ʼE Malave Feafeaʼi Kiā Koutou Takotou ʼIloʼi ʼAē Ia Te Moʼoni ʼo ʼUhiga Mo Te ʼIfeli?

KO NĀTOU ʼaē ʼe natou akoʼi ko te ʼifeli ʼe ko he koga meʼa ʼe fakamamahiʼi ai ia te hahaʼi, ʼe natou fakamafola ia te fakamatala loi ʼo ʼuhiga mo Sehova ʼAtua pea mo tona ʼu kalitātē. ʼE moʼoni, ʼe ʼui ʼi te Tohi-Tapu ko te ʼAtua ʼe ina fakaʼauha anai ia te kau agakovi. (2 Tesalonika 1:6-9) Kae ko te hauhau ʼo te ʼAtua ʼaē ʼe faitotonu, ʼe mole ko te faʼahi tāfito ʼaia ʼo tona ʼulugaaga.

Ko te ʼAtua ʼe mole agakovi peʼe ina liufaki ia te kovi ʼaki te kovi. ʼE ina fai e ia totonu ia te fehuʼi ʼaenī: “ ʼE au loto koa ke mate ia te tagata agakovi?” (Esekiele 18:23, La Sainte Bible) Kapau ʼe mole fiafia ia te ʼAtua ki te mate ʼo te tagata agakovi, ʼe lava feafeaʼi hana fiafia ʼi tana sio ki te fakamamahiʼi ʼo talu ai ʼo nātou ʼaia?

Ko te kalitātē tāfito ʼo te ʼAtua ʼe ko te ʼofa. (1 Soane 4:8) Koia, “ko te ʼALIKI ʼe agalelei maʼa te hahaʼi fuli, ko tona ʼofa ʼe mafola ki tona ʼu fakatupu.” (Pesalemo 145:9, TOB) Pea ko te ʼAtua ʼe ina loto ke tou ʼoʼofa kiā te ia.—Mateo 22:35-38.

Koteā ʼAē ʼe Ina Uga Koutou: Ko Te Mataku Ki Te ʼIfeli Peʼe Ko Te ʼOfa ʼo Te ʼAtua?

Ko te akonaki ʼaē ʼe ʼui ʼe fakamamahiʼi ia te ʼu nefesi ʼi te ʼifeli, ʼe ina fakatupu ia he mataku lahi ki te ʼAtua. Kae ko ia ʼaē ʼe ina ako ia te moʼoni ʼo ʼuhiga mo te ʼAtua pea mo liliu ʼoʼofa kiā te ia, ʼe tuputupu ʼi tona loto ia te manavasiʼi ʼaē kiā te ia. ʼE fakamahino fēnei iā Pesalemo 111:10: “Ko te pelesepeto ʼo te poto ʼe ko te manavasiʼi ʼo te ʼAliki: ko nātou fuli ʼaē ʼe natou fai ia te faʼahi ʼaia ʼe natou fakaʼeteʼete.” (TOB) Ko te manavasiʼi ʼaia ki te ʼAtua, ʼe mole ko he mataku ia, kae ko he fakaʼapaʼapa lahi ki te Tupuʼaga. ʼE tupu iā tātou ia he manavasiʼi naʼa tou fakalotomamahi ia ia.

Kotou fakatokagaʼi pe neʼe malave feafeaʼi kiā Kathleen, ia te fafine ʼe taʼu 32 pea neʼe toloke ʼi te temi muʼa, ʼi te temi ʼaē neʼe ina ʼiloʼi ai te moʼoni ʼo ʼuhiga mo te ʼifeli. Neʼe fonu pē ia tona maʼuli ʼaki te ʼu fakafiafia, te agamālohi, tana fehiʼa kiā ia, pea mo te aga heʼeʼaoga. Neʼe ina ʼui fēnei: “Neʼe au sio ki taku kiʼi taʼahine ʼe taʼu kātoa pea mo au fakakaukau fēnei, ‘koteā te meʼa ʼaē ʼe au lolotoga fai kiā ia. ʼE tutu anai au ʼi te afi ʼuhi ko taku aga ʼaia.’ ” Neʼe faiga e Kathleen ke ina tuku tana toloke, kae neʼe mole ina lavaʼi. Neʼe ina ʼui fēnei: “Neʼe au fia fai ia te meʼa ʼaē ʼe lelei, kae ko meʼa fuli ʼi toku maʼuli pea ʼi te mālama neʼe kovi ʼaupitō. Neʼe hagē ia neʼe mole ʼi ai he tupuʼaga ke au agalelei ai.”

