‘Tou Palalau Ki Te Folafola ʼa Te ʼAtua ʼAki He Lototoʼa’

“Neʼe natou fonu . . . ʼi te laumālie māʼoniʼoni pea natou palalau ai ki te folafola ʼa te ʼAtua ʼaki te lototoʼa.”—GĀUE 4:31.

1, 2. He koʼē ʼe tonu ke tou faiga ke tou gāue lelei ʼi tatatou minisitelio?

 IĀ ʼAHO e tolu ʼi muʼa ʼo tana mate, neʼe ʼui fēnei e Sesu ki tana ʼu tisipulo: “Ko te logo lelei ʼaenī ʼo te puleʼaga ʼe fakamafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.” ʼI muʼa ʼo tana hake ʼaē ki selō, ko Sesu ʼaē neʼe kua fakatuʼuake, neʼe ina fakatotonu ki tana ʼu tisipulo ke natou ‘fai he ʼu tisipulo ʼi te hahaʼi ʼo te ʼu fenua fuli pē, ʼo akoʼi ia nātou ke natou mulimuli ki te ʼu meʼa fuli pē ʼaē neʼe ina fakatotonu age kiā nātou.’ Neʼe ina fakapapau age ʼe nofo anai mo nātou “ ʼi te ʼaho fuli pē, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.”—Mat. 24:14; 26:1, 2; 28:19, 20.

² Mai tona ʼaluʼaga ʼaē ko tātou ko te ʼu Fakamoʼoni ʼa Sehova, ʼe feala ke tou kau mālohi ki he gāue neʼe kamata ʼi te ʼuluaki sēkulō. ʼE mole he tahi gāue ʼe maʼuhiga age ʼi te gāue ʼaē ko te fakamafola ʼo te Puleʼaga pea mo te fai ʼo he ʼu tisipulo, ʼaē ʼe ina haofaki te maʼuli ʼo te hahaʼi. Koia, ʼe maʼuhiga ʼaupitō ai ke tou gāue lelei ʼi tatatou minisitelio! ʼI te ʼalatike ʼaenī, ʼe tou vakaʼi ai anai peʼe feafeaʼi ia te tokoni mai ʼa te laumālie māʼoniʼoni ke tou palalau ʼaki he lototoʼa mokā tou fai fakamafola. Ko te ʼu ʼalatike e lua ʼaē kā hoa mai, ʼe fakahā ai anai peʼe takitaki feafeaʼi tātou e te laumālie ʼo Sehova ke tou popoto ʼi te faiako pea mo kau tuʼumaʼu ki te fai fakamafola.

ʼE Tonu Ke Tou Lototoʼa

 3. He koʼē ʼe tonu ke tou lototoʼa mokā tou kau ki te gāue ʼaē ko te fakamafola ʼo te Puleʼaga?

³ ʼE ko he pilivilēsio lahi te gāue ʼaē neʼe foaki mai e te ʼAtua, ʼaē ko te tala ʼo te Puleʼaga. Kae ʼe faigataʼa ʼi ʼihi temi. Ko ʼihi hahaʼi ʼe natou tali ia te logo lelei ʼo te Puleʼaga ʼa te ʼAtua, kae tokolahi ʼe natou hagē ko te hahaʼi ʼaē neʼe māʼuʼuli ʼi te temi ʼo Noe. Neʼe ʼui fēnei e Sesu: “Neʼe mole natou fakatokagaʼi he meʼa ʼo aʼu ki te haʼu ʼa te tulivio pea neʼe ʼave fuli ai ia nātou.” (Mat. 24:38, 39) Pea ʼe ʼi ai mo te hahaʼi ʼaē ʼe natou vāʼi tātou peʼe natou fakafeagai kiā tātou. (2 Pet. 3:3) Ko te fakafeagai ʼe feala ke haʼu mai iā nātou ʼaē ʼe takitaki, mai te ʼu kaugā ako peʼe ko te ʼu kaugā gāue, peʼe mai totatou fāmili totonu. ʼO hilifaki kiai, ʼe tonu ke tou tauʼi totatou ʼu vaivaiʼaga, ohagē ko te umiuminoa peʼe ko te mataku ʼaē naʼa kapu tātou e te hahaʼi. ʼE lahi te ʼu faʼahi ʼe feala ai ke liliu ʼo faigataʼa kiā tātou tatatou “palalau fakahagatonu” pea mo palalau ki te folafola ʼa te ʼAtua ʼaki he “lototoʼa.” (Efe. 6:19, 20) Ke feala hatatou kātaki ʼo palalau ʼo ʼuhiga mo te folafola ʼa te ʼAtua, ʼe tonu ke tou lototoʼa. Koteā ʼaē kā tokoni mai ke tou lototoʼa ai?

