Atus 21:1-40
21 Tawamhã wa te wasima ropéi parimhã, wa tô wasisaꞌre ubaꞌre rowaꞌuꞌu na inem na, õne haré robꞌré zaꞌidi Cosi u. Duré awẽm na hã wa tô wasisaꞌre, Rodi na robꞌré zaꞌiti nhisi u, ubaꞌre nhimizahârizéb u. Ta hawimhã wa tô aiꞌabaꞌré ni, Patara na ꞌri nhoꞌõmo nhisi u.
2 Tame, wa tô ubaꞌre rowaꞌuꞌu na ine hã wasiwi ꞌmanhopẽtẽ ni, Fenisia u iwara da hã. Taha na wa tô asisi ni. Wawara na wa tô ãma uzusi zaꞌra ni.
3 Robꞌré zaꞌidi Chipri hã wa te oto ꞌmadâꞌâ zaꞌra wamhã, wa tô wasisaꞌrei waré robꞌré zaꞌiti nhimiꞌe niwĩ. Tawamhã wa tô wasisaꞌre, Siria na danhiptiꞌa nhoꞌõmo nhisi u. Tiru ãma wa tô warereꞌe ni, tame ubaꞌre, marĩ te te iduri hã za da te sani zaꞌra wa.
4 Tame ꞌri waꞌõtõ ꞌremhã wa tô sõpẽtẽ zaꞌra ni niꞌwam norĩ Zezusihi zazeiꞌwa norĩ hã. Isiré wa tô wahâimana zaꞌra ni, 7 na bâtâ ꞌremhã. Tawamhã ta norĩ hã ꞌRe ihâimana uꞌâsi mono Pẽꞌẽzani te te tãma waihuꞌu zaꞌra wa, ma tô Pauluhu ma nharĩ zaꞌra, Zeruzalẽ u hã morĩ tõ da.
5 Tane nherẽ, bâdâ iwasiꞌabaꞌrézé iwa waptãꞌã wamhã, wamorĩ na wa tô ãma uzusi zaꞌra ni. Tawamhã tame isazeiꞌwa norĩ hã ma tô ꞌri nhoꞌõmo hawi wasiré aiꞌabaꞌré, â zaihâ u, timro norĩ ré duré tiꞌra norĩ ré zama. Tame wa tô uburé suparaꞌai wa wahiꞌrãtitõ asimro ni. Wa tô rowaptẽrẽ zaꞌra ni.
6 Tawamhã wasisawi zaꞌra parimhã, ubaꞌre wa, wa tô oto asisi ni. Wasisãnawã norĩ hã apâ ma tô aiꞌabaꞌré, tinhorõwa u.
7 Wamorĩ na wa ãma uzusi zaꞌra ni, ubaꞌre na. Tiru hawi wa tô aiꞌabaꞌré ni. Patolemaida na ꞌri nhoꞌõmo nhisi u, wa tô aihutu ni. Tame isazeiꞌwa norĩ hã wa tô sawi zaꞌra ni. Misi bâtâ na wa tô duré iꞌratab zaꞌra hã wahâimana zaꞌra ni.
8 Awẽm na hã wa tô aiꞌabaꞌré ni. Tawamhã Cézaréia u wa tô aihutu ni. Tame Filipihi nhorõwa ãma wa tô aiꞌubumro ni. Ta hã Zezusihi wasuꞌuwẽ na isazeiꞌõꞌwa norĩ ma rowasuꞌuꞌwa. 7 na isazeiꞌwa norĩ pawaptoꞌwa da, da te ipisutu zaꞌra norĩ me, ꞌre ihâimana mono, Zeruzalẽ ãma hã.
9 Iꞌra sipiꞌõ norĩ hã maparane siꞌuiwa na ihâiba zaꞌra hã, imro õ si, te ꞌRe ihâimana uꞌâsi mono zadawa ꞌmahârâꞌwa na ꞌre hâimana zaꞌra.
10 Tame niha bâtâ na wahâimana zaꞌra parimhã, Zudéa hawimhã ma tô wi, aibâ hã ꞌRe ihâimana uꞌâsi mono zadawa ꞌmahârâꞌwa, Agabu na isisi hã.
