Waihuꞌu wamhã niꞌwa nhimiꞌmanharĩdzé hã duré e niha te ꞌre höimana ropire tsô watobro wamhã, te dza ĩwaihuꞌu wẽ ĩhöimanadzé hã. Ãne duré, waihuꞌu wamhã Ropotoꞌwa oto te te ĩꞌmanharĩdzé, te dza ĩwaihuꞌu wẽ. Ropotoꞌwa ma tô abꞌmanha marĩ ahö na te te wapawaptob da ã bötö na duré wama rowẽ dzaꞌra da aptoꞌoré. Te dza atobꞌudzu taha na waihuꞌu wamhã.

Jeová Ropoto mono ꞌwa. ‘Tiwaihuꞌu petse na te te roꞌapoto mono wa, ta hawim haré te ĩtsimiwaihuꞌu petse dzém na, da te ãma ꞌre waihuꞌu petse dzaꞌra, ĩhöiba hã da te ꞌre waihuꞌu dzaꞌra mono õ nherẽ.’ (Romanos 1:20) Ropotoꞌwai mreme te tinha ‘tinhimirowaihuꞌu wẽ na tiꞌa hã te te ĩpoto na duré tiwaihuꞌu petse dzarina höiwa te te ĩpitsutu na ĩwa ꞌre ĩtsaꞌwari mono da hã’. (Provérbios 3:19) Ropotoꞌwa nhimiropoto wẽ te höiꞌré ĩhöimanadzé hã duré wahöiba mono bö te te waꞌãma ĩrotsaꞌrata na.

Ãma ĩtsimiré, Jeová ma ꞌmanha wahöimanadzé pire na ‘titsine’ te te wapoto dzaꞌra wamhã. (Gênesis 1:27) E marĩ tahã te watsuꞌu. Jeová ma wapoto dzaꞌra rowaihuꞌu ré ĩhöimanadzé ĩwẽ uptabi na wa te tsidzutsi dzaꞌra da duré wa te tsadaihuꞌu dzaꞌra da ĩtsimirotsaꞌrada ĩwẽ ãma duré ĩwatsété ãma. Ropotoꞌwa nhimiroti dzarina ꞌre wahöimana dzaꞌra mono wamhã, wahöimanadzé taréi õ di duré wama robdze ti. Duré, Ropotoꞌwa ma wapoto dzaꞌra rowaihuꞌu ré ãma watsiwaihuꞌu dzaꞌra da.

Wa te ꞌmadöꞌö dzaꞌra wamhã Tiꞌa duré uburé ĩwa ꞌre ĩhöimana mono hã, wa tsadaihuꞌu dzaꞌra ni Ropotoꞌwa nhimirotsaꞌrada waꞌãma hã. Apóstolo Paulo te tinha Ropotoꞌwa ‘ꞌre ĩtsiwaihuꞌu uꞌötsi mono na, marĩ ĩwẽ te te ꞌre ĩꞌabꞌmanharĩ mono dzém na hã. Õ hã tãi ma, te te ꞌre robꞌru höiwa hawimhã, duré amnho hã ꞌre ĩꞌrãi ꞌré dzaꞌra mono da hã bödö ĩꞌuwaibaba na. Õ hã te datsa hã te te wama ꞌre tsõmri dzaꞌra. Te duré wapẽꞌẽ ꞌre, rowẽ ĩtsaꞌẽne hã te te wama ꞌre tsõmri dzaꞌra.’ (Atos 14:17) Ropotoꞌwa te te wama ꞌre anhomri wawi tsô ĩrowaptöꞌö nhipai u wahöimanadzéb da hã. Ma tô apoto marĩ ahö na tsipuꞌu petse na wama robdzedzéb da hã. Uburé tahã dzahadu tsuru di tô tsena hã te te wama tsima ĩwẽdzé ma hã.

