Kotou Haga Tokagaʼi Aipē Ia Te Totogi

“ ʼE hoko atu taku lele ke aʼu ki te totogi.”—FILP. 3:14.

 1. Koteā te totogi ʼaē neʼe foaki age ki te ʼapositolo ko Paulo?

 KO TE ʼapositolo ko Paulo, ʼaē neʼe toe ʼiloʼi ʼi tona higoa ʼaē ko Saulo ʼo Talesi, neʼe tupu ia ʼi he fāmili maʼuhiga. Neʼe akoʼi ia ia ʼi te lotu ʼo tana ʼu kui e te tagata faiako ʼiloa ʼo te Lao ko Kamaliele. (Gāue 22:3) Neʼe feala ke maʼu e Paulo hona tuʼulaga lelei ʼi tona maʼuli; kae neʼe sītuʼa ki tana lotu pea liliu ia ko he Kilisitiano. Neʼe fakaʼamu ia ki te totogi ʼo te maʼuli heʼegata ʼaē neʼe foaki age kiā ia, ʼaē ke liliu ko he hau mo he pelepitelō ʼe maʼuli tuputupua ʼi te Puleʼaga ʼo te ʼAtua ʼi selō. Ko te Puleʼaga ʼaia ʼe ina puleʼi anai ia te kele ʼaē kā liliu ko he palatiso.—Mat. 6:10; Fakh. 7:4; 20:6.

2, 3. Neʼe maʼuhiga feafeaʼi kiā Paulo ia te totogi ʼaē ʼo te maʼuli ʼi selō?

² Neʼe fakahā e Paulo ia te maʼuhiga ʼaupitō ʼaē kiā ia, ia te totogi ʼaia, ʼo ina ʼui fēnei: “Ko te ʼu meʼa fuli ʼaē neʼe hagē kiā au ko he u koloa, neʼe au fakaʼuhiga ko he ʼu meʼa pulinoa pē ia ʼuhi ko Kilisito. ʼIo, ʼe moʼoni, ʼe au fakaʼuhiga ko te ʼu meʼa fuli ʼe pulinoa ʼuhi ko te ʼuhiga māʼoluga ʼo te mālama ʼo Kilisito Sesu, toku ʼAliki. ʼUhi ko ia, neʼe au tali ke liʼaki ia meʼa fuli pea ʼe hagē kiā au ko he ʼu tuʼuga ʼotaʼota.” (Filp. 3:7, 8) Ko te ʼu meʼa ʼaē ʼe maʼuhiga ʼaupitō maʼa te hahaʼi, ia te maʼu tuʼulaga, te ʼu koloa, he gāue lelei, te ʼiloa, neʼe hagē ia kiā Paulo ko he ʼu ʼotaʼota, ʼi tana kua ʼiloʼi ʼaē ia te moʼoni ʼo ʼuhiga mo te fakatuʼutuʼu ʼa Sehova maʼa te mālamanei.

³ Talu mai ai, ko te faʼahi ʼaē kua maʼuhiga tāfito kiā Paulo neʼe ko te ʼatamai mālama maʼuhiga ʼo ʼuhiga mo Sehova pea mo Kilisito, ʼaē neʼe ʼui fēnei e Sesu ʼi tana faikole ki te ʼAtua: “Ko te fakaʼuhiga ʼaenī ʼo te maʼuli heʼegata, ke natou ako ke natou ʼiloʼi ia koe, te ʼAtua moʼoni e tahi, pea mo ia ʼaē neʼe ke fekauʼi mai, ia Sesu Kilisito.” (Soa. 17:3) Ko te loto moʼoni ʼaē ʼa Paulo ke ina maʼu ia te maʼuli heʼegata, ʼe hā lelei ʼi tana ʼu palalau ʼaē iā Filipe 3:14, ʼaē neʼe ina ʼui fēnei: “ ʼE hoko atu taku lele ke aʼu ki te totogi ʼo te pāui ʼa te ʼAtua, pāui ki ʼoluga, ʼaki ia Kilisito Sesu.” ʼEī, neʼe tokaga tāfito ia ki te totogi ʼo te maʼuli heʼegata ʼi selō, tana kau ʼaē ki te Puleʼaga ʼo te ʼAtua.

