E niha ĩwẽ aiꞌuté poto wamhã! Tane nherẽ pire di ĩmro ré norĩ ma hã. Ãté waihuꞌu aba õ di aiꞌra hã ĩꞌmadöꞌö wẽ aba da hã. Ãté atobꞌudzu aba di dza romhuri ĩꞌahö na aiꞌra ꞌmadöꞌö wẽ aba da. Duré bötö ahö na tãma ĩꞌatsiwatsutu aba na hã aiꞌra pibui wẽ aba da hã. Niwamhã ãté te dza atsitsada atsibꞌrui waꞌwa, atsõtõ wẽ waihuꞌu aba õ wa, niwamhã dahöimanadzé ĩtém na wa oto. Taha wa, ãma ĩtsaprĩ aba da tsi aihöimana aba dzé hã aiꞌra pibui wẽ aba da aimrodzé ꞌmadöꞌö wẽ aba tsina. E niha Bíblia nhimirowahudu te dza aipawapto waꞌwa ꞌre aihöimana wẽ aba mono da.

BÍBLIA DZARINA: Dadzawi hã ĩtsimipari nhimiꞌẽ, ‘duré daꞌãma ꞌre ĩtsiwãrĩ dzaꞌra mono, duré ꞌröwi tihöimanadzéb da tsi, te te tsiꞌãma ꞌre rotsaꞌrata dzaꞌra mono õ di dza. Duré wara tsina, dadzada ꞌre tsitiꞌru dzaꞌra mono õ di dza.’ (1 Coríntios 13:4, 5) A hã dana oto, te dza ĩrotsaꞌrata pe aiꞌutéprére na tsi hã. Ãté aibö aimro nhimirotsaꞌrada hã te dza tãma titsõ ĩtsiti romhö na ꞌre aihöimana mono da, taha wa robdzei õ di dza. Tawamhã aipoꞌre puꞌu aimro ãma atsimipari petse da. Danhimipari nhimiꞌẽ dzarina duré aihöimana wẽ dzarina höiꞌré na aibö aimro ma aiwi tsô ĩrowaptöꞌö, duré atsine aiꞌutéprére te te ĩpibui wẽ mono da tsi.

‘Aibö norĩ, aimro tsiré te oto ꞌre aihöimana dzaꞌra waꞌaba mo’, ãma ĩrotsaꞌrata dzaꞌra waꞌaba dzéb dzarina aimro ma hã. (1 Pedro 3:7) Waihuꞌu piꞌõ aimro hã te dza ꞌre tsiwatsutu petse aiꞌra hã te te ꞌre pibui wẽ mono da. Ãhã parimhã marĩ ahö te te ĩꞌmanharĩ da tsi, taha wa ãté ꞌrã dzé di, duré watsutu di niwamhã höimanadzei õ di. Duré nimahã bötö na, atsada te dza tinhitiꞌru, taha watobro wamhã atãma na ꞌre aihöimana mono. Bíblia te tinha: ‘Ĩwaꞌro tsuꞌuꞌõ norĩ hã wẽ uptabi di, ĩtsibꞌru petse norĩ nhipai u.’ (Provérbios 16:32) ꞌRãi waihuꞌu wẽ ré na hã ꞌre aihöimana mono duré ꞌre upari uꞌötsi mono piꞌõ aimro hã. — Provérbios 14:29.

TAHA DA ATSIPTETE:

• Damama: Ãma aime na aimro ãma hã aiꞌutéprére dza ĩpibudzém na robdzaꞌrã ré nherẽ. Tsaꞌré tõ taré uprotsi da atsibödö hã, ãma ꞌre aihöimana wẽ atsibötö na ꞌre aihöimana wẽ mono da aimro me, aiꞌutéprére me dzama bötö ahö na.

• Dana: Atsima rowẽ na aibö aimro hã te te tsima wẽ wamhã aiꞌãma tsime da aiꞌra te te ꞌmadöꞌö da. Ãté te te waihuꞌu õ di te te ꞌmanharĩ da marĩ hã atsima ĩwẽdzéb dzarina. Aiwaptsari tõ. Ãne atãma na ĩwaibaba na höiꞌré na ĩꞌmanharĩdzéb da.

BÍBLIA DZARINA: ‘Mitsi dahöiba ne hã oto tsiré ꞌre höimana dzahuré.’ (Gênesis 2:24) Aiꞌutére poto nherẽ, atsipoꞌre puꞌu a hã duré aimro dzahadu ‘mitsi dahöiba ne hã’ tsiré ꞌre ĩꞌaihöimana aba mono na hã. Atsiptete aimrodzé tsiptete na ꞌre höimana mono da.

