Ko te tupu mai ʼo he tamasiʼi ʼe feala ke liliu ko he aluʼaga fakatupu fiafia peʼe fakatupu hoha ki he taumatuʼa. Kia koulua, ʼu matuʼā foʼou, ʼe lagi kolua punamaʼuli anai ki te temi pea mo te malohi ʼae ʼe kolua foaki ki takolua tamasiʼi. Ko te mole feʼauga ʼo te moe pea mo te lahi ʼo te ’u tuʼania, ʼe feala ke faigataʼa ai ʼakolua felogoʼi. ʼE tonu anai ke kolua fakahoko he ʼu fetogi ke feala hakolua tokakaga ki takolua tamasiʼi pea mo puipui tokolua maʼuli fakataumatuʼa. ʼE lava tokoni feafeaʼi atu te ʼu pelesepeto ʼi te Tohi-Tapu?

KOTEA TE MANATU ʼI TE TOHI-TAPU? “Ko te ofa e kataki, e fonu ia i te agalelei.” Pea tahi, ko te ʼofa “e mole ina kumi tona lelei, e mole hoko ita ia.” (1 Kolinito 13:4, 5) Faʼe, ʼe lagi ke tokaga lelei ki tau kiʼi tamasiʼi. Kaʼe ʼe lagi logoʼi anai e tou hoa, ʼe liʼakina ia ia, koia ʼaua naʼa galo kia koe ʼe toe ʼaoga ke ke tokaga ki ai. ʼAki he faʼa kataki pea mo te agalelei, faigaʼi ke ina logoʼi ʼe ʼi ai tona ʼaoga pea ʼe tokoni ki te tuputupu ʼo takolua tamasiʼi.

“ ʼU tagata ʼohoana, . . . , kotou haga nonofo mo natou ʼo mulimuli ki te ʼatamai malama.” (1 Petelo 3:7, MN) ʼE tonu ke ke lotomahino moka fakaʼaogaʼi lahi anai e tou hoa ia tona malohi ki takolua tamasiʼi. ʼI tana fakahoko ʼona maʼua foʼou ʼaia, ʼe lagi hoha peʼe gaʼegaʼe peʼe lotomamahi. ʼI ʼihi temi, ʼe lagi to tona ita kia koe, kaʼe ʼaua naʼa ke ita ai, koteʼuhi “ko ia ae e ita tuai e lelei age i te tagata toa.” (Taaga Lea 16:32) ʼE tonu ke ke lotomahino pea mo ke foaki ia te tokoni ʼae ʼe ʼaoga ki ai.—Taaga Lea 14:29.

KOTEA ʼAE ʼE FEALA KE KOLUA FAI?

• Tamai: Tokoni ki tou hoa ki te tokaga ʼae ki takolua tamasiʼi, maʼia mo te poʼuli. Fakasiʼisiʼi te temi ʼae ʼe ke fakaʼaogaʼi ki ʼihi atu gaue, ke feala hau tokaga ki tou hoa pea mo takolua tamasiʼi

• Faʼe: Ka kole atu e tou hoa ke tokoni atu ki te tokaga ʼae ki takolua tamasiʼi, ʼe tonu ke ke tali lelei. Kapau ʼe mole poto lelei ʼi te fai ʼo te faʼahi ʼaia, ʼaua naʼa ke fai he ʼu palalau fakatupu lotomamahi, kaʼe ke ke fakaha age ki ai tona faʼahiga fai ʼaki he agalelei

KOTEA TE MANATU ʼI TE TOHI-TAPU? “E na liliu anai ko he sino e tahi.” (Senesi 2:24) Tatau aipe pe ʼe kua maʼu takolua tamasiʼi, kaʼe ʼaua naʼa galo kia koulua ʼe kolua faʼufaʼu ia “he sino e tahi.” Kolua faigaʼi ke malohi tuʼumaʼu ʼakolua felogoʼi.