Te Maʼuli ʼo Heʼegata ʼi Te Kele

4, 5. Koteā te totogi ʼe feala ke maʼu e te ʼu toko lauʼi miliona hahaʼi ʼaē ʼe natou fai ia te finegalo ʼo te ʼAtua iā ʼaho nei?

⁴ Maʼa te tokolahi ʼaē ʼe natou filifili ke natou fai ia te finegalo ʼo te ʼAtua, ko te totogi ʼaē ʼe tuha ke natou faiga kiai ʼe ko te maʼuli heʼegata ʼi te mālama foʼou ʼa te ʼAtua. (Pes. 37:11, 29) Neʼe fakamoʼoni e Sesu neʼe ko he ʼamanaki moʼoni ʼaia. Neʼe ina ʼui fēnei: “Fiafia ia nātou ʼaē ʼe agamalū, heʼe natou maʼu anai te kele.” (Mat. 5:5) Ko Sesu totonu ʼaē kā ina maʼu tāfito totatou kele ohagē ko he tōfiga, ohagē ko tona fakahā iā Pesalemo 2:8, pea ʼe kaugā hau anai mo ia ʼi selō ia te toko 144 000. (Tan. 7:13, 14, 22, 27) Ko te hahaʼi ʼaē ʼe hagē ko he ʼu ovi pea ʼe natou māʼuʼuli moʼoni anai ʼi te kele, ʼe natou “maʼu” anai ia te potu fakakelekele ʼo te Puleʼaga ‘ ʼaē neʼe teuteuʼi maʼa nātou talu mai te kamataʼaga ʼo te mālamanei.’ (Mat. 25:34, 46) Pea ʼe tou tui papau ʼe hoko anai ia te faʼahi ʼaia heʼe ko te  ʼAtua, ʼaē ʼe ina fai ia te fakapapau ʼaia, “ ʼe mole feala ke loi.” (Tito 1:2) ʼE feala ke tou falala ki te fakahoko ʼo te ʼu fakapapau ʼa te ʼAtua, ohagē ko te falala ʼa Sosue ʼi te temi ʼaē neʼe ina ʼui fēnei ai ki te kau Iselaele: “Neʼe mole he folafola neʼe mole hoko ʼi te ʼu folafola lelei fuli ʼaē neʼe tala atu e Sehova, tokotou ʼAtua. Neʼe hoko fuli ia maʼa koutou. Neʼe mole hana folafola e tahi ʼi te ʼu folafola ʼaia neʼe mole hoko.”—Sos. 23:14.

⁵ Ko te maʼuli ʼi te mālama foʼou ʼa te ʼAtua ʼe mole hagē anai ia ko te maʼuli lotomamahi ʼaē iā ʼaho nei. ʼE kehe ʼaupitō anai ia: ʼe mole toe ʼi ai anai he tau, he fai fakapō, te maʼuli masiva, te heʼe faitotonu, te mahaki pea mo te mate. ʼI te temi ʼaia, ko te hahaʼi ʼe natou haohaoa anai pea mo māʼuʼuli anai ʼi he kele kua fakaliliu ko he palatiso. Ko te maʼuli ʼaia ʼe fakafiafia anai, ʼo fakalaka age ʼi te ʼu moemisi ʼaē ʼe feala ke tou fai. ʼEī, ʼi te temi ʼaia, ko te ʼu ʼaho fuli ʼe fakafiafia moʼoni anai. ʼI totogi fakatalakitupua leva!

6, 7. (a) Neʼe fakahā feafeaʼi e Sesu ia te ʼu meʼa ʼaē ʼe tou lava ʼamanaki kiai ke hoko ʼi te mālama foʼou ʼa te ʼAtua? (b) ʼE foaki feafeaʼi anai ki te kau mate ia honatou maʼuli foʼou?

