ʼE LOLOTOGA haʼele ia Sosefo ʼi te loto fale pili- soni pea mo tafe kakava. Kua kovi ʼosi te vevela ʼi Esipito ʼuhi ko te laʼa. Kua ina iloʼi lelei ia te fale pilisoni he neʼe kua hage ko hona loto fale. Tokolahi ʼe natou leleiʼia ia ia ʼi te fale pilisoni, kaʼe neʼe ko he tagata pilisoni ia.

Kua tuʼa fia tana manatu ki te ʼu moʼuga ʼo Hepelone, ʼae neʼe ina taupau ai te ʼu ovi ʼo tana tamai. Neʼe taʼu 17 ʼi te temi ʼae neʼe fekauʼi ai e tana tamai ko Sakopo, ke alu ʼo fakasiosio ki he koga meʼa ʼe tuʼu ia kilometa ʼe lauʼi 10. Kaʼe ʼi te temi leva ʼaia ʼe mole kei feala ke alu feia. Neʼe iita ʼona tehina kia ia he neʼe natou maheheka ki ai. Koia neʼe natou fakatau ai ia ia ko he tagata kaugana. Neʼe ʼave ia ia ki Esipito, pea neʼe ʼuluaki gaue muʼa ʼi te loto fale ʼo te ʼofisa Esipito ko Potifale. Neʼe falala tona pule kia te ia, ʼo kaku pe ki te temi ʼae neʼe tukugakoviʼi ai ia ia e tona ʼohoana, takua neʼe ina fakaʼalikiʼi ia ia. Koia neʼe ʼave ai ia Sosefo ki te fale pilisoni. *—Senesi, kapite 37, 39.

ʼI tona taʼu 28, neʼe kua taʼu 10 tupu tana nofo pilisoni. Neʼe mole fakaʼamu ia ke feia tona maʼuli. ʼE fakaʼateainaʼi anai koa ia ia ʼi he ʼaho? ʼE toe sio anai koa ki tana tamai pea mo tona kiʼi tehina ʼofaina ko Pesamino? ʼE toe fualoa anai koa tana nofo ʼi te fale pilisoni ʼaia?

Neʼe kua kotou logoʼi koa ia te ʼu meʼa ʼae neʼe logoʼi e Sosefo? ʼI ʼihi temi ʼe mole hoko ia te ʼu aluʼaga ʼae neʼe tou fakaʼamu ki ai ʼi tatatou kei tupulaga. ʼI ʼihi temi ʼe ʼi ai te ʼu aluʼaga faigataʼa ʼe hoko hoholo pea ʼe hage ʼe mole ʼi ai he puleʼaki ki ai, peʼe faigataʼa hatatou katakiʼi. Tou vakaʼi pe kotea te ako ʼe feala ke tou maʼu mai te tui ʼa Sosefo.

Neʼe iloʼi pe e Sosefo ʼe tokagaʼi ia ia e tona ʼAtua, ia Sehova pea ko te tupuʼaga la ʼaia ʼo tana lava katakiʼi ia te ʼu faigataʼaia. Logo la neʼe nofo ia Sosefo ʼi he fale pilisoni, ʼi he fenua matapule, kaʼe neʼe tapuakinaʼi pe e Sehova ia ia. ʼE tou lau fenei: “Nee nofo leva [Sehova] mo Sosefo, pea nee ina fakaha leva tana agalelei kia ia. Nee ina tuku leva kia ia he kalasia ia mua o te pule o te fale pilisoni.” (Senesi 39:21-23) Neʼe tapuakinaʼi e te ʼAtua ia Sosefo koteʼuhi neʼe haga gaue kinakina. Pea neʼe lagi fiafia tona loto ʼi tana iloʼi ʼae neʼe nofo tuʼumaʼu pe ia Sehova mo ia.

Neʼe loto koa e Sehova ke nofo ia Sosefo ʼi te fale pilisoni ʼo talu ai? Neʼe mole feala ke iloʼi e Sosefo ia te faʼahi ʼaia. Kaʼe neʼe lagi faikole ia Sosefo ki te ʼAtua ʼo ʼuhiga mo te faʼahi ʼaia. Pea neʼe tali e Sehova ki tana kole ʼi he aluʼaga neʼe mole manatu ki ai. ʼI te tahi ʼaho, neʼe ʼi ai te ʼu tagata ʼe toko lua neʼe ʼaumai ki te fale pilisoni. Neʼe ko te ʼu tagata neʼe gaue ʼi te fale ʼo Falaone. Neʼe ko te pule ʼo te ʼu tagata taʼo pane pea mo te pule ʼo te ʼu tagata ʼae neʼe tokaga ki te meʼa inu ʼa Falaone.—Senesi 40:1-3.

