NEʼE nofo ia Sosefo ʼi tona ʼoloto ʼi te malumalu ʼo te afiafi. ʼE lagi ina sioʼi te ʼu fuʼu palema pea mo ʼihi atu fuʼu ʼakau, mo te ʼu maʼanuʼaga ʼae ʼe tuʼu ai te ʼu fuʼu ʼakau pea ʼi te tuʼa kaupa ʼe tuʼu mai ai te fale hau ʼo Falaone. Kotou fakakaukauʼi age muʼa ia te logo ʼa Sosefo ki te logoaʼa mai tona ʼapi; ko tona foha ʼae ko Manase ʼe gaoʼi mo tona kiʼi tehina ko Efalaimi. Neʼe feala ke fakakaukauʼi e Sosefo ia te aluʼaga ʼae ʼe hoko ʼi tona loto fale, te kata ʼo tona ʼohoana ʼuhi ko te gaoʼi ʼo ʼanā fanau. Neʼe malimali, pea neʼe ina iloʼi neʼe tapuakinaʼi ia ia.

Neʼe foaki e Sosefo ia te higoa ʼae ko Manase ki tona foha ʼuluaki ko tona fakaʼuhiga kua galoʼi. (Senesi 41:51) Ko te ʼu tapuakina ʼa te ʼAtua neʼe ina foaki kia Sosefo ʼi te ʼu taʼu ʼae kua hili, neʼe ina fakafimalieʼi ia te ʼatamai ʼo Sosefo ʼuhi ko tana manatuʼi ia tona ʼapi, mo ʼona tehina pea mo tana tamai. Neʼe fetogi ia tona maʼuli ʼuhi ko tona fehiʼaʼinaʼi e ʼona tehina. Neʼe natou gaohi koviʼi pea mo natou fakamatakuʼi ia ia, ʼe natou matehi anai pea mo natou fakatau ohage ko he tagata kaugana ki ni tagata faikoloa. Pea talu mai ai, neʼe lahi te ʼu aluʼaga neʼe hoko ʼi tona maʼuli. Lolotoga te ʼu taʼu ʼe hogofulu ma lua tupu, neʼe maʼuli popula pea mo pilisoni ʼi he temi fualoa. Kaʼe ʼi te temi nei, ko ia ʼae kua hoa kia Falaone ʼi te puleʼaga malohi ʼo Esipito. *

Lolotoga ni taʼu, neʼe sio ia Sosefo ki te ʼu aluʼaga ʼae neʼe hoko ohage pe ko tona fakakikite e Sehova. Neʼe hoko ia te lea fakakikite ʼae ʼe mahu anai ia te meʼa kai ia taʼu ʼe fitu ʼi Esipito, pea neʼe tokaga ia Sosefo ki te tanaki ʼo te meʼa kai ʼaia. Lolotoga te temi ʼaia, neʼe ina maʼu ʼona foha ʼe lua mo tona ʼohoana ko Asenate. Kaʼe neʼe ina manatuʼi tuʼumaʼu pe ia tona famili ʼae neʼe nonofo mamaʼo ʼi ni lauʼi kilometa mo ia, tafitō ia tona kiʼi tehina ko Pesamino pea mo tana tamai ko Sakopo. Neʼe lagi feʼekeʼaki e Sosefo pe natou lelei pe pea mo haohaoa mai he ʼu tuʼutamaki. Neʼe lagi toe feʼekeʼaki pe ʼe kua fetogi ʼona tehina ʼae neʼe agakovi, peʼe ʼe feala anai ʼi he ʼaho ke toe fakatokatoka mo tona famili pea mo toe fakatahi mo natou.

Kapau ʼe mole kotou tokalelei mo tokotou famili ʼuhi ko te maheka, pe neʼe natou kakāʼi koutou, peʼe natou fehihiʼa kia koutou, ʼe tatau tokotou aluʼaga mo te faʼahi ʼae neʼe hoko kia Sosefo. Kotea ʼae ʼe feala ke tou ako mai te tui ʼa Sosefo ʼi tana tokaga ʼae ki tona famili?