⁶ ʼI te kei maʼuli ʼa Sesu ʼi te kele, neʼe ina maʼu ia te mālohi ʼaki ia te laumālie māʼoniʼoni ʼo te ʼAtua moʼo fakahā ia te ʼu meʼa taulekaleka ʼaē kā hoko anai ʼi te kele kātoa ʼi te mālama foʼou. Ohagē lā, neʼe ʼui age e Sesu ki te tagata neʼe palalisia talu mai taʼu e 38 ke tuʼu ake ki ʼaluʼaga ʼo haʼele. ʼI te Tohi-Tapu, ʼe fakamatala ai neʼe fai e te tagata ia te faʼahi ʼaia. (Lau ia Soane 5:5-9.) ʼI te tahi age ʼaluʼaga, neʼe felāveʼi Sesu mo “he tagata neʼe kivi talu mai tana tupu” pea neʼe ina fakamālōlō. Ki muli age, ko te tagata ʼaē neʼe kivi ki muʼa atu neʼe fakafehuʼi ki ai ʼo ʼuhiga mo Ia ʼaē neʼe ina fakamālōlō ia ia, pea neʼe ina tali fēnei: “Talu mai te ʼu temi muʼa, neʼe mole heʼeki tou logo ki he tahi neʼe ina ʼavahi he ʼu mata ʼo he tagata neʼe tupu ake ʼe kivi. Kapau ʼe mole haʼu te tagata ʼaia mai te ʼAtua, pea ʼe mole lavaʼi anai ke ina fai he meʼa.” (Soa. 9:1, 6, 7, 32, 33) Neʼe feala ke fai e Sesu ia te ʼu meʼa fuli ʼaia he neʼe foaki age e te ʼAtua ki ai ia te mālohi. Ko te ʼu potu fuli pē ʼaē neʼe ʼalu kiai Sesu, neʼe ina “fakamālōlō ia nātou ʼaē neʼe ʼaoga ke fakamālōlō.”—Luka 9:11.

⁷ Neʼe mole fakamālōlō pē e Sesu ia te hahaʼi māhahaki pea mo māʼimoa, kae neʼe ina toe fakatuʼuake mo te kau mate. Ohagē lā ko te kiʼi taʼahine taʼu 12 ʼaē neʼe kua mate, ʼo tupu ʼaki ai ia te toe mamahi ʼaupitō ki tana ʼu mātuʼa. Kae neʼe ʼui fēnei e Sesu: “Taʼahine, ʼe au ʼui atu kiā te koe, Tuʼu ake!” Pea neʼe tuʼu ake! ʼE kotou lava fakakaukauʼi age muʼa pe neʼe feafeaʼi ia te ʼu mātuʼa pea mo nātou ʼaē neʼe nonofo ai? (Lau ia Maleko 5:38-42.) ʼI te mālama foʼou ʼa te ʼAtua, ʼe hoko anai ia ‘he fiafia ʼe lahi ʼaupitō’ mokā fakatuʼuake anai ia te ʼu toko lauʼi miliale hahaʼi, koteʼuhi “ ʼe ʼi ai anai he fakatuʼuake ʼo te kau faitotonu pea mo te kau heʼe faitotonu.” (Gāue 24:15; Soa. 5:28, 29) ʼE foaki anai kiā nātou ʼaia ia honatou maʼuli foʼou, ʼaki te ʼamanaki ʼaē ke natou māʼuʼuli ʼo heʼegata.

8, 9. (a) Lolotoga ia te ʼAfio ʼa Kilisito Iā Taʼu e Afe, koteā anai kā hoko ki te agahala ʼaē mai iā Atama? (b) ʼE fakatafito anai kiteā ia te fakamāuʼi ʼo te kau mate?

⁸ ʼE foaki anai ki te kau fakatuʼuake ia te faigamālie ʼaē ke natou maʼu ia te maʼuli. Ko nātou ʼaē kā fakatuʼuake ʼe mole fakamāuʼi anai nātou ʼo mulimuli ki te ʼu agahala ʼaē neʼe natou fai ʼi muʼa ʼo tanatou mamate. (Loma 6:7) Lolotoga ia te ʼAfio ʼa Kilisito Iā Taʼu e Afe, ʼi te fakahoko ʼo te ʼu lelei ʼo te sākilifisio faitotogi, ko te hahaʼi fakalogo ʼo te Puleʼaga ʼe natou kaku anai ki te ʼuhiga haohaoa, pea ki muli age ʼe puli kātoa anai iā nātou ia te ʼu fua kovi fuli ʼo te agahala ʼa Atama. (Loma 8:21) Ko Sehova “ ʼe ina fakaʼauha moʼoni anai te mate ʼo talu ai, pea ʼe mahino papau ia, ko te Tuʼi ʼAliki ko Sehova ʼe ina holoholoʼi  anai ia te ʼu loʼimata ʼi te ʼu fofoga fuli pē.” (Isa. 25:8) ʼE toe ʼui ʼi te Folafola ʼa te ʼAtua ʼe “ ʼavahi [anai] te ʼu takaiga tohi,” ʼo hā ai ko nātou ʼaē kā māʼuʼuli ʼi te temi ʼaia ʼe foaki age anai kiā nātou ia he ʼu fakatotonu foʼou. (Fakh. 20:12) ʼI te fakaliliu ʼo te kele ko he palatiso, “ ʼe ko te faitotonu ʼaē kā ako moʼoni anai e te ʼu hahaʼi ʼo te kele maʼuli.”—Isa. 26:9.