Piꞌõ damro wamhã, natsi tãma hepãrĩ aimro ma ĩtsimipawaptobdzém na, ĩꞌuparidzém na dzama, duré natsi tãma watsuꞌu na. Damreme ĩwapari dze aiwa daꞌrãdzéptöꞌödzém ne hã aimro ma hã dza. (Provérbios 12:18) Aibö damro wamhã, aimreme piꞌõ aimro ma hã aima ĩtsawi petse uptabi na hã duré aima ĩpire na hã. Tãma hepãrĩ wẽ na ĩtsimiromhuridzé hã família ma. — Provérbios 31:10, 28.

‘ꞌRöwip tsi, atsina ꞌre rotsaꞌrata dzaꞌra waꞌaba mono õ di dza. Atsiré ĩtsadzeiꞌwa norĩ hã, te dza ta norĩ ãma ꞌre ĩrotsaꞌrata uꞌötsi dzaꞌra waꞌaba mo.’ (1 Coríntios 10:24) Tãma ꞌre aihöimana wẽ uꞌötsi mono aimro hã. A norĩ waꞌwa hã atsima ĩrobdzanhamri aba da tsi, atsima hepãrĩ aba, duré atsina wapari aba. Datsina dahöiba na hã atsiꞌãma tsi rotsaꞌrata tõ. Rotsaꞌrata aimro te te tsima ĩwẽdzém na hã. Bíblia te tinha: ‘Aimro wi aihöiba hã ꞌre tsawi dzaꞌra waꞌaba mono õ di dza oto. Ãté nimahã bötö na tsi te dza ãma ꞌre atsitsadze dzaꞌra waꞌaba mo’. (1 Coríntios 7:3-5) Ãne, tsõꞌawi atsima robdzanhamri aba taha na. Atsimiparidzem na ꞌre aihöimana mono wamhã duré ãma rotsaꞌrata wamhã aimro na hã, ãne atsina ĩꞌaimrodzé waꞌwa te dza ĩtsipte.

TAHA DA ATSIPTETE:

• Atsima pitsutu aba bödö hã aimro me tsi ꞌre aihöimana aba mono dzéb da hã.

• Tsihötö romnhihödö hã atsimidzawidzéb dzarina, niwamhã tãma tsõmri danhibdzari aimro ma hã. Marĩ ĩwapu ĩtsawi na hã ꞌmanharĩ wamhã aimro ma hã, te dza waihuꞌu aima ĩtsawi na hã.

BÍBLIA DZARINA: ‘ꞌWatébrémi na ꞌre aihöimana mono dzém hawi, aima waihuꞌu petse di, ꞌRe ĩhöimana uꞌötsi mono nhimiroti ꞌrata na robꞌuiꞌéré hã. Taha dzarina höiwa hawi rowaihu hã te aima ꞌre höimana, atsõꞌreptudzé hã atsina ĩꞌuwaimramidzéb da hã.’ (2 Timóteo 3:15) Rotsaꞌrata petse aiꞌutére tãma ĩrowahutudzém na hã. Potoꞌõ nherẽ, ĩtsada hã te te waihuꞌu da, dadiꞌi ꞌre niwĩ nherẽ aiꞌutéprére tãma waihuꞌu petse di aihörödzé hã duré te ꞌre höimana ĩna pẽꞌẽdzéb dzarina. Tsõré na aiꞌra ma aiꞌutéprére nherẽ. Õhõ tãma waihuꞌu õ nherẽ aiꞌutéprére wa, tadzahã oto prédu wamhã tãma tsõré dze ti dza.

Aiꞌra ma robdzanhamri aiꞌutéprére nherẽ Höimanaꞌuꞌö na. Tsaꞌré na te te aiwapari da rowaptẽrẽ wamhã Jeová wi. (Provérbios 22:6) Taré atoire aba wamhã, aiꞌra ma rowahutu Höimanaꞌuꞌö nhimipotodzém na. (Salmo 78:3, 4) Aiꞌra prédub tsina te dza ꞌmadö aima ĩtsawi na hã Jeová, ãne duré te dza waihuꞌu Jeová, õhõ te te tsima ĩtsawi da hã.

TAHA DA ATSIPTETE:

• Atsima rowaptẽrẽ mono Jeová wi ĩtsimirowaihuꞌudzéb dzô aiꞌutéprére ma natsi rowahutu da hã.

• Damreme ĩpire hã ãma ꞌre tsahu uꞌötsi mono aiꞌra ma aiꞌutéprére nherẽ te te waihuꞌu da hã.