Jeová ma poto Tiꞌa ĩwa ꞌre dahöimana uꞌötsi dzaꞌra mono da, õne uꞌö. Ropotoꞌwai mreme te tinha: ‘Aibö mitsi nherẽ, taha höiba hawimhã ma tô uburé dapoto mono bö daꞌapoto, tiꞌai ãma ꞌre dahöimana dzaꞌra mono da hã. Te te daꞌapoto õ ré hã, ꞌRe ĩhöimana uꞌötsi mono hã ma tô ro hã apitsutu tsiro, dapoto mono bö ĩwa ꞌre ĩdahöimana dzaꞌra mono dzéb da hã, duré niha wahum na ĩwa ꞌre ĩdahöimana dzaꞌra mono dzéb da hã.’ (Atos 17:26) E ꞌwam norĩ hã Tiꞌai ãma te dza ꞌre höimana dzaꞌra duré e niha bötö na. Ropotoꞌwai mreme te tsadaꞌö: ‘ꞌRe ĩhöimana uꞌötsi mono te te tsima ꞌre ĩwẽ mono dzé te te ꞌre ĩꞌmanharĩ dzaꞌra mono norĩ hã. Ta norĩ hã te dza õne uꞌötsi ꞌre höimana dzaꞌra.’ — 1 João 2:17.

 Te te tsima ĩwẽdzéb dzarina Tiꞌai ãma duré daꞌãma hã, Jeová ma poto aibö ĩmorĩꞌrada duré piꞌõ ĩmorĩꞌrada, Adão duré Eva, duré ma tsimidzutsi ‘te te ꞌre ꞌmadöꞌö dzahuré mono da duré te te ĩwa ꞌre robꞌre dzahuré mono da oto.’ (Gênesis 2:8, 15) Romhuri ĩmorĩꞌrata uptabi Ropotoꞌwa ma tãma pitsutu dzahuré: ‘Te dza atébré aba mo, atsina aihöꞌö aba da hã. Uburé te dza duré tiꞌa hã atsina ĩtsito waꞌwa, atsiptete na atsiwi ꞌre ꞌmadöꞌö aba mono da hã.’ (Gênesis 1:28) Marĩ ĩwẽ uptabi tsada hã aré Adão duré Eva ma: dahöimana ĩtsiꞌutõrĩꞌõ robdze na tsi Tiꞌai ꞌre. Tadzahã, Ropotoꞌwa ma tô tsadawa rẽme dzahuré. Taha wa, tsadai õ di oto Tiꞌai ꞌre ‘õne uꞌötsi ꞌre ĩhöimana dzaꞌra mono norĩ me’ ꞌre nomro mono da. Adão duré Eva watsété dzahuré nherẽ, Jeová te te tsima ĩwẽdzé hã daꞌãma hã Tiꞌai ãma te te rẽmẽ õ di. Taha na dzahadu wa dza waihuꞌu dzaꞌra ni duré. Aꞌö wa dza ꞌmadöꞌö dzaꞌra ni marĩ ĩhöiba amo Ropotoꞌwa te te wama ĩꞌmanharĩ dzaꞌra.

Bíblia duré dama waihuꞌu petse di Ropotoꞌwai mreme na. E marĩ da Jeová Bíblia hã ma wama tsõmri dzaꞌra. Ĩmorĩꞌrata na, wa te ãma waihuꞌu dzaꞌra da. (Provérbios 2:1-5) Tô tsena, Bíblia te te tsadaꞌöbö õ di uburé wanhimidzadanharĩ Ropotoꞌwai ãma. Tsadai õ di nimahã ĩhöiwarobo ãne te te ꞌmanharĩ da. (Eclesiastes 3:11 TNM) Tane nherẽ, uburé Bíblia te te ĩnharĩdzé hã te te wama waihuꞌu dzaꞌra Jeová ãma. Bíblia na wa tsõré dzaꞌra ni e niha Ropotoꞌwa te dama ꞌre höimana duré e ꞌwam norĩ te te tãma ĩrowẽ duré te te tãma ĩrowẽꞌõ. (Salmo 15:1-5 TNM) Ropotoꞌwai mreme te duré wama rowahutu dzaꞌra ĩtsimirotsaꞌrada ãma dawatadzéb ãma, ĩwẽ ãma duré ĩwatsété ãma, robꞌuipradzéb ãma duré danhibro petse ãma. Taha nhipai u, te duré wama waihuꞌu dzaꞌra Jesus, Ropotoꞌwai ꞌra te te ĩnharĩdzé duré te te ĩꞌmanharĩdzé. Ĩhawi, tsada hã tsõꞌawi Jeová höimanadzé wa te waihuꞌu dzaꞌra da. — João 14:9.