⁹ Ko nātou ʼaē kā fakatuʼuake ʼe fakamāuʼi anai nātou, ʼo mole fakatafito ki te agahala ʼaē neʼe natou maʼu mai iā Atama, kae ki te meʼa ʼaē neʼe natou filifili e nātou totonu ke natou fai. ʼE ʼui fēnei iā Fakahā 20:12: “Neʼe fakamāuʼi te kau mate ʼo mulimuli pē ki te ʼu meʼa ʼaē neʼe tohi ʼi te ʼu takaiga tohi, ʼo mulimuli ki tanatou ʼu gāue,” ʼaē ko he ʼu gāue kā natou fai ʼi tonatou kua ʼosi fakatuʼuake. Ko he faʼifaʼitaki fakatalakitupua ʼaia ʼo te faitotonu ʼa Sehova, mo tona manavaʼofa pea mo tona ʼofa! Tahi ʼaē meʼa, ko te ʼu mamahi ʼaē neʼe hoko ʼi tonatou maʼuli ʼi tanatou kei māʼuʼuli ʼi te mālama ʼāfea “ ʼe mole . . . toe manatuʼi anai . . . , pea ko te ʼu meʼa ʼaia ʼe mole toe hake anai ki te loto.” (Isa. 65:17) ʼAki he ʼu logo fakalotomālohi foʼou pea mo he maʼuli ʼe hoko aipē ia he ʼu meʼa ʼe lelei, ʼe mole natou toe hoha anai ʼuhi ko te ʼu meʼa ʼaē ʼe kovi ʼo te temi muʼa. ʼE natou galoʼi anai ia te ʼu meʼa fakaʼofaʼofa ʼaē neʼe hoko kiā nātou ʼi te temi muʼa. (Fakh. 21:4) ʼE toe fēia anai mo te “toe hahaʼi tokolahi,” ʼaē kā hao ʼi Halamaketone.—Fakh. 7:9, 10, 14.

10. (a) ʼE feafeaʼi anai ia te maʼuli ʼi te mālama foʼou ʼa te ʼAtua? (b) Koteā ʼaē ʼe feala ke tokoni atu ke kotou haga tokagaʼi aipē ia te totogi?

¹⁰ ʼI te mālama foʼou ʼa te ʼAtua, ʼe feala anai ki te hahaʼi ke natou māʼuʼuli ʼo mole kei natou māhahaki peʼe mamate. “ ʼE mole he tahi ʼe ina ʼui anai: ‘ ʼE au mahaki.’ ” (Isa. 33:24) Ki muli age, ko te hahaʼi ʼaē kā māʼuʼuli ʼi te kele foʼou ʼe natou ʼaʼala ake ʼi te ʼuhu  fuli kua natou haohaoa, ʼaki hanatou fakaʼamu ki he tahi age ʼaho fakatalakitupua. ʼE natou fakaʼamu anai ki he gāue fakafiafia, pea mo fakatahi mo he hahaʼi ʼe tokaga anai kiā nātou. ʼE mahino ia, ko te taʼi maʼuli ʼaia ʼe ko he totogi taulekaleka! He koʼē ʼe mole kotou ʼavahi takotou Tohi-Tapu, ʼo lau ia te ʼu lea fakapolofetā iā Isaia 33:24 pea mo Isaia 35:5-7? Kotou faigaʼi ke kotou fakakaukauʼi ʼe kotou māʼuʼuli ʼi te mālama ʼaia. ʼE tokoni atu anai ke kotou haga tokagaʼi aipē ia te totogi.

