Te ʼu Tali Ki Te ʼu Fehuʼi Fakatohi-Tapu

ʼE fagono koa te ʼAtua ki te ʼu faikole fuli?

ʼE fagono te ʼAtua ki te ʼu faikole ʼe fai e te hahaʼi mai te ʼu puleʼaga fuli. (Pesalemo 145:18, 19) ʼE fakalotomalohiʼi tatou ʼi tana Folafola, te Tohi-Tapu, ke tou fakaha age kia te ia ʼatatou tuʼania. (Filipe 4:6, 7) Kaʼe ʼe ʼi ai ʼihi faikole ʼe mole leleiʼia e te ʼAtua. Ohage la, ʼe mole ina leleiʼia te ʼu faikole ʼae ʼe lau fakaʼatamai pea mo liuliuga.—Lau ia Mateo 6:7.

ʼE mole leleiʼia e Sehova ia te ʼu faikole ʼa natou ʼae ʼe mole natou fia mulimuli ki ʼana lao. (Taaga Lea 28:9) Ohage la, ʼi te temi muʼa, neʼe mole fia fagono ia te ʼAtua ki te ʼu faikole ʼa te kau Iselaele ʼae neʼe faifakapo. ʼE mahino ia, ʼe ʼi ai te ʼu fakamaʼua ʼe tonu ke tou fakahoko mo kapau ʼe tou loto ke fagono te ʼAtua ki ʼatatou faikole.—Lau ia Esaia 1:15.

Kotea ʼae ʼe tonu ke tou fai ke feala ai ke fagono mai te ʼAtua?

ʼE mole feala ke tou fakaovi ki te ʼAtua mo kapau ʼe mole tou tui kia te ia. (Sakopo 1:5, 6) ʼE tonu ke tou tui papau ʼe maʼuli te ʼAtua pea ʼe ina tokagaʼi tatou. ʼE feala ke tou fakamalohi tatatou tui ʼaki ia te ako ʼo te Tohi-Tapu, koteʼuhi ʼe fakatafito te tui moʼoni ki te ʼu fakamoʼoni ʼe tuʼu ʼi te Folafola ʼa te ʼAtua.—Lau ia Hepeleo 11:1, 6.

ʼE tonu ke tou faikole fakamalotoloto pea ʼaki he agavaivai. Maʼiape la mo Sesu, te ʼAlo ʼo te ʼAtua, neʼe faikole ʼaki he agavaivai. (Luka 22:41, 42) Koia, ʼe mole meʼa ke tou ui age ki te ʼAtua ia te meʼa ʼae ʼe tonu ke ina fai. ʼE lagi lelei ke tou lau ia te Tohi-Tapu ke feala hatatou iloʼi ia te meʼa ʼae ʼe ina kole mai. ʼOsi ʼaia pea tou faikole ʼo mulimuli ki tona finegalo.—Lau ia 1 Soane 5:14.

Kapau ʼe kotou fia maʼu he tahi ʼu fakamahino, vakaʼi te kapite 17 ʼo te tohi ʼaeni Koteā ʼAē ʼe Akoʼi Moʼoni Mai ʼi Te Tohi-Tapu?, neʼe ta e te kau Fakamoʼoni ʼa Sehova

ʼE feala ke kotou toe toʼo ʼi te tuʼasila ʼaeni ʼi te Neti www.mr1310.com/wls

[Paki ʼo te pasina 16]

ʼE ʼi ai koa ʼihi faikole ʼe mole leleiʼia e te ʼAtua?