11 Watẽme wisi zaꞌra wi, ma tô Pauluhu usisizé hã tiwi waze. Ma tô ãma sisibꞌrata wasisi, tipara zama. Taha pari, ma tô ãne tinha:
— ꞌRe ihâimana uꞌâsi mono Pẽꞌẽzani hã ma tô ãne ĩma waihuꞌu: “Ãne te za Zudeu norĩ hã daꞌusisizé tedeꞌwa hã siwi wasisi, Zeruzalẽ ãma hã. Taha pari te za zudeuꞌõ norĩ ma siwi hâiba nho.”
12 Tawamhã ãne hã imreme wa te wapari zaꞌra wamhã, tame isazeiꞌwa norĩ ꞌre isiꞌubumroi mono norĩ me, wa tô Pauluhu ma wazada wazaꞌréiꞌõ zaꞌra ni aré, Zeruzalẽ u hã morĩ tõ da.
13 Tane nherẽ, Paulu hã ma tô wama nharĩ zaꞌra, ãne:
— E marĩ da, te aiꞌruꞌru waꞌwa. Ma ãma ĩwi irobzeiꞌõ pese zaꞌra waꞌwa. Wa tô ĩsisaꞌra pese, da te ĩpawasisi da si õ di. Duré ĩdâꞌâ da zama Zeruzalẽ ꞌremhã, Wanhibꞌapito Zezusihi uꞌâbâ.
14 Morĩ tõ da, wa te wasiwi piꞌrai waihuꞌu õ wa, wa te oto tiwi rosawi zaꞌra õ di. Tahawa, wa tô ãne tãma nharĩ zaꞌra ni oto:
— Uburé Danhibꞌapito te te sima iwẽzéb uwaibaba ihâimana da si, iwẽ hã.
15 Tame wahâimana zaꞌra parimhã, wa tô wasima robꞌubumro zaꞌra ni. Taha pari wa tô aiꞌabaꞌré ni, Zeruzalẽ u.
16 Nima norĩ Cézaréia ãma isazeiꞌwa norĩ hã ma tô wasiré aiꞌabaꞌré. Ta norĩ hã ma tô te te wanhimro Menasõhõ nhorõwa u, tame wasiꞌubumro da. Ta hã Chipri ãma ipotozé hã duréi isazeiꞌwa.
Paulu hã Zeruzalẽ u iwisizé
17 Tawamhã Zeruzalẽ u wasihutu wamhã, isazeiꞌwa norĩ hã to sina ma wawaibu.
18 Awẽm na hã Paulu ma tô wasiré timorĩ zaꞌra, Tiagu te te sabu da. Tame uburé pese isazeiꞌwa ꞌmadâꞌâꞌwa norĩ hã ma tô ubumro.
19 Tawamhã Paulu hã ma tô sawi zaꞌra. Ma tô duré uburé tãma wasuꞌu pese zaꞌra, ꞌRe ihâimana uꞌâsi mono te te ꞌre ipawapto mono zé hã zudeuꞌõ norĩ wazari ꞌre hâimana mono ré hã.
20 Te te siwi wapari parimhã, uburé ma tô ꞌRe ihâimana uꞌâsi mono ãma tiwata zaꞌra. Ãne ma tô Pauluhu ma nharĩ zaꞌra:
— Wasisãnawã, aima waihuꞌu pese di, ã hã. Zudeu norĩ hã ahâ uptabi na ma tô saze zaꞌra. Duré uburé te te ꞌre ꞌmadâꞌâ pese zaꞌra, ꞌRe ihâimana uꞌâsi mono nhimiroti zahi na Mozési te te irobꞌuiꞌérézé hã.
21 Ta norĩ hã ma tô aiwasuꞌu wapari zaꞌra, Zudeu norĩ hã, zudeuꞌõ norĩ wazari ꞌre isiꞌubumroi mono norĩ ma ꞌre irowahutu mono na hã, Mozésihi nhimiꞌuiꞌéré hã te te rẽme zaꞌra tõ da. Te u, tãma ꞌre iroti zaꞌra mo, tiꞌra hã te te ꞌre sihâiwata nhihâri zaꞌra mono tõ da, Zudeu norĩ hâimanazéb zarina.
22 Tawamhã ãne wamhã, e marĩ, wa za ꞌmanharĩ zaꞌra ni. Te za tô aiwasuꞌu wapari zaꞌra, we iꞌaiwisi na hã.
23 Tahawa, maꞌãpé ꞌmanharĩ, za wa te aima inharĩ zaꞌra zéb zarina: Wasiré te tihâimana zaꞌra maparane siꞌuiwa na aibâ norĩ hã, ꞌRe ihâimana uꞌâsi mono ma, marĩ na ropisudu te te iꞌmanharĩ zaꞌra hã.