 4. (a) Koteā koa ia te lototoʼa? (b) Neʼe maʼu feafeaʼi e te ʼapositolo ko Paulo ia te lototoʼa moʼo palalau ki te hahaʼi ʼi Tesalonika?

⁴ Ko te kupu Fakakeleka ʼaē neʼe fakaliliu ʼaki te kupu “lototoʼa” ʼe fakaʼuhiga ki te “palalau fakahagatonu, mo faigafua.” ʼE maʼu ʼi te kupu ʼaia te manatu ʼaē ko he “tahi ʼe loto falala, . . . ʼe mole mataku.” ʼE mole fakaʼuhiga ia te lototoʼa ke kita fai he ʼu palalau fefeka peʼe ko he ʼu palalau kona. (Kol. 4:6) Tatau aipē peʼe tou lototoʼa, kae ʼe tonu foki ke tou toe maʼuli tokalelei mo te hahaʼi fuli pē. (Loma 12:18) Tahi ʼaē meʼa, ʼi tatatou fakamafola ia te logo lelei ʼo te Puleʼaga ʼo te ʼAtua, ʼe tonu ke tou lototoʼa pea mo toe aga fakaʼeteʼete, ʼo tou tōkakaga naʼa lave kovi ki he tahi ia tatatou ʼu palalau kae neʼe mole tou ʼamanaki kiai. Koia, ke tou maʼu  ia te lototoʼa, ʼe tonu ke tou fakatuputupu ʼi totatou maʼuli ia he tahi age ʼu kalitātē. ʼE mole tou liliu ʼo lototoʼa ʼaki pē totatou mālohi fakatagata peʼe mai hatatou falala kiā kita totonu pē. Hili ki ‘te laukoviʼi ʼi Filipe’ ʼo te ʼapositolo ko Paulo pea mo tona ʼu kaumeʼa, neʼe natou ‘maʼu feafeaʼi ia te lototoʼa’ moʼo palalau kiā nātou ʼaē ʼi Tesalonika? Neʼe tohi fēnei e Paulo: “ ʼUhi ko tomatou ʼAtua.” (Lau ia 1 Tesalonika 2:2.) Ko Sehova ʼAtua ʼe feala ke ina pulihi totatou mataku pea mo foaki mai ia te taʼi lototoʼa ʼaia.

 5. Neʼe foaki feafeaʼi e Sehova ia te lototoʼa kiā Petelo, mo Soane, pea mo ʼihi tisipulo?

⁵ ʼI te felāveʼi ʼaē ʼa te ʼu ʼapositolo ko Petelo pea mo Soane mo te fakafeagai mai ‘te ʼu pule, mo te ʼu tagata ʼāfea pea mo te ʼu sekelipa,’ neʼe nā ʼui fēnei: “Kapau ʼe matatonu iā muʼa ʼo te ʼAtua ke mā fakalogo atu kiā koutou ʼi hamā fakalogo ki te ʼAtua, ʼa koutou tona vakaʼi. Kae kiā māua, ʼe mole feala ke tuku tamā palalau ki te ʼu meʼa ʼaē neʼe mā sisio kiai pea mo fagono kiai.” ʼI tanā faikole ʼaia, neʼe mole nā kole ki te ʼAtua ke fakagata ia te fakataga, kae ko nāua mo tonā ʼu tehina neʼe natou kolekole, ʼo fēnei: “Sehova, tokagaʼi tanatou ʼu fakamatakutaku, pea fakafealagia ki tau ʼu kaugana ke natou haga tala tau folafola ʼaki he lototoʼa kātoa.” (Gāue 4:5, 19, 20, 29) Neʼe tali feafeaʼi e Sehova ki tanatou kole ʼaia? (Lau ia Gāue 4:31.) Neʼe tokoni Sehova kiā nātou ke natou maʼu ia te lototoʼa ʼo ina foaki age tona laumālie. ʼE feala ke toe fai e te laumālie ʼo te ʼAtua ia te faʼahi ʼaia maʼa tātou. ʼE tou lava maʼu feafeaʼi ia te laumālie ʼo te ʼAtua pea mo ina takitaki tātou ʼi tatatou minisitelio?