Neʼe maʼumaʼua lahi ia Sosefo ʼi te ʼaho fuli, pea neʼe alu vave te ʼu taʼu. Hili pe te ʼu taʼu ʼe fitu ʼo te taʼukai neʼe ʼi ai he toe fetogi lahi, ohage pe ko tona fakakikite e Sehova ʼi te moemisi ʼa Falaone. Neʼe mole ʼi ai he meʼa kai ʼi te ʼu gaueʼaga. Neʼe kua vave mafola ia te hoge ʼi te ʼu fenua katoa ʼae ʼi te ʼu tafaʼaki. Kaʼe ohage ko tona ui fenei ʼi te Tohi-Tapu: “Nee mau pe te pane i te fenua katoa o Esipito.” (Senesi 41:54) Koia, neʼe fua lelei ki te hahaʼi ʼo Esipito ʼuhi ko te fakakikite ʼa Sosefo pea mo tana faʼahiga fakatuʼutuʼu ʼo te taʼukai.

Neʼe tonu ke lotofakafetaʼi ia te kau Esipito pea mo fakamalō kia Sosefo koteʼuhi neʼe ina fakatuʼutuʼu lelei ia te tanaki ʼo te meʼa kai. Kaʼe neʼe iloʼi e Sosefo ko Sehova, ia tona ʼAtua ʼae ʼe tuha mo ia ke fai ki ai te ʼu fakafetaʼi. Kapau ʼe tou fakaʼaogaʼi ʼotatou fealagia ki te  tauhi ʼae ki totatou ʼAtua, ʼe feala ke ina fakagafua mai ke tou fakaʼaogaʼi totatou faiva ʼo laka age ʼi hona aluʼaga neʼe mole tou ʼamanaki ki ai.

ʼAki te temi, neʼe toe kakusia mo te kau Esipito ʼi te hoge. ʼI tanatou kalaga ʼae kia Falaone ke tokoni age, neʼe ina ui fenei age: “Kotou olo kia Sosefo, pea koutou fai te mea ae e ina fakatotonu atu kia koutou.” Koia, neʼe kamata avahi ai e Sosefo te ʼu fale ʼae neʼe tanaki ai te ʼu meʼa kai pea neʼe feala ki te hahaʼi hanatou ʼomai ʼo toʼo ia te ʼu meʼa ʼae neʼe ʼaoga kia natou.—Senesi 41:55, 56.

Ko te ʼu fenua ʼae ʼi ʼonatou tafaʼaki neʼe mole ʼi ai hanatou meʼa kai. Neʼe nonofo mamaʼo ia te famili ʼo Sakopo ia lauʼi kilometa ʼe teau tupu pea neʼe natou maʼuli mamahi heʼe neʼe mole kei ʼi ai hanatou meʼa kai. Neʼe kua matuʼa ia Sakopo pea neʼe maʼu logo ʼe maʼu ia te fulumeto ʼi Esipito, koia neʼe ina fekauʼi ai ʼona foha ke natou olo ʼo kumi mai hanatou meʼa kai.—Senesi 42:1, 2.

Neʼe fekauʼi e Sakopo ʼona foha ʼae ʼe hogofulu kaʼe neʼe mole alu ai ia tona foha muli, ia Pesamino. Neʼe manatuʼi lelei e Sakopo ia te temi ʼae neʼe ina fekauʼi ai tona foha ʼofaina ko Sosefo ke alu tokotahi ʼo ʼahiʼahi ki ʼona tehina. Neʼe ko te ʼaho pe ʼaia, neʼe sio fakaʼosi ai ki tona foha. Neʼe ʼaumai e ʼona foha ia te kofu matalelei ʼo Sosefo kua makahaehae pea mo totoʼia. Neʼe ko te meʼa ʼofa ʼo tana tamai moʼo fakaha ʼaki ai ia tona ʼofa ʼae kia Sosefo. Neʼe natou fakamamahiʼi tanatou tamai ʼo natou ui age neʼe kai ia Sosefo e te manu fekai.—Senesi 37:31-35.