Ko ʼIhi Neʼe Mole Natou Haga Tokagaʼi Ia Te Totogi

11. Kotou fakamatala ia te kamataʼaga lelei ʼo te hau ʼa Salomone.

¹¹ ʼI tatatou kua mahino ki te totogi, ʼe tou faʼafai anai, ʼo tou haga tokagaʼi aipē ia te totogi heʼe feala pē ke mole kei tou tokagaʼi fakalelei. Ohagē ko Salomone ʼi tana hau ʼaē ki Iselaele, neʼe faikole ʼaki he agavaivai ki te ʼAtua ke ina maʼu ia te ʼatamai pea mo te fakasiosio poto, ke feala hana fakamāu fakalelei ia Tana hahaʼi. (Lau ia 1 Hau 3:6-12.) Koia ʼe ʼui fēnei ʼi te Tohi-Tapu: “Neʼe foaki lahi e te ʼAtua kiā Salomone, ia te poto pea mo te ʼatamai.” Koia, “ko te poto ʼo Salomone neʼe lahi age ia ʼi te poto ʼo te hahaʼi fuli ʼo te Potu Hahake pea mo te poto ʼo te hahaʼi fuli ʼo Esipito.”—1 Hau 4:29-32.

12. Koteā te fakatokaga neʼe fai e Sehova kiā nātou ʼaē neʼe hau ʼi Iselaele?

¹² Kae ki muʼa atu, neʼe fakatokaga e Sehova ko he tahi ʼe hau “ ʼe mole tonu anai ke lahi ia tana faga hōsi” pea “mole tonu anai ke lahi fau tona ʼu ʼohoana, ke ʼaua naʼa hēʼia tona loto.” (Teu. 17:14-17) Kapau neʼe ina fakalahi tana faga hōsi, neʼe fakahā ai e te hau neʼe falala ia ki tona mālohi fakasōlia moʼo puipui ia te puleʼaga kae mole falala ia kiā Sehova, ia Ia ʼaē ʼe ina Puipui. Pea kapau neʼe lahi tona ʼu ʼohoana, neʼe feala ke tuʼutāmaki ai, heʼe ko ʼihi iā nātou ʼaia neʼe ʼomai mai te ʼu fenua pagani ʼi te ʼu tafaʼaki ʼaē neʼe natou fai ia te tauhi hala, pea ko te ʼu fafine ʼohoana ʼaia neʼe feala hanatou fakahēʼia te loto ʼo te hau mai te tauhi moʼoni kiā Sehova.

13. Neʼe feafeaʼi ia te mole kei tokaga ʼa Salomone ki te ʼu meʼa ʼaē neʼe foaki age?

¹³ Neʼe mole fakalogo ia Salomone ki te ʼu fakatokaga ʼaia. Kae neʼe ina fai ia te ʼu meʼa ʼaē neʼe tapuʼi tāfito e Sehova ki te ʼu hau. Neʼe ina tānaki te ʼu lauʼi afe hōsi pea mo te ʼu tagata heka hōsi. (1 Hau 4:26) Neʼe ina toe maʼu mo tona ʼu fafine ʼohoana e 700 pea mo te ʼu fafine e 300 neʼe nonofo fēia mo ia, tokolahi neʼe ʼomai mai te ʼu fenua pagani ʼaē neʼe ovi age. Ko te ʼu fafine ʼaia neʼe “natou uga tona loto ke ina muliʼi he tahi age ʼu ʼatua; pea neʼe mole kātoa ai ia tona loto kiā Sehova.” Neʼe fai e Salomone ia te tauhi hala fakalialia ʼo te ʼu puleʼaga pagani, ʼaē neʼe uga kiai e tona ʼu fafine ʼohoana matāpule. Koia, neʼe ʼui ai e Sehova “ ʼe au toʼo moʼoni anai mai iā [Salomone] te puleʼaga.”—1 Hau 11:1-6, 11.