 Pea neʼe felāveʼi ia Kathleen mo te kau Fakamoʼoni ʼa Sehova. Neʼe ina ʼui fēnei: “Neʼe au ʼiloʼi ai ʼe mole he ʼifeli kakaha. Neʼe mahino gafua ia te ʼu fakamoʼoni Fakatohi-tapu ʼo ʼuhiga mo te akonaki ʼaia. ʼI taku ʼiloʼi ʼaē ʼe mole tutu anai au ʼi te ʼifeli neʼe ko he fakafīmālie lahi ʼaupitō kiā au.” Kae neʼe toe ako e Kathleen ia te fakapapau ʼa te ʼAtua ʼaē ʼe feala ke māʼuʼuli ia te hahaʼi ʼo heʼegata ʼi te kele kua fakamaʼa mai te agakovi. (Pesalemo 37:10, 11, 29; Luka 23:43) Neʼe ina ʼui fēnei: “ ʼI te temi nei, kua au maʼu he ʼamanaki moʼoni—ke au maʼuli ʼo heʼegata ʼi te Palatiso!”

Neʼe feala koa kiā Kathleen ke ina tuku tana toloke logolā tana kua ʼiloʼi ʼaē ʼe mole kei fakamatakuʼi ia ia ʼaki he ʼifeli kakaha? Neʼe ina fakamatala fēnei: “ ʼI te temi ʼaē neʼe mālohi ai taku fia fai ki te toloke, neʼe au faikole, mo kolekole ke tokoni mai ia Sehova ʼAtua. Neʼe au ʼiloʼi tana sio ifo mai ʼaē ki te ʼu agamāhani ʼuli ʼaia, pea neʼe mole au fia fakalotomamahi ia ia. Neʼe tali e Sehova ia taku ʼu faikole.” (2 Kolonito 7:1) Ko te mataku ʼaē ʼa Kathleen naʼa lotomamahi ia te ʼAtua, ʼaē neʼe ina lava tuku ai ia tana toloke.

ʼEī, ko te fakatuputupu ʼo te ʼofa ki te ʼAtua pea mo he manavasiʼi kiā te ia, kae mole ko he mataku ia ki he fakamamahi ʼi he ʼifeli, ʼaē kā ina uga tātou ke tou fai anai ia te finegalo ʼo te ʼAtua ke tou maʼu ai ia te fiafia heʼegata. Neʼe tohi fēnei e te tagata fai pesalemo: “Fiafia ia nātou fuli ʼaē ʼe natou manavasiʼi ki te ʼAliki pea mo muliʼi tana ʼu ala.”—Pesalemo 128:1, TOB.

[Fakamatala ʼo te pasina 9]

KO AI ʼAĒ KĀ FAKAʼĀTEAINA MAI TE ʼIFELI?

Ko ʼihi Tohi-Tapu ʼe natou fakaliliu ia te ʼu kupu Fakakeleka e lua, ko Géénna pea mo Haïdês, ʼaki pē te kupu e tahi: “ ʼifeli.” ʼI te Tohi-Tapu, ko te kupu Géénna ʼe fakaʼuhiga ki he fakaʼauha kātoa, ʼo mole he ʼamanaki ki he fakatuʼuake. Kae ko nātou ʼaē ʼi te Haïdês, peʼe ko te Hatesi, ʼe natou maʼu ia te ʼamanaki ʼaē ke fakatuʼuake nātou.

Koia, ʼi te ʼosi mate ʼa Sesu pea mo fakatuʼuake, neʼe tala e te ʼapositolo ko Petelo kiā nātou ʼaē neʼe fakalogo age kiā ia, ko Sesu “neʼe mole liʼakina ia ʼi te Hatesi.” (Gāue 2:27, 31, 32, Osty; Pesalemo 16:10) Neʼe mole ʼalu Sesu ia ki he koga meʼa ʼe ulo ai he afi. Ko te Hatesi peʼe ko te “ ʼifeli” ʼe fakaʼuhiga pē ki te faitoka. Kae ʼe mole ko Sesu tokotahi pē ʼaē ʼe fakaʼāteaina e te ʼAtua mai te Hatesi.

ʼO ʼuhiga mo te fakatuʼuake, ʼe ʼui fēnei ʼi te Tohi-Tapu: “Ko te mate pea mo te ʼifeli neʼe nā tuku age mo nāua te kau mate ʼaē neʼe nonofo iā nāua.” (Apokalipesi 20:13, 14, Bible de Crampon) Ko te fakagaʼasi ʼo te “ ʼifeli” ko tona fakaʼuhiga, ʼe foaki anai te maʼuli kiā nātou ʼaē ʼe tuha kiā mata ʼo te ʼAtua ke fakatuʼuake nātou. (Soane 5:28, 29; Gāue 24:15) Ko he ʼamanaki taulekaleka ki te kā haʼu—te sio ʼaē kiā nātou ʼaē neʼe tou ʼoʼofa ai ʼe natou hū mai ki tuʼa mai te faitoka! Ko Sehova, te ʼAtua ʼaē ʼe ʼofa ʼo heʼegata, ʼe ina fakahoko anai ia te faʼahi ʼaia.