“ ʼE ALU te ka kaʼe nofo te tagata Siaina ia.” Ko te palalau ʼaia neʼe logoʼi e Alexandra ʼi tana heka ʼi te ka, ʼo fakatalitali ke fakalaka ʼi te vaha ʼo te ʼu fenua ʼe lua ʼo Amelika Saute. Neʼe hifo ʼo vakaʼi pe kotea te aluʼaga ʼae neʼe hoko. Pea neʼe ina maʼu atu ko he tagata Siaina ʼe mole poto lelei ʼi te palalau Fakasepania. ʼE faiga ke ina fakamahino te meʼa ʼae neʼe hoko ki ai ki he tagata polisi. Kaʼe ko Alexan­dra neʼe kau ki he kokelekasio ʼa te kau Fakamoʼoni ʼa Sehova ʼi te lea Fakasiaina. Neʼe lotolelei ia ke fakahoko lea ki te tagata ʼaia.

Neʼe ui e te tagata ʼe maʼuli ʼi te fenua kaʼe neʼe kaihaʼa ʼana pepa pea mo tana foʼi falā. Ko te ʼuluaki polisi neʼe mole fia logo ki te hisitolia ʼaia. Pea neʼe mahalohalo ia ʼe kau ia Alexandra kia natou ʼae ʼe natou fakatau te hahaʼi. Ki muli age, neʼe tali e te polisi te fakamahino ʼa te tagata Siaina, kaʼe neʼe tonu ke ina totogi he tuʼā ʼi tana mole maʼu ia te ʼu pepa. Kaʼe neʼe mole ʼi ai hana foʼi falā moʼo totogi te tuʼā ʼaia. Koia neʼe foaki age e Alexandra ia te foʼi 2 000 CFP. Neʼe mole maʼu feʼauga he kupu ke fakaha e te tagata ʼaia tana lotofakafetaʼi ki ai. Pea neʼe ina ui age ʼe hoki ina huʼi age anai. Neʼe fakamahino age e Alex­andra ʼe mole loto ia ke liufaki age. Kaʼe neʼe fiafia ia ʼi te tokoni age ki ai, koteʼuhi neʼe ina iloʼi ʼe ko he meʼa lelei ʼaia ʼe tonu ke fai. Neʼe ina foaki ki te tagata te ʼu tohi pea mo tokoni ki ai ke ina ako te Tohi-Tapu mo he Fakamoʼoni.

ʼE tou fiafia moka ʼe tou logo ʼe agalelei niʼihi ki te kau matapule. Pea ʼe mahino ia, ʼe fai te aga ʼaia e te hahaʼi ʼo te ʼu lotu fuli pea mo natou ʼae ʼe mole lotu. ʼE mole koa la ke fia faʼifaʼitakiʼi te taʼi agalelei ʼaia ʼaki tau tokaga ki niʼihi? ʼE maʼuhiga te fehuʼi ʼaia he neʼe ui fenei e Sesu: “ ʼE lahi age te fiafia moka kita foaki, ʼi takita tali.” (Gaue 20:35) ʼE toe maʼuhiga foki ki te kau toketa, he ʼe natou ui ko te lotofoaki ʼe lelei kia koe. Tou vakaʼi te faʼahi ʼaia.

ʼE ha ʼi te ʼu aluʼaga ʼae neʼe hoko, ʼe alu tahi tuʼumaʼu te foaki mo te fiafia. Neʼe ui fenei e te apositolo ko Paulo: “ ʼE ʼofa te ʼAtua ki ʼae ʼe ina foaki ʼaki he loto ʼe fiafia.” Neʼe talanoa Paulo ki te kau Kilisitiano ʼae neʼe natou lotolelei ʼo foaki he ʼu meʼa ʼofa moʼo tokoni ki ʼonatou tehina ʼae neʼe felaveʼi mo he ʼu faigataʼaʼia. (2 Kolonito 8:4; 9:7) Neʼe mole ui e Paulo ʼe natou foaki koteʼuhi ʼe natou fiafia. Kaʼe neʼe natou fiafia koteʼuhi neʼe natou lava foaki he ʼu meʼa ʼofa.

