Ĩwaꞌõtõ wana ꞌremhã, ma tô ĩꞌmadö Jesus te te ĩrowatsuꞌu tsirõmo dzé hã. Tahã te wama höiꞌré dzaꞌra Jesus Rotiꞌwa na Ropotoꞌwa nhimirobꞌrudzéb ꞌremhã ãma ĩtsãnaꞌrata na höiwa ãma te te roti da.

Ropotoꞌwai mreme dzarina, Jesus tsirotiꞌwai wamhã, õ hã ma tô wadze Satanás duré waꞌuburé norĩ höiwa hawi Tiꞌai u. Ãhãna hã, õ norĩ hã Tiꞌai ãma tsi te ꞌre höimana dzaꞌra. Taha wa, 1914 wahub hawimhã, daꞌãma romhöimanadzé hã ma tô tiwatsété petse. — Apocalipse 12:7, 9.

Tiꞌai ãma daꞌãma romhöimanadzé watsété nherẽ, Jesus, Rotiꞌwa na Ropotoꞌwa nhimirobꞌrudzéb ꞌremhã, te oto daꞌapawapto Tiꞌai mono bö. Jesus ma tô watsuꞌu tsiro dama rowahudu hã Ropotoꞌwai mreme na daro mono bö dza ĩhöimana na hã. Taha uꞌöbö, daꞌahö na te waihuꞌu dzaꞌra ni Ropotoꞌwai mreme nhimiroti hã duré te ꞌre dahöimana dzaꞌra ĩtsarina. (Isaías 2:2-4 TNM) Daꞌahö na ma tô oto waihuꞌu dzaꞌra ni damro daꞌra me rowẽ na dahöimana dzaꞌra da hã, duré romhuri ãma duré datsimarĩ norĩ ãma ĩbö dzarina da te rotsaꞌrata dzaꞌra da hã. Ta norĩ hã, da te waihuꞌu dzaꞌra parimhã, danhipai u rowẽ na te oto ꞌre dahöimana dzaꞌra. Ropotoꞌwa te dza pitsutu ãne ĩdahöimana dzaꞌra norĩ hã Tiꞌai ãma ꞌre dahöimana dzaꞌra mono da aptoꞌoré.

Jesus höiwa ãma oto te te ꞌre roti mono nherẽ, dzahadu danhimirobꞌrudzé Tiꞌai ãma wahuré te tiromhöiba. Tadzahã, Ropotoꞌwa ma tô tinha Jesusihi ma ãne: ‘Te dza atsitobꞌru norĩ nhipai u atsiptete na ꞌre aihöimana mo.’ (Salmo 110:2) Romhutu na Jesus te dza uprotsi uburé tinhitobꞌru norĩ. Ãne wamhã, uburé ropire norĩ Ropotoꞌwa wapariꞌwa norĩ dzô ĩwairébé hã te dza aiꞌutõrĩ dzaꞌra.

Tahã watobro wamhã, e marĩ Ropotoꞌwa nhimirobꞌrudzé te dza ãma uwaimra.

• Te dza uprotsi danhimidzadzedzé ĩꞌuptabiꞌõ. Te dza uprotsi uburé danhimidzadzedzém norĩ te te dama ĩrowahutu dzaꞌra hã dadzadawa nhipe Ropotoꞌwai ãma duré te te dawi ĩroꞌwaꞌré dzaꞌra hã. Ĩwatsété uꞌöbö, Ropotoꞌwai mreme te watsuꞌu danhimidzadzedzé ĩꞌuptabiꞌõ hã piꞌõ ĩwaꞌöbö dzô ꞌre ĩtsitsõmri mono ne. Te dza uprotsi da te rotsaꞌretse dzaꞌra ãna. — Apocalipse 17:15, 16.

• Te dza uprotsi danhimirobꞌrudzé. Ropotoꞌwa nhimirobꞌrudzé te dza uprotsi uburé danhimirobꞌrudzém norĩ. — Apocalipse 19:15, 17, 18.

