LESOŊ 55

Li nga mën a def ci mbooloo bi nga bokk

TAALAL

Ci àddina si sépp, ay milioŋi nit ñu ngi jaamu Yexowa ànd ci ak mbég ci mbooloo bi ñu bokk. Dañu am ngërëm ci tegtal yi ñu leen di jox te dañuy bég ci dimbali seen waa mbooloo ci anam yu bare. Yow itam ndax du loolu nga bëgg a def ci sa biir mbooloo?

1. Naka nga mënee jëfandikoo sa jot ak sa kàttan ngir dimbali sa mbooloo?

Ñun ñépp mën nañu def dara ci suñu mbooloo. Ci misaal, ndax ci sa mbooloo am na ñu màgget walla ñu feebar? Ndax mën nga leen a yóbbu ñu teewe ndaje yi? Walla ndax mën nga leen a dimbali ci yeneen fànn, mel ni demal leen marse walla defal leen liggéeyu kër? (Jàngal Saag 1:27). Mën nga dimbali itam ci liggéeyu set-setal ak toppatoo saalu Nguur gi. Kenn du ñu forse ci def loolu. Suñu mbëggeel ci Yàlla ak ci suñu mbokk yi moo ñuy xiir ci ‘taxawal suñu bopp’ ngir def ko (Sabóor 110:3).

Seede Yexowa yi sóobu ci ndox mën nañu dimbali mbooloo mi ci yeneen fànn. Karceen yu góor yi matal li Biibël bi laaj, mën nañu bokk ci ñiy topptoo yëfi mbooloo mi walla nekk ay magi mbooloo. Mbokk yu góor yi ak yu jigéen yi mën nañu doon ay pioñee ngir jàpp bu baax ci liggéeyu waare bi. Yenn Seede Yexowa yi mën nañu jàppale ci liggéeyu tabax béréb yi ñuy jaamoo Yàlla walla ñu toxu ngir dem dimbali mbooloo yi soxla ndimbal.

2. Naka lañu mënee jëfandikoo suñu alal ngir dimbali suñu mbooloo?

Mën nañu ‘teral Yexowa ci suñu alal’ (Kàddu yu Xelu 3:9). Dañuy bég ci jëfandikoo suñu xaalis ak suñu alal ngir jàppale suñu mbooloo ak liggéeyu waare bi ñuy def ci àddina si sépp (Jàngal 2 Korent 9:7). Li ñuy maye dañu koy jëfandikoo itam ngir wallu suñu mbokk yi musiba dal. Ñu bare dañuy faral di «ber» dara ngir maye ko (Jàngal 1 Korent 16:2). Mën nañu def li ñuy maye ci boyet yi nekk ci béréb yi ñuy jaamoo Yexowa walla ñu jaare ko ci internet ci donate.mr1310.com. Mën nañu won Yexowa ne, bëgg nañu ko bu ñuy jëfandikoo suñu alal ngir dimbali mbooloo mi.

XÓOTALAL NJÀNG MI

Xoolal li nga mën a def ngir dimbali mbooloo mi.

3. Mën nañu jëfandikoo suñu alal

Yexowa ak Yeesu fonk nañu nit ñiy maye ak mbégte. Ci misaal, Yeesu ndokkeel na jigéen ji ñàkkoon jëkkëram te néew doole ndaxte dafa may Yexowa li mu amoon. Jàngal Luug 21:1-4. Boo paree, nga tontu ci laaj yii di topp:

Ndax soxla nañu may Yexowa xaalis bu bare ngir neex ko?
Lan la Yexowa ak Yeesu di yëg, bu ñuy maye ak xol bu tàlli?

Boo bëggee xam ni ñuy jëfandikoo li nit ñi di maye, seetaanal WIDEO BI. Boo paree, nga tontu ci laaj bii di topp.

WIDEO: ‘Maye ngir Yexowa’ (4:47)

Naka lañuy jëfandikoo maye yi ngir njariñu mbooloo yi nekk ci àddina si sépp?

4. Mën nga dimbali ci liggéey bi

Ci jamono ji ñu doon bind Biibël bi, jaamu Yexowa yi dañu sawaroon ci toppatoo seen béréb yi ñu doon jaamoo Yàlla. Waaye toppatoo boobu yemul woon rekk ci maye xaalis. Jàngal 2 Chroniques 34:9-11. Boo paree, nga tontu ci laaj bii di topp:

Lan la Yawut bu nekk def ngir dimbali ci toppatoo këru Yexowa, maanaam fi ñu doon jaamoo Yàlla?

Boo bëggee xam ni leen Seede Yexowa yi di roye, seetaanal WIDEO BI. Boo paree, nga tontu ci laaj yii di topp.

WIDEO: Nañu toppatoo béréb yi ñuy jaamoo Yàlla (3:31)

Lu tax mu am solo ñuy toppatoo suñu saalu Nguur, ba mu wéy di set te bañ a am benn yàqu-yàqu?
Lan nga mën a def ngir dimbali ci liggéey boobu?

5. Mbokk yu góor yi mën nañu yokk li ñuy def ci mbooloo mi

Biibël bi dafay xiirtal karceen yu góor yi ci def lépp li ñu mën ngir jàppale mbooloo mi. Boo bëggee xam li ñu mën a def, seetaanal WIDEO BI. Boo paree, nga tontu ci laaj yii di topp.

WIDEO: Yeen góor ñi: wutleen a def liggéey bu rafet (5:19)

Ci wideo bi, lan la Ryan def ngir gën a jàppale mbooloo mi?

Biibël bi wax na li karceen yu góor yi war a def ngir mën a bokk ci ñiy topptoo yëfi mbooloo mi te nekk ay magi mbooloo. Jàngal 1 Timote 3:1-13. Boo paree, nga tontu ci laaj yii di topp:

Lan lañuy xaar ci mbokk yu góor yi bëgg a bokk ci ñiy topptoo yëfi mbooloo mi walla nekk magu mbooloo?
Lan lañuy xaar ci seen njaboot? (Xoolal aaya 4 ak 11)
Bu mbokk yu góor yi di jéem a matal li leen Biibël bi laaj, ban njariñ la ci waa mbooloo mi di jële?