Tonatou Maʼuli
Ko Te ʼu Taupoʼou Neʼe Liliu Ko He ʼu Fakamoʼoni ʼa Sehova
“TUKU tau palalau mai. ʼE mole au fia logo ki he tahi age meʼa ʼo ʼuhiga mo tau lotu. ʼE fakatupu mahaki ʼosi ia. ʼE au fehiʼa ia koe.” Ko te ʼu palalau ʼaia neʼe fai e toku kiʼi tehina ko Araceli kua hili nei ki ai ni lauʼi taʼu, koteʼuhi neʼe ita kia au. Kaʼe neʼe mamahi toku loto ʼi ʼana palalau. Kua au taʼu 91 nei, pea ʼe kei au manatuʼi lelei ʼana palalau. Kaʼe ohage pe ko tona ui ia Ekelesiasi 7:8, “e lelei age te ikuaga o he mea i tona kamataaga.”—Felisa.
Felisa: Neʼe au lahi ake ʼi Sepania pea neʼe masiva toku famili. Neʼe matou Katolika pea neʼe matou fakamalotoloto ʼi tamatou tauhi. Ko te toko 13 ʼi ʼoku kaiga neʼe patele pe neʼe natou gaue maʼa te ʼekelesia. Ohage la, ko te tokolua mataʼi tama ʼo taku faʼe neʼe ko he patele pea neʼe faiako ʼi te fale ako Katolika. Hili tona mate, neʼe fakasagato e te Tuʼi Tapu ko Soane Paulo 2. Ko taku tamai neʼe ko te tagata gaue ukamea pea neʼe gaue taku faʼe ʼi te ʼu gaueʼaga. Neʼe matou toko valu pea neʼe ko au ʼae neʼe muʼa ʼi te fanau.
ʼI toku taʼu 12, neʼe kamata ai te tau fakasivile ʼi Sepania. Hili te tau, neʼe pilisoniʼi taku tamai koteʼuhi neʼe mole leleiʼia e te puleʼaga ʼana manatu fakapolitike. Neʼe faigataʼa ai ki taku faʼe hana taupau ia matou fuli. Koia neʼe ina fekauʼi ai ʼoku kiʼi tehina ko Araceli, Lauri, mo Ramoni ke natou olo ʼo maʼuʼuli ʼi te nofoʼaga taupoʼou ʼi te kolo ko Bilbao. Koteʼuhi ʼe feala ai anai honatou taupau.
Araceli: ʼI te temi ʼaia neʼe au taʼu 14, ko Lauri neʼe taʼu 12 pea ko Ramoni neʼe taʼu 10. Neʼe matou manatuʼi tuʼumaʼu tomatou famili. Pea ko tamatou gaue ʼi te nofoʼaga taupoʼou neʼe ko te fakamaʼa. Hili ki ai taʼu ʼe lua, neʼe fekauʼi matou e te kau taupoʼou ki te nofoʼaga taupoʼou ʼi Saragosse, ke matou tokakaga ki te hahaʼi matutuʼa. Neʼe matou gaue kinakina ʼi te fakamaʼa ʼo te fale kuka pea neʼe kovi ʼosi tomatou gaʼegaʼe.
Felisa: ʼI te temi ʼae neʼe olo ai ʼoku kiʼi tehina ki te nofoʼaga taupoʼou ʼi Saragosse, neʼe toe fekauʼi au ki ai e taku faʼe mo taku faʼe tagata ʼae neʼe ko te patele. Neʼe nā fia fakamamaʼo au mai te tama neʼe manako ia au. Kaʼe neʼe au fiafia ʼi te alu ʼo gaue lolotoga he temi ʼi he nofoʼaga taupoʼou, koteʼuhi neʼe au ʼofa ki te ʼAtua. Neʼe
au alu ki te ʼekelesia ʼi te ʼaho fuli, pea neʼe au fia liliu ko he misionea Katolika ohage ko toku tokolua mataʼi tama ʼi Afelika.Kaʼe ʼi te nofoʼaga taupoʼou, neʼe au manatu ʼe au fai anai te meʼa ʼae ʼe au loto ki ai. Neʼe mole fakalotomalohiʼi au e te kau taupoʼou ke au tauhi ki te ʼAtua ʼi he tahi age fenua, ohage ko taku fakaʼamu ki ai. Koia hili ki ai te taʼu katoa, neʼe au toe liliu ki fale ʼo tokaga ki taku faʼe tagata, ia te patele. Neʼe au fai tana menasi pea mo ma lau losalio fakatahi ʼi te afiafi fuli. Neʼe au toe leleiʼia te alu ʼo faiteu ʼi te ʼekelesia pea mo teuteuʼi te ʼu fakatata ʼo Malia pea mo te kau “sagato.”
