Te Evaselio ʼa Soane 12:1-50
12 Ia ʼaho ʼe ono ʼi muʼa ʼo te Pasikate, neʼe tau ia Sesu ki Petania. Neʼe maʼuli ai ia Lasalo,+ ʼae neʼe fakatuʼuake e Sesu mai te kau mate.
2 Neʼe natou fai te kaitahi maʼa ia, pea neʼe tauhi natou e Maleta.+ Pea neʼe kau ia Lasalo ia natou ʼae neʼe kakai fakatahi mo ia.
3 Neʼe toʼo leva e Malia ia te hina lolo magoni* totogi kovi heʼeki hui, ʼo ina tākai ʼaki te ʼu vaʼe ʼo Sesu pea mo ina holoholoʼi ʼaki tona lauʼulu. Neʼe tau te magoni ʼo te moʼi lolo ʼi te loto fale katoa.+
4 Kae neʼe ui e Sutasi Isekaliote,+ te tahi ʼo ʼana tisipulo, ʼae ka ina ʼamanaki lavakiʼi ia ia:
5 “He koʼe neʼe mole fakatau te moʼi lolo magoni ʼaia kia tenalio* ʼe 300 pea mo foaki ia te falā maʼa te kau masiva?”
6 Kae neʼe mole palalau feia he neʼe ina manatuʼi te kau masiva, kae ʼuhi neʼe ko he tagata kaihaʼa. Neʼe nofo ia mo te kesi falā, pea neʼe ko tana agamahani ia te kaihaʼa ʼo te falā ʼae neʼe ʼi ai.
7 Pea neʼe ui e Sesu: “Haganoa ki te fafine ʼaeni, ke ina fai te faʼahi ʼaia moʼo teuteuʼi fakatomuʼa toku ʼavaifo.+
8 Koteʼuhi ʼe nonofo tuʼumaʼu pe te kau masiva mo koutou,+ kae ʼe mole au fakatahi tuʼumaʼu anai mo koutou.”+
9 Neʼe iloʼi leva e te tokolahi ʼi te kau Sutea tana nofo ʼi Petania. Pea neʼe natou ʼomai mole ʼuhi pe ko Sesu kae ʼuhi foki ko Lasalo, ʼae neʼe ina fakatuʼuake mai te kau mate.+
10 Neʼe fonofono leva ia te kau pelepitelo pule ke natou toe matehi mo Lasalo,
11 koteʼuhi tokolahi te kau Sutea neʼe olo age ki Petania pea natou tui kia Sesu ʼuhi ko ia.+
12 ʼI te ʼaho ake, ko te hahaʼi tokolahi ʼae neʼe ʼomai ki te ʼaho lahi, neʼe natou logo ʼe haʼu ia Sesu ki Selusalemi.
13 Neʼe natou toʼo leva te ʼu vaʼa palema pea natou olo ʼo fakafelaveʼi kia te ia. Neʼe natou kalaga: “ ʼAtua, ʼe matou kole atu ke ke haofaki ia ia! Ke tapuakiʼi ia ia ʼae ʼe haʼu ʼi te huafa ʼo Sehova,*+ te Hau ʼo Iselaele!”+
14 Neʼe maʼu e Sesu he asino mui pea neʼe heka ki ai,+ ohage pe ko tona tohi:
15 “ ʼAua naʼa ke mataku, taʼahine ʼo Sione.* Koʼeni, ʼe haʼu tou hau pea ʼe heka ʼi he asino mui.”+
16 ʼI te kamata, neʼe mole mahino ʼana tisipulo ki te ʼu faʼahi ʼaia. Kae ʼi te ʼosi fakakololiaʼi ʼo Sesu,+ neʼe natou manatuʼi neʼe kua tohi te ʼu faʼahi ʼaia ʼo ʼuhiga mo ia pea neʼe hoko te ʼu faʼahi ʼaia kia te ia.+
17 Ko te hahaʼi ʼae neʼe sisio ki te pauʼi e Sesu ia Lasalo ke haʼu ki tuʼa mai te fale maka*+ pea mo ina fakatuʼuake ia ia mai te kau mate, neʼe natou haga fakamoʼoni ki ai.+
18 Ko te tupuʼaga la ʼaia ʼo te ʼomai ʼa te hahaʼi ʼo fakafelaveʼi kia te ia, koteʼuhi neʼe natou logo ki tana fakahoko te milakulo ʼaia.