ʼE Tou Lava Maʼu Feafeaʼi Ia Te Lototoʼa?

6, 7. Koteā ʼaē ʼe feala ke tou fai ke tou maʼu ia te laumālie māʼoniʼoni ʼo te ʼAtua? Kotou tuku mai he ʼu faʼifaʼitaki.

⁶ Ke tou maʼu ia te laumālie māʼoniʼoni ʼo te ʼAtua, ʼe feala ke tou kole fakahagatonu kiā te ia. Neʼe ʼui fēnei e Sesu ki te nofoʼaki: “Kapau ko koutou, logopē takotou agakovi, ʼe kotou popoto ʼi te foaki ki ʼakotou ʼu fānau he ʼu meʼa ʼofa ʼe lelei, ʼe feafeaʼi leva lā te lahi ake ia ʼo te foaki e te Tamai ʼaē ʼi selō te laumālie māʼoniʼoni kiā nātou ʼaē ʼe natou kole kiā te ia!” (Luka 11:13) Koia ʼe tonu ke tou kole tuʼumaʼu ke foaki mai ia te laumālie māʼoniʼoni. Kapau ʼe tou mātataku ʼi te fai ʼo ʼihi faʼahi ʼo te minisitelio, ohagē ko te fai fakamafola ʼi te ala, te fagonogono faigamālie, peʼe ko te tala ʼo te logo ʼi te ʼu matani gāue, pea ʼe tou lava kole kiā Sehova ia tona laumālie pea mo kole ke tokoni mai ke tou maʼu ia te lototoʼa.—1 Tes. 5:17.

⁷ Neʼe ko te faʼahi ʼaia neʼe fai e te tuagaʼane ʼe higoa ko Rosa. a ʼI te tahi ʼaho, ʼi tana fale gāue, ko te fafine faiako ʼe kaugā gāue mo Rosa neʼe ina lolotoga lau ia te pepa sivi mai te tahi faleako, ʼo ʼuhiga mo te gaohi koviʼi ʼo te tamaliki. ʼI te punamaʼuli ʼaupitō ʼa te fafine faiako ʼaia ʼi te meʼa ʼaē neʼe ina lau, neʼe ina ʼui leʼo lahi fēnei: “ ʼE feafeaʼi anai ia te ikuʼaga ʼo te mālamanei ʼaenī?” Neʼe mahino kiā Rosa ʼe ko te temi faigamālie ʼaia ke fai fakamafola. Koteā ʼaē neʼe ina fai ke feala ai hana maʼu ia te lototoʼa ʼaē moʼo palalau ki te fafine? ʼE ʼui fēnei e Rosa: “Neʼe au faikole kiā Sehova pea mo kole ki ai ia tona laumālie ke tokoni mai.” Neʼe feala ai leva kiā Rosa ke fai fakamafola pea mo fai he fakatuʼutuʼu ke ina ʼaʼahi te fafine faiako ʼaia. Kotou toe tokagaʼi mo te faʼifaʼitaki ʼaenī ʼa te kiʼi taʼahine taʼu nima, ʼe higoa ko Milane, ʼe nofo ʼi te kolo ko New York. ʼE ʼui fēnei e Milane: “ ʼI muʼa ʼo taku ʼalu ʼo ako, ko au mo mama ʼe mā faikole tuʼumaʼu kiā Sehova.” Koteā ʼaē ʼe nā kole? Neʼe nā kole ke maʼu e Milane te lototoʼa ke nofo mālohi pea ke palalau ʼo ʼuhiga mo tona ʼAtua! ʼE ʼui fēnei e tana faʼē: “Neʼe tokoni te faʼahi ʼaia kiā Milane ke ina fakamahino tana manatu ʼo ʼuhiga mo te ʼu fakafiafia ʼaē ʼe fai ki te ʼu ʼaho tupu pea mo te ʼu ʼaho lalahi pea ke ʼaua naʼa kau ki te ʼu toʼotoʼoga ʼaia ʼi te ʼu temi ʼaē ʼe natou fai ai.” ʼAki te ʼu faʼifaʼitaki ʼaenī, ʼe mole fakahā ai koa lā, ʼe feala ke tou maʼu ia te lototoʼa mokā tou faikole?