Hili he faifagona loaloaga, neʼe tau ia te ʼu foha ʼo Sakopo ki Esipito. Moka natou fia toʼo ia he fulumeto, neʼe ʼave natou ki he tagata maʼuhiga neʼe higoa ko Safinati-Paeneasi. (Senesi 41:45) Neʼe natou iloʼi koa ko Sosefo? Kailoa. ʼI tanatou sisio ki ai neʼe ko he pule maʼuhiga pe ia ʼo Esipito, ko he tahi neʼe fia tokoni age. Moʼo fakaha ia tanatou fakaʼapaʼapa, “nee omai leva te u tehina o Sosefo o punou ki te kele i ona mua” ohage ko tona fai e te hahaʼi fuli.—Senesi 42:5, 6.

Kotea ʼae neʼe fai e Sosefo? Neʼe ina iloʼi atu aipe ʼona tehina. Pea ʼi te temi ʼae neʼe sio ai ki tanatou punonou kia ia, neʼe ina manatuʼi ia te temi ʼae neʼe kei veliveli ai. ʼE ui ʼi te Tohi-Tapu “nee manatui leva e Sosefo te u moemisi” ʼae neʼe foaki age e Sehova ʼi te temi ʼae neʼe kei veliveli ai. Kaʼe neʼe fakaha fakatomuʼa ʼi te ʼu moemisi ʼaia ia te temi ʼae ʼe punonou anai ʼona tehina kia ia ohage pe ko tanatou lolotoga fakahoko ʼi te temi ʼaia. (Senesi 37:2, 5-9; 42:7, 9) Kotea ʼae ka fai anai e Sosefo? ʼE alu anai koa ʼo faʼufua kia natou peʼe lagavaka anai kia natou?

Neʼe iloʼi e Sosefo neʼe tonu ke ina lolomi ia te ʼu meʼa ʼae neʼe ina logoʼi. Neʼe takitaki e Sehova ia te ʼu aluʼaga ʼae ka hoko. Neʼe kau ia te ʼu faʼahi ʼaia ʼi ʼana fakatuʼutuʼu. Neʼe ina fakapapau ʼe liliu anai ia te hologa ʼo Sakopo ko he puleʼaga malohi. (Senesi 35:11, 12) Ka na pau la neʼe kei agakovi te ʼu tehina ʼo Sosefo, mo manatu pe kia natou pea mo heʼe ʼofa, neʼe feala pe ke fua kovi kia natou. Koia ʼae neʼe tonu ai kia Sosefo ke ina maʼu ia te loto lolomi, kana ʼaua la neʼe mole feala ki ʼona tehina ke toe liliu ki tonatou ʼapi pea mo lagi feala ke tuʼutamakiʼia ai te maʼuli ʼo tana tamai pea mo Pesamino. Neʼe kei nā maʼuʼuli koa? Neʼe fakatotonu e Sosefo ke mole ina fakaha pe ko ai ia ia ke feala  hana ʼahiʼahiʼi ʼona tehina pea mo vakaʼi peʼe kua natou fetogi. Pea ʼe ina iloʼi anai pe kotea ʼe loto e Sehova ke ina fai.

ʼE lagi mole kotou felaveʼi anai mo he aluʼaga feia. Kaʼe ʼi te malama ʼaeni ʼe maʼu ai te ke pea mo te mavete ʼi te ʼu famili. Moka tou felaveʼi mo te taʼi ʼu fihifihia ʼaia, ʼe feala ke tou muliʼi ia totatou loto pea mo fai ia he meʼa kaʼe neʼe mole tou fakakaukauʼi. ʼE ko he aga fakapotopoto ke tou faʼifaʼitakiʼi ia Sosefo pea mo faiga ke tou fakasiosio pe kotea ʼae ʼe loto e te ʼAtua ke tou fai moʼo fakatokatoka ʼotatou fihifihia. (Taaga Lea 14:12) Kotou manatuʼi, ʼe fakalogo totatou maʼuli ki tatatou tokalelei ʼae mo Sehova pea mo tona Alo logo la ʼe maʼuhiga ke tou tokalelei mo totatou famili.—Mateo 10:37.

