Te ʼu Fehuʼi ʼa Te Kau Lautohi

ʼE Tali Koa e Te ʼAtua Ke ʼOhoanaʼi He ʼu Fafine e Tokolahi?

Kailoa; ko te fakatuʼutuʼu ʼaē neʼe fai e te ʼAtua ʼi Eteni, neʼe ko te tagata e tahi ʼaē neʼe ina ʼohoanaʼi ia te fafine pē e tahi. Ki muli age, neʼe toe fakamoʼoni e Sesu Kilisito ia te fakatuʼutuʼu ʼaia ki tana ʼu tisipulo.—Senesi 2:18-24; Mateo 19:4-6.

Kae ʼi te temi ʼi muʼa ʼo te kau Kilisitiano, ko te ʼu tagata ohagē ko Apalahamo, mo Sakopo, mo Tavite pea mo Salomone neʼe mole natou ʼohoanaʼi koa lā ni ʼu fafine e tokolahi? ʼE moʼoni, kae koteā ʼaē ʼe fakamatala mai ʼi te Tohi-Tapu ʼo ʼuhiga mo te taʼi faʼahiga maʼuli ʼaia? ʼE fakahā ai neʼe ʼi ai te ʼu mamahi pea mo te ʼu fihi neʼe hoko ʼi te ʼu fāmili ʼo Apalahamo pea mo Sakopo ʼuhi ko te taʼi faʼahiga maʼuli ʼaia. (Senesi 16:1-4; 29:18–30:24) Ki muli age, neʼe tohi ʼi te Lao ʼa te ʼAtua, ia te fakatotonu ʼaenī ki te ʼu hau takitokotahi: “Pea ʼe mole tonu anai ke kaugamālie tona ʼu ʼohoana, ke ʼaua naʼa hēʼia tona loto.” (Teutalonome 17:15, 17) Neʼe mole mulimuli ia Salomone ki te lao ʼaia kae neʼe ʼohoana ia mo te ʼu fafine e toko 700 tupu! Meʼa fakaʼofaʼofa, he neʼe mamaʼo leva ia te loto ʼo Salomone mai iā Sehova ʼuhi ko te ʼu fakaneke ʼo tona ʼu ʼohoana ʼaia e tokolahi. (1 Hau 11:1-4) ʼE hā lelei mai, ko te Tohi-Tapu ʼe mole talanoa lelei ʼo ʼuhiga mo te ʼohoanaʼi ʼo he ʼu fafine e tokolahi.

Kae ʼe lagi feʼekeʼaki e ʼihi, pe koʼē neʼe fakagafua e te ʼAtua ki tana hahaʼi ke natou ʼohoanaʼi ia he ʼu fafine e tokolahi. Kotou tokagaʼi age muʼa ia te faʼahi ʼaenī: Neʼe mole heʼeki kotou tali fakatemi koa lā ke kotou taupau he laupapa logolā neʼe tonu ke fetogi? Lagi ʼi takotou manatu ʼe mole heʼeki lelei hona toʼo ʼi te temi ʼaia? ʼE moʼoni, ko te ʼu ala pea mo te ʼu manatu ʼa te ʼAtua ʼe māʼoluga age ʼi tatatou ʼu manatu. (Isaia 55:8, 9) Kae ʼe tou lava mahino ki ʼihi tupuʼaga lelei ʼo te tali fakatemi ʼaē e te ʼAtua, ke ʼohoanaʼi ai he ʼu fafine e tokolahi.

Kotou manatuʼi ʼi Eteni, neʼe fakapapau e Sehova ia he “hako” kā ina maumauʼi anai ia Satana, ʼo talu ai. Ki muli age, neʼe ina ʼui age kiā Apalahamo ʼe liliu anai ko te tamai ʼo he puleʼaga lahi pea ko te Hako ʼaē neʼe fakapapauʼi mai, ʼe hifo anai mai tona fāmili. (Senesi 3:15; 22:18) Neʼe fakatotonu e Satana ke ina tāʼofi ia te fakatupu ʼo te Hako ʼaia. Koia neʼe ina faigaʼi ai ke ina fakaʼauha ia te puleʼaga ʼāfea ʼo Iselaele. Neʼe ina fakahalaʼi tuʼumaʼu ia Iselaele ke tō ki te agahala, ke tupu ʼaki ai te mole kei maʼu e te puleʼaga ʼaia, ia te ʼofa ʼo te ʼAtua pea mo tana puipui.