ʼO mulimuli ki te sivi neʼe fai, ko te lotofoaki “ ʼe fimalie ai tatatou fakakaukau pea ʼe fakatupu ʼaki ai te fiafia, mo te ʼu felogoʼi lelei mo te tagata pea ʼe tou maʼu ai te lotofalala.” ʼE ui fenei ʼi te tahi sivi neʼe fai: “ ʼE tou fiafia ʼi te totogi ʼo he meʼa maʼa he tahi ʼi hakita totogi pe maʼa kita.”

Neʼe kua ke manatu koa ʼe mole feala anai ke lahi te ʼu faʼahi ʼae ʼe feala ke ke fai ʼuhi ko tou aluʼaga? ʼE mahino ia, ʼe feala kia tatou fuli ke tou iloʼi te fiafia ʼae moka tou “foaki ʼaki he loto ʼe fiafia.” Ka tou foaki he meʼa ʼaki he manatu ʼe lelei, ʼe mole tou lau anai pe ʼe lahi peʼe veliveli. Neʼe momoli e he Fakamoʼoni ʼa Sehova ia tana tohi pea mo tana meʼa ʼofa, kia natou neʼe natou ta te nusipepa ʼaeni. ʼE ui fenei ʼi tana tohi: “ ʼI te ʼu taʼu ʼaia, neʼe mole au lava foaki he meʼa kaʼe neʼe au foaki he kiʼi foʼi falā veliveli pe maʼa te Fale Fono.” ʼE ina hoko atu fenei: “Neʼe toe foaki mai e Sehova ʼAtua ʼo laka age ʼi te meʼa ʼae neʼe au foaki. . . . ʼE au fakafetaʼi ʼi tana fakafealagia ifo ke au lava foaki te meʼa ʼofa ʼaia. Neʼe au logoʼi ʼosi toku loto fimalie.”

ʼE mahino ia, ʼe mole gata ʼaki pe tatatou lotofoaki ʼi te falā. ʼE lahi te ʼu aluʼaga ʼe feala ke tou fakaha ai te lotofoaki.

ʼE ui fenei ʼi te Tohi-Tapu: “E fai e te tagata agalelei te mea ae e lelei ki tona [“maʼuli,” MN ], kae e fai e te tagata agakovi te mea ae e kovi kia ia totonu.” (Taaga Lea 11:17) Ko te hahaʼi agalelei ʼe natou lotolelei ʼo foaki tonatou temi, mo tonatou malohi, mo tokakaga pea mo tokoni ki niʼihi. Ko te ʼu aluʼaga ʼaia ʼe ʼi ai ʼona fua lelei ki tonatou maʼuli ʼi te ʼu aluʼaga kehekehe. Pea ko te lotofoaki ʼaia ʼe fua lelei ki tonatou maʼuli malolo.

ʼE ha ʼi te ʼu sivi neʼe fai, ko natou ʼae ʼe lotolelei ʼo tokoni ki niʼihi, ʼe fakasiʼisiʼi ai tonatou maʼuli mamahi. Pea ʼe lelei age ki tonatou maʼuli malolo. Ko te lotofoaki ʼe feala ke toe tokoni kia natou ʼae ʼe tau mo he mahaki kua fualoa ohage la ko te sclérose en plaques peʼe ko te SITA. Pea ʼe toe fakaha ai foki ko natou ʼae kua tuku tanatou inu kava kaʼe kua natou tokoni ki niʼihi, kua natou fakasiʼisiʼi ai tonatou lotomamahi pea ʼe natou faiga ke mole natou toe to ki tonatou vaivaiʼaga ʼaia.

Ke tou iloʼi tona tupuʼaga, ʼe ui e ʼihi “ko te manavaʼofa, mo te lotoʼofa pea mo te agalelei, ʼe feala ke galo ai te ʼu manatu fakatupu lotovaivai.” Ko te lotofoaki ʼe feala ke fakasiʼisiʼi ai te hoha pea mo te mahaki ʼae ko te tosio. Pea ko te hahaʼi ʼae kua mamate ʼonatou ʼohoana ʼe mole fualoa anai tanatou lotomamahi he ʼe natou maʼumaʼua ʼo tokakaga ki niʼihi.