24 Tahawa, maꞌãpé aimorĩ. Isiré aihâimana zaꞌra na, ꞌRe ihâimana uꞌâsi mono ma, ꞌre idasihâiba pese zaꞌra mono zéb ãma hã. Duré taha waꞌâbâzé hã tãma waꞌâbâ zaꞌra na, siꞌrãpari zaꞌra da. Ãne wamhã, uburé te za waihuꞌu zaꞌra ni, senai õ na da te iꞌaiwasuꞌu zaꞌra zé hã. Tazahã te za aiwaihuꞌu zaꞌra ni, Mozésihi nhimiꞌuiꞌéré zarina ꞌre iꞌaihâimana mono na hã.
25 Zudeuꞌõ norĩ te te isaze zaꞌra norĩ ma, wa tô robꞌuiꞌéré hã wasiwi sõmri ni, ãne hã: “ꞌRe huri waꞌaba mono tõ, danhimizama romhâiba ꞌmanharĩ ãma ꞌre dawata zaꞌra mono da, da te ꞌre isimroi mono nhi hã. Duré iwapru hã ꞌre âhuri aba mono tõ. Duré danhimizama da te ꞌre isõꞌreti zaꞌra mono norĩ nhi hã, ꞌre huri aba mono tõ. Duré aihâiba na asiwi ꞌre asimisaihuri zaꞌra waꞌaba mono tõ.”
26 Tawamhã awẽm na, Paulu hã ma tô te te simro aibâ norĩ hã. ꞌRe ihâimana uꞌâsi mono ma, ꞌre idasihâiba pese zaꞌra mono zé hã ma tô isiré ꞌmanharĩ zaꞌra. Taha pari, ma tô ãzé, ꞌRe ihâimana uꞌâsi mono nhorõwa ꞌri ꞌrãihâ u, te te daꞌapoꞌre puꞌu da, niwa za isiꞌutõrĩzém na hã bâdâ dasihâiba upsõzép te hã, aibâ norĩ hã tinhoprubzé hâiba mono bâ te te ꞌmanharĩ zaꞌra da.
Paulu hã da te iꞌârizé, ꞌRe ihâimana uꞌâsi mono nhorõwa ꞌri ꞌrãihâ ãma
27 ꞌRe idasihâiba upsõ zaꞌra mono zé, bâdâ 7 na oto isiꞌutõrĩzéb u hã, nima norĩ Zudeu norĩ Azia na tiꞌa nhisi hawimhã ma tô siwi ꞌmadâ Paulu hã, ꞌRe ihâimana uꞌâsi mono nhorõwa ꞌri ꞌrãihâ ãma. Tawamhã ma tô sada dawadaꞌuri wasété zaꞌra. Tahawa ma tô siwi tiꞌâ.
28 Tawamhã ma tô tihârâ zaꞌra, ãne:
— Izaraéu nhihudu norĩ, waꞌãma ana waꞌaba. Ã hã aibâ hã daro mono bâ ma tô te te dama ꞌre rowahutu, tizadawa nhipese na, Izaraéu nhihudu wasuꞌu wasété na duré ꞌRe ihâimana uꞌâsi mono nhimiroti zahi na Mozési te te irobꞌuiꞌérézé hã da te ꞌre ꞌmadâꞌâ pese zaꞌra mono tõ da, duré ꞌRe ihâimana uꞌâsi mono nhorõwa ꞌri ꞌrãihâ wasuꞌu wasété na zama. Taha siré hã zudeuꞌõ norĩ hã ma tô we ꞌmazasi zaꞌra ꞌRe ihâimana uꞌâsi mono nhorõwa u. Taha zarina ma tô ã hã ꞌri iwazé pe hã wasété.
29 Ãne hã ma tô nharĩ zaꞌra, te te siwi ꞌmadâꞌâ wa, Trofimu hã Éfézu hawimhã, ꞌri nhoꞌõmo ꞌre Pauluhu siré. Tahawa ma tô ãma rosaꞌrata zaꞌra, Paulu hã ꞌRe ihâimana uꞌâsi mono nhorõwa ꞌri ꞌrãihâ u te te ꞌmazébré newa.
