IZenzo Zabapostile 23:1-35
23 UPawulos wayijonga ntsho iNkundla Ephakamileyo YamaYuda waza wathi: “Madoda, bantakwethu, izinto ndizenze ngesazela esikhululekileyo phambi koThixo+ kwada kwanamhlanje.”
2 Ngoko umbingeleli omkhulu uAnaniyas wayalela abo babemi ngakuye ukuba bambethe emlonyeni.
3 UPawulos wathi kuye: “UThixo uza kukubetha menemenendini.* Ngaba uhlalele ukundigweba ngoMthetho, ube kwawena uwophula ngokuthi mandibethwe?”
4 Abo babemi ngakuPawulos bathi: “Ngaba uthuka umbingeleli omkhulu kaThixo?”
5 UPawulos wathi: “Bantakwethu, bendingazi ukuba lo ngumbingeleli omkhulu. Kuba kubhaliwe kwathiwa, ‘Uze ungathethi kakubi ngomlawuli wabantu bakowenu.’”+
6 Xa uPawulos wabonayo ukuba abanye abantu abakwiNkundla Ephakamileyo YamaYuda* ngabaSadusi, abanye ngabaFarisi, wathi: “Madoda, bantakwethu, ndingumFarisi,+ unyana wabaFarisi. Ndigwetywa kuba ndikholelwa ukuba abafileyo baza kuvuswa.”
7 Akuba ethethe loo nto, abaFarisi nabaSadusi baxabana, yaqhekeka phakathi iNkundla.
8 Kaloku abaSadusi bathi akukho luvuko, akukho ngelosi ibe akukho moya, kodwa bona abaFarisi bayazikholelwa* zonke ezo zinto.+
9 Ngoko kwabakho isiphithiphithi yaye abanye ababhali ababekwiqela labaFarisi baphikisa benomsindo besithi: “Asifumani tyala kule ndoda, kodwa ukuba kukho umoya okanye ingelosi ethethe naye+—.”
10 Yakhula ingxabano, yaye umphathi-mkhosi woyika ukuba baza kumbulala uPawulos waza wathuma amajoni ukuba ayokumthatha apho, amse kwindawo ehlala amajoni.
11 Ngobusuku obulandelayo iNkosi yema ngakuye, yathi: “Yiba nesibindi!+ Kuba njengokuba uye washumayela ngokucokisekileyo ngam eYerusalem, kusafuneka ushumayele naseRoma.”+
12 Kwathi kwakusa amaYuda aceba iqhinga aza enza isifungo* sokuba awazukutya yaye awazukusela de abe ambulele uPawulos.
13 Ngamadoda angaphezu kwe-40 awaceba eli qhinga aza afunga.
14 La madoda aya kubabingeleli abaziintloko nakubadala, athi: “Sizibophelele ngesifungo* sokuba asizukutya kwanto de sibe simbulele uPawulos.
15 Ngoko nina kunye neNkundla Ephakamileyo YamaYuda nimele nithi kumphathi-mkhosi makamzise kuni ngokungathi kusekho izinto enisafuna ukuzixoxa ngetyala lakhe. Kodwa uza kuthi engekafiki kuni sibe sesilungele ukumbulala.”
16 Umtshana kaPawulos waliva elo qhinga waza waya kwindawo ehlala amajoni, wachazela uPawulos.
17 Emva koko uPawulos wabiza elinye lamagosa omkhosi, wathi: “Khawuse lo mfana kumphathi-mkhosi, kuba kukho into afuna ukumxelela yona.”
18 Ngoko lamsa kumphathi-mkhosi laza lathi: “Ela banjwa linguPawulos lindibizile laza lathi mandizise lo mfana kuwe, kuba kukho into afuna ukukuxelela yona.”
19 Umphathi-mkhosi wamthi chu ngesandla, wamtsalela ecaleni, wathi kuye: “Yintoni le ufuna ukundixelela yona?”
20 Wathi: “AmaYuda avumelene ukuba aza kukucela ukuba uzise uPawulos kwiNkundla Ephakamileyo YamaYuda ngomso, ngokungathi kusekho izinto asafuna ukuzixoxa ngetyala lakhe.+
21 Kodwa sukuwamamela kuba kukho amadoda angaphezu kwe-40 amlaleleyo yaye enze isifungo* sokuba awazukutya ibe awazukusela de abe ambulele;+ ngoku alinde nje ukuba uvume.”
22 Ngoko umphathi-mkhosi wathi angahamba lo mfana, emva kokuba emyalele wathi: “Uze ungaxeleli mntu ukuba undichazele le nto.”
23 Wabiza amagosa omkhosi amabini, wathi: “Qokelelani amajoni ayi-200 aza kuya eKesareya, kunye nabakhweli-mahashe abayi-70 namajoni aphatha umkhonto ayi-200, malunga nentsimbi yesithoba ebusuku.*
24 Nize niphathele uPawulos amahashe ukuze afike ekhuselekile kuFeliks umlawuli.”
25 Yaye wabhala ileta ethi:
26 “UKlawudiyo Lisiya ubhalela uMlawuli uFeliks Ohloniphekileyo: Ndiyabulisa!
27 Le ndoda iye yabanjwa ngamaYuda eza kuyibulala, kodwa ndiye ndakhawuleza ndeza namajoni am ukuze ndiyisindise,+ kuba ndifumanise ukuba ingumRoma.+
28 Ekubeni bendifuna ukwazi ukuba yintoni le bayimangalela ngayo, ndiye ndayisa kwiNkundla Ephakamileyo YamaYuda.*+
29 Ndifumanise ukuba imangalelwa ngoMthetho+ wamaYuda, kodwa akukho nto imangalelwa ngayo eyenza ifanelwe kukufa okanye kukuphoswa ejele.
30 Kodwa ngenxa yokuba ndiye ndaxelelwa ukuba kukho abantu abaceba ukuyibulala,+ ndiyithumela kuwe yaye ndifuna aba bantu bayimangalelayo bazokuchaza izimangalo zabo kuwe.”
31 Njengoko ayeyalelwe la majoni, amthatha ebusuku uPawulos+ amsa eAntipatris.
32 Ngemini elandelayo amyeka wahamba nabakhweli-mahashe kodwa wona abuyela kwindawo ahlala kuyo.
33 Abakhweli-mahashe bafika eKesareya, banika umlawuli ileta baza badlulisela noPawulos kuye.
34 Umlawuli wayifunda loo leta waza wabuza ukuba uPawulos ngoweliphi iphondo, wafumanisa ukuba ngowaseKilikiya.+
35 Wathi: “Ndiza kulixoxa kakuhle ityala lakho xa kufike abo bakumangalelayo.”+ Emva koko wathi makagcinwe ngoonogada kwindlu elikomkhulu eyakhiwa nguHerode.
Umbhalo osemazantsi
^ Ngokoqobo, “ludongandini oluqatywe mhlophe.”
^ Ngokoqobo, “abakwiSanhedrin.”
^ Okanye “bayashumayela ngazo.”
^ Oku kuthetha ukuba ayekholelwa ukuba xa engayenzi loo nto ayifungileyo ayeza kwehlelwa yinto embi.
^ Okanye “ngesiqalekiso.”
^ Okanye “azibophelele ngesiqalekiso.”
^ Ngokoqobo, “ngeyure yesithathu ebusuku.”
^ Ngokoqobo, “kwiSanhedrin.”