Jeová ma tô duré wama tsõmri dzaꞌra Bíblia wama ꞌre robdze dzaꞌra mono da duré taré ꞌre wahöimana dzaꞌra mono tõ da. Bíblia na, Jeová te tinha wa te ĩꞌmanharĩ dzaꞌra dzéb da hã watsitsãnawã norĩ me rowẽ na wahöimana dzaꞌra da, wanhimarĩ na tsi watsima robdze dzaꞌra da duré rowẽ na wahöimana dzaꞌra da marĩ na wahötöꞌö dzaꞌra nherẽ. Te dza duré ĩꞌmadö ãhã ꞌremhã Bíblia te te ĩtsadaꞌöbö na hã dadzadanharĩ danhipai u ĩpire norĩ dahöimanadzém na hã, ãma ĩtsimiré: E marĩ wa robdzépada tsaꞌẽtẽ di. E marĩ te dza watobro aptoꞌoré. Te duré ãma rowatsuꞌu Ropotoꞌwa oto te te ĩꞌmanharĩdzé hã te te tsima ĩwẽdzé daꞌãma hã Tiꞌai ãma tô watobro da.

Marĩ ahö na te höiꞌré Bíblia ĩhöiwarobo aimawi na. Tahã ma tsihötö ni 1600 wahub ré hã. Nimahã 40 aibö ma tô tsihötö dzaꞌra. Tane nherẽ, tô marĩ na te rowatsuꞌu. Tahã te höiꞌré Ropotoꞌwa hã tô Bíblia ꞌManharĩꞌwa ĩꞌuptabi na. (2 Timóteo 3:16) Ĩhöiwarobo ĩꞌrada ĩꞌahö norĩ watsuꞌu ma tô wamnarĩ ni bödö ãma ĩmorĩ na. Tadzahã, Bíbia nhihödö ĩꞌrata norĩ ahö na da te ĩtsõpẽne hã te höiꞌré Bíblia watsuꞌu da te ĩwamnarĩ õ na hã. Duré, ĩꞌahö norĩ ma tô ꞌwapé dzaꞌra Bíblia da te tsaprĩ tõ da damreme u, da te ãma ropé tõ da duré da te tsõré tõ da. Tane nherẽ, Bíblia da te datsiwi uprotsi õ di duré tsaꞌẽtẽ na te da te ãma ꞌre tsaprĩ dzaꞌra duré te da te ãma ropé dzaꞌra tsiwaꞌru ĩhöiwarobo nhipai u ã hã bötö na hã. Tahã te höiꞌré ‘ꞌRe ĩhöimana uꞌötsi mono mreme dza ꞌre ĩhöimana uꞌötsi mono na.’ — Isaías 40:8 TNM.

Ropotoꞌwa ma tô duré marĩ ĩpire uptabi ꞌmanha te te tsima ĩwẽdzé hã tô ĩꞌuwaimramidzéb da. Wa te ĩꞌmadöꞌödzéb dzarina, Ropotoꞌwa te tsima wẽ Tiꞌai ãma õne uꞌö ꞌre dahöimana dzaꞌra mono da hã. Tadzahã, Adão tsada watsété wa, tinhihudu norĩ me ĩpoto dzaꞌra da hã ma tsimini dzaꞌra dahöimanadzé ĩtsiꞌutõrĩꞌõ. Ropotoꞌwai mreme te tinha: ‘Dawatsédé ma tô tidzébré naꞌrata, Adão ĩwatsétédzém hawi. Ta hawimhã ma tô duré dawatsédé hã te te ropé, uburé dapoto mono bö. Ta hawim haré, te aihĩni petse oto ꞌre dadöꞌö dzaꞌra, dawatsété na ꞌre danomro mono wa.’ (Romanos 5:12) Adão te te wapari õ wa te aré tiwi roꞌwaꞌrutu Jeová wi te te tsima ĩwẽdzé hã te te uwaimrami da. E niha Jeová ma tô ꞌre höimana ãne wamhã.

Jeová ma tô ꞌre höimana tihöimanadzé ĩwẽ dzarina. Tihöimanadzé ĩbö dzarina, ma tô rowairébé Adão duré Eva ãma te te ĩꞌupa dzahuré dzém na. Jeová ma tô duré tsimidzawi na ꞌre höimana te te pawaptob da aihĩni Adão duré Eva dzaꞌu ĩpoto dzaꞌra da hã. Duré tinhimidzaꞌretse na, ma tô tsina pitsutu te te ĩꞌmanharĩdzéb da õhõ romhöimanadzéb ꞌremhã  duré te oto watsuꞌu e niha te dza hiri wẽ. (Gênesis 3:15) Ma tô tsima pitsutu te te daꞌadzani da dawatsété wi duré dadöꞌö wi Tiꞌra uꞌöbö, Jesus Cristo uꞌöbö. E niha bété.

