Nrummwa Paaulu ahimwaatikhela nxirikha-ye Timootheyo yoowo ari ntokweene airaka: “Kinnootumereryani oratteene, ohoolo wa Muluku ni wa Kristu Yesu ni wa malaikha oothanliwa, wira mutthareke malakiheryo ala muhaathanyaka nnakhala muhaathanlaka atthu.”—1 Tim. 5:21.

Wiira nipacere, nirowe nilotte voohima dha malaikha awo. Ekhweeli wiira awo kahi Makiristau oothaliwa 144.000. Okhala wiira okathi Paaulu amwaatikhenle iye Timootheyo, ohihimusiwa wa Makiristau oothanliwa wiira yaakhele ekumi wiirimu waira ohinapacere. Okathi ole, arummwa ni Makiristau makina oothanliwa yaaidhawo ehinakhale dhoopattusiwa dha omunepani. Ndho elo enoonihera wiira awo khiyaari “malaikha oothanliwa’’.—1 aKor. 15:50-54; 1 aTes. 4:13-17; 1 Yohani 3:2.

Ohiya-vo, “malaikha oothanliwa” anlottiwa kahi malaikha yanrukunuwenle Muluku okathi wa Mutaaseke. Malaikha awo yaanrunuwenle Muluku yaahintthara Satana ekhala malaikha ootakhala ni awanani a Yeesu. (Maph. 6:2; Luka 8:30, 31; 2 Ped. 2:4) Ndho nhoolo, malaikha awo ootakhala anootthukiwa ni oriheliwa nlittini nawiisa mwa iyaakha ekonto emodha aahiidho 1000. Noomala anoopwetesiwa vamodha ni Satana.—Yuda 6; Wiis. 20:1-3, 10.

Ndho “malaikha oothanliwa” Paaulu alontte iye eveersu ela ti yaawo anvara nteko ni ‘Muluku ni Kiriistu Yeesu’ wiirimu.

Aakhala malaikha imilyawu dhawaatta ororomeleya. (aHeb. 12:22, 23) Elo enoonihera wiira Yehova onnaavaha dhoothanleliwa dhoovirikana. (Wiis. 14:17, 18) Mwa ntakihero, nihiku nimodha Yehova aahiruma nlaikha nimodha wiira naapwetese anakhotto 185.000 a wAsiiriya. (2 Mam. 19:35) Woonawene malaikha makina ahaakhela yoothanleliwa ya ‘waakhumiha Moomweneni mwe [Yeesu], ootheene ale anaatthekiha akhwa, ni ale ampaka itthu dhootakhala.’ (Math. 13:39-41) Akina woonawene ahaakhela yoothanleliwa ya ‘waathukumanye atthu oothanliwa’ an’ya waakhela ekumi wiirimu. (Math. 24:31) Nitho akina avahiwa yoothanleliwa ya ‘onikhapelela khuta opuro ninrowa nhu.’—Esal. 91:11; Math. 18:10; nlikanyihe ni Matheyo 4:11; Luka 22:43.

“Malaikha oothanliwa” anromoliwa 1 Timootheyo 5:21, woonawene ti yaawo aathanliwe wiira yaakhapelele atthu a Muluku. Nitho yawaatikhiwa ela, nrummwa Paaulu oohavaha miruku asitokweene moopora akhanlawa awa okhapelela muloko ni moopora muloko onreerela awa waathokorerya awo mwa nttittimiho. Ndho asitokweene ahaana okhapelela miritti-dha ‘ehaathanyaka nnakhala waathanla atthu’ ni ahaana oxaka opaka dhoothanla ehuupuwenle. Nthowa nuulupale asitokweene anreerela awa otthara miruku ovanhe Paaulu, okhala wiira anvara “ohoolo wa Muluku ni wa Kristu Yesu ni wa malaikha oothanliwa.” Elo enoonihera wiira malaikha makina aathanliwa wiira ekhapelela miloko. Awo anipaka elo yaakhapelelaka arumeyi a Muluku, ohoolela nteko woolaleerya ni onleela Yehova itthu dhootheene anoona awa.—Math. 18:10; Wiis. 14:6.