Atus 19:1-41
19 Apolu hã Corĩtu ãma sãmra ré, ma tô Paulu hã roꞌrazâ Éfézu u, saꞌa waꞌwaibaba. Tame ma tô nima norĩ isazeiꞌwa norĩ hã sõpẽtẽ zaꞌra.
2 Tawamhã ma tô sadanharĩ zaꞌra, ãne:
— Saze zaꞌra waꞌaba wamhã, e ꞌRe ihâimana uꞌâsi mono Pẽꞌẽzani hã ma iwaibui waꞌwa.
Tahawa ma siwi sadaꞌâ, ãne:
— Mare di, iwasuꞌu hã wa te wapari zaꞌra õ di, Ipẽꞌẽzani ꞌre ihâimana mono na hã.
3 Tawamhã Paulu hã te duré sadanharĩ zaꞌra, ãne:
— Tawamhã bété, e ꞌwa simirowahutu zarina ma tô â dawabzuri hã iꞌmanharĩ zaꞌra waꞌwa.
Ma duré siwi sadaꞌâ, ãne:
— Zuwã Batistaha nhimirowahutu zarina wa tô ꞌmanharĩ zaꞌra ni, â dawabzuri hã.
4 Tahawa Paulu hã ma tô tãma nharĩ zaꞌra, ãne:
— Zuwã hã dawasété wi ꞌre idasipizari zaꞌra mono zéb zarina ma tô â dawabzuri hã te te dama ꞌre abꞌmanharĩ. Izaraéu nhihudu norĩ ma, ma tô duré te te ꞌre rowasuꞌu, isaꞌu we imorĩ hã te te saze zaꞌra da, tô Zezusi hã.
5 Tawamhã ãne hã te te wapari zaꞌra wamhã, â dawabzuri hã ma tô ꞌmanharĩ zaꞌra, Wanhibꞌapito Zezusihi nhisi na.
6 Tawamhã Paulu hã tinhibꞌrada te te ãma azaꞌra wamhã, ꞌRe ihâimana uꞌâsi mono Pẽꞌẽzani hã ma tô we itẽme siꞌra zaꞌra. Tahawa ma tô damreme aimawi na mreme zu oto. Ma tô duré ꞌRe ihâimana uꞌâsi mono zadawa wasuꞌu na dama rowasuꞌu zaꞌra.
7 Ã hã aibâ norĩ, niwamhã 12 na ihâiba zaꞌra hã.
8 Tawamhã aꞌamo siꞌubdatõ isiꞌutõrĩ mono na ma tô Paulu hã nasi ãza, Zudeu norĩ te rowahutuzéb u hã. Tame pahi ãna ma tô nasi dama rowahutu. Ma tô nasi dama arobzanha, te te daꞌapizari da duré da te ãma saze zaꞌra da, ꞌRe ihâimana uꞌâsi mono daꞌãma ꞌre isibꞌaꞌuwẽ mono zém na hã.
9 Tane nherẽ, niꞌwam norĩ hã ma tô tipẽꞌẽ tete pese zaꞌra. Te te isaze zaꞌra da hã, te te duré sima wẽ zaꞌra õ di. Danhoꞌa ma tô duré ãma wasété zaꞌra, Wanhibꞌapito te bâdâdi na ꞌre idanomro mono zém na hã. Tawamhã Paulu hã ma tô isiti timorĩ zaꞌra. Isiré ꞌre inomro mono norĩ si ma tô siré te te simro. Bâtâ sidâpâ ma tô nasi dama rowahutu zaꞌra, Tiranuhu te romnhorézéb ãma.
10 Maparane wahum na ma tô ãne hã ꞌmanha, Wanhibꞌapito zadawa wasuꞌu hã uburé da te iwapari zaꞌra zéb u, Azia na danhiptiꞌa nhoꞌõmo nhisi ãma ꞌre ihâimana zaꞌra mono, Zudeu norĩ duré zudeuꞌõ norĩ hã.