14. Koteā te fua ʼo te talagataʼa ʼa Salomone pea mo te puleʼaga ʼo Iselaele?

¹⁴ Neʼe mole kei tokagaʼi e Salomone ia te pilivilēsio maʼuhiga ʼaē ke ina fakafofoga ia te ʼAtua moʼoni. Neʼe kau kātoa ia te hau ki te tauhi hala. ʼAki te temi, ko te puleʼaga kātoa neʼe liliu ʼo ʼapositā, ʼo iku ai ki tona fakaʼauha  ʼi te taʼu 607 ʼi muʼa ʼo totatou temi. Logolā ia te fakatuʼu ʼaē ki muli age e te kau Sutea ia te tauhi moʼoni, kae hili kiai ni ʼu sēkulō, neʼe ʼui fēnei e Sesu: “Ko te puleʼaga ʼo te ʼAtua ʼe toʼo anai iā koutou pea ʼe foaki anai ia ki he hahaʼi kā natou fakatupu anai hona ʼu fua.” Ko te meʼa ʼaia neʼe hoko. Neʼe tala fēnei e Sesu: “Koʼenī ko tokotou ʼapi kua liʼaki atu kiā koutou.” (Mat. 21:43; 23:37, 38) ʼUhi ko tana mole kei nofo agatonu, neʼe toʼo ai ʼi te puleʼaga ʼaia ia te pilivilēsio lahi ʼaē ke ina fakafofoga ia te ʼAtua moʼoni. ʼI te taʼu 70 ʼo totatou temi, ko te ʼu kautau Loma neʼe natou fakaʼauha ia Selusalemi pea mo te fale lotu, pea tokolahi ʼi te kau Sutea ʼaē neʼe hao neʼe natou liliu ko he ʼu kaugana.

15. Kotou tuku mai he ʼu faʼifaʼitaki ʼo te ʼu tagata neʼe mole kei nā tokagaʼi ia te meʼa ʼaē neʼe maʼuhiga tāfito.

¹⁵ Ko Sutasi Isikaliote neʼe kau ʼi te toko 12 kau ʼapositolo ʼa Sesu. Neʼe logo ia Sutasi ki te ʼu akonaki fakaofoofo ʼa Sesu pea mo sio ki te ʼu milakulo ʼaē neʼe ina fai ʼaki te tokoni ʼo te laumālie māʼoniʼoni ʼo te ʼAtua. Kae neʼe mole puipui e Sutasi ia tona loto. Neʼe ko ia ʼaē neʼe nofo mo te puha ʼaē neʼe tānaki kiai ia te falā ʼa Sesu pea mo te toko 12 kau ʼapositolo. Kae “neʼe ko te tagata kaihaʼa ia pea neʼe nofo ia mo te kēsi falā, pea neʼe ina ʼave te falā ʼaē neʼe ʼai kiai.” (Soa. 12:6) Ko te lahi ʼaupitō ʼo tona mānumānu neʼe hā ʼi tana fonofono mo te kau pelepitelō pule mālualoi ke ina lavakiʼi ia Sesu kiā piesi siliva e 30. (Mat. 26:14-16) Ko te tahi tagata neʼe mole kei ina tokagaʼi ia te totogi, neʼe ko Temasi, ʼaē neʼe kaugā gāue mo te ʼapositolo ko Paulo. Neʼe mole puipui e Temasi ia tona loto. Neʼe ʼui fēnei e Paulo: “Kua liʼaki au e Temasi he neʼe manako ia ki te tuʼu ʼo te ʼu faʼahiga meʼa ʼaenī.”—2 Tim. 4:10; lau ia Tāʼaga Lea 4:23.

Ko He Ako Kiā Tātou Takitokotahi

16, 17. (a) ʼE mālohi feafeaʼi ia te fakafeagai ʼaē ʼe fai mai kiā tātou? (b) Koteā ʼaē ʼe lava tokoni mai ke tou kātakiʼi he meʼa pē ʼe feala ke fakaʼaogaʼi e Satana moʼo fakafeagai mai kiā tātou?

¹⁶ Ko te ʼu kaugana fuli ʼa te ʼAtua ʼe tonu ke maʼuhiga kiā nātou ia te ʼu faʼifaʼitaki ʼaē ʼe tuʼu ʼi te Tohi-Tapu, heʼe ʼui fēnei mai kiā tātou: “Ko te ʼu meʼa ʼaia neʼe hoko kiā nātou ohagē he ʼu faʼifaʼitaki, pea neʼe tohi ia moʼo fakatokagaʼi ʼo tātou, ia tātou ʼaē kua hoko mai ki ai ia te fakaʼosi ʼo te ʼu tuʼu ʼo te ʼu faʼahiga meʼa ʼaenī.” (1 Ko. 10:11) Iā ʼaho nei, ʼe tou māʼuʼuli lolotoga ia te ʼu ʼaho fakaʼosi ʼo te tuʼu ʼo te ʼu faʼahiga meʼa agakovi ʼaenī.—2 Tim. 3:1, 13.

