Apocalipsi 6:1-17
6 Tawamhã wa tô duré ꞌmadâ. Te ꞌmadâꞌâ wamhã, Poneꞌẽrebâ hã da te dasiwi iwĩrĩ hã ma tô ibaihâ nhinha tobꞌratatobzé imorĩꞌrada hã pru. Tawamhã maparane siꞌuiwa na ropoto na ihâiba norĩ hã te imorĩꞌrada hã hâ, mreme ꞌrãihâ na:
— We aiwatobro.
2 Tawamhã ãne hârâ wi, wa tô marĩ ꞌmadâ, awaru irã hã. Iꞌmaprabaꞌwa hã te umnhiꞌãsi ré nhamra. Tawamhã ma tô iꞌrãzaza hã tãma sẽrẽ ni. Iꞌrãzaza hã za te te daꞌãma iꞌaiꞌutézé, te wasuꞌu. Tawamhã ma tô wara tiꞌai u, tinhitobꞌru norĩ zô, siwamnhasi sina te te ãma aiꞌuté zaꞌra da.
3 Tawamhã Poneꞌẽrebâ hã ma tô duré ibaihâ nhinha uptobzé hã isãnaꞌremhã pru. Te te pru wi, ropoto na ihâiba norĩ hã ma tô duré isãnaꞌremhã hâ:
— We aiwatobro.
4 Tawamhã awaꞌawi awaru ipré uptabi hã ma tô watobro. Iꞌmaprabaꞌwa isisiwi te nhamra. Tawamhã sibꞌézé ꞌwapa ma tô tãma sõmri ni, daꞌwapézéb da hã. Taha ma, ma tô duré tãma pisutu ni, dasiꞌwapé hã te te dazada wazere da, dasiꞌwapé na ꞌre dasisimroi mono da.
5 Tawamhã Poneꞌẽrebâ hã siꞌubdatõ ãma ibaihâ nhinha uptobzé hã ma tô duré pru. Te te pru wi, wa tô duré wapa, siꞌubdatõ ãma ropoto na ihâiba norĩ hârâ hã, ãne:
— We aiwatobro.
Tawamhã awaꞌawi wa tô awaru tisã, iꞌrãdâ hã. Iꞌmaprabaꞌwa hã te marĩ pibuzé hã ꞌre tiꞌâ, tinhibꞌrata, amnho pibuzéb da hã.
6 Tawamhã wa tô duré wapa, damreme uptabi ne hã, maparane siꞌuiwa na ropoto na ihâiba norĩ isimasabzém hawi. Ãne te rowaꞌâbâzé hã tãma anhoré, awaru ꞌmaprabaꞌwai ma:
— Ãne misi bâtâ na dapawaꞌâ hã, tô misi ipibuzém na aiwa ãma isipoꞌo na, amnho trigu waꞌâbâzéb zarina. Ãne te za dawi isarõ hâimo, rowaꞌâbâzé hã. Tane nherẽ, azeitona wede hã ꞌre isimasa mono hã, duré uva ꞌru hã ꞌre isimnhatã mono hã uꞌa zaꞌra õ di za, azeitona ꞌrãi waꞌui wabre hã siꞌutõrĩ tõ da aꞌâ, uva ꞌrãi waꞌu isé zama.
7 Tawamhã Poneꞌẽrebâ hã ma duré pru, maparane siꞌuiwa na ãma ibaihâ nhinha uptobzé hã. Te te pru wi, wa tô duré wapa, ropoto na ihâiba norĩ hã maparane siꞌuiwa na ãma hã, daꞌrãsutuꞌwa hã. Ãne te hâ:
— We aiwatobro.
8 Tawamhã hârâ wi, wa tô duré ꞌmadâ, dadâꞌâ wa, dahâibaꞌa ne awaru ihâibaꞌa hã. Iꞌmaprabaꞌwa nhisi hã Adâꞌâ na isisi hã. Duré ihâiba amo, ꞌrâwi te te isaꞌu mono nhisi hã, Adâ ꞌre ihâimana zaꞌra mono zém na. Tawamhã ma tô pisutu zahuré ni, te te daꞌaꞌuprosi zahuré mono da, daro mono bâ, dasiꞌwapé na. Duré mram na te te daꞌuprosi zahuré mono da, ma tô pisutu zahuré ni, dahâzé pire na te te ꞌre idaduri mono na, duré abaze zahi na zama. Tawamhã dazaꞌrata ahâ prã na te za dasiꞌutõrĩ, daro mono bâ. Maparane siꞌuiwa na dahâiba wamhã, misi si te za dadâꞌâ zaꞌra. Taha zarina te za daꞌahâ prã na aiꞌutõrĩ ni, daro mono bâ.
9 Tawamhã Poneꞌẽrebâ hã ma tô duré imrotõ hã pru, ibaihâ nhinha uptobzé hã. Tawamhã te te pru wamhã, wa tô duré ꞌmadâꞌâ zaꞌra, ꞌRe ihâimana uꞌâsi mono nhimiroti te te ꞌre sazei pese zaꞌra mono ꞌru te, da te ꞌre isimroi mono norĩ pẽꞌẽzani hã, tô sena na Zezusihi zazeiꞌwa na pahi ãna dama ꞌre siwasuꞌu zaꞌra mono ꞌru te, da te ꞌre isimroi mono norĩ pẽꞌẽzani hã. ꞌRe ihâimana uꞌâsi mono ma, danhoprubzé nomrizéb ꞌrowi te ta norĩ hã asimro, wedeza ne ꞌrowi.