Araceli: Lolotoga taku nofo ʼi Saragosse, neʼe au fai taku ʼuluaki voto ke au liliu ko he taupoʼou. Hili ia, neʼe fakatotonu ai e te ʼu taupoʼou ke mole kei matou nonofo fakatahi mo ʼoku kiʼi tehina. Koia neʼe natou fekauʼi ia au ki te nofoʼaga taupoʼou ʼi Madrid pea ko Lauri neʼe fekauʼi ki te nofoʼaga taupoʼou ʼi Valence. Kaʼe neʼe nofo pe Ramoni ʼi Saragosse. ʼI Madrid, neʼe au fai ai taku lua voto ke au liliu ko he taupoʼou. Tokolahi neʼe natou ʼomai ʼo nonofo ʼi te nofoʼaga taupoʼou, ohage ko te tamaliki ako pea mo te hahaʼi matutuʼa. Koia ʼae neʼe lahi ai taku gaue. Pea neʼe au gaue ʼi te fale mahaki ʼo te nofoʼaga taupoʼou.
Neʼe au ʼamusia age ke au liliu la ko he taupoʼou. Koteʼuhi ʼi taku manatu, ʼe matou lau pea mo ako tuʼumaʼu anai te Tohi-Tapu. Kaʼe neʼe au lotovaivai. Neʼe mole pe la he tahi neʼe ina fakaʼaogaʼi te Tohi-Tapu pe neʼe palalau ʼo ʼuhiga mo te ʼAtua pea mo Sesu. Neʼe au ako te lea Fakalatina, mo ako te maʼuli ʼo te kau “sagato” Katolika pea mo au tauhi kia Malia. Kaʼe neʼe lahi pe te temi ʼae neʼe au gaue kinakina ai.
Neʼe au kamata lotohoha ai. Koteʼuhi neʼe tonu ia ke au alu ʼo gaue moʼo tokoni ki toku famili, kaʼe neʼe au gaue ʼi te nofoʼaga taupoʼou ke au fakakoloaʼi ʼihi. Koia neʼe au fakaha ai taku manatu ki te taupoʼou pule pea neʼe au ui age kua au fia mavae. Kaʼe neʼe ina pupunu au ʼi te koga fale, he ʼe kia ia, ʼe au fetogi anai taku manatu.
Neʼe tuku age au ki tuʼa e te kau taupoʼou, kaʼe ʼi tanatou iloʼi ʼae neʼe heʼeki fetogi taku manatu, neʼe natou toe fakamaʼu au. Hili tanatou pupunu tuʼa tolu ia au, neʼe natou ui mai leva kapau ʼe au fia mavae pea ʼe tonu ke au fai te ʼu palalau ʼaeni: “ ʼE au fia mavae koteʼuhi ʼe au leleiʼia age taku tauhi ʼae kia Satana ʼi taku tauhi ki te ʼAtua.” Neʼe au punamaʼuli ai. Neʼe au loto ke au mavae, kaʼe neʼe mole au fia tohi te ʼu palalau ʼaia. Ki muli age, neʼe au fia palalau ki he patele ke au fakaha age ki ai te aluʼaga ʼae neʼe hoko. Neʼe ina fakaha ki te ʼepikopo ʼo ina fakagafua mai ke au toe liliu ki te nofoʼaga taupoʼou ʼi Saragosse. Hili ki ai ni mahina, neʼe fakagafua mai ke au mavae mai te nofoʼaga taupoʼou. ʼE mole faʼa fualoa ki ai, neʼe toe mavae ia Lauri mo Ramoni mai te nofoʼaga taupoʼou.