19 Neʼe feuiʼaki ai e te kau Faliseo: “Sio mai, ʼe mole tou lava fai he meʼa. Kua mulimuli te malamanei katoa ia te ia.”+
20 Pea neʼe ʼi ai ʼihi Keleka neʼe kau ia natou ʼae neʼe ʼomai ʼo atolasio ʼi te ʼaho lahi.
21 Neʼe natou fakaovi age kia Filipo,+ ko te tagata neʼe haʼu mai Petesaita ʼo Kalilea, pea natou kole ki ai: “ ʼAliki, ʼe matou fia felaveʼi mo Sesu.”
22 Neʼe haʼu ia Filipo ʼo fakaha age kia Atelea. Pea neʼe ʼomai leva ia Atelea mo Filipo ʼo fakaha age kia Sesu.
23 Kae neʼe ui e Sesu kia naua: “Kua hoko mai ia te hola ʼae ke fakakololiaʼi ai te Foha ʼo te tagata.+
24 ʼE au tala moʼoni atu kia koulua, kapau ʼe mole to te tegaʼi fulumeto ki te kele pea mo mate, ʼe ko he tegaʼi fulumeto pe ia ʼe tahi. Kae kapau ʼe mate,+ pea ʼe fua anai ia ʼo lahi.
25 Ko ʼae ʼe ʼofa ki tona maʼuli,* ʼe ina pulihi anai, kae ko ʼae ʼe fehiʼa ki tona maʼuli*+ ʼi te malama ʼaeni ʼe ina haofaki anai ki te heʼe gata.+
26 Kapau ʼe fia kaugana he tahi kia te au, ke mulimuli mai ia te au, pea ko te faʼahi ʼae ʼe au ʼi ai, ʼe toe ʼi ai foki anai mo taku kaugana.+ Kapau ʼe fia kaugana he tahi kia te au, pea ʼe fakamaʼuhigaʼi anai ia ia e te Tamai.
27 ʼE au lotohoha ʼi te temi nei,+ pea kotea ʼae ke au ui? Tamai, haofaki au mai te hola ʼaeni.+ Kae ʼe ko te hola ʼaeni ʼae neʼe tupu ai taku haʼu.
28 Tamai, fakakololiaʼi tou huafa.” Pea neʼe logo ki te leʼo+ mai te lagi ʼe ina ui: “Neʼe au fakakololiaʼi pea ʼe au toe fakakololiaʼi anai.”+
29 Neʼe logo ki ai te hahaʼi ʼae neʼe ʼi ai, pea neʼe natou ui neʼe ʼuʼulu te mana. Neʼe ui e ʼihi age: “Neʼe palalau age he ʼaselo kia ia.”
30 Neʼe ui e Sesu: “Neʼe mole logo te leʼo ʼaia ʼuhi ko au, kae ʼuhi ko koutou.
31 ʼI te temi nei, ʼe fakamauʼi te malama ʼaeni pea ʼe li anai ki tuʼa ia te pule ʼo te malama ʼaeni.+
32 Pea ka lagaʼi ake au,+ ʼe au taki mai anai kia te au te faʼahiga hahaʼi kehekehe.”
33 Neʼe ina fai te ʼu palalau ʼaia moʼo fakaha pe ʼe feafeaʼi anai tona mate.+
34 Pea neʼe ui e te hahaʼi tokolahi kia te ia: “Neʼe matou logo mai te Lao* ʼe nofo ʼo talu ai ia Kilisito.*+ Kae he koʼe ʼe ke ui ʼe tonu ke lagaʼi ake te Foha ʼo te tagata?+ Ko ai koa ia te Foha ʼo te tagata ʼaia?”
35 Neʼe tali e Sesu kia natou: “ ʼE nofo anai te malama mo koutou ʼi he kiʼi temi nounou. Kotou haʼele ʼi takotou kei maʼu te malama, ke ʼaua naʼa puleʼi koutou e te fakapoʼuli. Pea ko ʼae ʼe haʼele ʼi te fakapoʼuli, ʼe mole ina iloʼi pe ʼe alu kifea.+
36 ʼI takotou kei maʼu te malama, kotou tui ki te malama, ke kotou liliu ai ko te ʼu foha ʼo te malama.”+
Neʼe fai e Sesu te ʼu palalau ʼaia, pea neʼe alu leva ʼo nono.