• Te dza uprotsi ĩwatsété norĩ. Daꞌahö na te datsima pitsutu dzaꞌra ni ĩwatsédé da te ꞌmanharĩ dzaꞌra da duré te wẽꞌõ dzaꞌra ni Ropotoꞌwa nhimiroti. E marĩ te dza watobro ta norĩ dzô. ‘Tiwatsédé te te ꞌre ĩꞌmanharĩ dzaꞌra mono norĩ hã te dza te te ꞌre adzani, robꞌre hã tiꞌai hawi, da te ꞌre ĩtsaꞌoꞌo dzaꞌra mono ne.’ — Provérbios 2:22.

• Te dza uprotsi Satanás duré waꞌuburé norĩ. Satanás duré waꞌuburé norĩ ‘tsadawa nhipetse na te te ꞌre daꞌaꞌrãmi mono õ di dza oto’. — Apocalipse 20:3, 10.

E marĩ ĩwẽ norĩ te dza wairé Ropotoꞌwa nhimirobꞌrudzé nhimiroti dzarina ꞌre ĩdahöimana dzaꞌra mono norĩ dzô.

Rotiꞌwa na Jesus te dza dama abꞌmanha Tiꞌai ãma tsiwaꞌru rotiꞌwa nhipai u. Ma tô pitsutu ni 144 mil aibö duré piꞌõ norĩ höiwa u tsiꞌabaꞌré da Jesus tsiré te te ꞌre roti dzaꞌra mono da. (Apocalipse 5:9, 10; 14:1, 3) Jesus te dza romhu Ropotoꞌwa te te tsima ĩwẽdzé hã Tiꞌai wahuré na te te ãma uwaimrami da. ꞌMadöꞌö e marĩ Ropotoꞌwa nhimirobꞌrudzé te dza ꞌmanha:

• Te dza uprotsi dahödzé duré dadö. “Niꞌwa te te nharĩ õ di dza: ‘Ĩ̱hödzé di’”, ‘duré oto ꞌre dadöꞌö dzaꞌra mono õ di dza.’ — Isaías 33:24 TNM; Apocalipse 21:4.

• Te dza ãwitsi rowẽ ĩꞌuptabi duré dahöimanadzé ropipa ãna Tiꞌai u. “Rowẽ dzaꞌẽtẽ na aiꞌra norĩ te dza ꞌre höimana dzaꞌra”, duré “õ norĩ hã te dza aiꞌubumro tite uwaꞌru ꞌrowimhã duré tite figueira wede ꞌrowimhã, dama pahi dzaꞌra ãna”. — Isaías 54:13 TNM; Miqueias 4:4 TNM.

• Te dza dama titsõ romhuri da te datsima rowẽ da. “Ĩ̱nhimipitsutu norĩ tinhibꞌrata nhimiromhuri na te dza tsima rowẽ uptabi dzaꞌra. Taré tsaꞌẽtẽ na te te romhuri dzaꞌra õ di dza.” — Isaías 65:22, 23 TNM.

• Te dza uprotsi rowamnarĩ mono dzé hã Tiꞌa dzô ĩwairébé mono hã. “Ro ꞌre ĩroptsaꞌwari mono duré rob ꞌré te dza tiwi tirobdzei petse dzahuré, ro tsaꞌa waꞌwa te dza tirowẽ duré te dza tiꞌwanhipré ĩtsirãrã norĩ açafrão ne.” — Isaías 35:1 TNM.

• Te dza dama rowahutu da te ĩꞌmanharĩ dzaꞌra dzéb da na, ꞌre dahöimana uꞌötsi dzaꞌra mono da. ‘Ã hã dahöimanadzé ĩtsiꞌutõrĩꞌõ: Da te aiwaihuꞌu dzaꞌra da, aiwététsi tsena na ꞌRe ĩhöimana uꞌötsi mono na, duré Jesus Cristo, da te waihuꞌu dzaꞌra da, tiꞌai u we ĩtsatõrĩ hã.’ — João 17:3.

Ta norĩ na hã, Ropotoꞌwa te tsima wẽ petse aima tsõprub da. (Isaías 48:18) Ĩwaꞌõno ĩhöiba amo te dza aima höiꞌré ĩꞌmanharĩdzéb da oto, ãhã ropitsutu norĩ ĩwẽ aptoꞌoré hã atsina uwaimrami da.