Kia koe fafine ʼohoana, fakaha ia tau lotofakafetaʼi ki tou hoa ʼo ʼuhiga mo tana tokoni. ʼE hage anai ko he “faitoo” kia te ia. (Taaga Lea 12:18) Kia koe tagata ʼohoana, fakaha ki tou hoa ʼe ke ʼofa ai pea mo ke leleiʼia ia ia. Fakamalō age ki tana faʼahiga tokaga ki tokolua kiʼi famili.—Taaga Lea 31:10, 28.

“Ke aua naa kumi e he tahi te mea e aoga kia ia totonu, kae ki te mea e aoga kia natou ake ae.” (1 Kolinito 10:24) Fai ia te meʼa ʼae ʼe ʼaoga ki tou hoa. Kolua toʼo he temi ke kolua faipalalau ai pea mo kolua fefakavikivikiʼaki. ʼAua naʼa kolua tahi manatu pe kia koulua totonu ʼi te faʼahi ʼo te ʼu felaveʼi fakasino. Kolua tokagaʼi ia te ʼu meʼa ʼae ʼe ʼaoga kia koulua tokolua. ʼE ui fenei ʼi te Tohi-Tapu: “Ke aua naa kolua fefakafisiaki ia kolua, gata pe mo kapau kua kolua loto tahi ki ai.” (1 Kolinito 7:3-5) Kolua palalau fakahagatonu ki te faʼahi ʼaia. Kapau ʼe kolua faʼa kataki pea mo lotomahino, ʼe malohi anai tokolua maʼuli fakataumatuʼa.

KOTEA ʼAE ʼE FEALA KE KOLUA FAI?

• Kolua manatuʼi ʼo toʼo he temi maʼa koulua

• Kolua fefakahaʼaki takolua feʼofaʼofani, ohage la ko te fai ʼo he kiʼi tohi peʼe ko te foaki ʼo he kiʼi meʼa ʼofa

KOTEA TE MANATU ʼI TE TOHI-TAPU? “He talu mai tau kei veliveli mo tau iloi te Tohi tapu, ae e feala ke ina foaki atu kia koe te poto, o uhiga mo te haofaki.” (2 Timoteo 3:15) Kolua fakakaukauʼi te faʼahiga ako ʼae ka kolua foaki anai ki takolua tamasiʼi. ʼE ina maʼu ia te ʼu fealagia ki te ako, maʼia ʼi muʼa ʼo tana tupu. ʼI tana ʼi te fatu ʼo tana faʼe, ʼe ina iloʼi ʼokolua leʼo pea mo logoʼi te ʼu meʼa ʼae ʼe kolua logoʼi. Kolua lau age he ʼu tohi ʼi tana kei veliveli. Tatau aipe pe ʼe mole mahino ki te ʼu meʼa ʼae ʼe kolua lau, heʼe feala anai ke ina leleiʼia ia te lautohi moka lahilahi ake.

ʼE lelei ke logo takolua tamasiʼi ʼi tana kei veliveli ʼe kolua palalau ki te ʼAtua. Kolua faikole leʼo lahi mo ia kia Sehova. (Tetelonome 11:19) Maʼia moka kolua gaoʼi mo takolua tamasiʼi, kolua fakamatala age te ʼu meʼa ʼae neʼe fai e te ʼAtua. (Pesalemo 78:3, 4) ʼI tana lahilahi ake, ʼe logoʼi anai e takolua tamasiʼi tokolua ʼofa ʼae kia Sehova pea ʼe ʼofa anai kia te ia.

KOTEA ʼAE ʼE FEALA KE KOLUA FAI?

• Kolua kole tafitō ia te poto ʼaoga kia Sehova moʼo akoʼi ʼaki takolua tamasiʼi

• Kolua lau liuliuga ki takolua tamasiʼi ia he ʼu kupu pea mo he ʼu manatu tafitō ke ina akoʼi tautonu