TE TOHI ʼAE NEʼE MOLE KEI MATOU FELOGOʼI AI
Felisa: Hili ki ai he temi, neʼe au ʼohoana pea neʼe ma olo ʼo maʼuʼuli ʼi te potu fenua ko Cantabrie ʼi Sepania. Neʼe kei au alu tuʼumaʼu pe ki te ʼekelesia. ʼI te tahi ʼahotapu ʼi te ʼekelesia, neʼe ita te patele pea neʼe ina fakaha mai te tohi La vérité qui conduit à la vie éternelle. Pea neʼe kalaga fenei: “Kotou sisio ki te tohi ʼaeni. Kapau neʼe fakatoʼo atu e he tahi he tohi feia, kotou ʼaumai kia au peʼe kotou liaki.”
Neʼe mole haku tohi feia, kaʼe neʼe au loto ke au maʼu te tohi ʼaia. Hili ki ai ni ʼaho, neʼe ʼomai te ʼu fafine ʼe toko lua ki toku ʼapi. Neʼe ko te ʼu Fakamoʼoni ʼa Sehova pea neʼe nā foaki mai te tohi ʼaia. Neʼe au lau ʼi te po pe ʼaia. ʼI te toe liliu mai ʼae ʼa te ʼu fafine, neʼe nā fehuʼi mai pe ʼe au fia ako te Tohi-Tapu, pea au ʼio ki ai.
Tuʼumaʼu pe neʼe au loto ke leleiʼia au e te ʼAtua. Koia neʼe au ako ai te moʼoni ʼo ʼuhiga mo Sehova, pea neʼe au kamata ʼofa mamahi ai kia te ia. Pea neʼe au fia fakaha ki te hahaʼi fuli pe ʼe ko ai ia ia. ʼI te taʼu 1973, neʼe au papitema ai. Pea ʼi te temi fuli pe neʼe au fealagia ai, neʼe au faiga ke au palalau ʼo ʼuhiga mo te moʼoni ki toku famili. Kaʼe ko toku famili, tafitō ia toku kiʼi tehina ko Araceli, neʼe fakafifihi malohi ʼo ina ui ʼe au nofo ʼi te lotu hala.
Araceli: Neʼe gaohi koviʼi au ʼi te nofoʼaga taupoʼou, koia ʼae neʼe au ita ai pea neʼe mole au lotolelei ki taku lotu. Kaʼe neʼe au alu tuʼumaʼu pe ki te ʼekelesia ʼi te ʼu ʼAhotapu, pea neʼe au lau losalio ʼi te ʼaho fuli. Neʼe kei au fia mahino pe ki te Tohi-Tapu, ʼo au kole ai ki te ʼAtua ke tokoni mai. Pea neʼe fakaha mai leva e Felisa pe ʼe kotea ʼae neʼe ina ako. ʼI te lahi fau ʼae ʼo tona fiafia ʼo ʼuhiga mo te ʼu akonaki neʼe tui ki ai, neʼe au ui kua vale ia. Neʼe mole au manatu tahi mo te ʼu meʼa ʼae neʼe ina ui mai.