Neʼe ʼahiʼahiʼi e Sosefo ʼona tehina ke ina iloʼi pe kotea ʼae ʼi ʼonatou loto. ʼAki te tokoni ʼa he tagata fakahoko lea, neʼe kamata palalau fefeka ai kia natou ʼo ina tukugakoviʼi natou ko he ʼu tagata kakā. Moʼo haofaki ia natou totonu, neʼe natou palalau ai kia ia ʼo ʼuhiga mo tonatou famili pea neʼe ʼi ai honatou kiʼi tehina neʼe nofo ʼi fale. Neʼe faigaʼi e Sosefo ke mole ina fakaha ia tana fiafia. Neʼe kei maʼuli moʼoni koa ia tona kiʼi tehina? Neʼe kua iloʼi leva e Sosefo pe kotea ʼae ka ina fai. Neʼe ina ui fenei: “E au ahiahii anai koutou i te mea aeni.” Pea neʼe ina ui age kia natou ʼe tonu ke sio ki tonatou kiʼi tehina ʼaia. ʼI te temi ʼaia, neʼe ina tuku ke natou toe liliu ki tonatou ʼapi ʼo kumi mai ia tonatou kiʼi tehina kaʼe neʼe tonu ke taʼofi he tahi ia natou.—Senesi 42:9-20.

Neʼe felogoʼi muʼa ia te fale tautehina kaʼe neʼe mole natou iloʼi neʼe feala ke lotomahino ia Sosefo kia natou. Neʼe natou fakahemala ki te toe agahala ʼae neʼe natou fai kua hili ki ai taʼu ʼe 20. Neʼe natou ui fenei: “Kua hoko te mamahi aeni kia tatou o tupu ko tatatou agahala ae nee tou fai ki totatou tehina: Koteuhi nee tou sio ki te mamahi o tona loto, i tana tagi mai kia tatou ke tou ofa age kia ia, kae nee mole tou tokagai ia ia!” Neʼe mahino ia Sosefo ki te aluʼaga ʼae neʼe natou faipalalau ki ai pea neʼe maliu kehe mai ia natou ke ʼaua tanatou sisio ki ʼona loʼimata. (Senesi 42:21-24) Neʼe ina iloʼi ko te fakahemala moʼoni ʼe mole gata ʼaki pe ki te fakahemala ki te ʼu nunuʼa ʼo he aga ʼe kovi. Koia, neʼe ina haga ai ʼo ʼahiʼahiʼi natou.

Neʼe ina fekauʼi leva ia natou ke olo ki tonatou ʼapi kaʼe neʼe ina taʼofi ia Simeone ohage ko he tagata pilisoni. Neʼe ina toe fufu ia he foʼi falā ʼi te ʼu kato meʼa kai ʼae neʼe natou olo mo ia ki tonatou ʼapi. Neʼe toe liliu ia te fale tau tehina ki tonatou ʼapi kaʼe neʼe faigataʼa kia natou koteʼuhi neʼe natou iloʼi ʼe mole tuku age anai e Sakopo ia tona ʼofaaga ko Pesamino ke natou olo mo ia ki Esipito. ʼI tanatou tau atu ki Esipito, neʼe natou fakaha ki te tagata tauhi ʼapi ʼo Sosefo ia te foʼi falā ʼae neʼe natou maʼu ʼi ʼanatou kato, pea neʼe natou ui age ki ai ʼe feala tanatou totogi fuli ia te foʼi falā ʼaia. Neʼe lelei ia tanatou manatu ʼaia, kaʼe neʼe loto e Sosefo ke ina iloʼi tonatou ʼuhiga moʼoni. Neʼe ina foaki ia he meʼa kai lelei maʼa natou pea neʼe ina fakanofo ia Pesamino ki he nofoʼaga ʼe feala hana sio ki ai. Pea neʼe ina fekauʼi ai natou ke natou liliu ki tonatou ʼapi mo tanatou meʼa kai kaʼe ʼi te temi leva ʼaia neʼe fafaʼo fakafufu ia he ipu siliva ki te kato ʼa Pesamino.—Senesi 42:26–44:2.