Moʼo tokoni ki te kau Iselaele ke mole natou tō ki te ʼu fakahala, neʼe fekauʼi liuliuga e Sehova ia tana ʼu polofetā ke natou ʼolo ʼo fakatokaga ki tana hahaʼi, ʼi te temi ʼaē neʼe natou kamata hehē ai mai tana ʼu lao faitotonu. Kae neʼe ina ʼiloʼi fakatomuʼa ko tana hahaʼi ʼe natou talagataʼa pē anai ʼi te temi fuli, māʼiapē lā mo te ʼu fakatotonu tāfito, ohagē ko te fakatotonu ʼaē ke mole natou tauhi ki te ʼu taulāʼatua, ʼe mole natou muliʼi anai. (Ekesote 32:9) Kapau neʼe faigataʼa hanatou fakalogo ki he lao maʼuhiga fēia, pea ʼe feafeaʼi age lā hanatou fakalogo ki he lao ʼe ina tapuʼi ia te ʼohoanaʼi ʼo he ʼu fafine e tokolahi? ʼI tana ʼiloʼi lelei ʼaē ia te agaaga ʼo te tagata, neʼe mahino ai kiā Sehova neʼe mole heʼeki tonu ke ina tapuʼi ia te aga ʼaia, ʼaē neʼe kua fualoa tona fai ʼi te temi ʼaia. Kanapau lā ʼi te temi ʼaia neʼe ina tapuʼi age ia te aga ʼaia, pea lagi neʼe feala aipē kiā Satana ke ina maʼu he faigamālie ke ina fakahalaʼi ai ia Iselaele ke tō ki te agahala.

Neʼe ʼi ai te tahi ʼu lelei ʼo te tali fakatemi e te ʼAtua ia te ʼohoanaʼi ʼo he ʼu fafine e tokolahi. Neʼe ko he faigamālie ʼaia ki te puleʼaga ke tuputupu fakavilivili. Ko te toe hahaʼi tokolahi ʼaia neʼe ina fakafealagia ke maʼuli te puleʼaga ʼo Iselaele ʼo aʼu ki te temi ʼaē neʼe tupu ai te Mēsia. Ko te ʼohoanaʼi ʼo he ʼu fafine e tokolahi, neʼe ko he puipui ʼaia ʼo ʼihi fafine, he neʼe feala ai ke natou maʼu honatou ʼu nofoʼaga pea mo honatou ʼu loto fale ʼi te ʼu temi tuʼutāmakiʼia.

Kae kotou manatuʼi, neʼe mole ko Sehova ʼaē neʼe ina fakatuʼu ia te aga ʼaia. Neʼe ina tali fakatemi pē, ʼo ina fai ia te ʼu lao ʼo ʼuhiga mo te faʼahiga maʼuli ʼaia, ke mole gaohi koviʼi ai te hahaʼi fafine. (Ekesote 21:10, 11; Teutalonome 21:15-17) ʼI te temi ʼaē neʼe fakatuʼutuʼu ai e Sehova ke ina fakagata ki tana kau ʼatolasio ia te ʼohoanaʼi ʼo he ʼu fafine e tokolahi, neʼe ina fakaʼaogaʼi tona ʼAlo ke ina toe tala ia te fakatuʼutuʼu ʼo te ʼohoana ʼaē neʼe fai ʼi Eteni. Pea neʼe tapuʼi ai e Sesu ki tana ʼu tisipulo ia te ʼohoanaʼi ʼo he ʼu fafine e tokolahi. (Maleko 10:8) Koia, neʼe mahino lelei age ai ki te moʼoni ʼaenī: Ko te Lao ʼa Moisese neʼe lelei ʼi tona temi, kae ko “te lao ʼa Kilisito,” ʼe lelei age ia.—Kalate 6:2.