Ngubani Igama Lakhe? UThixo uthi: “NdinguYehova. Lilo elo igama lam.” (Isaya 42:8) Igama likaThixo livela phantse kubeyi-7 000 eBhayibhileni. Kodwa iiBhayibhile ezininzi ziye zalisusa igama lakhe zaza zabhala amagama ahlonitshwa ngawo, njengelithi “Nkosi”. UThixo ufuna ‘umbize ngegama lakhe’ ukuze ube ngumhlobo wakhe.​—INdumiso 105:1.

Amagama Abizwa Ngawo UThixo Xa Ehlonitshwa. Xa ehlonitshwa uYehova kuthiwa “Thixo,” “Somandla,” “Mdali,” “Bawo Osezulwini” okanye “Nkosi.” Abantu abaninzi  eBhayibhileni xa bethandaza baye badibanise igama likaThixo, uYehova kunye namagama ahlonitshwa ngawo.​—Daniyeli 9:4.

Ngaba UThixo Unenyama Negazi? UThixo ungumoya. (Yohane 4:24) Yiyo loo nto neBhayibhile isithi, “akukho mntu umbonileyo uThixo.” (Yohane 1:18) IBhayibhile ithi abantu bangamenza buhlungu okanye ‘bamvuyise uYehova.’​—IMizekeliso 11:20; INdumiso 78:40, 41.

Indlela UThixo Ayiyo. KuThixo akukho mntu ubhetele kunomnye, nokuba ukhule njani okanye ungowoluphi uhlanga. (IZenzo 10:34, 35) Uphinda abe nguThixo “onenceba nobabalo, ozeka kade umsindo, onobubele bothando obuninzi nenyaniso.” (Eksodus 34:6, 7) Nazi ezona zinto zithandekayo ngaye:

Unamandla. Uyakwazi ukuzenza zonk’ izinto azithembisayo kuba unamandla amakhulu, yiyo loo nto iBhayibhile isithi ‘nguThixo uSomandla.’​—Genesis 17:1.

Unobulumko. Akukho mntu umogqithayo uThixo ngokuba nobulumko. Ide ithi iBhayibhile unguThixo “osisilumko yedwa.”​—Roma 16:27.

Wenza izinto ezilungileyo. UThixo usoloko esenza izinto ezilungileyo. Kwizinto zonke azenzayo akakhe enze impazamo okanye into engalunganga.​—Duteronomi 32:4.

Unothando. IBhayibhile ithi “uThixo uluthando.” (1 Yohane 4:8) UThixo akanalo njee uthando kodwa ululo uthando. Yonke into ayenzayo uyenza kuba esithanda. Yiyo lo nto izinto azenzayo zisinceda kangaka.

UThixo Uyabathanda Abantu. UnguTata wethu osithandayo wasezulwini. (Mateyu 6:9) Xa sinokholo kuye siza kuba ngabahlobo bakhe. (INdumiso 25:14) UThixo ufuna ube ngumhlobo wakhe, uthethe naye uze ‘uliphose kuye lonke ixhala, kuba ukukhathalele.’ (1 Petros 5:7; Yakobi 4:8)

UYesu AkangoThixo. Akakho umntu ofana noYesu, kuba nguye yedwa owadalwa nguThixo nqo. Naxa ithetha ngaye iBhayibhile ithi nguNyana kaThixo. (Yohane 1:14) Emva kokuba uYehova edale unyana wakhe wokuqala, uYesu, zonke ezinye izinto zadalwa nguye ‘engumsebénzi onobuchule.’​—IMizekeliso 8:30, 31; Kolose 1:15, 16.

 UYesu Zange Athi UnguThixo. UYesu wathi: “Ndingummeli ovela kuye [uThixo], yaye Yena undithumile” (Yohane 7:29) Xa uYesu wayethetha ngoYehova komnye umfundi wakhe, wathi ‘nguBawo noYihlo noThixo wam noThixo wenu.’ (Yohane 20:17) Emva kokuba uYesu efile, uYehova wamvusela ezulwini waza wamnika igunya ngasekunene kwakhe.​—Mateyu 28:18; IZenzo 2:32, 33.

UYesu Angakunceda Usondele KuThixo

UYesu weza emhlabeni ukuze asifundise ngoTata wakhe. UYehova wathi ngoYesu “Lo nguNyana wam, oyintanda; mphulaphuleni yena.” (Marko 9:7) Akekho umntu owazi uThixo ngaphezu koYesu. Wathi: ‘Akukho nabani na omaziyo uBawo ngaphandle kukaNyana, nalowo uNyana athanda ukumtyhila kuye.’​—Luka 10:22.

UYesu ufana nqwa noThixo. UYesu umfuze ngayo yonke into uTata wakhe, yiloo nto wathi: “Lowo undibonileyo mna umbonile noBawo.” (Yohane 14:9) UYesu wayebenza abantu bamthande uTata wakhe onothando, ngezinto awazithethayo nawazenzayo. Wathi: “Ndim indlela nenyaniso nobomi. Akukho bani uzayo kuBawo ngaphandle kokuza ngam.” (Yohane 14:6) Waphinda wathi: “Abanquli bokwenyaniso baya kumnqula uBawo ngomoya nenyaniso, kuba, eneneni, uBawo ufuna abanjalo ukumnqula.” (Yohane 4:23) Uyambona uYehova ukuba ukhangela abantu abanjengawe, abafuna ukwazi inyani ngaye?