Neʼe tuku e te pule ʼo te fale pilisoni ke leʼole’o e Sosefo ia te ʼu tagata ʼaia ʼe toko lua ʼi te poʼuli. * ʼI te  tahi po, neʼe nā fai he ʼu moemisi ʼe matafaikehe. Pea ʼi te ʼaho ake neʼe tokagaʼi e Sosefo ʼe hage neʼe ʼi ai he meʼa ʼe nā hoha ki ai. Neʼe ina fehuʼi fenei age: “Kotea e kolua mata mamahi ai i te aho aeni?” (Senesi 40:3-7) Neʼe lagi fia palalau agalelei age ke feala hanā fakaha ia te ʼu faʼahi ʼae ʼe nā lotomamahi ai. Neʼe mole heʼeki iloʼi e Sosefo, kaʼe ʼe ʼamanaki hoko ai he aluʼaga ʼe fetogi ai leva tona maʼuli. Neʼe feala koa ke hoko tanatou faipalalau ʼaia mo ka na pau la neʼe mole fia tokagaʼi e Sosefo ia naua? Koia ʼe feala ai ke tou fai ia te fehuʼi ʼaeni: “ ʼE au hage koa ko Sosefo ʼo au tokagaʼi ia te hahaʼi, ʼaki taku palalau age kia natou ʼo ʼuhiga mo taku tui ʼae ki te ʼAtua?”

Neʼe fakamahino age e te ʼu tagata ʼe toko lua neʼe nā lotohoha ʼuhi ko te matafaikehe ʼo ʼanā moemisi ʼae neʼe nā fai. Pea neʼe mole he tahi ke ina fakamahino age ʼanā moemisi. Neʼe maʼuhiga te ʼu moemisi ki te kau Esipito pea neʼe natou fakalogo ki te ʼu tagata ʼae ʼe natou ui ʼe natou lava fakamahino. Neʼe mole iloʼi e te ʼu tagata ʼaia, neʼe haʼu ʼanā moemisi mai ia Sehova, te ʼAtua ʼo Sosefo. Kaʼe neʼe iloʼi e Sosefo. Koia neʼe ina fakalotomalohiʼi fenei ai naua: “Ko te Atua toko tahi ae e feala ke ina fakamahino atu te u moemisi aena kia koulua. Koulua fakamatala mai te u moemisi kia au.” (Senesi 40:8) ʼE ʼaoga te ʼu palalau ʼaeni neʼe fai e Sosefo kia natou fuli ʼae ʼe natou ako fakamalotoloto ia te Tohi-Tapu ia ʼaho nei. Ka na neʼe agavaivai te hahaʼi ʼo hage ko te ʼu tagata Esipito ʼaia pea mo falala ʼo natou kumi mai te ʼAtua ia te fakamahino totonu ʼo tana folafola.—1 Tesalonika 2:13; Sakopo 4:6.

Neʼe ʼuluaki kamata muʼa e te pule ʼae ʼe tokaga ki te ʼu meʼa inu ʼa Falaone. Neʼe ina fakamatala age kia Sosefo tana moemisi ʼo ʼuhiga mo he fuʼu vite mo ʼona vaʼa ʼe tolu ʼe fua. Neʼe kua momoho te ʼu vite pea neʼe tatau e te pule te huʼa vite ki te ipu ʼa Falaone. Neʼe faikole ia Sosefo kia Sehova pea mo ina fakamahino atu aipe ia tana moemisi. Neʼe ina ui age ʼe fakata ia te ʼu vaʼa ʼaia ʼe tolu kia ʼaho ʼe tolu, ʼae ʼe toe fakanofo anai e Falaone ia ia ki tana gaue. Neʼe lotofimalie atu aipe te tagata Esipito. Pea neʼe fai fenei age e Sosefo tana kole ki ai: “Ke ke fakaha tou ofa kia au, o palalau kia Falaone o uhiga mo au.” Neʼe fakamatala age e Sosefo neʼe toʼo ia ia mai tona loto fale pea neʼe pilisoniʼi ia ia kaʼe neʼe mole ina fai hana hala.—Senesi 40:9-15.