¹⁷ Ko Satana te Tēvolo, “te ʼatua ʼo te tuʼu ʼo te ʼu faʼahiga meʼa ʼaenī,” ʼe ina ʼiloʼi “kua nounou tona temi.” (2 Ko. 4:4; Fakh. 12:12) ʼE ina fai anai ia meʼa fuli ʼe ina lavaʼi moʼo uga ia te ʼu kaugana ʼa Sehova ke natou liʼaki ia tanatou nonofo agatonu ki te ʼu pelesepeto Fakakilisitiano. ʼE takitaki e Satana ia te mālama ʼaenī, ʼo kau kiai mo te ʼu meʼa ʼaē ʼe fakamafola haʼele ʼi te mālamanei. Kae ko te hahaʼi ʼa Sehova ʼe natou maʼu ia te meʼa ʼe mālohi age ia, ko “te mālohi ʼaē ʼe fakalaka ʼi te mālohi māhani.” (2 Ko. 4:7) ʼE feala ke tou falala ki te mālohi ʼaia mai te ʼAtua moʼo tokoni mai ke tou kātakiʼi ia he meʼa pē ʼe feala ke fakaʼaogaʼi e Satana moʼo fakafeagai mai kiā tātou. Koia, ʼe uga ai tātou ke tou faikole tuʼumaʼu, ʼo tou falala ko Sehova ʼe ina “foaki [mai anai] . . . te laumālie māʼoniʼoni kiā nātou ʼaē ʼe natou kole kiā te ia.”—Luka 11:13.

18. Ko te manatu fea ʼaē ʼe tonu ke tou maʼu ʼo ʼuhiga mo te mālamanei ʼaenī?

¹⁸ ʼE tou toe mālolohi ʼi tatatou ʼiloʼi ʼaē ko te tuʼu kātoa ʼa Satana kua vave fakaʼauha anai kae haofaki anai ia te kau Kilisitiano moʼoni. “ ʼE lolotoga fakalaka nei te mālamanei pea mo tona holi, kae ko ʼaē ʼe ina fai te finegalo ʼo te ʼAtua ʼe nofo maʼu ia ʼo talu ai.” (1 Soa. 2:17) ʼI tatatou ʼiloʼi ia te faʼahi ʼaia, ʼe mole fakapotopoto anai ki he tahi ʼi te ʼu kaugana ʼa te ʼAtua ia hana manatu ʼe ʼi ai he meʼa ʼi te tuʼu ʼaenī, ʼe feala ke maʼuhiga age ʼi tana ʼu felōgoi ʼaē mo Sehova! Ko te mālama ʼaenī ʼaē ʼe puleʼi e Satana ʼe hagē ko he vaka ʼe lolotoga mou. Neʼe foaki e Sehova ia te kōkelekāsio Fakakilisitiano ohagē ko he vaka ʼe haʼu ʼo haofaki ia tana ʼu kaugana agatonu. ʼI tanatou tokagaʼi ia te mālama foʼou, ʼe feala hanatou falala ki te fakapapau ʼaenī: “ ʼE molehi anai te hahaʼi agakovi, kae ko nātou ʼaē ʼe falala kiā Sehova ʼe natou maʼu anai te kele.” (Pes. 37:9) Koia, kotou haga tokagaʼi aipē ia te totogi fakatalakitupua ʼaia!

ʼE Kei Kotou Manatuʼi Koa?

• Koteā te manatu ʼa Paulo ʼo ʼuhiga mo te totogi ʼaē neʼe foaki age kiā ia?

• ʼE fakatafito anai kiteā te fakamāuʼi ʼo nātou ʼaē kā māʼuʼuli anai ʼo heʼegata ʼi te kele?

• Koteā te aga fakapotopoto ʼe tonu ke kotou fai ʼi te temi nei?

[ʼU fehuʼi ʼo te ako]

[Paki ʼo te pasina 13]

Kā kotou lau ia te ʼu fakamatala ʼi te Tohi-Tapu, ʼe kotou fakakaukauʼi koa ʼe kotou aʼu anai ki te totogi?