37 Logo la neʼe ina fakahoko te ʼatu milakulo ʼi ʼonatou muʼa, kae neʼe mole natou tui kia te ia,
38 ke hoko ai te folafola ʼa te polofeta ko Esaia, ʼi tana ui: “Sehova,* ko ai koa ʼae neʼe tui ki te logo ʼae neʼe matou tala?+ Pea neʼe fakaha koa kia ai te malohi* ʼo Sehova?”*+
39 Neʼe toe fakaha e Esaia te tupuʼaga ʼo tanatou mole lava tui, ʼi tana ui:
40 “Neʼe ina fakakiviʼi ʼonatou mata pea mo fakafefeka ʼonatou loto, ke mole natou sisio mo mahino pea mo natou toe liliu mai ke au fakamalolo natou.”+
41 Neʼe fai e Esaia te ʼu palalau ʼaia he neʼe sio ki tona kololia pea neʼe palalau ʼo ʼuhiga mo ia.+
42 Kae, maʼia mo te kau pule, tokolahi neʼe natou tui kia te ia,+ kae ʼuhi ko te kau Faliseo, neʼe mole natou fakaha tanatou tui naʼa fakamavae natou mai te sinakoka.+
43 Koteʼuhi neʼe lahi age tonatou ʼoʼofa ki te kololia ʼo te tagata ʼi te kololia ʼo te ʼAtua.+
44 Kae neʼe kalaga ia Sesu: “Ko ʼae ʼe tui kia te au, ʼe mole tui pe kia te au kae ʼe toe tui foki kia ia ʼae neʼe ina fekauʼi mai au.+
45 Pea ko ʼae ʼe sio kia te au, ʼe toe sio foki kia Ia ʼae neʼe ina fekauʼi mai au.+
46 Neʼe au haʼu ki te malamanei ohage ko he malama,+ ke ʼaua naʼa nofo ʼi te fakapoʼuli ia ia ʼae ʼe tui kia te au.+
47 Kae kapau ʼe logo he tahi ki ʼaku folafola pea ʼe mole mulimuli ki ai, ʼe mole au fakamauʼi ia ia. Koteʼuhi neʼe mole au haʼu ke au fakamauʼi te malamanei, kae ke au haofaki te malamanei.+
48 Ko ʼae ʼe mole fakaʼapaʼapa kia te au pea mole ina tali ʼaku folafola, ʼe fakamauʼi anai ia ia ʼi te ʼaho fakamuli ʼo fakatafito ki te folafola ʼae neʼe au tala.
49 Koteʼuhi neʼe mole au palalau ʼi toku loto faʼitaliha, kae ko te Tamai ʼae neʼe ina fekauʼi mai au, neʼe ina foaki mai he fakatotonu ʼo ʼuhiga mo te ʼu palalau ʼae ʼe tonu ke au fai pea mo tona faʼahiga fakaha.+
50 Pea ʼe au iloʼi ko tana fakatotonu ʼe taki ki te maʼuli heʼe gata.+ Koia ko te meʼa ʼae ʼe au palalau ki ai, ʼe au palalau ki ai ohage pe ko tona fakaha mai e te Tamai.”+
Nota
^ Ko te teitei vaeluaʼi lite lolo, neʼe fai ʼaki te kiʼi ʼakau magoni.
^ Vakaʼi Te ʼu Fakamahino 2.14.
^ Vakaʼi Te ʼu Fakamahino 1.5.
^ ʼE feala ke fakaʼuhiga ki te “kolo ʼo Sione” peʼe ki te “hahaʼi ʼo Sione.” Vakaʼi te kupu “Sione” ʼi Te ʼu Kupu.
^ Peʼe “fale maka fakamanatu.”
^ Klka. psukhê. Vakaʼi Te ʼu Kupu.
^ Klka. psukhê. Vakaʼi Te ʼu Kupu.
^ ʼE mahino ia, ʼe fakaʼuhiga ki te ʼu Tohi Fakahepeleo.
^ Vakaʼi Te ʼu Kupu.
^ Vakaʼi Te ʼu Fakamahino 1.5.
^ Vakaʼi Te ʼu Fakamahino 1.5.
^ Klka. “te nima.”