ʼE moʼoni tafito te faʼahi ʼaia. ʼEi, ka ke lotofoaki ʼe ke maʼu ai te fiafia.

Neʼe fakalotomalohiʼi fenei e Sesu ʼana tisipulo: “Kotou haga foaki, pea ʼe foaki atu anai e te hahaʼi kia koutou. ʼE natou huaʼi anai ki ʼakotou taga he fua ʼe lahi, ʼe lulu anai, mo lomi pea ʼe fonu gutugutu anai. He ʼe fakafuafua anai koutou ʼo mulimuli ki takotou faʼahiga fakafuafua.” (Luka 6:38) Ka ke lotofoaki, ʼe lotofakafetaʼi anai te hahaʼi pea ʼe natou toe lotofoaki anai mo natou. ʼEi, ka tou lotofoaki ʼe tou maʼu anai te faifaitahi pea mo te ʼofa.

Neʼe tokagaʼi e te kau poto ʼae neʼe natou sivisivi te ʼu felogoʼi ʼa te hahaʼi, “ko te hahaʼi ʼae ʼe tokakaga ki niʼihi ʼe natou fakalotomalohiʼi ʼihi ke natou toe fai feia.” “Ko te tokagaʼi ʼo te ʼu aga ʼae ʼe lelei ʼe fakatupu ʼaki ai te lotofoaki ʼa te hahaʼi.” Pea ʼo mulimuli ki te sivi neʼe fai, “ ʼE feala ki he foʼi tokotahi, ’i te Neti, ke ina fakaha ʼana manatu ʼo feala ai ki he foʼi toko hogofulu tupu peʼe ko he foʼi teau hahaʼi ke natou faʼifaʼitakiʼi. Pea ʼe ’i ai ʼihi ia natou ʼaia, ʼe mole natou feiloʼiʼaki.” Koia, ka lotofoaki he tahi ʼe feala ki he foʼi tokotahi peʼe ko he tokolahi ke natou toe fai feia. ʼE mole koa la ke fia maʼuli fakatahi mo he ʼu hahaʼi feia? ʼEi, ʼe lahi te ʼu fua lelei ʼe tou maʼu anai mo kapau ʼe lotofoaki te hahaʼi.

 ʼE ha te faʼahi ʼaia ʼi te aluʼaga neʼe hoko ʼi Floride, ʼi Amelika. ʼI te to ʼo te afā, neʼe olo ia he kutuga Fakamoʼoni ʼa Sehova ʼo tokoni kia natou ʼae neʼe tau mo te aluʼaga ʼaia. ʼI tanatou fakatalitali ʼae ke ʼaumai te ʼu meʼa gaue moʼo faʼu te ʼapi ʼae ʼe natou gaue ai, neʼe natou tokagaʼi ko te ʼa ʼo te ʼapi ʼo te vahaʼa fale neʼe maumau. Koia, neʼe natou olo ʼo gaohi te ʼa ʼaia. Hili ki ai he temi, neʼe fai e te tagata ʼoʼona te ʼapi tana tohi ki te ʼu pilo lalahi ʼa te kau Fakamoʼoni ʼa Sehova. Neʼe ina ui fenei: “ ʼE mole au galoʼi anai ʼi he temi tonatou ʼofa. Ko taku hoki felaveʼi ʼae mo he hahaʼi agalelei feia.” ʼI tana lotofakafetaʼi ʼaia, neʼe ina foaki ai he meʼa ʼofa moʼo fakaʼaogaʼi ki te gaue fakaofoofo ʼa te kau Fakamoʼoni.

