Neʼe faiakonaki ia Sesu pea neʼe ina fakamalolo te hahaʼi ʼi Sutea pea mo Selusalemi. Neʼe fakalaka leva ʼi te Vai Tafe ʼo Solotane, ʼo faiakonaki ʼi te ʼu kolo ʼo te koga fenua ko Pele. Kaʼe mole fualoa, pea neʼe toe liliu leva ki Selusalemi.

ʼI te kei nofo ʼa Sesu ʼi Pele, neʼe fehuʼi fenei age e he tagata: “ ʼAliki, ʼe tokosiʼi koa ia natou ʼae ka haofaki?” Neʼe lagi iloʼi e te tagata ʼaia neʼe fihi te kau takitaki lotu he neʼe natou fia iloʼi pe ʼe kaugā malie peʼe tokosiʼi anai ia natou ʼae ka haofaki. Kaʼe neʼe mole tali age e Sesu pe ʼe ko te tokofia anai ʼae ka haofaki, kaʼe neʼe hoko atu ia ʼo palalau ki te meʼa ʼae neʼe tonu ke fai e te hahaʼi ke haofaki ai natou. Neʼe ina ui fenei: “Ke kotou faiga malohi ke kotou hu ʼi te matapa faveliveli.” ʼEi, neʼe tonu ke natou faiga fakamalotoloto. Kotea tona tupuʼaga? Neʼe fakamahino fenei e Sesu: “ ʼE au tala atu kia koutou, ʼe faiga anai te tokolahi ke natou hu ai kaʼe ʼe mole natou lavaʼi anai.”—Luka 13:23, 24.

Moʼo fakaha te ʼaoga ʼae ke natou faiga malohi, neʼe fai e Sesu te lea fakatata ʼaeni: “ ʼI te tuʼu ake ʼa te pule ʼo te ʼapi ʼo lokaʼi te matapa, ʼe kotou tutuʼu ai anai ʼi tuʼa ʼo tukituki te matapa mo ui fenei: ‘ ʼAliki, avahi mai.’ . . . Kaʼe ʼe ina tali fenei atu anai kia koutou: ‘ ʼE mole au iloʼi pe ʼe kotou ʼomai maifea. Kotou fakamamaʼo atu ia te au, ia koutou fuli ʼae ʼe kotou fai te meʼa ʼae ʼe heʼe faitotonu!’ ”—Luka 13:25-27.

Neʼe fakaha ai te fihifihia ʼae ʼe hoko ki he tahi ʼe tauhala mai, he neʼe lagi fakafifimalie pe ia, ʼo ina maʼu mai te matapa kua pupunu pea lokaʼi. Neʼe tonu ia ke haʼu fakatomuʼa, tatau aipe pe neʼe mole ina faʼa leleiʼia. Neʼe toe tatau mo te hahaʼi tokolahi ʼae neʼe feala ke fua lelei kia natou te kei nofo ʼa Sesu ʼo akoʼi natou. Neʼe mole natou toʼo ia te faigamalie ʼae ke natou fakamuʼamuʼa te tauhi moʼoni ʼi ʼonatou maʼuli. Kaʼe ʼe feafeaʼi kia natou ʼae ʼe mole natou tali te fakatuʼutuʼu ʼae neʼe fai e te ʼAtua moʼo haofaki natou? Neʼe ui e Sesu ʼe natou “fetagihi mo lotomamahi anai” ʼi tonatou li ki tuʼa. Kaʼe, ko te hahaʼi ʼae ʼe ʼomai “mai te potu esite mo te potu uesite pea mai te potu noleto mo te potu saute,” ʼei, mai te ʼu puleʼaga fuli, “ ʼe natou kakai fakatahi anai ʼi te Puleʼaga ʼo te ʼAtua.”—Luka 13:28, 29.

Neʼe fakamahino fenei e Sesu: “Ko natou ʼae ʼe mumuli [natou ʼae neʼe mole Sutea pea mo te kau Sutea ʼae neʼe maʼuli taʼomia] ʼe natou mumuʼa anai, pea ko natou ʼae ʼe mumuʼa [te kau takitaki lotu ʼae neʼe natou fiameʼameʼa he neʼe ko natou te hakoga ʼo Apalahamo] ʼe natou mumuli anai.” (Luka 13:30) Ko te ui ʼae “ ʼe natou mumuli anai,” ko tona fakaʼuhiga ko te hahaʼi ʼae neʼe mole lotofakafetaʼi, ʼe mole natou hu anai ki te Puleʼaga ʼo te ʼAtua.