 8. Koteā ʼaē ʼe tou lava ako mai te polofetā ko Selemia ʼo ʼuhiga mo te maʼu ʼo te lototoʼa?

 ⁸ Kotou toe fakakaukauʼi ia te faʼahi ʼaē neʼe tokoni ki te polofetā ko Selemia ke ina maʼu ia te lototoʼa. ʼI te filifili ʼo ia e Sehova ke liliu ko he polofetā ʼo te ʼu puleʼaga, neʼe tali fēnei e Selemia: “Sio mai ʼe mole au poto ʼi te palalau, heʼe kei au tamasiʼi.” (Sel. 1:4-6) Kae ʼaki te temi, neʼe liliu ia Selemia ʼo mālohi ʼi tana ʼu palalau pea mo faʼa kātaki ʼi tana gāue fai fakamafola, ʼo tupu ai ia te ʼui ʼa te hahaʼi tokolahi ʼo ʼuhiga mo ia, ko he polofetā ʼe ina tala ia te malaʼia. (Sel. 38:4) Lolotoga taʼu e 65 tupu, neʼe lototoʼa ʼo fakamafola ia te ʼu fakamāu ʼa Sehova. Neʼe ʼiloʼi lelei ia Selemia e te hahaʼi ʼo Iselaele ʼuhi ko tana mole mataku pea mo tana fai fakamafola lototoʼa, koia lā ʼaē, hili kiai taʼu e 600 tupu, neʼe ʼui e ʼihi ʼi te temi ʼaē neʼe palalau ai Sesu ʼaki he lototoʼa, neʼe lagi ko Selemia ʼaē kua toe fakatuʼuake. (Mat. 16:13, 14) Neʼe lava tauʼi feafeaʼi e te polofetā lotolotolua ʼaia ko Selemia ia tana umiuminoa ʼi te kamata? ʼE ina ʼui fēnei: “Neʼe hagē [ia te folafola ʼa te ʼAtua] ʼi toku loto ko he afi kakaha ʼe nofo ʼi toku ʼu hui; pea neʼe au fiu ʼi tona tāʼofi.” (Sel. 20:9) ʼEī, neʼe foaki e te folafola ʼa Sehova ia te mālohi kiā Selemia pea mo uga ai ia ia ke palalau.

 9. He koʼē ʼe feala ke malave te folafola ʼa te ʼAtua ki ʼotatou loto ohagē ko tona malave ki te loto ʼo Selemia?

⁹ ʼI tana tohi neʼe ina fai ki te kau Hepeleo, neʼe tohi fēnei e te ʼapositolo ko Paulo: “Ko te folafola ʼa te ʼAtua ʼe maʼuli pea mo mālohi, pea ʼe māsila age ia ʼi te heletā mata lua fuapē pea ʼe ʼulu ia ʼo kaku ki tana vaheʼi te nefesi pea mo te laumālie, pea mo te ʼu hokoga hui mo ʼonatou gakoʼi hui, pea ʼe feala ke ina ʼiloʼi lelei te ʼu manatu pea mo te ʼu fakatuʼutuʼu ʼo te loto.” (Hep. 4:12) Ko te logo, peʼe ko te folafola ʼa te ʼAtua ʼe feala ke malave ki ʼotatou loto ohagē ko tona malave ʼaē ki te loto ʼo Selemia. Kotou manatuʼi, logolā neʼe ko te ʼu tagata ʼaē neʼe fakaʼaogaʼi moʼo tohi ia te Tohi-Tapu, kae neʼe mole fai ʼaki he poto fakatagata, he neʼe ko te ʼAtua ʼaē neʼe ina takitaki ia te tohi ʼo te Tohi-Tapu. Iā 2 Petelo 1:21, ʼe tou lau fēnei: “Neʼe mole heʼeki ʼaumai he lea fakapolofetā ʼaki te finegalo ʼo te tagata, kae neʼe palalau ni ʼu tagata ʼaki te fakatotonu ʼa te ʼAtua, he neʼe taki nātou e te laumālie māʼoniʼoni.” Kā tou toʼo hotatou temi ke tou ako fakalelei takitokotahi ia te Tohi-Tapu, ʼe fonu ai totatou ʼatamai ʼaki te logo ʼe haʼu mai te laumālie māʼoniʼoni. (Lau ia 1 Kolonito 2:10.) ʼE feala ke liliu ia te logo ʼaia “ko he afi kakaha” ʼi totatou loto, ʼo mole feala ai anai hatatou taupau maʼa tātou.