Neʼe fiafia ia te tagata taʼo pane ʼi tana logo ʼae ki te fakamatala ʼo ʼuhiga mo te pule ʼae ʼe tokaga ki te ʼu meʼa inu ʼo Falaone. Koia neʼe ina kole age kia Sosefo ke ina fakamahino age tana moemisi. Neʼe ina sio ki he ʼu kato pane ʼe tolu pea mo te ʼu manulele neʼe ʼomai ʼo kai te pane ʼi ʼoluga ʼo tona ʼulu. Neʼe toe fakaha e Sosefo ia tona fakaʼuhiga. Kaʼe neʼe mole ko he ʼu logo lelei maʼa te tagata taʼo pane. Neʼe ui fenei e Sosefo: “Koeni tona fakamahino: ko te u kato ae e tolu ko te u aho aia e tolu. Kei toe anai ni aho e tolu, pea e too anai e Falaone tou tuulaga ia koe. E tautau anai ia koe ki he akau, pea e omai anai te u manulele o te lagi o kai tou sino.” (Senesi 40:16-19) Ohage pe ko te ʼu kaugana fuli ʼa te ʼAtua, neʼe fakaha fakahagatonu e Sosefo ia te ʼu logo ʼa te ʼAtua, mo te ʼu logo lelei ʼo feia mo te ʼu fakamau ka haʼu.—Esaia 61:2.

 Hili ki ai ʼaho ʼe tolu, neʼe hoko moʼoni te ʼu palalau ʼa Sosefo. Neʼe fai e Falaone ia he fakafiafia ʼo ʼuhiga mo tona ʼaho tupu. Neʼe ko he ʼu fakafiafia neʼe mole fai e te hahaʼi ʼa te ʼAtua ʼi te temi ʼaia. Neʼe fakaha e Falaone ʼana tonu ʼo ʼuhiga mo ʼana kaugana ʼaia ʼe toko lua. Neʼe matehi ia te tagata taʼo pane ohage pe ko tona ui e Sosefo. Kaʼe neʼe toe fakanofo ia te tagata ʼae ʼe tokaga ki te ʼu meʼa inu ʼa Falaone ki tana gaue. Kaʼe meʼa fakaʼofaʼofa, neʼe galoʼi e te tagata Esipito ia Sosefo.—Senesi 40:20-23.

Kua hili nei ki ai taʼu ʼe lua. (Senesi 41:1) Kotou fakakaukauʼi age muʼa ia te toe lotomamahi ʼae neʼe logoʼi e Sosefo. Neʼe lagi lahi ʼana fakaʼamu, ʼi tana sio ʼae neʼe foaki age e Sehova ia te ʼu fakamahino ʼo te ʼu moemisi ʼa te ʼu tagata Esipito ʼe toko lua. ʼI te ʼaho fuli neʼe lagi ala ake pea mo fakaʼamu ʼe ko te ʼaho ʼaia ʼae ka fakaʼateainaʼi anai ia ia. Neʼe lagi kua fiu ʼi te nofo ʼi te fale pilisoni pea mo tana sio ʼae ʼe mole he meʼa ʼe hoko. Neʼe lagi ko te ʼu taʼu ʼaia ʼe lua, ko te ʼu taʼu faigataʼa ʼaia ʼo tana katakiʼi ia te ʼu taʼu fuli ʼae neʼe nofo ai ʼi te fale pilisoni. Kaʼe neʼe falala tuʼumaʼu pe ia kia Sehova, tona ʼAtua. Neʼe mole lotovaivai ia, kaʼe neʼe ina fakatotonu malohi ke ina katakiʼi te aluʼaga ʼaia, pea neʼe liliu ai ʼo malohi age.—Sakopo 1:4.

ʼI te ʼu temi faigataʼa ʼaeni, ko ai ʼae ʼe mole ʼaoga ke ina ako ia te faʼa kataki? ʼE ʼaoga kia tatou ia te faʼa kataki pea mo te tokalelei ʼae ʼe foaki mai e te ʼAtua mo kapau ʼe tou fia tauʼi ia te ʼu fihifihia ʼo te maʼuli. Ohage pe ko Sosefo ʼe tonu ke tou taupau maʼu ia he ʼamanaki lelei, kaʼe ke ʼaua naʼa tou lotovaivai.—Loma 12:12; 15:13.