ʼE ha ʼi te ʼu sivi neʼe maʼu e te kau tagata popoto “ko te tokoni ki te hahaʼi ʼe ko he koga maʼuhiga ʼi te maʼuli ʼo te tagata.” ʼE ui fenei ʼi te sivi neʼe fai: “Kua maʼu e te ʼu fanau te fealagia ʼae ke natou tokakaga ki ʼihi ʼi muʼa ʼo tanatou popoto ʼi te palalau.” Kotea tona tupuʼaga? Koteʼuhi ʼe ui ʼi te Tohi-Tapu ko te tagata neʼe fakatupu ʼo mulimuli “ki te paaki o te Atua.” Kotea tona fakaʼuhiga? Ko tona fakaʼuhiga neʼe fakatupu te tagata ʼaki he ʼu kalitate ʼe tatau mo te ʼAtua.—Senesi 1:27.

ʼE kau ki te ʼu kalitate taulekaleka ʼaia ʼo totatou Tupuʼaga ia te agalelei. ʼEi, ko Sehova ʼAtua ʼe agalelei. Neʼe ina foaki mai kia tatou te maʼuli pea mo meʼa fuli ʼe ʼaoga kia tatou ke tou fiafia ai. (Gaue 14:17; 17:26-28) ʼE feala ke tou ako ke tou iloʼi tatatou Tamai ʼae ʼi selo pea mo ʼana fakatuʼutuʼu ʼofa ʼo ʼuhiga mo tatou. ʼO feafeaʼi? ʼAki tatatou ako tana Folafola, ia te Tohi-Tapu. ʼE toe fakaha ʼi te Tohi-Tapu te ʼu fakatuʼutuʼu ʼa te ʼAtua ʼae neʼe ina fai ke tou maʼuli fiafia ai ʼi te ka haʼu. * (1 Soane 4:9, 10) ʼEi, ko Sehova ʼAtua ʼe ko te matapuna ʼo te lotofoaki pea neʼe fakatupu koe ʼo mulimuli ki tona pāki. Koia ʼe mole tonu ai ke ke punamaʼuli ki tau fiafia moka ke lotofoaki ohage ko te ʼAtua. Pea ʼe ke maʼu anai ia tona ʼofa.—Hepeleo 13:16.

ʼE kei ke manatuʼi ia Alexandra ʼae neʼe tou talanoa ki ai ʼi te kamata ʼo te alatike ʼaeni? Kotea ʼae neʼe hoko? Ko ia ʼae neʼe olo fakatahi mo Alexandra ʼi te ka neʼe ina ui ʼe mole kei ai he foʼi falā ʼa Alexandra. Koia neʼe pauʼi ai te tagata Siaina ʼae neʼe tokoni ki ai ki ʼona kaumeʼa ʼi te kolo ʼae ka alu te ka ʼo tuʼu ai. Pea neʼe foimo huʼi age pe e te tagata te foʼi 2 000 falā pasifika, ʼae neʼe ʼavage e Alexandra. Pea tahi, neʼe fakalogo ki te manatu ʼa Ale­xandra pea neʼe ina kamata ako te Tohi-Tapu. Hili ki ai mahina ʼe tolu, neʼe fiafia ia Alexandra ʼi te toe felaveʼi mo ia ʼi te fakatahi lahi ʼa te kau Fakamoʼoni ʼa Sehova ʼi te lea Fakasiaina ʼi Pérou. Neʼe fakaafe e te tagata ʼaia ia ­Alexandra pea mo natou ʼae neʼe kau ki te fakatahi lahi ki tona fale kai. Neʼe ko tana fia fakaha ʼaia ʼo tana lotofakafetaʼi ki te ʼu faʼahi fuli ʼae neʼe fai e Alexandra maʼa ia.

Ka tou lotofoaki pea mo tokoni ki niʼihi, ʼe tou maʼu ai he fiafia lahi. ʼE feala hau toe tokoni ki te hahaʼi ke natou ako ke natou iloʼi ia Sehova ʼAtua, ia te Matapuna ʼo te ʼu meʼa lelei fuli. (Sakopo 1:17) ʼE ke fia maʼu koa he ʼu fua lelei moka ke lotofoaki feia?