10, 11. (a) ʼE tonu ke feafeaʼi tatatou ako ia te Tohi-Tapu mo kapau ʼe tou fia maʼu ia te lototoʼa ʼo palalau? (b) Kotou tuku mai he fakatuʼutuʼu ʼe kotou fai ke lelei age takotou ako takitokotahi.

¹⁰ Ke feala ke malave mālohi kiā tātou ia tatatou ako takitokotahi ia te Tohi-Tapu, ʼe tonu ke tou fai ia te ako ʼaia ke ʼulu ki totatou loto. Ohagē lā, neʼe sio te polofetā ko Esekiele ki te meʼa neʼe hā age kiā ia, neʼe kole age kiā ia ke ina kai ia te takaiga tohi neʼe tohi ai ia te logo mālohi  neʼe tonu ke ina tala ki te hahaʼi ʼe mole natou fia logo anai kiai. Neʼe tonu kiā Esekiele ke ina kai fuli ia te logo pea ke ʼalu ki tona fatu. ʼI tana fai ʼaia, ʼe liliu anai ia te tala ʼo te logo ʼaia ko he meʼa fakafiafia, ohagē ko te kai ki he meli.—Lau ia Esekiele 2:8–3:4, 7-9.

¹¹ Ko totatou ʼaluʼaga ʼe tatau mo ʼaē ʼa Esekiele. Iā ʼaho nei, tokolahi te hahaʼi ʼe mole natou fia fakalogo ki te meʼa ʼaē ʼe ʼui ʼi te Tohi-Tapu. Kapau ʼe tonu ke tou faʼa kātaki ʼo tala ia te folafola ʼa te ʼAtua, ʼe maʼuhiga ke tou ako ia te Tohi-Tapu, ke tou mahino kātoa ai pea mo tui ki te logo ʼaē ʼe tuʼu ai. ʼE tonu ke tou ako tuʼumaʼu ia te Tohi-Tapu, kae mole ko he meʼa ʼe tahitahiga tatatou fai. ʼE tonu ke hagē ia totatou loto ko te loto ʼo te tagata fai pesalemo, ʼaē neʼe hiva fēnei: “Ke liliu te ʼu palalau ʼo toku gutu pea mo te metitāsio ʼo toku loto ʼo lave lelei ʼi ʼou muʼa, Ê Sehova, toku Maka pea mo toku Fakamaʼuli!” (Pes. 19:14) ʼE maʼuhiga ʼaupitō ke tou toʼo he temi moʼo metitāsioʼi ia te ʼu manatu ʼaē ʼe tou lau, ke liliu ai ia te ʼu moʼoni ʼo pipiki mālohi ki ʼotatou loto! ʼE mahino ia, ʼe tonu ke tou faiga ke lelei age tatatou ako takitokotahi. b

12. He koʼē ʼe tokoni mai ia te ʼu fono Fakakilisitiano ke takitaki tātou e te laumālie māʼoniʼoni?

¹² Ko te tahi faʼahi moʼo maʼu ia te ʼu lelei ʼaē mai te laumālie māʼoniʼoni ʼo Sehova, ʼe ko hatatou “fetokagaʼaki ke tou uga ia tātou ki te ʼofa pea mo te ʼu gāue matalelei, ʼo mole tou tuku tatatou ʼu fakatahi.” (Hep. 10:24, 25) Tou faiga ke tou kau tuʼumaʼu ki te ʼu fono Fakakilisitiano, mo fakalogo lelei, pea mo maʼuliʼi ia te ʼu meʼa ʼaē ʼe tou logo kiai, heʼe ko he ʼu faʼahi lelei ʼaia ke takitaki ai tātou e te laumālie. ʼE mole koa lā foaki e te laumālie ʼo Sehova tana takitaki ʼaki ia te kōkelekāsio?—Lau ia Fakahā 3:6.

