Apinaatamu ootheene aakhalana madhina aya. Ndho nnoona wiira khiwaya okhala wookhalela Muluku ookhalana ndhina? Okhalana ni orumeela ndhina na ntthu etthu yuulupale ennaakhalihera apinaatamu waatana. Niire wookhala-vo ovirikana voohima dha waataana wihu ni Muluku?

 Mbiibiliyani, Muluku onlotta wiira: “Miyo ka Yehova. Nna ndhina aka.” (Yesaya 42:8) Hata owo arina maitthaneliwo awaatta nkhama “Muluku Owerya Dhootheene,” “Pwiya Muulupalesa,” ni “Mpattusa,” owo onnaatumererya atthu ootheene ale aninkokhorela wiira emwaattamele erumeelaka ndhina-ne.—Maphattuwelo 17:1; Miteko 4:24; 1 Pedru 4:19.

 Abiibiliya awaatta anniromola ndhina na Muluku va Okhuma 6:3. Etestu elo eni: “Miyo kahakhumelela Abrahamu, n’Isakhi ni Yakobe, kìsoniheryaka ntoko Muluku òwerya: masi nkavanhe osuwela nsina naka Apwiya [Yehova].”

 Yehova ndhina na Muluku, ovinya khalai ndhina nlo ninnirumeeliwa ni enkelexi. Hata asomi akinaku yaaputiki waatikha “Yahveh,” Yehova ndhina nookhweya ni nihireere odhuweliwa. Epaarti yoopacerya ya Biibiliya khiyaatikhiwe ni enkelexi masi yaatikhiwe ni eHeeberi elottelo ensommwa ovinya moono weelopwana eyaaka moono weethiyana. Elottelo elo, ndhina na Muluku nirina maleetera masese, יהוה. Maleetera awo masese a eHeeberi antaphulela YHWH ni anidhuweliwa nkhama eTetrakaraama.