ROMNHORÉ 53
Atsima ĩrobdzedzéb da pitsutu wẽ na Jeová ma rowẽ da
Jeová Ropotoꞌwa ‘rowẽ uꞌötsi ꞌre ĩmorĩ hã.’ (1 Timóteo 1:11) Õ hã te tsima wẽ wa te watsima robdze dzaꞌra da duré wahöimanadzém na wa te watsima rowẽ dzaꞌra da. Tãma rowẽ di bödö wa te watsima pitsutu dzaꞌra wamhã wawaꞌutudzéb da. Ãhã romnhoré na hã wa dza ꞌmadöꞌö dzaꞌra ni e niha robdze na wa dza watsima rowẽ dzaꞌra ni bötö na wanhiꞌwaꞌrutu õ wamhã Jeová ma wa te rowẽ dzaꞌra tsina.
1. E marĩ na wa dza rotsaꞌrata dzaꞌra ni watsima robdzedzé hã wa te pitsutu dzaꞌra wamhã.
E marĩ a hã ꞌmanharĩ dze ti atsiꞌwaꞌrutu õ wamhã. Niꞌwam norĩ hã ĩhöiwarobo te te tsõré dze dzaꞌra di ꞌri ꞌre. Niꞌwam norĩ ma hã rétsi ãna te aiꞌubumro ꞌri ꞌre — te te tsõré dze dzaꞌra di, romhörö te te wapari dze dzaꞌra di, ĩropodo te te ꞌmadöꞌö dze dzaꞌra di niwamhã internet na höimana dze dzaꞌra di. Niꞌwam norĩ hã rétsi ãna tsiꞌubumroi õ di — tãma wẽ dzaꞌra di nimomo tsitsaꞌre da, ribi dzaꞌra da niwamhã titsiwaihuꞌu norĩ me to dzaꞌra da. Wa watsiwatsutu dzaꞌra ni ‘Wanhibꞌapito te te wawẽtsãmridzéb da hã’ robdzedzé wa te watsima ĩpitsutu dzaꞌra na hã. (Efésios 5:10) Taha na wa te ĩrotsaꞌrata petse dzaꞌra da tsi. E marĩ wa. Marĩ ahö na da te ꞌre ĩꞌmanharĩ dzaꞌra mono dzéb ꞌremhã da te datsima robdze dzaꞌra da ĩré hã datsiꞌahöri, dahöimana nhitsébꞌõ duré romhõtsi nhipetse watsédé. (Tsõré na Salmo 11:5 TNM.) E marĩ te dza wapawaptob dzaꞌra wanhimidzaꞌretse na wa te pitsutu wẽ dzaꞌra da watsima robdzedzé hã.
Watsiwaihuꞌu norĩ Jeová dzawiꞌwai wamhã te dza warétsi dzaꞌra ĩbö na wa te pitsutu dzaꞌra da watsima robdzedzé hã. Wa te ĩꞌmadöꞌödzéb dzarina romnhoré 48 na ‘niꞌwa ĩꞌrãi waihuꞌu wẽ norĩ tsiré ꞌre morĩ wamhã te dza ĩꞌrãi waihuꞌu wẽ dzé hã te te tsina tãma ꞌre höimo uꞌötsi.’ Taha waꞌrãmimhã, natsi ꞌre watsiꞌabaꞌréi wamhã Jeová nhimiroti dzawiꞌõꞌwa norĩ tsiré ‘wa dza wahöimana watsété na hã ꞌröwi ãma ꞌre watsiꞌuꞌa dzaꞌra.’ — Provérbios 13:20.
2. E marĩ wa, ĩpire wa te ãma tsipa dzaꞌra tõ da bötö na robdzedzéb da hã.
Wanhimipitsutudzé robdzedzéb da hã Jeová ma rowẽ nherẽ, wa te ãma ĩpibui petse dzaꞌra da tsi bödö ahö na taha na wa te uprotsi dzaꞌra tõ da. Wa te ãma pibui petse dzaꞌra õ wamhã, bödö wama höimana dzaꞌra õ di dza marĩ danhipai u ĩpire da hã. Ropotoꞌwai mreme te wama roti dzaꞌra wa te uprotsi dzaꞌra da ‘wanhibödö danhipai u wẽ na’. — Tsõré na Efésios 5:15, 16 TNM.
WAIHUꞌU DURÉ
Te dza ĩꞌmadö e niha atsima ĩrobdzedzéb da hã te dza ĩpitsutu wẽ.
3. Aihöimana Jeová ma te te ĩrowẽ õ nhiti
E marĩ wa, watsima ĩrobdzedzéb da hã wanhimidzaꞌretse na wa dza pitsutu dzaꞌra ni. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
E marĩ na dato Roma ãma duréihã ꞌre ĩhöimana dzaꞌra mono hã aiwa dato robdzedzém ne ã bötö na.
-
Ĩropoto na hã, e marĩ Daniel ma tô waihuꞌu robdzedzém na hã.
