Tokolahi ia ʼaho nei ʼe natou maʼu ia te manatu ʼa Alex. ʼE mole kei natou fia fai ki te ’u gaue kinakina. Neʼe ui fenei e Aaron, ko te tagata faimekanisia: “Tokolahi ʼe natou ufiufi ʼi te fai ʼo he gaue kinakina. ʼE natou manatu ʼe natou fai ia te gaue ʼaia ʼo kaku pe ki tanatou maʼu he tahi gaue ʼe lelei age.”

He koʼe ʼe tokolahi te hahaʼi ʼe mole fia fai ki te ʼu gaue kinakina? ʼE lagi lahi fau tanatou sisio ki te ʼu ʼata ʼi te televisio, peʼe ʼi te senima peʼe ʼi te Neti ʼae ʼe fakahaha ai te ʼu faʼahiga maʼuli ʼe koloaʼia pea mo fimalie. ʼE ui fenei e Matthew, ko te tagata faʼu masini: “Ki te manatu ʼa te hahaʼi, kapau ʼe kotou gaue kinakina pea ʼe mole lelei tokotou maʼuli.” ʼE ui fenei e Shane, ko he tagata leʼo fale: “Kua loto pe ia te hahaʼi ke foaki lahi age te totogi ʼo te gaue ʼae neʼe natou fai.”

Kaʼe, tokolahi ia natou ʼae ʼe maʼuli fiafia, ʼe natou fiafia ʼi te gaue kinakina. ʼE ui fenei e Daniel, ko he tupulaga ʼe kei taʼu 25, ʼe gaue laga fale: “Ki taku manatu, ʼe maʼuhiga ia te gaue, tafitō mo kapau ʼe tou fai ʼaki ni fakatuʼutuʼu lelei. ʼE toe maʼu e Andre ʼae ʼe taʼu 23 ia te manatu ʼaia. ʼE ina ui fenei: “Ki taku manatu, ʼe feala ke tou fiafia ʼi te gaue. Kapau ʼe tou fakasiʼisiʼi tatatou gaue pea ʼe feala ke puli ai tatatou fiafia ʼaki pe te alu ʼo te temi.”

Neʼe lava maʼu feafeaʼi e te hahaʼi ʼae ʼe hage ko Daniel pea mo Andre ia he manatu ʼe lelei ʼo ʼuhiga mo te gaue kinakina? ʼAki pe tanatou maʼuliʼi ia te ʼu pelesepeto ʼi te Tohi-Tapu. ʼE ʼekenaki tatou ʼi te Tohi-Tapu ke tou gaue kinakina pea mo faʼa kataki. Kaʼe ʼe mole ui mai pe ʼi te Tohi-Tapu ke tou gaue kinakina. ʼE ina fakaha mai pe ʼe tou lava maʼu feafeaʼi ia te fiafia ʼi tatatou gaue.

Kotea te ʼu pelesepeto ʼi te Tohi-Tapu ʼe feala ke tokoni mai ke tou fiafia ʼi tatatou gaue? ʼE tou vakaʼi anai ʼihi pelesepeto ʼi te alatike ʼae ka hoa mai.