Pea neʼe fakahoko e Sosefo ia tana ʼahiʼahi. Neʼe ina fekau ke tuli pea mo puke ʼona tehina pea neʼe ina tukugakoviʼi natou ʼi tanatou kaihaʼa ia te ipu. ʼI tanatou maʼu ʼi te kato ʼa Pesamino, neʼe ʼave fuli natou kia Sosefo. Neʼe ko te faigamalie ʼaia ke iloʼi ai e Sosefo pe ko te ʼu tagata feafeaʼi ʼona tehina. Ko Suta ʼae neʼe fakahoko lea ia natou. Neʼe faifakalelei pea neʼe ina toe kole age ke liliu fuli ia te toko 11 ko ni kaugana ʼi Esipito. Neʼe ui age e Sosefo ko Pesamino tokotahi pe ʼae ʼe tonu ke nofo ʼo kaugana ʼi Esipito kaʼe ko natou fuli ʼae ʼe tonu ke natou mavae.—Senesi 44:2-17.

Neʼe tali fenei ia Suta ʼaki he lototoʼa: “E ofa kehe age tamatou tamai ki te fanau aia, koteuhi ko te fanau aia e tahi kei toe kia ia i te fafine ae nee ofa mamahi ia ia ki ai.” Neʼe malave ia te ʼu kupu ʼaia kia Sosefo ʼae ko te ʼuluaki kiʼi tama ʼa Lasele ia te ʼohoana ʼofaina ʼo Sakopo, neʼe mate ʼi te temi ʼae neʼe ina fanauʼi ai ia Pesamino. Ohage pe ko tana tamai, neʼe fiafia ia Sosefo ʼi te manatuʼi ia Lasele. ʼE lagi neʼe ko te ʼofa ʼaia ʼae neʼe ina fakatahiʼi ai ia Pesamino pea mo Sosefo.—Senesi 35:18-20; 44:20.

Neʼe kole mamahi e Suta kia Sosefo ke ʼaua naʼa fakakauganaʼi ia Pesamino, kaʼe ke liliu ia ia ko he kaugana. Pea neʼe ina fakaʼosi ʼaki te ʼu palalau fakamalave loto ʼaeni: “Pe feafeai anai haku toe liliu ki taku tamai, kae e mole hake anai te fanau mo au? Ke  aua naa au sio anai ki te mamahi o taku tamai!” (Senesi 44:18-34) ʼI te temi ʼaia, neʼe ko he fakamoʼoni ʼo te kua fetogi ʼa te tagata. Neʼe mole gata ʼaki pe ia tana fakahemala kaʼe neʼe ina toe fakaha ia te lotomahino, mo te ʼofa pea mo te manavaʼofa.

Neʼe mole kei lava mataʼofi e Sosefo te ʼu meʼa ʼae neʼe ina logoʼi. Neʼe ina fakaha ia te ʼu meʼa ʼae neʼe ina logoʼi ʼi tona loto. Neʼe ina fakamavae ki tuʼa ʼana kaugana fuli, pea neʼe tagi leʼo lahi ʼo logo ai ki te fale hau ʼo Falaone. Pea neʼe ina fakaha pe ko ai ia ia, ʼo ina ui fenei: “Ko au Sosefo, ko tokotou tehina.” Neʼe punamaʼuli ai ʼona tehina. Neʼe faʼufua kia natou pea mo ina ui age ʼaki he agalelei neʼe ina fakamolemole ia te ʼu aga ʼae neʼe natou fai kia ia. (Senesi 45:1-15) Neʼe ina fakaha ia te kalitate ʼo Sehova ʼae ʼe fakamolemole ʼaki he lotolelei. (Pesalemo 86:5) ʼE tou toe fakahoko koa mo tatou ia te faʼahi ʼaia?