Te ʼu Fua Lelei ʼi Tatatou Maʼu Ia Te Lototoʼa

13. Koteā ʼaē ʼe tou lava ako mai te ʼu gāue ʼaē neʼe fai e te kau Kilisitiano ʼo te ʼuluaki sēkulō ʼi te fai fakamafola?

¹³ Ko te laumālie māʼoniʼoni ʼe ko te mālohi lahi pē ʼaia e tahi ʼi te ʼatulaulau, pea ʼe ina lava foaki ia te mālohi ki te hahaʼi ke natou fai ia te finegalo ʼo Sehova. ʼAki tana takitaki, neʼe fakahoko ai e te ʼu Kilisitiano ʼo te ʼuluaki sēkulō ia he toe gāue fai fakamafola lahi. Neʼe natou fakamafola ia te logo lelei “ki te ʼu fakatupu fuapē ʼi te lalo lagi.” (Kol. 1:23) ʼI tatatou ʼiloʼi ʼaē ko te tokolahi iā nātou neʼe ‘mole ako pea neʼe mole natou maʼu ia he poto ke feafeaʼi,’ ʼe tou mahino lelei ai neʼe uga nātou e te toe mālohi lahi.—Gāue 4:13.

14. Koteā ʼaē kā tokoni mai ke tou “vela ʼi te laumālie”?

¹⁴ Kapau ʼe tou tuku ia te laumālie māʼoniʼoni ke ina takitaki totatou maʼuli, pea ʼe ina toe uga ai mo tātou ke tou fakahoko ʼaki he lototoʼa tatatou minisitelio. Ko te ʼu lelei fuli ʼaē ʼe tou maʼu mai te faikole ʼaē ke foaki mai ia te laumālie, mo te fai fakalelei ʼo takita ako takitokotahi, mo tatatou metitāsioʼi ʼi te faikole ia te ʼu manatu ʼaē ʼe tou lau, pea mo te kau tuʼumaʼu ki te ʼu fono Fakakilisitiano ʼe lava tokoni mai ai ke tou “vela ʼi te laumālie.” (Loma 12:11) ʼO ʼuhiga mo “te tagata Sutea neʼe higoa ko Apolose, neʼe tupu ʼi Alekesatilia, ko te tagata poto palalau, neʼe tau age ki Efesi,” ʼe ʼui fēnei ʼi te Tohi-Tapu: “[Neʼe] vela ʼi te laumālie pea neʼe palalau ia pea mo akonaki totonu ki te ʼu meʼa ʼaē ʼo ʼuhiga mo Sesu.” (Gāue 18:24, 25) ʼI tatatou “vela ʼi te laumālie,” ʼe feala ke tou fakahā ai ia he lototoʼa lahi ʼi tatatou minisitelio ʼi te ʼu ʼapi pea ʼi tatatou fai fagonogono faigamālie.—Loma 12:11.

15. Koteā te ʼu fua lelei kiā tātou mokā tou palalau ʼaki he lototoʼa ʼe lahi?

¹⁵ ʼE ʼi ai tona fua lelei kiā tātou mokā tou maʼu ia he lototoʼa lahi ʼi te fai fakamafola. ʼE tou maʼu ai ia he ʼu manatu lelei heʼe tou mahino lelei age ki te maʼuhiga pea mo te fua lelei ʼo tatatou gāue. ʼE tuputupu tatatou fiafia heʼe tou maʼu ia he fiafia lahi mokā tou gāue lelei ʼi totatou minisitelio. Pea ʼe mālohi ai tatatou  faʼafai, heʼe tou mahino lahi age ki te maʼuhiga ʼo te gāue fai fakamafola.

