“Ko Te Atua . . . o Te Kau Mauli”
KOTOU FAKAOVI KI TE ʼATUA
“Ko Te Atua . . . o Te Kau Mauli”
ʼE malohi age koa te mate ʼi te ʼAtua? Kailoa ia! ʼE mole feala ia ke malohi age te mate, pe ko he tahi age “fili,” ʼi “te Atua Mafimafi.” (1 Kolinito 15:26; Ekesote 6:3) ʼE maʼu e te ʼAtua te malohi ke ina pulihi te mate ʼaki tana haga ʼo fakatuʼuake te kau mate. Pea ʼe ina fakapapau ke ina fakahoko te faʼahi ʼaia ʼi tona malama foʼou. * He ko ʼe ʼe feala ke tou tui ʼe hoko anai te fakapapau ʼaia? Heʼe ko Sesu, te ʼAlo ʼo te ʼAtua, ʼae ʼe ina fakaha mai te faʼahi ʼaia ʼi tana fai te ʼu palalau ʼe tou maʼu ai he ʼamanaki malohi.—Lau ia Mateo 22:31, 32.
ʼI tana palalau ki te kau Satuseo ʼae neʼe mole tui ki te fakatuʼuake, neʼe ui fenei e Sesu: “O uhiga mo te toe tuuake a te kau mate, pe nee mole koutou lau te mea ae nee fakaha e te Atua kia koutou: Ko te Atua au o Apalahamo, mo te Atua o Isaake, mo te Atua o Sakopo? Ko te Atua e mole ko te Atua ia ia o te kau mate, kae ko te Atua ia ia o te kau mauli.” Neʼe talanoa ʼi heni ia Sesu ki te palalau ʼa te ʼAtua kia Moisese mai te kiʼi fuʼu ʼakau neʼe ulo, pea kua hili nei ki ai teitei taʼu ʼe 3 500. (Ekesote 3:1-6) ʼO mulimuli ki te ʼu palalau ʼa Sesu, ʼi te ui fenei ʼa Sehova kia Moisese: “Ko te Atua au o Apalahamo, mo te Atua o Isaake, mo te Atua o Sakopo,” ʼe ha ai ʼe hoko moʼoni anai te fakapapau ʼo te fakatuʼuake. ʼE tou mahino feafeaʼi ki te faʼahi ʼaia?
Tou ʼuluaki vakaʼi muʼa te temi ʼae neʼe fai ai e Sehova te ʼu palalau ʼaia kia Moisese. ʼI te temi ʼaia, neʼe kua fualoa te mate ʼa te kau pateliaka ko Apalahamo, mo Isaake, pea mo Sakopo. Neʼe kua taʼu 329 te kua mate ʼo Apalahamo, mo taʼu 224 ʼa Isaake, pea mo taʼu 197 ʼa Sakopo. ʼE kotou tokagaʼi, neʼe mole ui e Sehova “neʼe ko te Atua au o” natou ʼaia. Kaʼe neʼe ina ui “ko te Atua au o” natou ʼaia, ohage pe neʼe kei maʼuʼuli te ʼu pateliaka ʼaia ʼe toko tolu. He ko ʼe neʼe palalau feia ia Sehova?
Neʼe fakamahino fenei e Sesu: “Ko te Atua e mole ko te Atua ia ia o te kau mate, kae ko te Atua ia ia o te kau mauli.” Kotou fakakaukauʼi age muʼa te fakaʼuhiga ʼo te ʼu palalau ʼaia. Kapau neʼe mole he fakatuʼuake, pea ʼe mate anai ʼo talu ai ia Apalahamo, mo Isaake, pea mo Sakopo. Kapau koia, pea ko Sehova ʼe ko te ʼAtua pe ia ʼo te kau mate. Pea ʼe ko tona fakaʼuhiga, ʼe malohi age te mate ia Sehova, ohage ʼe mole lavaʼi e Sehova te fakaʼateaina ʼo ʼana kaugana agatonu mai te pule ʼo te mate.
Kaʼe kotea ʼae ʼe tonu ke tou mahino ki ai ʼo ʼuhiga mo Apalahamo, mo Isaake, mo Sakopo pea mo te ʼu kaugana agatonu fuli ʼa Sehova ʼae kua mamate? Neʼe fai e Sesu te ʼu palalau malohi ʼaeni: “Kia ia [Sehova] ko te u tagata fuli e mauli.” (Luka 20:38) Koia, ʼe hoko moʼoni pe anai te fakapapau ʼa Sehova ke ina fakatuʼuake ʼana kaugana agatonu ʼae kua mamate, koia la ʼae ʼe manatu ai ʼo ʼuhiga mo natou ohage pe kei natou maʼuʼuli. (Loma 4:16, 17) ʼE manatuʼi lelei pe anai natou e Sehova ʼi te temi ʼae kua ina fakatuʼutuʼu ke ina fakatuʼuake ai ia natou.
ʼE kotou leleiʼia koa te manatu ʼae ke kotou toe fakatahi mo natou ʼae ʼe kotou ʼoʼofa ai kaʼe kua mamate? Kapau koia, kotou manatuʼi ko Sehova ʼe malohi ʼaupito age ia ʼi te mate. ʼE mole he meʼa ʼe feala ke ina taʼofi ia ia ke ina fakahoko tana fakapapau ʼae ke ina fakatuʼuake te kau mate. He ko ʼe koa ʼe mole hoko atu takotou ako ʼo ʼuhiga mo te fakapapau ʼo te fakatuʼuake pea mo kotou iloʼi te ʼAtua ʼae ka ina fakahoko anai te fakapapau ʼaia? Kapau ʼe kotou fai te faʼahi ʼaia, pea ʼe kotou fakaovi anai kia Sehova, “te Atua . . . o te kau mauli.”
Te koga Tohi-Tapu ke lau
[Nota]
^ Kapau ʼe kotou fia maʼu he tahi ʼu fakamahino ʼo ʼuhiga mo te fakapapau ʼa te ʼAtua ki te fakatuʼuake ʼo te kau mate ʼi he malama foʼou faitotonu, kotou vakaʼi te kapite 7 ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? neʼe ta e te kau Fakamoʼoni ʼa Sehova.
[Fakamatala ʼo te pasina 13]
Ko Sehova ʼe malohi ʼaupito age ia ʼi te mate