30 Tahawa, Zeruzalẽ ꞌremhã, roꞌwaꞌrudu hã ma tô ropâ tihâiba. Dasiꞌabaꞌré na ma tô ubumro ni. Paulu hã ma tô dasiwi âri ni. Ma tô da te ãma robâdâ rob u, ꞌRe ihâimana uꞌâsi mono nhorõwa hawi. Tahawa awaꞌawi pesere ma tô ꞌridawa hã dasiwi sitom ni.
31 Paulu hã da te oto iwĩrĩzéb u, Roma hawi dasiꞌwapéi ꞌmanharĩꞌwa norĩ nhibꞌapito tẽme ma tô wi romreme hã, Zeruzalẽ ꞌremhã iroꞌwaꞌrutu na hã.
32 Tahawa waptu na awaꞌawi ma tô tite nima norĩ dasiꞌwapéi ꞌmanharĩꞌwa norĩ nhibꞌapito norĩ zô hâ, duré tite dasiꞌwapéi ꞌmanharĩꞌwa norĩ zô zama. Tawamhã ta norĩ hã ma tô sisaꞌre, dawaꞌwa u. Dasiꞌwapéi ꞌmanharĩꞌwa norĩ nhibꞌapito hã duré dasiꞌwapéi ꞌmanharĩꞌwa norĩ hã da te ꞌmadâꞌâ zaꞌra wamhã, ma tô Paulu hã siwi azâri zazâ.
33 Tawamhã danhibꞌapito hã, Pauluhu u ma tô aiꞌré. Ma tô paꞌâ. Ma tô duré tiꞌru, ite dasiꞌwapéi ꞌmanharĩꞌwa norĩ hã te te siwi pawasisi da, maparane isiꞌuwazi nhorõ rutu na. Taha pari ma tô ãne sadanha:
— E ꞌwa hã ã hã aibâ. E marĩ ma ꞌmanha.
34 Tane nherẽ, daꞌahâ uptabi na idahâimana zaꞌra ãma hã, dahârâ sipuꞌu pese na ma tô nasi tahãsi ni. Roꞌwaꞌrutu uptabi wamhã, danhibꞌapito hã iromhâimanazé hã te te upsibi mei waihuꞌu õ di. Tahawa ma tô tiꞌru dasiꞌwapéi ꞌmanharĩꞌwa norĩ ma, Paulu hã te te siwi ꞌmazébré da, ꞌri isiptete u hã.
35 Dazaiꞌurizéb u sihutu wamhã, dasiꞌwapéi ꞌmanharĩꞌwa norĩ hã, Paulu ma tô siwi subza, dazahi wa, da te dasiwi iꞌazâri da si wa.
36 Tawamhã daꞌahâ na isarina idasiꞌabaꞌré norĩ hã ma tô dahãsi uꞌâsi, ãne:
— Wĩrĩ aba. Wĩrĩ aba.
Paulu hã siꞌuihâ na dama isiwasuꞌuzé
37 ꞌRi isiptete u te te siwi iꞌmazébrézéb u, Paulu hã ma tô tinha danhibꞌapito ma, ãne:
— E aima wẽ di, marĩ te aima iwasuꞌu da hã.
Tawamhã apito hã te asa sadanha, ãne:
— E nare aima waihuꞌu pese di, gregu norĩ mreme hã.
38 E tawamhã a hã ezipsiu duréihã nimahã wahum na te te ãma isãnaꞌrada, Roma ãma apito wi, dasipizari zaꞌra da hã duré ropsi ꞌre irosaꞌwari mono u te te idanhimroi mono 4 miu na dahâiba na, rowasété ꞌmanharĩꞌwa norĩ hã.
39 Tawamhã Paulu hã ma sadaꞌâ, ãne:
— Wa hã Zudeu. Tarsu na ꞌri nhoꞌõmo nhisi ãma ĩpotozé hã. Ta hã ꞌri nhoꞌu dama ipire, Silisia na danhiptiꞌa nhoꞌõmo nhisi ãma hã. Ĩma ꞌru na aꞌâ, te dama rowasuꞌu da.
40 Tawamhã dasiꞌwapéi ꞌmanharĩꞌwa norĩ nhibꞌapito hã ma tô tãma rowairébé wẽ, te te tô dama rowasuꞌu da hã. Tawamhã Paulu hã hâiwi ma tô za dazaiꞌurizém na. Tinhibꞌrada hã ma tô duré dama ꞌmanha, ariꞌiwi dasimasab da. Oto dawarõtâꞌâ zaꞌra wamhã, ma tô dama tinha, Ebreu norĩ mreme na.