ʼI te temi ʼae neʼe logo ai ia Falaone ki te aluʼaga ʼae neʼe hoko ʼi te fale ʼo Sosefo, neʼe ina ui kia Sosefo ke ina ʼaumai tana tamai ki Esipito pea mo tona famili katoa. Neʼe mole heʼeki faʼa fualoa ki ai, neʼe fakatahi leva ia Sosefo mo tana tamai ʼofaina. Neʼe tagi ia Sakopo pea mo ina ui fenei: “Ke au mate i te temi aeni, koteuhi kua au sio ki ou mata, pea kei ke mauli!”—Senesi 45:16-28; 46:29, 30.

ʼI tona fakahagatonu, neʼe kei hoko atu ia te maʼuli ʼa Sakopo ia taʼu ʼe 17 ʼi Esipito. Pea neʼe maʼuli fualoa moʼo foaki ia te ʼu tapuakina fakakikite ki ʼona foha ʼae ʼe 12. Neʼe ina foaki maʼa Sosefo ʼae neʼe tuʼulaga 11, ia te ʼu vahe ʼe lua ʼae neʼe tonu ke maʼu e te ʼuluaki foha. ʼE haʼu anai mai ia ia te ʼu telepi ʼe lua ʼo Iselaele. Kaʼe ʼe feafeaʼi kia Suta ʼae neʼe tuʼulaga fa, neʼe fakahemala lahi age ʼi ʼona tehina? Neʼe ina maʼu ia he toe tapuakina lahi: Ko te Mesia ʼe hifo anai mai tona hologa.—Senesi kapite 48, 49.

ʼI te temi ʼae neʼe mate ai ia Sakopo ʼi tona taʼu 147, neʼe matataku ia te ʼu tehina ʼo Sosefo naʼa lagavaka age ia tona famili ʼae neʼe kua liliu ʼo malohi. Kaʼe neʼe ina fakafimalieʼi natou ʼaki te ʼofa. Neʼe ina ui tuʼumaʼu ʼe ko Sehova ʼae neʼe ina ʼaumai tona famili ki Esipito pea neʼe mole tonu ke tukugakoviʼi e ʼona tehina ia natou totonu ʼo ʼuhiga mo te aluʼaga ʼae neʼe hoko. ʼI te temi ʼaia, neʼe ina ui ai te ʼu palalau fakaofoofo ʼaeni: “E mole ko au ae e tonu ke nofo i te tuulaga o te Atua!” (Senesi 15:13; 45:7, 8; 50:15-21) Neʼe sio ia Sosefo kia Sehova ʼi tona ʼuhiga Tui Fakamau haohaoa. Neʼe ko ai koa ia Sosefo ke ina fakatuʼā ia natou ʼae neʼe fakamolemole ki ai ia Sehova?—Hepeleo 10:30.

Neʼe faigataʼa koa kia koutou ia te fakamolemole ki he tahi? ʼE lagi e faigataʼa tafitō la mo kapau neʼe fai mai e he tahi ia he meʼa. Kaʼe kapau ʼe tou loto fakamolemole kia natou ʼae ʼe fakahemala moʼoni, ʼe tou tokoni anai ke mole lotomamahi ʼihi ʼo kau ai mo tatou. Koia, tou faʼifaʼitakiʼi ia te tui ʼa Sosefo pea mo te faʼifaʼitaki ʼo tana Tamai manavaʼofa, ko Sehova.