Ki muli age, neʼe au toe liliu ki Madrid ke au maʼu ai haku gaue pea neʼe au ʼohoana leva. ʼAki te temi, neʼe au fakatokagaʼi ko te hahaʼi ʼae neʼe ʼomai tuʼumaʼu ki te ʼekelesia, neʼe mole natou maʼuliʼi te ʼu akonaki ʼa Sesu. Koia neʼe mole au toe alu ai ki te ʼekelesia. Neʼe mole kei au tui ki te ʼu “sagato” peʼe ki te ʼifeli, pea kia au neʼe mole feala ki he patele ke ina fakamolemole te ʼu agahala. Pea neʼe au liaki ʼaku fakatata fuli. Kaʼe neʼe mole au iloʼi pe neʼe lelei te meʼa ʼae neʼe au fai. Neʼe au lotovaivai, kaʼe neʼe au haga faikole fenei aipe ki te ʼAtua: “ ʼE au fia iloʼi ia koe. Tokoni mai kia au.” ʼE au manatuʼi neʼe tuʼa lahi te tukituki ʼo toku matapa e te
kau Fakamoʼoni ʼa Sehova, kaʼe neʼe mole he temi neʼe au avahi ai toku matapa. Neʼe mole au falala ki he lotu.Neʼe maʼuli toku kiʼi tehina ko Lauri ʼi Falani, pea ko Ramoni neʼe maʼuli ʼi Sepania. ʼI te teitei taʼu 1980, neʼe nā kamata ako te Tohi-Tapu mo te kau Fakamoʼoni ʼa Sehova. Neʼe au tui papau, neʼe nā hage pe ko Felisa. Neʼe mole nā iloʼi ko te ʼu meʼa ʼae neʼe nā lolotoga ako, neʼe ko he ʼu loi. Ki muli age, neʼe au felaveʼi mo te fafine ʼo toku vahaʼa fale neʼe higoa ko Angelines, pea neʼe ma liliu ʼo kaumeʼa lelei. Neʼe ko te tahi pe ʼaia Fakamoʼoni ʼa Sehova. Neʼe fehuʼi tuʼa lahi mai e Angelines mo tona ʼohoana pe ʼe au fia ako te Tohi-Tapu mo naua. Neʼe mahino kia naua, logo la taku ui ʼae ʼe mole au leleiʼia he lotu, kaʼe neʼe au loto moʼoni ke au iloʼi te Tohi-Tapu. Neʼe au ui fenei age leva kia naua: “ ʼIo, kaʼe ʼe au ako pe anai mo koulua mo kapau ʼe au fakaʼaogaʼi taku Tohi-Tapu.” Neʼe au maʼu te Tohi-Tapu Katolika Fakasepania ko te Nácar-Colunga.
ʼAKI TE TOHI-TAPU KUA MATOU FELOGOʼI LEVA
Felisa: ʼI te taʼu 1973 ʼae neʼe au papitema ai, neʼe ko te teitei toko 70 kau Fakamoʼoni ʼi Santander, te kolo hau ʼo Cantabrie. Neʼe tonu ke matou olo mamaʼo ke matou faifakamafola ki te hahaʼi fuli ʼo te ʼu kolo ʼe lauʼi teau ʼi te telituale. Koia neʼe matou olo papika ai, pea ki muli age neʼe matou olo motoka ki te ʼu kolo.
ʼAki te ʼu taʼu, neʼe au ako te Tohi-Tapu mo te tokolahi pea neʼe papitema te toko 11. Neʼe teitei pe ke Katolika fuli te hahaʼi ʼae neʼe au fai tanatou ako. Koia neʼe tonu ai ke au maʼu te kataki fualoa. Ohage pe ko au, neʼe ʼaoga kia natou he temi ke natou mahino neʼe natou tui ki he ʼu akonaki hala. Neʼe au iloʼi ʼe hoki feala ki he tahi ke ina fetogi tana faʼahiga fakakaukau pea ke mahino ki te moʼoni ʼaki pe te Tohi-Tapu pea mo te laumalie ʼo Sehova. (Hepeleo 4:12) Ko toku ʼohoana ko Bienvenido ʼae neʼe polisi, neʼe papitema ʼi te taʼu 1979, pea ko taku faʼe neʼe ina kamata ako te Tohi-Tapu ʼi muʼa ʼo tona mate.
Araceli: ʼI taku kamata ako te Tohi-Tapu mo te kau Fakamoʼoni ʼa Sehova, neʼe au lotolotolua ʼo ʼuhiga mo natou. Kaʼe ʼaki pe te temi, neʼe mole kei au manatu feia. Koteʼuhi neʼe mole ako pe e te kau Fakamoʼoni ʼa Sehova ia te Tohi-Tapu, kaʼe neʼe natou mulimuli foki ki te ʼu akonaki ʼae ʼe tou maʼu ai. Neʼe kamata tuputupu ai taku tui kia Sehova pea mo te Tohi-Tapu, ʼo au fiafia lahi ai. Ko ʼihi ʼi ʼoku vahaʼa fale, neʼe natou tokagaʼi te ʼu fetogi ʼae neʼe au fai ʼo natou ui mai, “Araceli, haga nofo ʼi te ala ʼae neʼe ke filifili.”
