Mateus 11:1-30
11 Zezusi hã tisiré ꞌre inomro mono 12 na ihâiba zaꞌra norĩ ma te te roti parimhã, ma tô mo tinhamrazém hawi, te te dama rowahutu mono da, ꞌri nhoꞌõmo mono bâ Galiléia ꞌremhã.
2 Tawamhã Zuwã Batista hã dazazéb ꞌre sab ré, ma tô wapa Cristuhu wasuꞌu hã, marĩ te te ꞌre iꞌaꞌmanharĩ mono zém na hã. Tahawa isiré ꞌre inomro mono norĩ hã ma tô satõrĩ zaꞌra,
3 te te siwi sadanharĩ da, ãne:
— E tô a hã we iwisi da hã*, ma we aiwi. E niwamhã zahadu, wa za mapari zaꞌra ni, aimawi zô.
4 Tawamhã Zezusi hã ma ãma sadaꞌâbâ zaꞌra, ãne:
— Mo oto apâ aiꞌabaꞌréi waꞌaba, Zuwãhã ma rowasuꞌu zaꞌra waꞌaba da, iwapari zaꞌra waꞌaba zém na hã, duré iꞌmadâꞌâ zaꞌra waꞌaba zém na zama.
5 Tãma wasuꞌu zaꞌra waꞌaba, itobꞌa norĩ hã ito pese zaꞌra na, duré imorĩꞌõ norĩ hã oto imorĩ ré na, duré iꞌwaꞌre ré norĩ ipese zaꞌra na hã, ipoꞌreptõ norĩ ipoꞌre pese zaꞌra na hã, duré idâꞌâ norĩ apâ ihâiwaꞌutu zaꞌra na hã, duré isibrobꞌõ norĩ hã Rowasuꞌu wẽ ité te te iwapari zaꞌra na hã.
6 Niꞌwam norĩ ma ꞌre rowẽ uptabi zaꞌra mono di, te te sina ꞌre ĩꞌumnhasi zaꞌra mono zé, te te ꞌre irẽme waihuꞌu zaꞌra mono õ norĩ ma hã.
7 Tawamhã Zuwã Batistaha siré ꞌre inomro mono norĩ hã apâ oto siꞌabaꞌréi wamhã, Zezusi hã ma tô ãma sãnaꞌrata dama rowasuꞌu na, daꞌahâ uptabi na idahâimana zaꞌra ma, Zuwã Batistaha wasuꞌu na hã, ãne:
— E marĩ ꞌmadâꞌâ zaꞌra waꞌaba da, ma tô aiꞌabaꞌréi waꞌwa, rop si ꞌre irosaꞌwari mono u hã. E du teihi po, rowaꞌu te te ꞌre irési mono.
8 E marĩ ꞌmadâꞌâ zaꞌra waꞌaba da bâ. E aibâ, uza hâi wẽ uptabi na ꞌre isiꞌuza mono. Waihuꞌu zaꞌra waꞌaba! Uza hâi wẽ uptabi na ꞌre isiꞌuza zaꞌra mono norĩ hã, apito norĩ te, ꞌri isaꞌẽne iwẽ uptabi wap si te ꞌre siꞌubumro.
9 Tazahã, e marĩ ꞌmadâꞌâ zaꞌra waꞌaba da, ma tô aiꞌabaꞌréi waꞌwa. E ꞌRe ihâimana uꞌâsi mono zadawa ꞌmahârâꞌwa. Tane tô. Tô sena wa za duré aima waihuꞌu zaꞌra waꞌwa. Ma tô iꞌmadâꞌâ zaꞌra waꞌwa, ꞌRe ihâimana uꞌâsi mono zadawa ꞌmahârâꞌwa norĩ nhipai u ipire hã.
10 E marĩ wa. Zuwãhã ãma ma tô ꞌRe ihâimana uꞌâsi mono zadawa ꞌmahârâꞌwa hã ãma robꞌuiꞌéré, Imreme na Ibaihâ iwazé pese na robꞌuiꞌéré hã, ãne: “Ĩmreme ꞌwapéiꞌwa hã wa za satõ, aiwana. Ta hã te za ate bâdâdi hã aiwana asô ropese.”
11 Tô sena wa za aima waihuꞌu zaꞌra waꞌwa, ãne: Uburé aꞌuwẽ norĩ ipoto zaꞌra hã, niꞌwa Zuwã Batistaha ne hã hâimana õ di, ipire hã. Tane nherẽ, niꞌwa hã Hâiwa ãma ꞌre Isãmra mono, daꞌãma ꞌre isibꞌaꞌuwẽ mono zéb ãma dama wapu na ꞌre ihâimana mono hã, ta hã Zuwã Batistaha ma saꞌẽtẽ di za, isipai u hã.