Neʼe mole kei manatuʼi e te kaugana ʼa Falaone ia Sosefo. Kaʼe neʼe kei manatuʼi pe e Sehova. ʼI te tahi po, neʼe ina fakaha age kia Falaone he ʼu moemisi ʼe lua, neʼe mole feala ke ina galoʼi. ʼI te ʼuluaki, neʼe sio te hau ki ni pipi matalelei neʼe hake mai te Nile. Pea neʼe muli mai ia natou he ʼu pipi ʼe fitu ʼe sino kovi pea mo matakovi. Neʼe kai leva e te ʼu pipi ʼae ʼe sino kovi ia te ʼu pipi ʼae ʼe sisino. Hili ia, neʼe sio leva ia Falaone ki he ʼu kauʼi fulumeto ʼe fitu ʼe matalelei pea mo fua lalahi. Pea neʼe homo ake leva ni ʼihi ake kauʼi fulumeto ʼe fitu, ʼae ʼe mae mo mahunu ʼi te matagi. Pea neʼe folo leva e te u kauʼi fulumeto ʼae ʼe mae, te ʼu kauʼi fulumeto fua lalahi mo fua lelei. ʼI te uhu, neʼe hoha ia Falaone ʼi tana ala ake, ʼuhi ko tana moemisi. Koia neʼe ina kole ai ki te kau popoto pea mo te kau pelepitelo fuli ʼo Esipito, ke natou fakamahino age tana moemisi. Kaʼe neʼe mole natou lavaʼi. (Senesi 41:1-8) ʼE mole tou iloʼi pe neʼe kotea tanatou manatu. Kaʼe neʼe lotovaivai ia Falaone ʼi tana tokagaʼi ʼae ʼe lagi mole feala anai ke ina iloʼi tona fakaʼuhiga.

ʼI te temi leva ʼaia, neʼe manatuʼi ai e te kaugana ʼa Falaone ia Sosefo. Neʼe hoha tana fakakaukau pea neʼe ina ui age kia Falaone, neʼe ʼi ai te tupulaga ʼi te fale pilisoni, kua hili ki ai taʼu ʼe lua, neʼe ina fakamahino age tana moemisi pea mo ʼae ʼo te tagata taʼo pane. Neʼe fekauʼi atu aipe e Falaone ke ʼaumai ia Sosefo mai te fale pilisoni.—Senesi 41:9-13.

Kotou fakakaukauʼi age muʼa ia te fiafia ʼae neʼe logoʼi e Sosefo ʼi te olo age ʼa te ʼu tagata ʼave logo ʼa Falaone. Neʼe teuteu fakavilivili pea mo tele tona kava mo tona foʼi ʼulu ohage ko te kau Esipito. ʼE mahino ia, neʼe faikole fakamalotoloto kia Sehova ke ina tapuakiʼi tanā felogoʼi. Neʼe alu leva ki te fale ʼo te hau ʼo tuʼu ia muʼa ʼo Falaone. ʼE tou lau fenei: “Nee ui leva e Falaone kia Sosefo: Nee au fai he moemisi, pea nee mole feala ke fakamahino ia e he tahi. Pea nee au logo e ke fakamahino te u moemisi, i te osi o tau fakalogo ki ai.” Neʼe toe fakaha e Sosefo tana agavaivai pea mo tana tui ʼi tana tali fenei: “E mole ko au! Kae ko te Atua ae ka ina foaki anai he tali lelei kia Falaone.”—Senesi 41:14-16.

ʼE ʼofa ia Sehova ki te hahaʼi agavaivai pea mo agatonu. Ko te tupuʼaga la ʼaia ʼo tana fakaha age kia Sosefo ia te ʼu fakamahino ʼae neʼe mole feala ke maʼu e te ʼu hahaʼi popoto pea mo te kau pelepitelo ʼo Esipito. Neʼe ui age e Sosefo kia Falaone, ko ʼana moemisi ʼe lua ʼe fakaʼuhiga pe ki he meʼa ʼe tahi. Neʼe fakaha age e Sehova ia te ʼu moemisi ʼe lua, ke mahino ki ai ʼe ko he “fakapapau” pea ke tui ʼe hoko moʼoni anai. ʼE fakata ia te ʼu pipi ʼae ʼe sino lelei pea mo te ʼu kauʼi fulumeto ʼae ʼe fua lelei ki he ʼu taʼu ʼe fitu ʼe mahu anai te meʼa kai ʼi Esipito. Pea ʼe fakata ia te ʼu pipi ʼae ʼe sino kovi pea mo te ʼu kauʼi fulumeto ʼae ʼe mae ki he ʼu taʼu ʼe fitu ʼae ʼe hoa atu ki te ʼu taʼu ʼae  ʼe fitu ʼe mahu ai te meʼa kai. Pea ʼi te ʼu taʼu ʼaia ʼe hoge meʼa kai anai ʼi Esipito. Pea ʼe lahi anai ia te hoge ʼi te fenua.—Senesi 41:25-32.