Cevaha ꞌra norĩ
11 Tawamhã ꞌRe ihâimana uꞌâsi mono hã, marĩ dama iꞌmanharĩ waihuꞌuꞌõ iwẽ uptabi hã ma tô te te ꞌre abꞌmanharĩ, Pauluhu nhibꞌrata na.
12 Tahawa Pauluhu te zazahâ hâirã duré zazahâ marĩ ꞌmanharĩ da, ãma ꞌre isiꞌawasisi mono zé hã, ma tô da te ꞌre ꞌwasari, ihâzé ré norĩ te te ꞌre upi zaꞌra mono da hã. Te te ꞌre upi zaꞌra mono wamhã, ma tô ꞌre pese zaꞌra. Waꞌuburé zama ma tô duré ꞌre wairébé dahawi.
13 Tawamhã niꞌwam norĩ Zudeu norĩ hã waꞌuburé te te dama ꞌre sãmra zaꞌra mono da, ꞌre inomro mono norĩ hã ma tô sima wẽ zaꞌra aré, Wanhibꞌapito Zezusihi nhisi na te te tãma robꞌru zaꞌra da, waꞌuburé ma hã. Ãne ma tô tãma robꞌru zaꞌra:
— Zezusihi nhisi na, Paulu te te dama ꞌre iwasuꞌu mono na, wa aima robꞌru zaꞌra waꞌwa, aiwairébé waꞌaba da.
14 Ãne hã aibâ norĩ te te ꞌre iꞌmanharĩ zaꞌra mono hã 7 na ihâiba zaꞌra, Cevaha ꞌra norĩ. Ta hã Zudeu, sasedoti tisiré norĩ nhipai u ipire.
15 Tane nherẽ, nimahã bâtâ na waꞌuburé hã ma tô tãma nharĩ zaꞌra, ãne:
— Zezusi hã ĩma waihuꞌu pese di. Paulu hã duré ĩma waihuꞌu pese di. Tazahã, e ꞌwam norĩ hã a norĩ waꞌwa.
16 Tawamhã aibâ waꞌuburé ré ꞌre imorĩ hã ma tô sô sime zaꞌra. Ma tô hâ zaꞌra, saꞌẽtẽ uptabi. Tahawa ꞌri hawi ma tô sisaꞌre aiꞌuréiwi, uꞌa na.
17 Tawamhã Éfézu ãma ꞌre isiꞌubumroi mono norĩ, Zudeu norĩ duré zudeuꞌõ norĩ hã rowasuꞌu te te waihuꞌu zaꞌra wamhã, ma tô tãma tipahi pese zaꞌra. Tahawa Wanhibꞌapito Zezusihi nhisi hã dama wazé pese uptabi di oto.
18 Tawamhã daꞌahâ na da te ꞌre isaze zaꞌra mono hã ma tô danhoꞌa ꞌre dasiwasuꞌu zaꞌra, marĩ iwasédé hã da te ꞌre iꞌmanharĩ zaꞌra mono zém na hã.
19 Tawamhã daꞌahâ na abzé, aré da te ꞌre iꞌmanharĩ zaꞌra mono norĩ hã ma tô tite zaꞌra ãma robꞌuiꞌéré hã ãwisi zaꞌra ni, danhoꞌa da te ãma roꞌo zaꞌra da. Ãma irobꞌuiꞌéré hã da te ãma iroꞌo zaꞌra waꞌâ, da te saꞌrata zaꞌra wamhã, ma tô watobro 50 miu na robꞌuiprazé isapotore ẽtẽ waipo prã prata ꞌmanharĩ hã.
20 Ãne wa, Wanhibꞌapito mreme hã dama pire uptabi di oto. Daro mono bâ ma tô da te ãma ropé.
Éfézu ãma roꞌwaꞌrudu iwatobrozé
21 Ãne hã ꞌre romhâimana mono parimhã, Paulu hã ma tô sima rowairébé, morĩ da, Masédonia waꞌwaibaba duré Acaia waꞌwaibaba, taha pari Zeruzalẽ u morĩ da. Ãne te sima tinha:
— Zeruzalẽ u ĩmorĩ parip si, tô iꞌru zahi Roma u ĩmorĩ da hã.