Neʼe ʼomai leva ʼihi kau Faliseo kia Sesu pea neʼe natou fai age te tokoni ʼaeni: “Alu pea ke mavae ʼi heni, koteʼuhi ʼe loto e Helote [Atipasi] ke ina matehi koe.” Neʼe lagi ko te Hau totonu ko Helote ʼae neʼe ina kamata fakamafola te logo ʼaia, ke tupu ai he hola ʼa Sesu mai te koga fenua ʼaia. Neʼe lagi tuʼania e Helote naʼa toe kau ki te matehi ʼo he polofeta, ohage ko tana kau ki te matehi ʼo Soane Patita. Kaʼe neʼe ui fenei e Sesu ki te kau Faliseo: “Kotou olo ʼo tala age ki te lenato ʼaia: ‘ ʼE au kapu te ʼu temonio  pea mo fakamalolo te hahaʼi ʼi te ʼaho nei pea mo apogipogi, pea ʼi te tolu ʼaho ʼe au fakaʼosi anai taku gaue.’ ” (Luka 13:31, 32) ʼI tana fakahigoaʼi ia Helote ko he “lenato,” neʼe lagi manatuʼi e Sesu te kaka ʼa te ʼu lenato. Kaʼe neʼe mole tali e Sesu ke ui age e Helote peʼe ko he tahi age te meʼa ʼae neʼe tonu ke ina fai, peʼe ke uga ia ia ke mavae. Neʼe tonu ke ina fakahoko te gaue ʼae neʼe foaki age e tana Tamai ki ai, ʼo ina fai ʼo mulimuli ki te fakatuʼutuʼu ʼa te ʼAtua, kaʼe mole ʼa te tagata.

Neʼe hoko atu e Sesu tana alu ki Selusalemi koteʼuhi, ohage ko tana ui, “ ʼe mole feala ke matehi he polofeta ʼi tuʼa atu ʼo Selusalemi.” (Luka 13:33) Neʼe mole he lea fakapolofeta ʼi te Tohi-Tapu neʼe ui neʼe tonu ke mate te Mesia ʼi te kolo ʼaia, koia he koʼe neʼe ui e Sesu neʼe tonu ke mate ʼi ai? Koteʼuhi ko Selusalemi neʼe ko te kolo muʼa pea neʼe tuʼu ai te Sanetualio, te fakamauʼaga lahi ʼae neʼe kau ki ai te toko 71. Pea tahi ʼae, neʼe fakamauʼi ai ia natou ʼae neʼe tukugakoviʼi ko he kau polofeta loi. Neʼe toe momoli ai foki mo te ʼu sakilifisio manu. Koia neʼe mahino ai kia Sesu neʼe mole feala ia ke matehi ia ia ʼi he tahi age koga meʼa.

Neʼe lauga fenei ia Sesu: “Selusalemi, Selusalemi, ia koe ʼae ʼe ke matehi te kau polofeta pea mo ke tuki makaʼi ia natou ʼae neʼe fekauʼi atu kia koe. Neʼe tuʼa lahi taku fia fakatahiʼi ʼau fanau ohage ko te fakatahiʼi e te matuʼa moa ʼona ʼuhi ʼi ʼona lalo kapakau. Kaʼe neʼe mole kotou loto ki ai. Koʼeni, kua liakī pea mo tuku atu tokotou fale.” (Luka 13:34, 35) Neʼe mole tali e te puleʼaga Sutea te ʼAlo ʼo te ʼAtua pea neʼe natou tau ai mo ni fua kovi.

ʼI muʼa ʼo te tau atu ʼa Sesu ki Selusalemi, neʼe fakaafe ia ia e he pule ʼo te kau Faliseo, ke alu age ʼo kai ʼi tona ʼapi, ʼi te Sapato. Ko natou ʼae neʼe fakaafe, neʼe natou lamalama te meʼa ʼae ka lagi fai e Sesu ki he tagata neʼe fufula ʼona nima mo ʼona vaʼe. Neʼe fehuʼi fenei age e Sesu ki te kau Faliseo pea mo natou ʼae neʼe popoto ʼi te Lao: “ ʼE gafua koa ʼi te Lao ke fai he fakamalolo ʼi te ʼaho ʼo te Sapato peʼe kailoa?”—Luka 14:3.

Neʼe mole tali age he tahi. Neʼe fakamalolo e Sesu te tagata pea neʼe ina fehuʼi fenei kia natou: “Ko ai koa ia koutou, ʼi te ʼaho ʼo te Sapato, kapau neʼe to tona foha peʼe ko tana vitulo ki he vai keli, ʼe mole alu atu aipe ʼo toʼo ake ia ia?” (Luka 14:5) ʼO toe feia aipe, neʼe mole feala ke natou tali ki tana fehuʼi fakapotopoto ʼaia.