Atsiré tsõré aba Romanos 12:9. Taha parimhã atsima robdzanhamri aba ãhã dadzadanharĩ ãma piꞌrebamhã:
-
E niha ãhã romnhihödö te dza aipawapto atsima ĩrobdzedzéb da hã pitsutu wẽ da.
E marĩ norĩ Jeová ma ꞌru ti. Atsiré tsõré aba Provérbios 6:16, 17 duré Gálatas 5:19-21. Tsõré aba parimhã romnhihötö mono bö, atsima robdzanhamri aba ãhã dadzadanharĩ ãma piꞌrebamhã:
-
E ma norĩ ãhã romnhihötö norĩ ꞌremhã te ꞌre höimana dzaꞌra robdzedzéb ꞌremhã ã bötö na hã.
E niha atsima ĩrobdzedzéb da hã te dza ĩpitsutu wẽ.
ꞌRöwi rotsaꞌrata:
-
E marĩ. E ãhã robdzedzéb ꞌremhã ĩré hã marĩ Jeová ma ĩꞌru hã.
-
E niwa. E ãhã robdzedzé hã te dza ĩ̱wi roꞌwaꞌré marĩ danhipai u ĩpire hã te ꞌmanharĩ da.
-
E ꞌwai me. E ãhã robdzedzéb ꞌremhã wa dza ĩ̱tsina rotété Jeová dzawiꞌõꞌwa norĩ tẽme.
Romhö na ropipa nhiti aihöimana. Tawamhã wama waihuꞌu õ wamhã robdzedzé wẽꞌõ dzô, wa dza oto ĩtsiti wahöimana dzaꞌra ni.
4. Atsibödö uprotsi wẽ na
ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã:
-
Ĩropoto na hã watsitsãnawã marĩ ĩwatsédé te te ꞌmadöꞌö õ di. Tane nherẽ e marĩ, ma tiwi roꞌwaꞌré.
Atsiré tsõré aba Filipenses 1:10. Taha parimhã atsima robdzanhamri aba ãhã dadzadanharĩ ãma piꞌrebamhã:
-
E niha ãhã romnhihödö te wapawaptob dzaꞌra wa te pitsutu dzaꞌra da e niha bötö na wa dza uprotsi dzaꞌra ni robdzedzém na hã.
5. Atsima ĩrobdzedzéb da hã pibui petse na pitsutu
Nimahã robdzedzém norĩ te te rowẽ õ nherẽ Jeová ma, marĩ ĩwẽ ahö di wa te watsima ĩrobdze dzaꞌra dzéb da hã. Atsiré tsõré aba Eclesiastes 8:15 TNM duré Filipenses 4:8. Taha parimhã atsima robdzanhamri aba ãhã dadzadanharĩ ãma piꞌrebamhã:
-
E marĩ ꞌmanharĩ dze ti atsima ĩrobdzedzéb da hã.
Marĩ ĩwẽ ahö di atsima ĩrobdzedzéb da hã.
NIꞌWAM NORĨ TE NHARĨ DZAꞌRA ÃNE: “Marĩ õ di ĩropodo niwamhã ĩhöiwarobo datsiꞌahöri ré, dahöimana nhitsébꞌõ ré niwamhã romhõtsi nhipetse watsété ré, ta norĩ te ꞌmanharĩ õ wamhã.”
-
E marĩ te aré ĩnha.
ĨWAIHUꞌUDZÉ HÃ
Jeová te tsima wẽ wa te pitsutu wẽ dzaꞌra da duré wa te watsima rowẽ dzaꞌra da robdzedzé ĩwẽ na hã.
Ãma aipoꞌre puꞌu
-
E mahã robdzedzém norĩ Jesus dzadawa dzamarĩꞌwa norĩ te dza weꞌõ dzaꞌra.
-
E marĩ wa, wa te ĩpibui petse dzaꞌra da tsi bödö ahö na wa te uprotsi dzaꞌra tõ da robdzedzém na hã.
-
E marĩ wa, te dza ĩpitsu robdzedzé hã Jeová ma te te tãma ĩrowẽ.
TSÔ AIRĨTĨ DURÉ
ꞌMadöꞌö e ꞌwa te te aima ĩpitsutu da tsi atsima ĩrobdzedzéb da hã.
ꞌMadöꞌö e niha atsimidzaꞌretse na te dza ĩpitsutu wẽ atsima ĩrobdzedzéb da hã.
“E atsima ĩrobdzedzéb da hã te aima ãwitsi ĩwẽ hã.” (Roꞌmadöꞌöꞌwa, 15 outubro na, 2011 na)
Rowatsuꞌu na hã “Wa tô ãma aiꞌuté ĩ̱nhimiwẽꞌõ na hã” ꞌmadöꞌö e marĩ wa, aibö ma tô ãma tsaprĩ te te tsima ĩrobdzedzé hã.
“Ropotoꞌwai mreme te te daꞌadzaprĩ waihuꞌu petse di” (Roꞌmadöꞌöꞌwa, 1.º fevereiro na, 2010 na)
ꞌMadöꞌö e niha dana ma tô pitsutu wẽ dza te te ꞌmadöꞌö dzô ĩropoto norĩ romhõtsi nhipetse watsété ré hã.