22 Tawamhã Paulu hã Masédonia u ma tô maparane satõrĩ zahuré tipawaptoꞌwa norĩ hã, Timotiu norĩ Erastuhu me. Tane nherẽ, Paulu ma tô aꞌâ nhamra niha bâtâ na, Azia na danhiptiꞌa nhoꞌõmo nhisi ãma hã.
23 Taha bâtâ mono na ma tô roꞌwaꞌrudu hã watobro Éfézu ꞌremhã, Wanhibꞌapito te bâdâdi uꞌâbâmhã.
24 Aibâ hã ẽtẽ waipo prata na marĩ ꞌmanharĩꞌwa Dimetriu na isisi hã ma tô nasi abꞌmanha, prata na romhâiba ĩsurure hã Diãna na ihâibaꞌõ ma ꞌri ꞌrãihâ isam na. Tahawa tãma iromhuriꞌwa norĩ hã pawaꞌâbâ wẽ di.
25 Tawamhã Dimetriu hã ma tô sô tihârâ zaꞌra, isine romhuri te te ꞌre iꞌmanharĩ zaꞌra mono norĩ zô. Ãne te tãma nharĩ zaꞌra:
— Ĩsiwaihuꞌu norĩ, aima waihuꞌu pese zaꞌra waꞌaba di, wanhimarĩ hã ã hã wanhimiromhuri zaꞌra hawim na hã.
26 Asiꞌuihâ na te nasi iꞌmadâꞌâ zaꞌra waꞌwa. Te duré nasi iwapari zaꞌra waꞌwa, Paulu te te nasi dama irowasuꞌuzé hã. Te nasi dama rowahutu romhâiba danhibꞌrata na iꞌmanharĩ hã, ihâibaꞌõ iꞌuptabi õ na hã. Ãne na te daꞌapiza daꞌahâ na, ãhã ꞌremhã duré aré uburé Azia na danhiptiꞌa nhoꞌõmo ꞌremhã.
27 Ãne wa, romnhimimnhasi di, wanhimiromhuri zaꞌra hã da te wawi wẽꞌõ zaꞌra õꞌumnhasite. Taha si õ di. Duré isimimnha hã Diãna te ꞌri zaꞌẽne hã taré oto ꞌre hâimana mono õꞌumnhasite, duré da te dasiwi prub õꞌumnhasite, ihâibaꞌõ dama isaꞌẽne hã, Azia ꞌre duré danhiptiꞌai mono bâ daro mono bâ, ãma ꞌre idawata zaꞌra mono hã.
28 Ãne hã imreme da te wapari zaꞌra wamhã, daꞌahâ uptabi na ma tô abꞌrui pese zaꞌra ni. Ma tô duré tahãsi ni, dahârâ ꞌrãihâ na, ãne:
— Diãna hã, danhipai u dama pire di, Éfézu ãma ꞌre isiꞌubumroi mono norĩ te hã.
29 Tawamhã roꞌwaꞌrudu hã ꞌri nhoꞌõmo ꞌremhã ropâ ma tô ropé. Ma tô ꞌre dasiwaꞌrãmi. Tahawa ma tô dasiwi mrami zahuré ni Gaiu norĩ Aristarcuhu me hã, Pauluhu siré ꞌre ine, Masédonia ãma ꞌre isimasisi zahuré mono aré. Ma tô da te ãma robâdâ zahuré, robꞌre zaꞌẽne marĩ da, ꞌri waꞌõtõ ꞌre, ꞌre idasiꞌrãꞌõtõ mono zéb u.
30 Tawamhã Paulu hã ma tô aré sima wẽ, daꞌahâ na idahâimana zaꞌra norĩ ma, te te nharĩ da. Tane nherẽ, Zezusihi zazeiꞌwa norĩ hã ma tô ãma ropti zaꞌra.
31 Nima norĩ tame danhiptiꞌai ꞌre dama ipire norĩ, Pauluhu siwaihuꞌu norĩ hã ma tô romreme ré itẽme daꞌmazatõrĩ zaꞌra. Ma tô tiwi rosawi pese zaꞌra, morĩ tõ da, robꞌre zaꞌẽne marĩ da, ꞌri waꞌõtõ ꞌre, ꞌre idasiꞌrãꞌõtõ mono zéb u hã.