Neʼe iloʼi ai e Falaone neʼe maʼu e Sosefo ia te tali. Kaʼe kotea te puleʼaki ki ai? Neʼe fakaha e Sosefo ia he fakatuʼutuʼu gaue. Neʼe tonu ke kumi e Falaone ia he tagata “atamai mo poto” ke ina takitaki ia te tanaki ki te ʼu fale koloa te fulumeto ʼae neʼe mole fakaʼaogaʼi lolotoga te ʼu taʼu ʼaia ʼe fitu ʼe mahu ai te meʼa kai. Pea moka hoko mai leva te ʼu taʼu ʼae ʼe hoge meʼa kai ai, ʼe feala leva ke tufa te meʼa kai ki te hahaʼi. (Senesi 41:33-36) Neʼe maʼu e Sosefo ia te poto pea mo te ʼu fealagia ʼae moʼo fakahoko ia te gaue ʼaia, kaʼe neʼe fia meʼa noa pe ia. Neʼe agavaivai ʼuhi ko tana tui malohi. Kapau ʼe tou tui malohi kia Sehova pea ʼe mole anai tou fiatuʼu. ʼE tou maʼu anai te tokalelei mo tuku te ʼu fihifihia kia nima ʼo Sehova.

Neʼe sio ia Falaone pea mo ʼana kaugana ki te fakapotopoto ʼo te fakatuʼutuʼu gaue ʼa Sosefo. Pea neʼe mahino ki te hau, neʼe ko te ʼAtua ʼae neʼe ina fakaha age kia Sosefo ia te ʼu palalau fakapotopoto ʼaia. Neʼe ina ui fenei ki ʼana kaugana ʼi te fale hau: “E nofo te tagata aeni mo te Laumalie o te Atua. Pe e tou toe mau anai he tahi age tagata e tatau mo ia aeni?” Pea neʼe ina ui fenei kia Sosefo: “Koeni kua fakaha e te Atua kia koe te u mea fuli aeni, e mole toe mau anai he tahi age tagata ae e toe atamai mo toe poto age ia koe. Koia, e au fakanofo ia koe ke ke pule ki toku puleaga, pea e fakalogo anai taku hahai katoa ki au fakatotonu. E au mahili pe la koe i te hekaaga fakahau.”—Senesi 41:38-41.

Neʼe fakahoko e Falaone tana fakapapau. Neʼe ina teu ia Sosefo ʼaki he teu matalelei, mo he kahoa ʼaulo, mo he mama fakahau, pea mo he saliote fakahau, mo te fealagia ʼae ke feʼaluʼaki faʼitaliha ʼi te fenua pea mo fakahoko ʼana fakatuʼutuʼu. (Senesi 41:42-44) ʼI te ʼaho pe ʼe tahi, neʼe mavae ai Sosefo mai te fale pilisoni ki te fale hau. ʼI te ala uhu ake, neʼe ko te tagata pilisoni agavaivai pea ʼi te afiafi neʼe liliu leva ko te toʼo mataʼu ʼo Falaone. ʼE fakamoʼoni ʼaki ai te tui papau ʼa Sosefo kia Sehova. Neʼe sio moʼoni ia Sehova ki te ʼu mamahi ʼae neʼe tau mo Sosefo lolotoga te ʼu taʼu. ʼI tona temi totonu, neʼe fakatokatoka ai e Sehova ʼona fihifihia ʼi hona ʼu aluʼaga lelei. Neʼe mole fia fakatokatoka pe e Sehova ia te ʼu mamahi ʼae neʼe tau mo Sosefo, kaʼe neʼe ina toe fia puipui ia te ka haʼu ʼo te puleʼaga ʼo Iselaele. Koia ka tou vakaʼi anai ʼi te alatike ʼae ka hoa mai.

ʼAua naʼa kotou lotovaivai moka kotou tau mo he ʼu fihifihia, ohage ko te heʼe faitotonu ʼe mata loaloaga fau. Kotou manatuʼi ia Sosefo. Neʼe mole puli tana agalelei, mo tana fiavaivai, mo tana faʼa kataki pea mo tana tui. Koia neʼe tapuakinaʼi ai e Sehova ki muli age.