuʼi fakatomuʼa te ʼu meʼa ʼofa ʼae ʼe feala ke natou foaki ʼi te ʼu aluʼaga takitahi. *

Koia, ʼe mole tou foaki meʼa ʼofa pe anai ʼi he ʼu ʼaho maʼuhiga. ʼE feala ke tou fai ʼi he temi pe. Kae ʼe tonu foki ke tou tokakaga ʼi ʼihi temi. Ohage la, kapau la ʼe foaki e he tagata he meʼa ʼofa ki he fafine, kae ʼe mole hona tupuʼaga, ʼe feala ke manatu hala ia te fafine ʼe fia fakatahi te tagata mo ia. ʼE nā femahinohalaʼaki ai pea ʼe hoko ai he ʼu fihifihia. Koia ʼe maʼuhiga ai ke tou iloʼi pe kotea ʼae ʼe ina uga he tahi ke ina foaki he meʼa ʼofa.

Te tupuʼaga ʼo te foaki. ʼE ha ʼi te faʼifaʼitaki ʼae neʼe tou palalau ki ai, ia te maʼuhiga ʼae ke tou tokakaga naʼa mahino hala he tahi ki te tupuʼaga ʼo te foaki age ʼo he meʼa ʼofa. ʼE toe maʼuhiga kia ia ʼae ʼe ina foaki te meʼa ʼofa ke ina fakakaukauʼi lelei te tupuʼaga ʼo tana fia fai te faʼahi ʼaia. Tokolahi te hahaʼi ʼe natou manatu ʼe natou foaki ʼonatou meʼa ʼofa ʼaki he loto lelei. Kae tokolahi ʼe natou foaki ʼonatou meʼa ʼofa ʼi te ʼu ʼaho lalahi ʼuhi he ʼe ko he fakamaʼua. Ko ʼihi ʼe natou foaki mo fakaʼamu ʼe toe liufaki age anai peʼe ʼe agalelei kehe age anai kia natou.

ʼE feafeaʼi hatatou iloʼi ʼe tou foaki he meʼa ʼofa ʼaki he loto ʼe lelei? ʼE ui fenei ʼi te Tohi-Tapu: “Ke kotou fai ia meʼa fuli ʼaki te ʼofa.” (1 Kolonito 16:14) Kapau ʼe kotou foaki he meʼa ʼofa he ʼe kotou ʼoʼofa moʼoni ki he tahi, ʼe ina tali fakafiafia anai takotou meʼa ʼofa. ʼE kotou logoʼi anai te fiafia lahi ʼae ʼe tupu mai te lotofoaki moʼoni. Ka kotou foaki ʼaki he loto katoa, ʼe kotou fakafiafiaʼi te loto ʼo tatatou Tamai ʼae ʼi selo. Neʼe vikiʼi e te apositolo ko Paulo te kau Kilisitiano ʼo Kolonito ʼuhi ko tanatou lotofoaki pea mo tanatou tokoni ki ʼonatou tehina masisiva mo fakaʼofaʼofa ʼo Sutea. Neʼe ui fenei e Paulo kia natou: “ ʼE ʼofa te ʼAtua ki ʼae ʼe ina foaki ʼaki he loto ʼe fiafia.”—2 Kolonito 9:7.

 Kapau ʼe tou tokagaʼi te ʼu faʼahi ʼae neʼe tou palalau ki ai, ʼe feala anai ke tou foaki he ʼu meʼa ʼofa ʼe fiafia ai te hahaʼi. Neʼe foaki e te ʼAtua te meʼa ʼofa ʼae ʼe lahi tokotahi ki te malamanei. Pea neʼe ina fai ʼo mulimuli ki te ʼu faʼahi ʼae neʼe tou vakaʼi. ʼE matou fakaafe atu koutou ke kotou lau te alatike ʼaeni ka hoa mai, ke kotou iloʼi ai pe kotea te meʼa ʼofa lahi ʼaia.