Neʼe Fakapapau Age Koa e Sesu Ki Te Tagata Agakovi Ia Te Maʼuli ʼi Te Lagi?
ʼE FIA ILOʼI E TE KAU LAUTOHI . . .
Neʼe Fakapapau Age Koa e Sesu Ki Te Tagata Agakovi Ia Te Maʼuli ʼi Te Lagi?
ʼO mulimuli ki Te Tohi-Tapu i te fakauvea, neʼe fakapapau fenei age e Sesu ki te tagata agakovi ʼae neʼe mate fakatahi mo ia: “E au ui mooni atu kia koe, i te aho nei e ke nofo anai mo au i te palatiso.” (Luka 23:43) Kaʼe ki ʼihi Tohi-Tapu ʼe natou fakaliliu fenei ia te ʼu palalau ʼa Sesu: “ ʼE au tala moʼoni atu kia te koe ʼi te ʼaho nei, ʼe ke ʼi te Palatiso anai mo au.” ʼE tou lava iloʼi feafeaʼi neʼe mole ui age e Sesu ki te tagata agakovi ʼe nā fakatahi anai ʼi te ʼaho pe ʼaia ʼi te lagi?
ʼUluaki, ʼe tou vakaʼi peʼe tuha ia te tagata agakovi ʼaia mo te maʼuli ʼi te lagi. Ko natou ʼae ʼe natou maʼu ia te ʼamanaki ki te maʼuli ʼi te lagi, ʼe papitemaʼi natou ʼi te vai pea mo te laumalie maʼoniʼoni pea ʼe natou liliu ko te kau tisipulo ʼa Sesu neʼe fakanofo ʼaki te laumalie. (Soane 3:3, 5) ʼE tonu ke natou mulimuli ki te ʼu lekula ʼa te ʼAtua ʼo ʼuhiga mo te aga ʼae ʼe tonu ke natou fai pea mo fakaha he ʼu kalitate ohage ko te aga fakahagatonu, mo te agatonu pea mo te loto manavaʼofa. (1 Kolinito 6:9-11) ʼE tonu ke natou toe nonofo agatonu ki te ʼAtua pea mo Kilisito ʼo kaku pe ki te fakaʼosi ʼo tonatou maʼuli ʼi te kele. (Luka 22:28-30; 2 Timoteo 2:12) ʼI tanatou fai ia te ʼu faʼahi ʼaia, ʼe natou fakaha ai ʼe tuha ke fakatuʼu ake natou pea ʼe feala ke natou fakahoko he ʼu maʼua ʼi tonatou ʼuhiga pelepitelo pea mo hau mo Kilisito ki te malamanei lolotoga taʼu ʼe afe.—Apokalipisi 20:6.
Kaʼe ko te tagata ʼae neʼe mate ia tafa ʼo Sesu, neʼe ko he tagata agakovi pea neʼe matehi ʼuhi ko te faʼahi ʼaia. (Luka 23:32, 39-41) ʼE moʼoni, neʼe ina fakaha ia he aga ʼe lelei ʼi tana ui fenei age kia Sesu: “Manatui au moka ke hau anai i tou puleaga.” (Luka 23:42) Kaʼe neʼe mole heʼeki papitema, neʼe mole pe la kau ki te ʼu tisipulo fakanofo ʼa Sesu, pea neʼe mole ina fakaha pe la ʼaki tana aga ʼe faitotonu pea mo agatonu. ʼE fakapotopoto koa ke fakapapau age e Sesu ia te tuʼulaga hau ʼi te lagi ia tafa ʼo tana kau tisipulo agatonu ʼae neʼe kua natou fakaha ia tanatou agatonu?—Loma 2:6, 7.
Te faʼifaʼitaki: Kapau ʼe fai fakalelei atu he tahi neʼe ina kaihaʼa hakotou falā, ʼe lagi kotou fakamolemole anai ki ai. Kaʼe ʼe kotou falala anai koa ki ai ʼo kotou tuku ke tokaga ki takotou matani gaue pea ki tokotou famili? ʼE kotou foaki pe anai ia te ʼu maʼua ʼaia kia natou ʼae ʼe kotou falala ki ai. ʼO toe feia aipe, ko natou ʼae ʼe natou maʼu ia te ʼamanaki ke natou maʼuʼuli ʼi te lagi, ʼe tonu ke natou fakaha ʼe natou tuha mo te falala, ʼe natou fakamuʼamuʼa anai ia te ʼu meʼa ʼae ʼe faitotonu ʼi te temi ʼae ka natou puleʼi ai anai ia te malamanei. (Apokalipisi 2:10) Kaʼe neʼe mole fakaha e te tagata agakovi ʼi tona maʼuli ʼe ina fai anai ia te faʼahi ʼaia, logo la tana fakamalotoloto ʼi muʼa ʼo tana mate.
Neʼe mole koa la fakapapau age e Sesu ki te tagata agakovi ʼe nā fakatahi anai ʼi te lagi ʼi te ʼaho pe ʼaia? Neʼe mole feala ke hoko ia te faʼahi ʼaia he neʼe mole hake ia Sesu ki te lagi ʼi te ʼaho ʼaia. Kaʼe neʼe nofo “i te fatu o te kele,” ko tona fakaʼuhiga ʼi te faitoka lolotoga ʼaho ʼe tolu. (Mateo 12:40; Maleko 10:34) ʼI te hili ʼo tona fakatuʼu ake, neʼe toe nofo lolotoga ʼaho ʼe 40 ʼi te kele ʼi muʼa ʼo tana toe liliu ki te lagi. (Gaue 1:3, 9) Koia, neʼe mole feala ke fakatahi ia te tagata agakovi mo Sesu ʼi te lagi ʼi te ʼaho pe ʼaia.
Kaʼe ko te Palatiso fea ʼae ka hu anai ki ai ia te tagata agakovi? ʼI te hili ʼo te fakatuʼu ake, ʼe maʼuli anai ʼi te Palatiso fakakelekele ʼae ka puleʼi anai e Sesu. (Gaue 24:15; Apokalipisi 21:3, 4) Ke feala hakotou mahino lelei ʼo ʼuhiga mo te Palatiso pea mo te ʼu fakamaʼua ʼa te ʼAtua, kotou fai palalau mo te kau Fakamoʼoni ʼa Sehova.