16. Koteā ʼaē ʼe tonu ke tou fai mo kapau kua vaivai tatatou faʼafai ʼaē ʼi te minisitelio?

¹⁶ ʼE feafeaʼi mokā kua puli tatatou faʼafai ʼaē ʼi te minisitelio peʼe mole kei tatau ohagē ko te temi muʼa? ʼE tonu ke kita sivi fakalelei ia kita totonu. Neʼe tohi fēnei e Paulo: “Kotou haga ʼahiʼahiʼi ia koutou ke kotou ʼiloʼi peʼe kotou nonofo ʼi te tui, kotou sivisivi tuʼumaʼu peʼe koteā tokotou ʼuhiga totonu.” (2 Ko. 13:5) Kotou fai ia te ʼu fehuʼi ʼaenī: ‘ ʼE kei au vela koa ʼi te laumālie? ʼE au kole koa kiā Sehova ia tona laumālie? ʼE hā koa ʼi taku ʼu faikole taku falala ʼaē kiā ia moʼo fakahoko ia tona finegalo? ʼE au fakamālo koa ʼi taku ʼu faikole ki te minisitelio ʼaē neʼe ina foaki mai? ʼE feafeaʼi ʼo ʼuhiga mo taku ʼu agamāhani ʼi te ako takitokotahi? Ko temi e fia ʼe au fakaʼaogaʼi moʼo metitāsioʼi ia te ʼu manatu ʼaē ʼe au lau pea mo logo kiai? ʼE feafeaʼi taku fakalogo pea mo taku kau ʼaē lolotoga te ʼu fono?’ Ko te fakakaukau ki te ʼu fehuʼi ʼaia, ʼe feala ke tokoni atu ke kotou ʼiloʼi ia tokotou ʼu vaivaiʼaga pea mo te ʼu fetogi ʼaē ʼe tonu ke kotou fai.

Ke Kotou Liliu ʼo Lototoʼa ʼAki Ia Te Laumālie ʼo Te ʼAtua

17, 18. (a) ʼE feafeaʼi ia te ʼaluʼaga ʼo te gāue fai fakamafola iā ʼaho nei? (b) ʼE tou lava “palalau fakahagatonu” feafeaʼi ʼi tatatou tala ia te logo lelei ʼo te Puleʼaga ʼo te ʼAtua?

¹⁷ Hili ki tona fakatuʼuake, neʼe ʼui fēnei e Sesu ki tana ʼu tisipulo: “ ʼE kotou maʼu anai te mālohi mokā hifo atu anai te laumālie māʼoniʼoni kiā koutou pea ʼe kotou liliu anai ko haku kau fakamoʼoni ʼi Selusalemi, mo Sutea kātoa pea mo Samalia ʼo kaku ki te potu taupotu ʼo te kele.” (Gāue 1:8) Ko te gāue ʼaē neʼe kamata ʼi te temi ʼaia ʼe lolotoga fai iā ʼaho nei ʼi hona ʼaluʼaga ʼe lahi ʼaupitō age. Ko te teitei toko fitu miliona kau Fakamoʼoni ʼa Sehova ʼe natou tala ia te logo ʼo te Puleʼaga iā fenua e 230 tupu, ʼo natou fakaʼaogaʼi ʼi te minisitelio ia hola e 1 miliale vaelua ʼi te taʼu. ʼI meʼa fakafiafia hatatou kau ʼaki he faʼafai ki te gāue ʼaia ʼaē kā mole toe fai anai ki ʼamuli!

¹⁸ Ohagē ko te ʼuluaki sēkulō, ko te fai fakamafola iā ʼaho nei ʼi te mālamanei kātoa ʼe fakalogo ki te takitaki ʼa te laumālie ʼo te ʼAtua. Kapau ʼe tou mulimuli ki te takitaki ʼa te laumālie, ʼe tou lava “palalau fakahagatonu” anai ʼi tatatou minisitelio. (Gāue 28:31) Koia, tou tuku ke takitaki tātou e te laumālie ʼi tatatou tala ia te logo lelei ʼo te Puleʼaga ʼo te ʼAtua!

[ʼU nota]

Koteā ʼAē Neʼe Kotou Ako?

• He koʼē ʼe ʼaoga ke tou lototoʼa ʼi tatatou palalau ki te folafola ʼa te ʼAtua?

• Koteā ʼaē neʼe tokoni ki te ʼu ʼuluaki tisipulo ke natou palalau ʼaki he lototoʼa?

• ʼE tou lava maʼu feafeaʼi te lototoʼa?

• ʼE fua lelei feafeaʼi kiā tātou tatatou maʼu ia te lototoʼa?

[ʼU fehuʼi ʼo te ako]

[Paki ʼo te pasina 13]

ʼE lava tokoni feafeaʼi e te ʼu mātuʼa ia tanatou fānau ke natou lototoʼa?

[Paki ʼo te pasina 15]

Ko he faikole fakanounou ʼe lava tokoni mai ke tou maʼu ia te lototoʼa ʼi te minisitelio