32 Idasiꞌrãꞌõtõzéb ãma hã siwaꞌru ma tô tahâimana zaꞌra ni. Niꞌwam norĩ hã ma tô aimawi nasi hã, duré niꞌwam norĩ aimawi. Daꞌahâ na dame idahâimana zaꞌra hã da te waihuꞌu zaꞌra õ di, marĩ zô dame idahâimana zaꞌra na hã.
33 Niꞌwam norĩ hã ma tô rosaꞌrata zaꞌra, Alesãdri iꞌupaiꞌwa na hã. Tahawa Zudeu norĩ hã ma tô siwi tisã, danhoꞌre u. Tawamhã tinhibꞌrada hã ma tô aré dama ꞌmanha ariꞌiwi dasimasab da, te te sima wẽ wa, siꞌwawi simapa da, timreme na danhoꞌremhã.
34 Tane nherẽ, Zudeu na te te siwi waihuꞌu wamhã, aiwapsi ma tô tahãsi ni. Bâtâ pibuzé hã maparane ma tô daꞌãma aiꞌutõ, nasi dahãsi ré hã, ãne:
— Diãna hã, danhipai u dama pire uptabi di, Éfézu ãma ꞌre isiꞌubumroi mono norĩ te hã.
35 Tawamhã ꞌri nhoꞌõmo ꞌre, danhibꞌapito ma robꞌuiꞌéréꞌwa hã ma tô oto daꞌawahâ, dawaimri dahâimana zaꞌra da. Ãne te dama tinha:
— Éfézu ãma ꞌre iꞌaiꞌubumroi waꞌaba mono norĩ, aima waihuꞌu pese zaꞌra waꞌaba di, wate zaꞌra ꞌri nhoꞌu hã, Diãna dama isaꞌẽne robꞌmadâꞌâꞌwai ma, ꞌri ꞌrãihâ iwa ꞌre isa mono na hã duré ẽne iwazé pe hâiwa hawi we iwaptãꞌã na zama.
36 Ã hã niꞌwa hã te te udâ waihuꞌu õ di. Ãne wa, aiwaimri aihâimana zaꞌra waꞌaba. Duré marĩ hã ꞌmanharĩ zaꞌra waꞌaba tõ, ãma rosaꞌrata pese zaꞌra waꞌaba õ ré hã.
37 Ma we asiwi iꞌãwisi zahuré waꞌwa ã hã aibâ norĩ hã, marĩ te te simiꞌuri zahuré õ nherẽ, Diãna isabzé ꞌri ꞌremhã. Duré wate zaꞌra ihâibaꞌõ sipiꞌõi ãma hã te te wasété zahuré õ di.
38 Dimetriu hã duré isine isimiromhuri norĩ hã, marĩ na niꞌwa hã te te siwi wasuꞌu wasété da wamhã, daꞌãma rowairébézé hã, ꞌridawa haré sada hã. Dama ipire norĩ zama te sada tihâimana zaꞌra. Tamep si te za marĩ hã wasuꞌu zaꞌra.
39 Tazahã ãhã nhipai u marĩ hã wasuꞌu zaꞌra waꞌaba da wamhã, uburé norĩ nhoꞌa te za tihâiba, roti zahi te te wama iꞌru zaꞌra zéb zarina.
40 Tô ã bâtâ na iromhâimanazé uꞌâbâmhã, simimnhasi di, da te wawasuꞌu wasété zaꞌra õꞌumnhasite, uburé daꞌãma rowairébézé wi, wa te iroꞌwaꞌré zaꞌra na hã. Ãne wamhã, iꞌuwaibaba na wa te rowasuꞌu waihuꞌu zaꞌra õ di za, ãhã na iromhâimanazé roꞌwaꞌrutu na hã.
41 Ãne na te te dama nharĩ pari, ma tô dama robꞌru, dawairébé da oto.