ʼE au manatuʼi neʼe au faikole fenei: “ ʼE au fakafetaʼi kia te koe Sehova, ʼi tau mole liaki au pea mo tau foaki lahi mai te ʼu faigamalie ke au maʼu te meʼa ʼae neʼe au faiga ʼo kumi, ia te ʼatamai malama ʼo te Tohi-Tapu.” Neʼe au toe kole ki toku taʼokete ko Felisa ke fakamolemole mai ʼo ʼuhiga mo ʼaku palalau fakalotomamahi. Pea talu mai ai, neʼe au fiafia ʼi te palalau ki te Tohi-Tapu, kaʼe neʼe mole kei matou fihi. Koia ʼi te taʼu 1989, neʼe au papitema ai ʼi toku taʼu 61.
Felisa: ʼI te temi nei kua au taʼu 91. Kua mate toku ʼohoana pea ʼe mole kei au fai te ʼu gaue ohage ko te temi muʼa. Kaʼe ʼe kei au lau pe te Tohi-Tapu ʼi te ʼaho fuli, pea ʼe au kau ki te ʼu fono mo te faifakamafola moka ʼe au fealagia.
Araceli: ʼE au leleiʼia moka au palalau ʼo ʼuhiga mo Sehova ki te ʼu patele mo te ʼu taupoʼou fuli ʼae ʼe au felaveʼi mo natou. Koteʼuhi ʼae neʼe au taupoʼou. Neʼe lelei ʼaku faipalalau mo ʼihi ia natou, pea tokolahi neʼe natou toʼo ʼanatou tohi mo te ʼu nusipepa. ʼE au manatuʼi tafitō ia te patele. Neʼe ko taku ʼaʼahi, pea neʼe manatu tahi mo te ʼu meʼa neʼe au ui age kia ia. Hili ia, neʼe ina ui fenei mai: “Ke au toe alu la kifea kaʼe kua au matuʼa? Kotea anai te manatu ʼa te hahaʼi ʼo toku palokia pea mo toku famili?” Neʼe au tali fenei age ki ai: “Kaʼe kotea anai te manatu ia ʼa te ʼAtua?” Neʼe ina iloʼi lelei pe neʼe tonu taku manatu, pea neʼe au mahino neʼe lotomamahi. Kaʼe ʼe mahino mai, neʼe mole ina maʼu te lototoʼa ke ina fai he ʼu fetogi ʼi tona maʼuli.
ʼE mole toe galo anai kia au te temi ʼae neʼe fia alu ai toku ʼohoana mo au ki te fono. Neʼe taʼu 80 tupu ʼi tana ʼuluaki kau ʼae ki he fono, pea talu mai ai neʼe fono tuʼumaʼu pe ia. Neʼe fai tana ako Tohi-Tapu pea neʼe kamata faifakamafola. Koia ʼe lahi te ʼu aluʼaga fakafiafia ʼe au manatuʼi, neʼe au faifakamafola fakatahi ai mo toku ʼohoana. Neʼe mate ia mahina ʼe lua ʼi muʼa ʼo tona papitema.
Felisa: ʼI te temi ʼae neʼe au kamata tauhi ai kia Sehova, neʼe fakafeagai mai ʼoku kiʼi tehina ʼe toko tolu. Kaʼe ki muli age, neʼe natou tali te moʼoni. Pea ʼe ko he aluʼaga fakafiafia ʼaia neʼe hoko ki toku maʼuli. Neʼe feala ai ke matou faipalalau ʼi he ʼu temi loaloaga ʼo ʼuhiga mo siʼi ʼotatou ʼAtua, ia Sehova, pea mo tana Folafola. ʼI te temi nei, kua matou tauhi fuli kia Sehova. * (Vakaʼi te hi ʼi nota.)
^ pal. 29 Ko Araceli ʼe taʼu 87, ko Felisa ʼe taʼu 91 pea ko Ramoni ʼe taʼu 83. ʼE kei natou tauhi agatonu fuli pe kia Sehova. Neʼe mate ia Lauri ʼi te taʼu 1990 pea neʼe kei nofo agatonu pe kia Sehova.