Te te dadzani da robdzépata wi Adão watsété uꞌöbö, Jeová ma we tsatõ Jesus Tiꞌai u. Ãme, Jesus te te dama ꞌre rowahutu da te ĩꞌmanharĩdzéb da hã ꞌre dahöimana uꞌötsi dzaꞌra mono da duré tihöiba hã ma titsõ ‘daꞌahö uptabi na te te daꞌanhoꞌreptu da.’  a (Mateus 20:28; João 14:6) Jesus te te waꞌawaꞌöbö waihuꞌu petse di höimana upai õ wa, Adão ne. Tadzahã, Adão waꞌrãmimhã, Jesus poꞌre petse na ma tô ꞌre höimana tidöꞌödzéb u hã. Watsété õ wa, Jesus döꞌö tõ da aré. Taha wa, Jeová ma tô apö höiwaꞌutu höiwa ãma ꞌre höimana mono da. Ãne na hã, Jesus te te dama tsõmri waihuꞌu petse di marĩ Adão te te dama ĩtsõmri waihuꞌu õ: danhimiparidzé dahöimanadzé ĩtsiꞌutõrĩꞌõ dzô. Bíblia te tinha: ‘Aibö hã mitsi nherẽ, ꞌRe ĩhöimana uꞌötsi mono te te ĩwapari õ hawimhã, ma tô oto uburé dawatsété na tsi ꞌre dahöimana dzaꞌra. Tane duré, aibö hã mitsi nherẽ, ꞌRe ĩhöimana uꞌötsi mono te te ĩwapari petse dzém hawi te dza oto ꞌRe ĩhöimana uꞌötsi mono hã te te ꞌre daꞌawẽtsãmri, Jesus Cristo te te ĩwapari petse dzém hawimhã.’ (Romanos 5:19) Jesus te te wawaꞌöbö dzaꞌra wa, Ropotoꞌwa te te tsima ĩwẽdzé hã te dza ãma uwaimra Tiꞌai ãma õne uꞌö ꞌre dahöimana dzaꞌra mono da.

Wa awaihuꞌu petse dzaꞌra ni Jeová ãma te te ĩꞌmanharĩdzém na hã ropire Adão watsété uꞌöbö te te uprotsi da. Marĩ te te tiwi rowaꞌré waihuꞌu õ di tinhimirotsaꞌrada te te ãma uwaimrami da. Ĩmreme hã te dza tô ãma uwaimra. (Isaías 55:11 TNM) Wa tô duré waihuꞌu dzaꞌra ni Jeová ma ĩwadzawi petse uptabi na. Bíblia te tinha: ‘ꞌRe ĩhöimana uꞌötsi mono ma tô tinhimidzawidzé hã wama höiꞌré dzaꞌra, ãhã na: Tiꞌra hã mitsi nherẽ, ma tô we tsatõ tiꞌai u dadzada, dahöimanadzé ĩtsiꞌutõrĩꞌõ hã wa te ãma ꞌre tsõpẽtẽ dzaꞌra mono da. Tô tsena danhimidzawi hã, ã hã: ꞌRe ĩhöimana uꞌötsi mono hã, wa te ꞌre ĩtsawi dzaꞌra mono nai õ di. Tadzahã, Õ hã ma tô te te ꞌre waꞌadzawi petse. Taha wa, Tiꞌra hã ma tô we tsatõ, te te wadzada robdzépata dzaꞌẽtẽ dzaꞌra da, taha dzarina wawatsédé hã te te waꞌãma ꞌre abꞌmadöꞌö mono tõ da.’ — 1 João 4:9, 10.

Ropotoꞌwa ‘tiꞌra te te wawi tsawi dzaꞌra õ di, wadzada döꞌö dzaꞌra tõ da. Waꞌudöna ma tô wama tsõmri dzaꞌra tô, te te wawi tsawi dzaꞌra ãna.’ Tawamhã, wa dza umnhatsi dzaꞌra ni ‘marĩ ĩwẽ hã dza te te wama ꞌre ĩꞌanhomri mono na hã’. (Romanos 8:32) E marĩ na Ropotoꞌwa te wama ropitsutu dzaꞌra. Ãma udzutsi ĩtsõré na.