10 Tawamhã mreme ꞌrãihâ na te hã:
— Wanhibꞌapito, danhipai u aiwaihuꞌu pese di. Duré aiwazé pese na ꞌre iꞌaihâimana mono. Tô sena, a hã. Tahawa, e nimahã na hã waꞌuprosiꞌwa norĩ ãma iwasédé hã saꞌra õ di za, tiꞌai ãma ꞌre ihâimana wasété zaꞌra mono ãma. E niwamhã waꞌruiwaꞌâbâ zaꞌra õ di za, asimiꞌahârizém na hã.
11 Tawamhã daꞌuza hâirã hâpa, ma tô tãma sõmri zaꞌra ni, tidâꞌâzéb u sipizari ãna, Zezusihi ãma ꞌre hâimana zaꞌra mono wa. Ma tô duré tãma nharĩ zaꞌra ni:
— Maꞌãpé, asimiꞌẽ na aꞌâ ꞌre asimipari zaꞌra waꞌaba mono. Da te ꞌre isimroi mono norĩ zaꞌratazé hã ꞌRe ihâimana uꞌâsi mono te te ipisutuzé hã zahadu da te dasina azahutu õ di. Da te aiꞌuprosi aba ne, asiré isazeiꞌwa norĩ, za da te ꞌre isimroi mono norĩ zaꞌratazé wab õ wa, te za aꞌâ asimiꞌẽ na sô ꞌre asimipari zaꞌra waꞌaba mo.
12 Tawamhã wa tô duré ꞌmadâ. Te ꞌmadâꞌâ wamhã, ma tô Poneꞌẽrebâ hã duré pru imropâ ãma hã, ibaihâ nhinha uptobzé hã. Te te pru wamhã, awaꞌawi ma tô tiꞌa hã sãsãꞌã, saꞌẽtẽ uptabi. Bâdâ hã ma tô duré titoptâꞌâ, zazahâ ihâ ꞌrãdâꞌâ uptabi ne. Aꞌamo hã ma tô duré titõmo wapru.
13 Wasi hã ma tô duré rere, tiꞌai u. Figuera wede ꞌrã hã rowaꞌuꞌu zaꞌẽne hã te te ꞌre pari zaꞌra mono wa, ꞌre iꞌaꞌa mono ne, ma tô wasi hã rere, tiꞌai u.
14 Tawamhã ma tô duré hâiwa nhirõno hã aiꞌubꞌrã, ibaihâ da te ꞌre iꞌubꞌrã zaꞌra mono ne. Duré tiꞌa hã sãsãꞌã wamhã, ẽtẽ ꞌrãihâ, daro mono bâ ꞌre isimasa mono hã ma tô siꞌré zaꞌra, ꞌre isimasa mono zém nhiti. Robꞌré zaꞌiti zama, ma duré uburé sina siꞌré zaꞌra, ꞌre isimiꞌwara mono zém nhiti.
15 Tawamhã tiꞌai ãma danhibꞌapito mono bâ dama ipire mono bâ ma tô ẽtẽ ꞌrãihâ zahâpâ simaꞌuri, daꞌmadâꞌâꞌwa norĩ hã, duré dasiꞌwapéi ꞌmanharĩꞌwa norĩ nhibꞌapito norĩ hã. Isibrob ahâ norĩ zama ma tô simaꞌuri, isibrobꞌõ norĩ zama, pawaꞌâbâ ãna iwadaꞌuri zarina si te te dama ꞌre iromhuri zaꞌra mono norĩ zama, duré wadaꞌuri ãna siꞌuihâ na ꞌre ihâimana zaꞌra mono norĩ zama. Uburé ma tô dasimaꞌuri, ẽtẽ ꞌrãihâ zahâpâ ẽtẽꞌre ꞌre, duré ẽtẽ nhiꞌriti ꞌre, dasiꞌutõrĩ tõ mono da.
16 Tawamhã ẽtẽ ꞌrãihâ norĩ ma, te nasi siꞌmahârâ zaꞌra, ẽtẽ tõmo wawẽ norĩ ma zama. Ãne te nasi tãma siꞌmahârâ zaꞌra:
— Maꞌãpé, wanhisiwi we airereꞌe aba mono, waꞌupsibi zaꞌra waꞌaba mono da, hâiwa ãma danhibꞌapito simasisizém na isãmra hã te te waꞌasãmri tõ da. Duré Poneꞌẽrebâ nhimihâzé wi, wanhisiwi we asaꞌwari aba, tiwi wazuwa zaꞌra waꞌaba da.
17 Bâdâ ipipa hã ma tô oto iwa waptãrã, õ norĩ hã te te iwaꞌaꞌuprosi zahuré mono zéb da hã. E ꞌwa hã hâiba ré tiwi watobro da bâ. Niꞌwa hã dâꞌâ ãna tiwi watobro waihuꞌu õ di za. Sõꞌrata waihuꞌu zahuré õ di za duré.