12 Zuwã Batista hã, Rowasuꞌu wẽ itém na te te ꞌre irowasuꞌu mono zém na te te isãnaꞌratazém hawim haré, ãwa bâtâ u hã, Hâiwa ãma ꞌre Isãmra mono, daꞌãma ꞌre sibꞌaꞌuwẽ mono zé hã ma tô danhiptete na da te ꞌre ꞌwapé zaꞌra, dazahi na. Aibâ iwasété norĩ hã ma tô te te sima ꞌre wẽ zaꞌra, tinhiptete na te te sima ꞌre waibui mono da.
13 Uburé ꞌRe ihâimana uꞌâsi mono zadawa ꞌmahârâꞌwa norĩ nhimirobꞌuiꞌéré hã duré uburé isimiroti zahi na Mozési nhimirobꞌuiꞌéré zama ma tô wasuꞌu zaꞌra, ꞌRe ihâimana uꞌâsi mono daꞌãma ꞌre isibꞌaꞌuwẽ mono zé hã, Zuwã ipotozéb u hã.
14 Tawamhã isimirowasuꞌu zaꞌra na, saze zaꞌra waꞌaba da wamhã, Zuwã hã, ta hã Elias, za we iwisi da hã, duréi da te ꞌre iwasuꞌu mono.
15 Asimiparizé aima hâimana zaꞌra waꞌaba wamhã, maꞌãpé wapari zaꞌra waꞌaba!
16 — E marĩ na, wa za daꞌãma romnhimiréꞌé, ãhã na ꞌre idahâimana zaꞌra mono norĩ ãma hã. Aiwa aiꞌuté norĩ ne hã da te dasina ꞌre iꞌubumroi mono zéb ãma, nasi isiꞌmahârâ zaꞌra ne hã, ãne:
17 “Wa rowamreme zaꞌra ni, dasina damro wa, roptaꞌazém na. Tane nherẽ, ãma aipese zaꞌra waꞌaba õ di!Wa wanhoꞌre zaꞌra ni, da te daꞌãma ꞌre tiꞌa zaꞌra mono wa, ꞌre idazadawaꞌaꞌa mono zém na. Tane nherẽ, aiꞌruꞌru waꞌaba õ di.”
18 Tawamhã Zuwã Batista hã, sai ãna te te ꞌre rowaptẽrẽ. Duré uva ꞌrãi waꞌu te te ꞌre hâsi mono õ di. Taha zarina, te da te dasima ꞌre nharĩ zaꞌra, ãne: “Õ hã te waꞌuburé ré ꞌre mo.”
19 Tiꞌai ãma Dasiré Ipodo hã ma tô wei mo. Ta hã te to sina dasiré ꞌre sa. Uva ꞌrãi waꞌu isé hã te duré te te ꞌre hâsi dame. Tahawa, te da te tãma ꞌre nharĩ wasété zaꞌra, ãne: “Maꞌãpé ꞌmadâꞌâ zaꞌra waꞌaba! Õ hã aibâ hã isai wawẽ. Duré uva ꞌrãi waꞌu isé hã te te ꞌre hâsi zaꞌẽtẽ! Robꞌuiprazé arĩ ubumroiꞌwa norĩ siwaihu, duré siwaꞌru ꞌre idanomro mono norĩ siwaihu.” Tazahã, rowaihu ꞌRe ihâimana uꞌâsi mono te hã te ꞌre sihâiꞌré, romhuri iwẽ na da te ꞌre iꞌmanharĩ zaꞌra mono zém na si, tô sena na.
ꞌRi nhoꞌu Corazĩ ꞌre, duré Betisaida ꞌre, da te isaze zaꞌra õ norĩ wasuꞌu
20 Tawamhã Zezusi hã ma tô dawasédé daꞌãma azaꞌra, ꞌri nhoꞌõmo mono bâ marĩ dama iꞌmanharĩ waihuꞌuꞌõ, ahâ na te te dama ꞌre iꞌabꞌmanharĩ mono zéb ãma hã. E marĩ wa. Tamemhã ꞌRe ihâimana uꞌâsi mono ma, dasiwẽꞌõ zaꞌra õ wa, dawasété na idasisãmri zaꞌra zéb zarina. Ãne ma tô tinha:
21 — ꞌRi nhoꞌu Corazĩ ãma ꞌre iꞌaiꞌubumroi waꞌaba mono norĩ, aima ꞌre ropipa uptabi zaꞌra waꞌaba mono di za! Duré ꞌri nhoꞌu Betisaida ãma ꞌre iꞌaiꞌubumroi waꞌaba mono norĩ, aima ꞌre ropipa uptabi zaꞌra waꞌaba mono di za. E marĩ wa. Marĩ dama iꞌmanharĩ waihuꞌuꞌõ aiꞌreb zaꞌra waꞌaba, te ꞌre iꞌabꞌmanharĩ mono hã, ꞌri waꞌõno Tiru ãma duré Sidõ ãma ꞌwaꞌâhã, tame ꞌre isiꞌubumroi mono hã te aré tiwasédé hã rẽme zaꞌra, duréi pese. Tawamhã tiwasété wi isipizari zaꞌra na sihâiꞌré zaꞌra da hã, te aré siꞌuza zaꞌra, daꞌuza ihâpa ihâihâ zaꞌõtõ na. Duré ꞌruꞌa hã te aré tiꞌrã nhisiwi sima ahiri zaꞌra!
22 Tô sena wa za aima waihuꞌu zaꞌra waꞌwa, ãne: ꞌRe ihâimana uꞌâsi mono, Daꞌãma Rowairébézé ihâimana ãma hã Tiru duré Sidõ ãma ꞌre idahâimana zaꞌra mono norĩ ãma, te za tipẽꞌẽzé, Corazĩ ãma duré Betisaida ꞌre, iꞌaiꞌubumroi waꞌaba mono norĩ nhipai u.
23 Tawamhã duré a hã, ꞌri waꞌõno Cafarnau. E te asina irosaꞌra, hâiwa u za iꞌaiwisi na hã. Aiwisi õ di za. ꞌRe ihâimana uꞌâsi mono hã te za aime, adâ ꞌre ihâimana zaꞌra mono zé, Hades na rowamri u. E marĩ wa. Marĩ dama iꞌmanharĩ waihuꞌuꞌõ tame te ꞌre iꞌabꞌmanharĩ mono hã, Sodoma ãma hâimana ꞌwaꞌâhã, ta hã ꞌri nhoꞌu te aré ãne zahadu ꞌre hâimana.
24 Tô sena wa za aima waihuꞌu zaꞌra waꞌwa, ãne: ꞌRe ihâimana uꞌâsi mono hã Daꞌãma Rowairébézé ihâimana ãma hã Sodoma ãma ꞌre idasiꞌubumroi mono norĩ ãma te za tipẽꞌẽzé, ꞌri waꞌõno Cafarnau ãma ꞌre iꞌaiꞌubumroi waꞌaba mono norĩ nhipai u.
25 Tawamhã tame hâimana ré, Zezusi hã ma tô ãne tinha, Timama ma:
— Ĩmama, Uburé Danhibꞌapito, hâiwa ãma duré tiꞌai ãma zama, wa aiꞌãma ĩwata, aiꞌuté ne dama wapu na ꞌre ihâimana zaꞌra mono norĩ ma, ꞌre ahâiꞌré mono wa, rowaihuꞌu pese ꞌwa norĩ ma, marĩ ꞌre iꞌahâiꞌré mono õ hã.
26 Tane tô, Ĩmama. Ãma aima ꞌre rowẽ uptabi mono di, ãne hã ꞌre iꞌabꞌmanharĩ mono zém na hã.
27 — Ĩmama hã uburé marĩ hã ma tô ĩma sõmri zaꞌra. Niꞌwa hã te te waihuꞌu õ di, Iꞌra hã. Imama si te te waihuꞌu pese di. Duré niꞌwa hã te te waihuꞌu õ di, Imama hã. Iꞌra si te te waihuꞌu pese di. Duré Iꞌra hã niꞌwam norĩ te te sima ꞌre iꞌawẽ mono zéb uwaibaba, te te tãma ꞌre iꞌahâiꞌré mono norĩ ma si, waihuꞌu pese di, Imama hã.
28 — We ĩtẽme aiꞌabaꞌréi waꞌaba, asadâꞌâ na iꞌaihâimana zaꞌra waꞌwa hã, marĩ pire na, da te ꞌre iꞌwasari mono ne, iꞌwasari ꞌwa hã. Tawamhã wa hã wa za aima sõmri zaꞌra waꞌwa, iꞌaiwaꞌutu zaꞌra waꞌaba zé hã.
29 Ĩzazeiꞌwa ꞌre anomro aba mono. Duré ĩꞌãma waihuꞌu zaꞌra waꞌaba. E marĩ wa. Wa hã ĩpẽꞌẽ na ĩnhimizawi pese di. Duré dama ĩpire na ꞌre ĩsiꞌmadâꞌâ zei mono õ wa. Tahawa, ĩꞌãma si te za isõpẽtẽ zaꞌra waꞌwa, iꞌaiwaꞌutu zaꞌra waꞌaba zé hã, aipẽꞌẽ na.
30 Marĩ iwapu, da te ꞌre iꞌwasari mono ne, ĩzazeiꞌwa na ꞌre iꞌanomro aba mono zé hã, wapu di.
Ĩwaꞌõtõ piꞌreba watsuꞌu mono
^ 11:3 we iwisi da hã Ta hã ꞌRe ihâimana uꞌâsi mono te te ipisudu, Danhoꞌreptuiꞌwa da.
